Faatumuina i le Olioli

Grant C. Anderson

Taitai Lagolago, Seminare ma Inisitituti o Mataupu Faalelotu

Faasalalauga Faasatelite mo Seminare ma Inisitituti o Mataupu Faalelotu • 13 Iuni, 2017

I le lua tausaga ua mavae na aoaoina ai i tatou e lo tatou Komesina, o Elder Kim B. Clark, mai le 3 Nifae e uiga i agelu ma tamaiti o e na li’o faataamilo e se afi. Na ia aoaoina i tatou faapea i le avea ai ma faiaoga o mataupu faalelotu, e tatau foi ia i tatou ona li’o faataamilo e lena afi paia.¹ O loo i ai, e pei ona tou silafia, se isi tala i totonu o le Tusi a Mamona e uiga i ni tagata o e na li’o faataamilo e ni afi faalelagi. O Liae ma Nifae na lafo i totonu o le falepuipui, ma na faapea mai le tala:

“Sa peiseai sa i ai i laua i totonu o se afi mumu. …

“Ma faauta, sa afio mai i lalo le Agaga Paia o le Atua mai le lagi, … ma sa faatumulia i latou e peiseai i le afi.”²

Sa faapea mai foi le tala, “Ma sa faatumuina i laua i lena olioli lea ua le magagana ma ua tumu i le mamalu.”³

O la’u savali lenei i le asō: I le avea ai ma faiaoga o mataupu faalelotu, e le gata i le li’o faataamilo o i tatou i se afi; ae e tatau foi ona faatumuina i tatou i le olioli. E tatau ona aoao e tagata aooga i totonu o o tatou potuaoga le “fuafuaga tele o le fiafia,” ae e tatau foi ona latou vaaia i totonu o i tatou le faamaoniga o loo aoga le fuafuaga—o le ola ai i le talalelei e aumaia ai le olioli. I le miti e uiga i le laau o le ola, sa talo atu Liae i lona aiga ia o mai ma aai i le fua sa “manaomia lava e faafiafia ai le tagata.”⁴ Sa i ai i lana valaaulia se mana ma se tulaga moni aua sa ia tautala atu mai se aafiaga. Sa ‘ai o ia ma lagona ai e ia lava lena olioli.

Na tulei saunoa mai Peresitene Gordon B. Hinckley e faapea: “E taua tele le maua o le fiafia i lenei galuega. Ua tele naua o tatou tagata faanoanoa i le Ekalesia ona latou te le malamalama, ou te matea, o le talalelei lenei o le fiafia.”⁵ E mafai ona tatou maua le fiafia lea na saunoa i ai Peresitene Hinckley e ala i le mauaina o le Agaga i o tatou olaga, e pei ona tau mai e tusitusiga paia, ona ola ai lea “e tusa ma le ala o le fiafia.”⁶

Ou te fia tuuina atu mo se tou iloiloga nisi o mataupu faavae ia na fesoasoani ia te a’u, i le avea ai ma se faiaoga o mataupu faalelotu, ia ola ai “e tusa ma le ala o le fiafia.” E le o ni manatu loloto pe fou, ma ou te ta’ua ma le faamoemoe o le a fesoasoani ai i se tasi ia ola ai ma aoao atu ma le olioli atili. Ou te le o talanoa atu na o i latou o le latou galuega o faiaoga faalelotu ae ia i latou foi o e, mo se vaitau, na ola i le olaga o se “ua valaauina” o se faiaoga faalelotu mo seminare ma inisitituti.

I le tele o tausaga ua mavae, na ou mauaina se upusii mai ia Peresitene Spencer W. Kimballi lea na ou atuatuvale ai. Na ia saunoa mai, “Ia tatou taofimau i le fiafia i le taimi nei, afai e te le o fiafia i le taimi nei, atonu o le a e le fiafia lava.”⁷

E le sa’o lena mea, sa ou mafaufau ai. Ae faapefea le salamo? Afai ou te le o fiafia i le taimi nei, e mafai ona ou faia se mea e suia ai lena mea? Sa ou mafaufau atili i ai, ma ou te talitonu o le faamoemoega o le savali a Peresitene Kimball e faapea: Afai e te le o fiafia ma talitonu e mafai ona e fiafia pe ana faapea lava e ese tulaga o e i ai; atonu o le a e le fiafia lava ona e le o fesootai lou fiafia i ou tulaga. Sa faaalia e se tasi tusitala i le auala lenei.

“E matele ina tatou talitonu faapea pe ana tatou i ai i se isi nofoaga—i se tafaoga, ma se isi paaga, i se isi matata ese, se isi fale, se isi tulaga—masalo o le a sili atu ona tatou fiafia ma faamalieina. Tatou te le [fiafia lava]!

“O le mea moni lava, afai e i ai ni ou mausa faatama’i faalemafaufau … pe o loo e moomoo lava maimau pe ana ese ia tulaga o i ai, o le a mulimuli atu ia te oe nei faanaunauga tutusa, i soo se mea lava e te alu i ai.”⁸

Na talitonu Lamana ma Lemuelu o lo la fiafia na noatia i ni tulaga—aemaise lava tulaga ia o le a faatumauina lo la toafimalie. I le ta’ua ai o le latou malaga i le vao, sa la faapea mai ai:

“Ua fanauina [e o matou taitoalua] fanau i le vao ma mafatia i mea uma, vagana ai le oti; ma sa sili ona lelei pe ana latou feoti ae latou te lei o ese mai i fafo o Ierusalema nai lo le mafatia i nei puapuaga.

“Faauta, ua tatou mafatia i le vao i nei tausaga e tele, o se taimi lea po o tatou olioli ai ia tatou mea ua maua ma le laueleele o lo tatou tofi; ioe, ma po o tatou fiafia.”⁹

Ua ou iloa o lo’u fiafia e le o faalagolago i le mea o o’u i ai, le tofiga ua ou maua, o ai ou te faigaluega ai, o a’u tamaiti aoga, po o avanoa e lei oo mai. Ou te le o faapea atu o le mauaina o se “uiga lelei” o le a o ese atu ai o’u luitau ma faatumuina le olaga i se la susulu. O tulaga tatou te mauaina ai i tatou i nisi taimi e mafai ona nutimomoia ai le loto ma toetoe lava a le mafai ona lavātia. Ae ou te tuuina atu la’u molimau e oo lava i na tulaga, e mafai lava ona i ai se agaga e auina mai le lagi ma se vaaiga lea e mafai ona avea ai le olaga ma oliolisaga.

Fai mai le fuaiupu i le tusi a Alema, “O le tala lenei e uiga ia Amona ma ona uso, a latou malaga i le laueleele o Nifae, o latou mafatiaga i le laueleele, o latou faanoanoaga, ma o latou puapuaga, ma lo latou olioli le mafuatia.”¹⁰ O le faanoanoa ma le olioli e le faatapulaaina tutusa. I le avea ai ma se faiaoga ua valaauina, atonu o loo e moomoo maimau pe ana i ai se isi ou valaauga e ese ai. I le avea ai ma se faiaoga o faigaluega, atonu o loo e moomoo maimau pe ana i ai se isi ou tofiga e ese ai. E le afaina le moomoo, ae faamolemole ia manatua e le o fesootai lou fiafia i le taunuuga o lou moomooga. O le fiafia o se tulaga o le femalagaai, e le o se taunuuga. Afai o e ola i se olaga ma mafaufau ai o se taunuuga, atonu o le a le fiafia lava.

E faapefea ona maua e se tasi le fiafia, po o a lava tulaga e ono oo i ai? Ou te le iloa ia tali uma, ae ou te tuuina atu se tasi e taua: O le loto faafetai e tele lava se aafiaga ma le ola ai “e tusa ma le ala o le fiafia.” Na saunoa Peresitene Dieter F. Uchtdorf:

“Ou te fautua atu e faapea nai lo le faafetai mo mea, ia tatou taulai atu ia faafetai i o tatou tulaga—e tusa lava po o a na mea. …

“O lenei ituaiga o lotofaafetai e mafai ona i ai i soo se taimi e tusa lava po o le a le mea o tupu i o tatou talaane. … E fuga pea ma le matagofie i taimi e sou ai le tai faapena foi ma le taimi e malū ai. …

“O le lotofaafetai i o tatou tulaga o se faatinoga o le faatuatua i le Atua. …

“O le lotofaafetai moni o se faailoaga lea o le faamoemoe ma le molimau.”¹¹

Sei ou tuuina atu se isi mataupu faavae lea na fesoasoani ia te a’u ia ola ai ma aoao atu ma le olioli atili. I ni nai tausaga ua mavae i la’u galuega, sa ou faia ai se faaiuga e tuua ia seminare ma inisitituti. Sa ou oo i lena faaiuga ona ou te lei mafaufau ou te lelei e pei o faiaoga sa ou vaaia o siomiaina a’u. Sa ou vaai i faiaoga o e punouai, atamamai, agamālie, ma toafimalie—ma sa ou vaai i sina mea laitiiti o lena mea ia te a’u lava ia. I le iuga, ou te lei tuua le seminare ma inisitituti, ae sa faaauau pea ona ou tauivi i totonu a o o’u mafaufau pe mafai e o’u uiga ona aoao atu ma le mataalia ma fesoasoani i le autalavou.

I le ta’ua ai o o tatou uiga patino tulaga ese, sa saunoa ai Sister Patricia Holland, le faletua o Elder Jeffrey R. Holland, faapea:

“E manaomia i tatou e lo tatou Tama o i le lagi i o tatou tagata o i ai, a o tatou tuputupu ae ia avea ai. Na ia faia ma le mautinoa i tatou ina ia ese mai le tasi ina ia mafai ona tatou faataunuuina e oo lava i o tatou le atoatoa ona faamoemoega. E oo mai lo’u faanoanoaga sili pe a ou lagona e ao ona ou faaofiofi i mea o faia e isi, po o mea ou te manatu o faamoemoe e isi mai ia te au. E sli ona ou fiafia pe a ou fiafia lava a’u i lo’u tagata ua i ai, ma taumafai e fai le mea e finagalo lo’u Tama o i le lagi ma a’u ia ou i ai.

“E tele tausaga sa ou taumafai ai e fuafaatatau ia Pat Holland o le e tele taimi e filemu, manatunatu, mafaufau i isi, ia Jeff Holland, o se alii tiotio, sagisagi fiafia, tautala soo, ma malosi, ma isi foi e faapena. Sa ou aoaoina e ala i le tele o mea na ou toilalo popo ai e le mafai ona e olioli e sagisagi fiafia pe afai e le o oe o se tagata e sagisagi fiafia. O se feteenaiga i ona faaupuga. Ua ou faavaivai i le vaai ia te a’u lava ia o se tagata e le atoatoa. … O le tuulafoaia o lenei mea ua faasaoloto ai a’u e opogi ma olioli i o’u lava tulaga ma uiga. …

I se nofoaga, i se auala, na “faatatagi [e le Alii] le savali ia ou malamalama ai” faapea na fatuina o’u uiga ia fetaui tonu lava ma le misiona ma taleni ia na Ia tuuina mai ia te a’u. … Ua ou iloaina e tele naua ni sosia o le malosi e le o ta’ua ia avea ai mo a’u lava ia. Ae o le taimi lava na ou auai ai i le faataitaiina o lo’u tuaoi, sa ou lagona le mafatia ma le vaivai ma oo atu ai i lo’u tauivi. A tatou taofia le fuafuaga a le Atua mo i tatou, ua tatou aveesea mai lenei lalolagi ma le malo o le Atua o tatou sao tulaga ese.”¹²

I le avea ai o oe lava ma tagata o e i ai, sei ou tuuina atu ni lapataiga se lua. Muamua, ou te le o fautua atu ia tatou ola ai ma se uiga lea e faapea mai, “E pau lava o a’u ia.” Na saunoa mai Peresitene Russell M. Nelson, “O le talalelei a Iesu Keriso o se talalelei o suiga.”¹³ E tatau ona ou saili ma le naunautai ni finagalo faaalia mai taitai i le ala e mafai ai ona ou sui ma ogatusa lelei ai o’u uiga ma a’u taumafaiga i le ausiaina o lo tatou faamoemoega. O le mea e sili ona taua, e i ai se poloaiga na tuuina mai e Keriso Lava Ia ina ia ou avea e faapei o Ia. Ae e le manaomia ona ou faapei o le faiaoga o loo i lalo atu o le fale tele. E mafai e o’u uiga, ua faaleleia e meaalofa a le Agaga, ona faia se saofaga tulaga ese i le galuega o le seminare ma inisitituti.

O le lapataiga lona lua: Ina ua ou faatoa sau i le Ofisa Tutotonu e faataunuuina se valaauga fou, na valaauliaina a’u e lo matou taitai i lena taimi, o Elder Paul V. Johnson, i totonu o lona ofisa mo ni aoaoga ma ni fautuaga. Faatasi ai ma isi mea, na ia saunoa mai ai, “Aua le faamatalaina oe lava.” Sa ou malamalama i lena mea e faauigaina faapea afai ou te faamatalaina i le Alii le ala sili e mafai ona ia faaaogaina ai a’u i le faataunuuina o Lana galuega, atonu o le a ou faatapulaaina o’u avanoa mo le tuputupu ae ma le auauna atu.

Ae paga lea, sa ou faia le mea lava lea na ia lapatai mai ai a’u. Sa ou taumafai i le mea sili ou te mafaia i le tofiga faaletaitai na ia talosagaina a’u e faatumu, ae sa ou muimui i totonu o lo’u loto. “E le o a’u o se taitai,” sa ou tauina ia te a’u lava ia. “O au o se faiaoga. E tatau ona ou i ai i le potuaoga, ae le o le saofai i totonu o fonotaga.” Sa avea ma se faagasologa umi ma tiga ae ou te lei iloaina o lo’u manao ia tautino atu o le avea ma faiaoga sa na o se ofu talaloa e ufiufi ai se manaoga e faataunuu ni ou lava manaoga patino. O le faaaluina o lou taimi ma tagata aooga ma tusitusiga paia na matuai tauia lava. O le faaaluaina o lou aso i fonotaga e talanoaina ni aiaiga faavae, e le lava lea. Peitai, e le o le tulaga lea. O o’u faia ea lenei galuega mo se taui faaletagata lava ia ma le faamalieina, pe o o’u faia ma se manatu tasi i le mamalu ma faamoemoega o le Atua?

Ou te faamoemoe o le a tou atamamai atu nai lo a’u ma o le a le faamatalaina outou lava ma le auala e tatau ona faaaoga ai outou. E i ai se fiafia tulaga ese e oo mai i le gauai atu i le finagalo o le Tama, e pei ona aoao ma faataitai soo mai e le Faaola.

O lenei mataupu o le gauai atu e taitai atu ai a’u i le isi fautuaga lea e mafai ona fesoasoani ia i tatou ia ola “e tusa ma le ala o le fiafia” i le avea ai ma faiaoga o mataupu faalelotu. Ou te mautinoa o le toatele o i tatou e mananao moni lava ia gauai atu i le finagalo o lo tatou Tama Faalelagi. E avea ma luitau sili pe a talosagaina i tatou ia gauai atu i tagata soifua iinei i le lalolagi lea na faaaoga e le Alii e taitaia Lana galuega, pe o i totonu o se uarota, se siteki, po o seminare ma inisitituti. Na ou iloaina i la’u galuega ni faiaoga matuai talenia o e na le fiafia i faatinoga a se taitai po o se aiaiga faavae latou te lei malilie i ai.Pe o tuuaiga sese na moni pe na iloaina, na puipuia ma faafaileleina e nei faiaoga o latou tiga—i le tau o lo latou lava fiafia. O lo latou tiga na masani ona liua i le ita, lea na taitai atu ai i le fetauai ma isi, aemaise lava i latou o e na taitaia i latou.

Sa tusia e Elder Neal A. Maxwell i se tasi taimi: “O le olaga i le Ekalesia [ma ou te faaopoopo atu i ai, olaga i seminare ma inisitituti] o lona uiga o le fetaiai ai ma taitai eseese e le o i latou uma e atamamai, faatagatamatua, ma sogasoga i taimi uma. O le mea moni, o nisi o i matou e le aoga ma faavasivasi. O nisi o faaleleiga sa matou aafia ai o se taunuuga moni lava o le feteenai o le tasi ma le isi. E ese le taua o le onosai ma le alofa faagauloto i ia tulaga!”¹⁴

E le lava lo’u faamamafaina atu o le taua o le “onosai ma le alofa faagauloto” mo se faiaoga o mataupu faalelotu. E taua tele mo le mauaina o le fiafia ma le aoao atu i le Agaga.

Sa saunoa mai Peresitene Boyd K. Packer: “O se tagata e fai mai o le a ia lagolagoina le Peresitene o le Ekalesia po o le Pulega Aoao ae le lagolagoina lona ia epikopo ua ia pepeloa ia lava.O le tagata e le lagolagoina le epikopo o lana uarota ma le peresitene o lana siteki o le a le lagolagoina le Peresitene o le Ekalesia.”¹⁵

E le lava le taimi mo nisi faamatalaga, ae e i ai se mataupu faavae i lena faamatalaga ou te talitonu e faatatau i faiaoga o mataupu faalelotu ma o latou sootaga ma isi o e ua tofia e taitaia i latou. Afai e i ai nisi o outou e i ai ni lagona le lelei i le au pulega, i se taitai patino po o se aiaiga faavae, po o le le amanaiaina po o le matuai vaavaaia, ou te augani atu ia te outou ia tuu loa, mo lo outou lava lelei. O le a faavavau ona mouese atu le fiafia mai le tagata e le loto faamagalo, o lē faasalalau atu lo latou le fiafia i isi po o se o uunaia ia finauga.

Ia, mo la’u fautuaga mulimuli. I nai itula a o lei maliu le Faaola, sa Ia mulumuluina vae o le au Aposetolo ma fetalai atu:

“O lenei afai o au le Alii, ma le Aoao, ua ou mulumuluina o outou vae, e tatau ona outou femulumuluai o outou vae. …

“Afai ua outou iloa nei mea, amuia outou pe a outou faia.”¹⁶

O le tele o le fiafia e mafai ona tatou mauaina i le olaga o le a oo mai pe a tatou faagaloina i tatou lava ma taulai atu o tatou manatu ma auaunaga i isi. Mo le faiaoga o mataupu faalelotu, o loo i ai se fiafiaga tele ia mauaina pe a tatou faaogatotonuina o tatou manatu, manaoga, ma taumafaiga i le faamanuiaina o o tatou tamaiti aoga. I le talanoa atu ai i faiaoga o mataupu faalelotu, na saunoa ai Peresitene Spencer W. Kimball i se tasi taimi faapea o le “tuputupu ae ma le atinaega” o o tatou tagata talavou e tatau ona avea ma a tatou “mea maoae ma ofoofogia e faamemelo i ai.”¹⁷ Afai o le a liliuese la tatou taulaiga mai a tatou tamaiti aoga ma amata ona faaautu i o tatou lava manaoga, mea tatou te toafimalie ai, faamalieina, po o viiga, o le a toesea le tele o lo tatou mana e aoao atu ai ma le mataalia, e le o ta’ua ai le aveesea o le tele o lo tatou lava fiafia.

Sa tusia e Harry Emerson Fosdick, o se faifeau Porotesano o le seneturi ua mavae: “O nisi o Kerisiano latou te tauaveina la latou tapuaiga i o latou papatua. O se ta’ui o talitonuga ma faiga masani ia e tatau ona latou tauaveina. I le aluga o taimi o le a faateleina le mamafa ma o le a latou loto ai e faataatia i lalo, ae o lona uiga o le a gausia ai ni tu ma aga tuai, o lea latou te toe amoina ai foi. Peitai o Kerisiano moni e le amoina la latou tapuaiga, ae amoina i latou e la latou tapuaiga. E le o mamafa; ae o apaau. E siitia i latou i luga, e vaaia ai i latou i nofoaga faigata, e faia ai le atulaulau ia foliga lelei, o le olaga e tumu i se faamoemoega, faamoemoe moni, ositaulaga aoga. E faasaolotoina i latou mai le fefe, le aoga, lotovaivai, ma le agasala—o le faapologa sili o agaga o tagata. E mafai ona e iloa se Kerisiano moni, pe a e vaai ia te ia, e ala i lona naunautai.”¹⁸

Ou te faamoemoe ma tatalo ina ia avea mo outou taitoatasi le talalelei, o ni apaau moni ae le o se avega mamafa, ia li’o faataamilo outou e le afi ma faatumuina i le olioli, ma o le a valaauliaina e lo outou lava fiafia isi ina ia saili ma mulimuli i le punavai o lo outou fiafia, o le Alii lea o Iesu Keriso. Ou te molimau atu sa avea o Ia ma tagata sili ona fiafia na savalia lenei lalolagi ma e Na te valaauliaina i tatou ia o mai ma mulimuli ia te Ia i le ola ai “e tusa ma le ala o le fiafia.” I le suafa, o Iesu Keriso, amene.