26 Fepuari

E Faapefea ona Fesoasoani Aoaoga a le Faaola ia te Au e Faia ai Faamasinoga Amiotonu?

Mataio 6–7

Fefautuaai Faatasi

Taitaiina e se uso o le au peresitene o le korama po o le vasega; pe a ma le 10–20 minute

I le amataga o le fonotaga, toe fai faatasi le Autu a Tamaitai Talavou po o le Autu o Korama a le Perisitua Arona. Ona taitaia lea o se talanoaga e uiga i le galuega o le faaolataga ma le faaeaga e faaaoga ai se tasi po o le sili atu o fesili nei po o ni a oe lava fesili (tagai i le Tusitaulima Aoao, 10.2, 11.2). Fuafua ni auala e faatino ai mea tou te talanoaina.

• Ola i le talalelei. O a mataupu na talanoaina e le au epikopo i le tatou fonotaga a le aufono a le autalavou a le uarota? O a ni mea e mafai ona tatou faia o se vasega po o le korama e faavae i na talanoaga?

• Tausia o i latou e lē tagolima. E mafai faapefea ona tatou aapa atu i tagata i auala faaKeriso pe a tatou vaaia se manaoga ma ua tatou le iloa le tala e fai atu?

• Valaaulia tagata uma ia talia le talalelei. O a mea ua tatou maua i le talalelei a Iesu Keriso ua aumaia ia i tatou le olioli? E mafai faapefea ona tatou faasoa atu lena olioli i isi?

• Tuufaatasia o aiga mo le faavavau. O a mea o loo tatou faia e saili ai igoa o tatou tuaa o e o loo manaomia sauniga o le malumalu? O le a se mea e mafai ona tatou faia e fesoasoani ai i isi i le sailia o igoa o latou tuaa?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le vasega po o le korama e uiga i fuafuaga ma valaaulia na faia i le fonotaga.

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O loo i ai se uiga i totonu o i tatou taitoatasi—o se taunuuga o o tatou natura pau—o le faamasino o isi, o nisi taimi e le talafeagai pe faafia-amiotonu. Ae sa aoao mai le Faaola, “Aua ne’i faamasino atu i le amioletonu, ina ia lē faamasinoina ai outou; ae ia faamasino atu i le faamasinoga amiotonu” (Faaliliuga a Iosefa Samita, Mataio 7:1 [i totonu o le Mataio 7:1, vaefaamatalaga a]). Mafaufau loloto pe mafai faapefea e le mulimuli i lenei fautuaga ona faamanuiaina oe ma i latou e te aoaoina. Na faaalia e le Faaola e ala i faataitaiga le uiga o Lana fetalaiga e ala i le “faamasinoga amiotonu.” Mo se faataitaiga, mafaufau pe na faapefea ona Ia taulimaina le fafine sa mulilua. Na te lei ta‘usalaina o ia, ae Na te lei talia foi lana agasala. Sa Ia poloaiina le fafine e “alu ma aua ne’i toe agasala” (Ioane 8:11). O le a se mea ua e aoaoina e uiga i le faamasino atu ma le amiotonu mai le Faaola?

A o e mafaufau loloto pe faapefea ona e fesoasoani i le autalavou ia malamalama i le faamasinoga amiotonu, e mafai ona e suesueina le Mataio 7:1–2 ma le savali a Elder Lynn G. Robbins “O Le Faamasino Amiotonu” (Liahona, Nov. 2016, 96–98).

Aoao Faatasi

E mafai ona e amataina se talanoaga e uiga i le faamasino ma le amiotonu e ala i le fai atu i tagata o le vasega po o le korama e mafaufau i se taimi na latou lagona ai le faamasino sese e isi. Na faapeī ia lagona? O le a se mea ua tatou aoaoina e uiga i le faamasino atu mai aoaoga a le Faaola i le Mataio 7:1–5? (tagai i le Faaliliuga a Iosefa Samita i le vaefaamatalaga 1a). Mata o le a le uiga o le fasifuaitau “faamasinoga amiotonu”? E mafai ona outou talanoaina nei fuaiupu e ala i le valaaulia o tagata o le vasega po o le korama e toe faaupu fuaiupu taitasi i a latou lava upu. O gaoioiga e pei o nei e mafai foi ona fesoasoani ia i latou o loo e aoaoina e faamasino ma le amiotonu.

• O aoaoga a le Faaola i le Mataio 6–7 e mafai ona fesoasoani ia i tatou e “faamasino atu ai i le faamasinoga amiotonu.” Ina ia fesoasoani i tagata o le vasega po o le korama ia iloa nei aoaoga, e mafai ona e tuu atu ia i latou taitoatasi se tasi o fuaitau nei e mafaufau loloto i ai: Mataio 6:14–15; 7:3–5; 7:12; 7:15–20. O le a se mea o fautua mai e upu a le Faaola i nei fuaiupu e uiga i le faamasino ma le amiotonu? O le a se mea e mafai ona tatou aoao mai le faataitaiga a le Faaola i le Ioane 8:1–11 ma le Mataio 9:10–13? O a ni eseesega tatou te matauina i le va o le ala e faamasino ai i tatou e le Faaola ma le ala e masani ona tatou faamasinoina ai le tasi ma le isi?

• Ona e tofu i tatou uma ma le faitalia, e tatau ona tatou faia e le aunoa ni faamasinoga e uiga i mea o le a tatou faia ma o le a tatou le faia lava. Ae i le avea ai ma soo o le Faaola, tatou te taumafai e aua nei faamasino atu pe faitioina isi tagata. Ina ia fesoasoani i le autalavou ia malamalama i le eseesega, faasoa atu ia i latou le saunoaga a Peresitene Dallin H. Oaks i le “Punaoa Lagolago.” I le avea ai o se vasega po o se korama, galulue faatasi e mafaufau i faataitaiga o le faamasinoina o se tulaga—e pei o se gaoioiga, se mea e tupu, po o se talanoaga—nai lo le faamasinoina o se tagata o loo aofia ai. Aisea e sili ai le faamasino o se tulaga nai lo o se tagata? Atonu e i ai nisi fesili a le autalavou e uiga i le faamasinoina ma le amiotonu (tagai i faataitaiga i le “Punaoa Lagolago”). Talanoaina faatasi a latou fesili e faaaoga ai faamatalaga o loo i lalo o “Punaoa Lagolago” e sue ai tali. Valaaulia le autalavou ia faasoa mai mea na latou lagona le uunaia e fai ona o mea sa latou aoaoina.

• I lana savali o le konafesi aoao “Atiina Ae o Faamasinoga Lelei ae Le o le Faamasinoina o Isi” (Liahona, Me 2010, 103–5), na faamatala ai e Elder Gregory A. Schwitzer ni tala se lua—o le uo a Iesu o Mareta ma se alii na fesoasoani i ai Elder Schwitzer. O a mea o loo aoao mai e nei tala e uiga i le ala e tatau ona tatou vaai atu ai ma tausia isi? O a mataupu faavae e mafai ona fesoasoani ia i tatou ia avea atili e faapei o Keriso ma faamasino ma le amiotonu? O vitio “Looking through Windows” ma le “Judging Others? Stop It!” (ChurchofJesusChrist.org) e mafai ona tuuina mai ni malamalamaaga faaopoopo.

A o tatou aoao ia avea atili e faapei o Keriso, e mafai ona tatou faamasino ia sili atu le amiotonu.

Faatino i le Faatuatua

Ia uunai tagata o le vasega po o le korama e manatunatu ma tusi mea o le a latou faia e faatino ai lagona na latou maua i le asō. Afai latou te mananao ai, e mafai ona faasoa mai o latou manatu. Valaaulia i latou e mafaufau pe o le a faapefea ona faamalosia a latou sootaga ma le Tama Faalelagi ma Iesu Keriso e ala i le faatinoina o lagona na latou mauaina.

Punaoa Lagolago

• Faataitaiga o fesili e uiga i le faamasinoina o isi: “Ua aoaoina au e filifili ma le faaeteete au uo. Ae e mafai faapefea ona ou faia lena mea e aunoa ma le faamasinoina o tagata?” “Pe a ou taumafai e ola i le talalelei, e tuuaia lava au i le faamasinosino. E mafai faapefea ona ou faamaoni i mea ou te talitonu i ai ma faaali atu le alofa ia i latou o e le tutusa o matou talitonuga?”

• 1 Samuelu 16:7; Moronae 7:12–19; Mataupu Faavae ma Feagaiga 11:12

• Autu o le Talalelei, “Faamasinoina o Isi” topics.ChurchofJesusChrist.org

• Na aoao mai Peresitene Dallin H. Oaks: “Soo se taimi lava e mafai ai, o le a tatou aloese mai le faamasinoina o tagata ae na o le faamasinoina o tulaga. E taua lenei mea i soo se taimi lava tatou te taumafai ai e faatino ia tulaga faatonuina eseese nai lo isi e tatau ona tatou fegalegaleai—i le aiga, i le galuega, po o le nuu. E mafai ona tatou faatulaga ma galulue i tulaga faatonuina maualuluga mo i tatou lava po o o tatou aiga e aunoa ma le tausalaina o i latou o e faia se isi mea” (“‘Judge Not’ and Judging,” Ensign, Aok. 1999, 11).

Aoao Atu i le Ala a le Faaola

O au taumafaiga e tatau ona lagolago ai taumafaiga a matua. Faasoa ma matua o le autalavou i mea o loo e aoaoina atu. Fautua ma i latou e aoao i manaoga o tagata talavou i lau vasega ma auala sili e fesoasoani ai e faataunuu na manaoga.