2:3

O Le Liuaina o Fanau a le Atua

Elder Donald L. Hallstrom

O Le Au Peresitene o Fitugafulu

Faasalalauga Faasatelite mo Seminare ma Inisitituti o Mataupu Faalelotu • 13 Iuni, 2017

Ua faagaeetia lava au e auai i lenei faasalalauga o le faigalotu i le asō faatasi ma outou o loo taitaia ma aoaoina a tatou Seminare ma Inisitituti o Mataupu Faalelotu faatasi ma a outou soa peleina. Ua matou feiloai i le toatele o outou i le lalolagi atoa, ma e ofoofogia tele outou. Ou te talitonu o loo i ai ni nai mafuaaga mo lena mea. Muamua, e nao tagata agavaa e faafaigaluegaina e le Ekalesia o e agavaa e umia se pepa faataga o le malumalu, ua i ai se tomai faamaoniaina faafaiaoga, ma ua fautuaina ma faamaonia i ni tulaga eseese, e aofia ai le Fono Faatonu o A’oga. O outou faiaoga valaauina, atonu e le tutusa tele le iloiloga ma le aufaigaluega, ae, i lo’u iloa, e valaau e taitai i le lotoifale tagata silisili ona lelei e faiaoga i seminare ma inisitituti. Lua, ua outou faatofuina outou i le mataupu faavae a Keriso, lea na folafola mai e Nifae “o le mataupu faavae moni lenei e tasi a le Tama, ma le Alo, ma le Agaga Paia.”¹ O le aoaoina atu o lenei mataupu faavae e maua ai le faamalosiauga faifai pea e ola ai i lenei mataupu faavae, ma o le mafuaaga lena e matua tou lelei tele ai. Tumau ai i lena ala!

O i tatou o se aiga seminare! Sa valaauina a’u o se peresitene o le Siteki a Honoluu Hawaii i le 32 tausaga talu ai. O le ma uii sa 18 masina le matua ma o le ulumatua o le ma fanau e 11. Sa ou punouai i se matata sili ona pisi, ma sa foliga mai sa ma oo i o ma tapulaa. Ona faafesootai lea o au e i latou na faamaopoopoina le seminare mo le matou siteki ma sa fesili mai, ma le leai o sina talitonuga ona o tulaga o le ma aiga talavou, “E te manatu e ono ummmm, mafai ona ummmm faiaoga Sister Hallstrom i le eeeee, seminare?” Ia, ma te le masani e teena ni valaauga, o lea sa ma manava loloa ai ma fai atu, “Ioe.”

O ina na amata ai se vaitau pisi tele ae na matua tauia mo le ma aiga. O lo’u toalua o Diane, sa ala i luga i le 4:30 i vaveao taitasi e sauni mo le seminare i le 6:00 i le taeao. Sa moomia ai foi ona ou fafagu le fanau, fesoasoani e faataeele ma fai lavalava, sauni le ti o le taeao, ma faatulaga mea uma, ina ia afe mai Diane i totonu i le 7:00 i le taeao, ua mafai ona ou alu ese atu i le galuega ae momoli e ia le fanau matutua i le aoga.

O le ma masani lea mo le valu tausaga, seia oo ina valaauina Diane o se peresitene o Tamaitai Talavou. I le mavae ai o le lima tausaga sa toe tu’itu’i mai ai foi le taitai faamaopoopo o le seminare i le matou faitotoa ma le aioiga, “E i ai se matou vasega sinia faigata tele; e mafai ona toe faiaoga Sister Hallstrom i le seminare?” O lea na toe faaopoopo ai le isi tolu tausaga i le valu, ma na manaomia ai se valaau mai ia Peresitene Hinckley e faamalolo ai o ia. Sa valaauina au o se Pulega Aoao, ma sa auina atu i maua i Iapani mo le ma tofiga muamua lava. O lea la, outou faiaoga valaauina, ia faaeteete lava i le faamoemoe mo se faamalologa—tou te le iloa lava le mea tou te ono i’u i ai.

Ia, ua ma toe tepa i tua ma lo ma faamemelo ma le lotofaafetai i lena taimi faigata, popole, ma le pisi naua. Sa matua alofa lava Diane i ana tamaiti aoga seminare (ma sa latou alolofa foi ia te ia). Sa ia aoaoina foi le ma fanau uma i le seminare, ma o ma tei [nephews ma nieces], o le tasi lea ua avea nei ma se faatonu o inisitituti ma, ou te faamoemoe o loo auai mai i lenei faasalalauga. Ma le isi, o lenei aoaoga loloto na faalolotoina ai le atamai faaletalalelei o Diane ma lana molimau—o se mea na matua faamanuiaina ai au ma lo ma aiga. Faapena foi, na “faatagaina” ai au ia faatasi ma le ma fanau i le taimi e tasi o le aso sa ou avanoa ai pea—o na itula i le vaveao o aso o le vaiaso. O se faamanuiaga taua tele lena ia te a’u ma, ou te talitonu, e mō latou foi. Ua outou vaai la, o nisi o a matou avega mamafa na avea moni lava ma o matou faamanuiaga silisili.

Ua ou fiafia lava i le asō e faatasi ma le vaega o paaga ou te matua faaaloalo lava i ai. I le avea ai ma sui o le Fono Faatonu o Aoga ma le Komiti Faatonu, ou te fono faalua i masina taitasi ma Elder Kim B. Clark, lo tatou Komesina lelei, ma Chad H Webb, le taitai tulagaese o Seminare ma Inisitituti o Mataupu Faalelotu. O outou ua faafaigaluegaina, pe o auauna atu i seminare ma inisitituti, ua lelei ona taitaiina. E pei ona silafia e le toatele o outou, o le taitaifono o le Fono Faatonu o Aoga o Peresitene Thomas S. Monson, ma e aofia ai ma Peresitene Henry B. Eyring ma Peresitene Dieter F. Uchtdorf. O Elder Dallin H. Oaks o se sui foi o le Fono Faatonu ma e taitaifono i le Komiti Faatonu. O isi sui o le Fono Faatonu ma le Komiti Faatonu o Elder Jeffrey R. Holland, Sister Jean B. Bingham, ma Sister Bonnie L. Oscarson. E faaauau pea ona ou maofa i le faamuamua ma punaoa ua tuu atu i aoaoga i le Ekalesia.

Ia, sei ou faasoa atua nisi o manatu ia te outou o e o i ai se matafaioi taua tele i le a’oga faaleagaga o le autalavou o le Ekalesia. Ua uma ona ou ta’ua le mataupu faavae loloto a Keriso. E faapefea ona fesoasoani lenei Ekalesia i ona tagata ia malamalama ma ola i lenei mataupu faavae? O le isi auala e fesiligia ai lenei fesili o le, “O a ni faamuamua a Aposetolo o Le Ekalesia a Iesu Keriso o le Au Paia o Aso e Gata Ai?”

O le tasi auala e aoao ai i nei faamuamua o le malamalama lea i le “galuega o le faaolataga.” O le faauigaga sili ona puupuu o le galuega o le faaolataga o loo i le Tusitaulima 2. Manatua o le tusitaulima a le Ekalesia ua faamaoniaina e le Au Peresitene Sili ma le Korama a Aposetolo e Toasefululua. O loo faapea mai: “E auina atu tagata o le Ekalesia a Iesu Keriso ‘e galulue i lona tovine mo le faaolataga o agaga o tagata’ (MF&F 138:56). O lenei galuega o le faaolataga e aofia ai le galuega faamisiona a tagata o le au paia, faatumauina o tagata liliu mai, faatoagaina mai o tagata ua le malolosi mai, galuega o le malumalu ma talafaasolopito o aiga, ma le aoaoina atu o le talalelei.”²

O le isi malamalamaaga i nei faamuamua o le faamatalaga o loo i le tusitaulima a le Ekalesia i lalo o le ulutala “O Le Faamoemoega o le Ekalesia.” E faitauina: “O Le Ekalesia a Iesu Keriso o le Au Paia o Aso e Gata Ai sa faatulagaina e le Atua e fesoasoani ai i Lana galuega ia faataunuuina le faaolataga ma le faaeaga o Ana fanau. O loo valaaulia e le Ekalesia tagata uma ia “o mai ia Keriso, ma faaatoatoaina ia te ia’ (Moronae 10:32; tagai foi MF&F 20:59). O le valaaulia ia o mai ia Keriso e faatatau i tagata uma o loo ola, pe o le a ola, i le lalolagi.”³

O loo ta’ua foi e lenei tusitaulima e faapea, “I le faataunuuina o lona faamoemoega e fesoasoani i tagata taitoatasi ma aiga ia agavaa mo le faaeaga, e taulai atu le Ekalesia i tiutetauave ua tofia mai le lagi. O nei tiutetauave e aofia ai le fesoasoani i tagata o le ekalesia ia ola i le talalelei a Iesu Keriso, faapotopotoina o Isaraelu e ala i le galuega faafaifeautalai, tausiga o e matitiva ma e le tagolima, ma faataunuuina le faaolataga o e ua maliliu e ala i le fausiaina o malumalu ma le faatinoina o sauniga sui mo i latou.”⁴

O le mea lea o le “galuega o le faaolataga” ma nei “tiutetauave ua tofia mai le lagi” e tutusa lo latou taua, ma e tatau ona taialaina ai mea uma tatou te faia i le Ekalesia, e aofia ai (atonu e faapitoa i le) aoaoina o a tatou talavou.

I le iuga, o mea uma tatou te faia—mo i tatou lava, o tatou aiga, ma i o outou tofiga o i ai nei—o le aoao atu lea o le “galuega o le faaolataga” ma “tiutetauave ua tofia mai le lagi” e fesoasoani ai i le liuaina o atalii ma afafine o le Atua. O le aoao atu lea e pei o Arona ma ona uso o Amona, Ominea, ma Himinae—o le aoao atu lea “e tusa ma le agaga o faaaliga ma valoaga, ma le … mana o le Atua,” ina ia mafai ai e le toatele o e talitonu “i la [outou] talaiga, ma faaliliuina i le Alii, [ona] le toe … pauu ese [ai] lava.”⁵

E pei ona ta’u atu e le Au Peresitene Sili i matua ma taitai o le autalavou, “Ua valaauina outou e le Alii e fesoasoani atu i le autalavou ia liua i le talalelei.”⁶ E ala i le faataitai i le auala na aoao atu ai le Faaola, matou te talitonu lava o le a aoao a tatou talavou i se auala sili atu ona loloto lea o le a taitai atu ai i le liuaina.

O lea, o le aoaoina o a tatou talavou e le tau nao le aoao i ai o le talafaasolopito, o le aoaoina o i latou i aoaoga faavae e musuia ai i latou e faatino. O la tatou matafaioi o le “avea [ma] ni auupega i aao o le Atua”⁷ ina ia le gata latou te faalogo, ae ia latou lagona foi, ona latou mafai lea ona faia. O la tatou matafaioi o le “aoao ma faagaeetia le tasi i le isi”⁸ ina ia mafai ona “fusia faatasi ai [tatou lava] ia … faia ma le paia atoatoa.”⁹ O la tatou matafaioi o le aoao atu lea o le “faatuatua e salamo ai.”¹⁰

E faapefea ona matua ausia lenei ituaiga o aoao atu? O le mamanu ua faatuina i le Ekalesia a le Alii o lo tatou auai atoatoa lea i tapuaiga faitele, tapuaiga faaleaiga, ma tapuaiga faaletagata lava ia. Sei ou faalauteleina elemene taitasi.

Tapuaiga Faitele

O le tapuaiga faitele o le taimi lea e potopoto ai o se fanau a le Atua, o ni uso ma ni tuafafine, o se nuu o le Au Paia. O nei sauniga i nisi taimi e tumutumu, e pei o konafesi faalesiteki po o se konafesi aoao, po o nisi taimi e toalaiti, e pei o se fonotaga a se korama po o Tamaitai Talavou po o le Aualofa po o se vasega seminare po o le inisitituti. O le tatou faatasiga i le faigalotu i le asō o se ituaiga o tapuaiga faitele. I nei sauniga taitasi, tatou te tatalo ai, tatou te molimau ai, ma tatou faagaeetia ai—faatasi ma le faamoemoega i mea uma ia faateleina lo tatou malamalama e uiga i lo tatou Tama oi le Lagi, Iesu le Keriso, ma le Agaga Paia. Ona tatou maua lea o le tiutetauave e faaliliu ai lena iloa o loo faateleina pea i le atamai—ia faaauau ai pea ona faaitiitia le va o mea ua tatou iloa ma le auala o tatou ola ai.

O le tapuaiga i le malumalu o se ituaiga paia o le tapuaiga faitele ona e aofia tonu ai sauniga ma feagaiga lea e fesootai atu ai i tatou i le Atua.O a mai lau fesootaiga ma le malumalu ma au feagaiga? O e faaaogaina soo lenei ituaiga paia o le tapuaiga faitele e faamalosia ai lou iloa ma lou atamai? O e fesoasoani ia i latou o e aoaoina ia fesootai atu i le malumalu? O e uunaia lau autalavou ia agavaa ma umia se pepa faataga e faatapulaa le faaaogaina ma ia faaaoga i nofoaga faafaafanua e mafai ai? O le auai i le galuega o le faaolataga e ala i le sailia o igoa faaleaiga ma ō atu i le malumalu ina ia papatisoina ma faamauina mo o latou tuaa, latou te maua ai avanoa e maua ai le taitaiga faaleagaga.

O le sauniga aupito sili ona taua o a tatou tapuaiga faitele, lea e i fafo mai ma le malumalu, o le sauniga faamanatuga. E faaopoopo atu i gaoioiga tapuai ia e avea ma vaega o le tele o sauniga a le Ekalesia, o lenei sauniga e taulai atu i le sauniga ola o le faamanatuga. A o tatou amataina ma faamaeaina le sauniga, ma e patino lava i le saunia e aai ma feinu i le faamanatuga paia, tatou te vivii ma tatalo ai. O tatou auai atoatoa ea? O i ai ea iina o tatou mafaufau ma o tatou loto, pe o i ai i se isi mea? O tapē a tatou telefoni, pe o tatou tesi atu ma tuiti (pe mo tatou o tagata matutua, o imeli) i le taimi o le sauniga po o soo se vaega o le sauniga? A saunoa le au failauga, aemaise lava pe afai o i latou o ni failauga faalēlelei tele, o tatou faamaualuga ma lē fia faalogo, ona ua manatu, “Ua uma foi ona ou faalogo muamua i ai”?

Afai o ta’usalaina i tatou i soo se mea o nei measese, o le mea o tatou faia o le faaitiitia lea—masalo o le aveesea—o le tomai o le Agaga e fesootai mai ai ia i tatou. Ona tatou tuufesili lea pe aisea e le o faagaeetiaina ai i tatou i sauniga faamanatuga ma isi sauniga faaleEkalesia?

O le tapuaiga faitele o se avanoa ofoofogia lea e fesoasoani ai ia i tatou uma, e aofia ai le autalavou, i luga o le ala o le liuaina.

Tapuaiga Faaleaiga

O tapuaiga faitele e tatau ona siitia ai tapuaiga faaleaiga. I le 1999, sa fautuaina e le Au Peresitene Sili matua ma fanau “ina ia tuu atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei atoatoa faaleaiga. Po o le a lava le taua ma le talafeagai o i ai isi mea e fai po o gaoioiga, e le tatau ona faatagaina e suitulaga i tiute ua tofia mai le lagi, ia e na o matua ma aiga e mafai ona faatinoina lelei.”¹¹ Ioe, o nei lava mataupu faavae e tasi ua aoaoina soo lava e le toatele o taitai o le Ekalesia i ni auala le mafaitaulia i le tele o tausaga.

O loo tatou ola i se lalolagi ua matua pisi lava. O le malaga ai i le Ekalesia atoa, o nisi taimi ou te fesiligia patino ai taitai o le lotoifale—ma o ni tagata lelei nei o le Au Paia o Aso e Gata Ai—pe o outou faia tatalo faaleaiga ma afiafi faaleaiga? O outou aoaoina le talalelei o se aiga? E tele lava ina ou maua se vaaiga matamuli ma le faamatalaga, “Oka se matou pisi. O a’oga a matou fanau ma isi gaoioiga, musika ma isi lesona, tafaoga faaagafesootai, ma gaoioiga a le Ekalesia ua toetoe lava a alu uma ai o latou taimi. Matua noatia lava ma’ua ma lo’u toalua i galuega, Lotu, ma isi tiute. Ua seāseā matou faatasitasi o se aiga.” O le agaga o le fautuaga a le Au Peresitene Sili, afai ua tatou pisi tele i le faia o mea lelei ua le maua ai se taimi mo mea e taua tele, e tatau la ona tatou sailia ni vaifofo.

A tausi ae ni fanau e ni matua ua liua o e ua faamautuina se mamanu o tapuaiga faaleaiga, o le a latou lagonaina lava le faatosinaga o le Agaga Paia a o latou laiti ma mulimuli ai i lenei faataitaiga amiotonu e faavavau. Ona taoto lelei lea o a tatou aoaoga i tulaga faaleEkalesia i lona tulaga talafeagai i le avea ai ma se vaega lagolago i aoaoga o loo tupu i totonu o le aiga.

E ese mai i tapuaiga faifai pea ma le mataalia i totonu o o tatou lava aiga, e manaomia e faiaoga o le autalavou ona uunaia ma le talafeagai ma le magafagafa lelei ia tapuaiga i totonu o aiga o a tatou tamaiti aoga. O nisi e o mai mai aiga ua uma lava ona i ai faiga masani faapena, ma e faigofie lava ona e tu mai autafa ma e pati mai ma le leleoa. Mo isi e le o tupu ai mo le tele o mafuaaga—mai se tamaitiiti e na o ia lava le tagata o le Ekalesia i lona aiga (pe na o ia lava le tagata e toaga i le lotu) e oo atu ia i latou o se vaega o se aiga e auai soo i sauniga a le Ekalesia ae latou te lei mauaina lava le vaaiga mamao o le taua o tapuaiga faaleaiga. E aunoa ma le tau mafaufau o le pule ma le tiutetauave a taitai faaleekalesia ma matua, tau lava ina faataitai atu ma aoao ia mamanu amiotonu ma fesoasoani i a tatou talavou ia maua auala e mafai ona avea ai i latou ma se punavai o musumusuga i o latou aiga i le atiaeina o mausa o tapuaiga faifai pea faaleaiga.

Tapuaiga Faaletagata Lava Ia

I le iuga, o le liua o se mataupu faaletagata lava ia. O tapuaiga faitele e taitai atu ai i tatou i tapuaiga faaleaiga, lea e taitai atu ai i tatou i tapuaiga faaletagata lava ia. E aofia ai i lenei mea tatalo faaletagata lava ia, suesueina o le talalelei e le tagata lava ia, ma le mafaufau loloto o le tagata lava ia i lana mafutaga ma le Atua. “Auā pe faapefea ona iloa e se tagata le matai … o se tagata ese ia te ia, ma ua mamao mai mafaufauga ma faamoemoega o lona loto?”¹²

Sa saunoa Elder D. Todd Christofferson: “O le taua o le mauaina o se lagona o le paia e faigofie lava—afai e le talisapaia e se tasi mea paia, o le a ia ma’umauina. O le leai o se lagona o le migao, o le a faateleina lona tuputupu ae faasamasamanoa i uiga ma faatalale i amioga. O le a ia tafea ese mai taula ia e mafai e ana feagaiga ma le Atua ona aumai. O ona lagona o le tali atu mo ia lava i le Atua o le a faaitiitia ma oo ina faagaloina. Mulimuli ane, e na o le pau le mea o le a popole i ai o lona lava toafimalie ma le faamalieina o ona manaoga le puleaina. I le iuga, o le a ia inoino i mea paia, e oo lava i le Atua, ona ia inoino ai lea ia te ia lava.”¹³

Ua matou malamalama o le muai faailo silisili e iloa ai le manuia faaleagaga (e fuaina i le faauuga o le Perisitua Mekisateko, mauaina o faaeega paia, auauna atu faamisiona, faaipoipo i le malumalu, ma le tausiaina o se aiga amiotonu) e mo se alii talavou po o se tamaitai talavou ia maua ni aafiaga faaleagaga patino i lo latou talavou—mo i latou ia lagonaina le faatosinaga a le Agaga Paia. E sili atu i lo le toaga i le Lotu; o le toaga i le talalelei.

O lau sini mo vasega taitasi e te aoaoina, o talanoaga taitasi e te taitaia, o fegalegaleaiga i alasavali e te faia e mo le Agaga Paia ia avea ma faiaoga moni. E pei ona aoao mai le Faaola, “A o le Fesoasoani, o le Agaga Paia lea, e auina mai e le Tama i lo’u igoa, o ia lava na te aoao ia te outou i mea uma lava, e faamanatu mai foi o ia ia te outou i mea uma.”¹⁴ O loo i ai i le Agaga Paia le gafatia e faapatinoina ai le savali i tagata taitoatasi ina ia “faapupulaina … e le Agaga o le upumoni.”¹⁵ O lea, a o tatou aoao atu le galuega o le faaolataga ma tiutetauave ua tofia mai le lagi, tatou te faia i se auala e faagaeetia ai, siitia, musuia, lea e taitai atu ai i latou o loo tatou aoaoina ia faamalosia le faatuatua i le Tama Faalelagi ma ia Iesu Keriso ma Lana Togiola.

Ia te outou faiaoga faalelotu maoae, matou te faapea atu: Faafetai! Faafetai! Faafetai! E fai ai ma sui o taitai o le Ekalesia, faafetai atu! Ia tou ola i ni olaga agavaa faaletagata lava ia, tausi lelei tou aiga, ma auauna atu i le Alii—aemaise le tausiaina o le tupulaga faiae faapelepele. O le auai i le galuega o le faaolataga ma tiutetauave ua tofia mai le lagi, i lalo o le taitaiga faaaposetolo ma ki, o le a siitia ai i tatou ma uunaia i tatou.

Ou te tautino atu le mamalu o lo tatou tofi faalelagi ma lo tatou gafatia e maua ai le “ola e faavavau, o le meaalofa sili lea o meaalofa uma a le Atua.”¹⁶ Ou te molimau atu i le Ieova silisili, na soifua mai o Iesu, na faasuafa ia Iesu Keriso, le “ua faauuina.”¹⁷ Ou te molimau atu i Lana Togiola le mafaatusalia lea ua mafai ai e i tatou taitoatasi ma i latou uma tatou te aoaoina ona manumalo ai i le lalolagi—ia sao ai i mea aupito sili ona faigata o tulaga faalelalolagi i se “susulu atoatoa o le faamoemoe.”¹⁸ Faatasi ma faamanuiaga o se talalelei toefuataiina ma se ekalesia toefuataiina, ua tatou maua mea uma tatou te manaomia e fesoasoani ai ia tatou faalogo, lagona, ma faia. I le suafa, o Iesu Keriso, amene.

© 2017 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 5/17. Faamaonia le faaliliuga: 5/17. Faaliliuga o le “The Conversion of the Children of God.” Samoan. PD60004121 890