Aoaoina Loloto ma Olioli i le Alii
Faasalalauga Faasatelite mo Seminare ma Inisitituti o Mataupu Faalelotu • 13 Iuni, 2017
O se faamanuiaga le talanoa atu i le aiga S&I i le salafa atoa o le lalolagi. Ou te alofa tele ia te outou, ma ou te faafetai mo outou ma mea uma o loo outou faia ma tagata o avea ai outou. Ou te tatalo mo faamanuiaga a le Alii i o outou luga i le galuega tele o loo taoto mai i o tatou luma.
O’u uso e ma tuafafine pele, o se galuega taua le aoao atu, saunia, siitia, ma faamalosia le tupulaga faiae. Ua ou lagona le naunautaiga ma le malosi e uiga i lena galuega. O loo fetaiai le autalavou ma talavou matutua o le Ekalesia a le Alii ma le tele o luitau faigata ma avanoa matagofie. Ua faatumulia le lalolagi o loo siomiaina i latou i tekonolosi malolosi lea ua faaaogaina mo le lelei silisili faapea ma le leaga matautia. O le toatele o a tatou tagata talavou ua i ai i atunuu ua aafia i taua ma tala o taua, faatinoga tau faamata’u, mea pi’opi’o, faatamaiaga o aiga, vāvāō faaupufai ma faaagafesootai, faalelalolagi, ma faatamaiaga o le mativa, faama’i, ma le oge.
Peitai, i le lotolotoi o lenei vāvāō ma faigata uma, ua saunia e le Alii o Iesu Keriso Lona malo ma Lona nuu mo Lona toe afio mai. O loo Ia femaliua’i ma le mana i le salafa o le lalolagi e faapotopoto Isaraelu na faataapeapeina, e fausia Lona malo, ma faatu Siona. Ua faaloaloa mai Ona aao o le alofa ma le alofa mutimutivale i le autalavou ma talavou matutua o Lana Ekalesia, valaauliaina i latou ia maua Lana faamalologa, faamalosiau, ma le mana togiola i o latou olaga.
O loo faaauau pea le taua tele i le va o le lelei ma le leaga lea na amata i le muai olaga ma ua tuputupu ae malosi i aso e gata ai. I lena taua e le o nofonofo ai le autalavou ma talavou matutua o le tupulaga faiae i lumā fale. O loo latou i ai i laina pito i luma, ma o le a latou faia se matafaioi taua tele i le galuega sili a le Alii. Ma ua aumaia ai a’u ia te outou.
Ua outou i ai iina i laina pito i luma ma le tupulaga faia’e. Pe a ou mafaufau ia te outou ma mea o loo outou faia i aso taitasi e pa’i atu ai i olaga o le faitau selau ma le fia afe o talavou ma talavou matutua o le Ekalesia a le Alii, ua ou mafaufau ai i le faaaliga a Nifae e uiga i o tatou aso:
“Ma sa … vaai aʼu o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele.”1
Ua faamatalaina e Nifae se faagasologa paia lea o loo outou punouai ai i se auala taua. Pe a outou manatunatu ai i mea o loo outou faia i le aoao atu o le seminare ma le inisitituti, ou te faamoemoe o le a oo atu lenei fasifuaitau i o outou mafaufau. O outou o meafaigaluega i aao o le Atua i se faagasologa paia lea ua faamanuiaina ai Ana fanau pele o le feagaiga i le amiotonu ma maua Lona mana ma Lona mamalu.
O le mea lenei o loo outou faia. Tou te aoao atu nei tagata talavou lelei o le talalelei a Iesu Keriso, ma tou te fesoasoani ia i latou ia maua le mana paia i le perisitua, i le malumalu, i le mafutaga ma le Agaga Paia, i tusitusiga paia, i feagaiga ma sauniga paia. O le mana lea o le Atua, ma ua Ia tuuina atu i Ona atalii ma afafine faapelepele ina ia mafai ona latou alolofa atu, aoao atu, ma auauna atu ma le faatuatua ma le faamoemoe ia te Ia, ma faia Lana galuega i o latou olaga atoa.
Atonu e faigata i nisi taimi le faafesootaia o le faaaliga musuia a Nifae i le tulaga moni o lau vasega seminare i le 6:15 i le taeao pe i vasega inisitituti i le afiafi ma le toatele o tamaiti aoga i le kolisi ua lē lavāvā. Na ou vaai i la’u vaega o talavou e mata fiamomoe i le taeao po. Ma ou te matuai iloa lelei foliga o tamaiti aoga o le kolisi le lavāvā. Ae na ou vaaia le mea e tupu i na talavou ma na tamaiti aoga i le kolisi pe a aoaoina i latou i le Agaga o le Alii e se faiaoga e alofa ia i latou. Na ou vaaia le mea e tupu i o latou loto ma i o latou agaga pe a tatala atu e le faiaoga le mana o tusitusiga paia ia i latou ma fesoasoani ia i latou ia aoao loloto i le ala a le Alii. Ua ou iloa aua o le mea lena na tupu i a’u fanau uma. Ma o le mea lena o loo tupu i fanau a a’u fanau.
O talavou ma talavou matutua o loo outou aoaoina e ofoofogia. Ae tatou te manaomia le toatele ma le anoanoai o i latou ina ia maua faamanuiaga o le perisitua ma le malumalu, ia auauna atu i ni misiona, ia faaipoipo i totonu o le malumalu, ia fatuina ni aiga e faavavau, ia auauna atu i le Alii i Lona malo, ma ia avea ma malamalama i le lalolagi—o le anoanoai o i latou. O lona uiga e tatau ona faatupulaia pea ona tou lelei atili i le mea o loo outou faia. E manaomia oe e le Alii ina ia sili atu ona mamana ma sili atu ona lelei i lenei galuega tele.
Olioli i le Alii
Ou te fia faasoa atu ia te outou nisi o manatu ou te faamoemoe o le a fesoasoani ia te outou a o outou tulitulimatagauina lena faamoemoega paia. O la’u savali e faigofie: e tatau ona tatou faia mea e tele e fesoasoani ai i talavou ma talavou matutua o le Ekalesia ia lagonaina le olioli—olioli moni ma faaleagaga—i le Alii o Iesu Keriso. Ou te talitonu o le auala sili e faia ai lena mea o le aoaoina loloto o aoaoga faavae a Keriso i le ala a le Alii. O la’u molimau ia te outou o le aoaoina loloto o aoaoga faavae a Iesu Keriso e taitai atu ai i le olioli i le Alii.
E pei ona aoao mai Peresitene Nelson:
“O o’u uso e ma tuafafine pele, o le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.
“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma.”2
O le olioli lena e manaomia ona lagona e a tatou tagata talavou. E puipuia i latou mai le amioleaga, uunaia i latou ina ia amiotonu, fafaga o latou manaoga ina ia faatasi pea le Agaga Paia ma i latou, ma faalatalata atu i latou i le Alii.
Ua tuuina mai ia i tatou e le Faaola se mamanu matagofie i le Tusi a Mamona e fesoasoani atu ia te oe ina ia fesoasoani ai i au tamaiti aoga ia maua le olioli ia te Ia:
“O lea, ia tuu i luga lo outou malamalama ina ia susulu atu i le lalolagi. Faauta, o au o le malamalama lea e tatau ona outou tuu i luga—mea ia na outou vaai ua ou faia. Faauta sa outou vaai sa ou tatalo atu i le Tamā, ma sa outou molimau uma.
“Ma ua outou vaai sa ou poloaiina ia aua nei i ai se tasi o outou e alu ese atu; ae sa ou poloai atu ia outou o mai ia te au, ina ia outou tagotago ma vaai; ia faapea lava ona outou fai i le lalolagi.”3
Ina ua faaali atu le Faaola i tagata i le malumalu i Nuumau, sa Ia alofaina i latou, aoao atu i latou i Lana mataupu, ma faamanuia i latou. Sa latou lagona le olioli tele. I lenei fasifuaitau ua valaau mai le Faaola ia te outou ina ia o mai ia te Ia ma, e ala i le mana o le Agaga Paia, vaai i Lana galuega, lagona Lona alofa, ma maua Lona olioli. Ona Ia poloaiina lea o outou ina ia avatu mea na outou vaaia ma lagona i o outou tamaiti aoga: alolofa ia i latou, aoao atu ia i latou Lana aoaoga faavae, valaaulia i latou ia o mai ia te Ia ma lagona Lona olioli. Afai o i ai ia te outou le alofa, aoaoga faavae, malamalama, ma le olioli o Iesu Keriso, o le a outou uunaia ma faamalosiau atu ia i latou ina ia saili o latou lava aafiaga patino, faaletagata lava ia ma faaleagaga ma le Alii.
Olioli ma le Aoaoina Loloto
O le aoaoina lea e taitai atu ai i le olioli o le aoaoina loloto i le aoaoga faavae a Iesu Keriso, ma e tatau ona faia i le ala a le Alii. O le aoaoina loloto o le aoaoina o le agaga atoa—le mafaufau, loto, tino, ma le agaga ola pea. O le aoaoina loloto e faateleina le malosi o tamaiti aoga ina ia faia mea e tolu:4
1. Iloa ma malamalama
Muamua ia iloa ma malamalama. O le malamalama lenei o le mafaufau ma le loto. E faatatau i le faatuatua ia Iesu Keriso, mo se faataitaiga, e aoao tamaiti aoga o le faatuatua ia Keriso o se mataupu faavae o le faatinoga ma le mana. E ala atu i le molimau a le Agaga, latou te lagona ai le moni o lena mataupu faavae ma amata ona manino le vaai, manao atili, ma o le a malamalama atoatoa atili ai i o latou loto e uiga i le galuega o lena mataupu faavae i o latou olaga.
2. Fai se faatinoga mataalia ma amiotonu
Lona lua o le faia lea o se faatinoga mataalia ma amiotonu. E aoao tamaiti aoga i le ala e faaaoga ai le mataupu faavae o le faatuatua ia Iesu Keriso i o latou olaga ona faia moni lea. Mo se faataitaiga, atonu latou te filifili ia galulue ma le faatuatua i le Faaola ina ia maua le lototele e valaaulia ai se uo e faitau le Tusi a Mamona. A o latou faatinoina ma le faatuatua ia te Ia, o le a tuputupu ae lo latou talitonuga ia te Ia ma o le a faamanuiaina i latou e le Alii ma le faatuatua sili atu.
3. Avea atili faapei o lo tatou Tama Faalelagi
O le lona tolu o le avea atili faapei o lo tatou Tama Faalelagi. O le avea ai, o se faagasologa lea o le suiga i le tulaga faaletagata ma le natura tonu lava o le tamaitiiti aoga. E oo mai e ala i le mana togiola ma le mana faamalosiau a Iesu Keriso. E faatatau i le mataupu faavae o le faatuatua i le Faaola, o lona uiga o le a faateleina le avea o se tamaitiiti aoga ma tagata sili ona faatuatua. O le faatuatua ia Keriso e avea ma se uiga mama o o latou tulaga faaletagata, o latou ituaiga tagata, pe a latou tuputupu ae pea i le poto ma le malamalama e uiga i le faatuatua ia Iesu Keriso, galue ma le faatuatua ia te Ia ina ia faia Lona finagalo, ma saili Ana meaalofa ma faamanuiaga ina ia avea faapei o Ia ma Lona Tama.
O nei vaega e tolu o le aoaoina loloto e fegalegaleai faatasi ma fefaamalosiaua’i e le tasi le isi. O le avea ma tagata faatuatua e faateleina ai le malosiaga o tamaiti aoga e iloa ai ma malamalama. O le malamalama loloto e uunaia atili ai se faatinoga mataalia, lea o le a fatuina ai ni malamalamaaga fou ma taitai atu ai i se tagata sili ona malosi. O loo i ai se olioli tele i elemene taitasi o le aoaoina loloto—olioli i le malamalamaaga fou, olioli i faatinoga amiotonu, olioli i le avea atili ai faapei o le Tama ma le Alo.
O Le Ala a le Alii ina ia Aoao Loloto
Valaaulia e Tolu
O le ala a le Alii ina ia aoao loloto e faigofie ae mamana. O le faamalamalamaga lenei a le Alii e uiga i le aoaoina i Lana ala:
“Afai e tautasi o outou mata i lo’u mamalu, o le a faatumulia o outou tino atoa i le malamalama.”5
“Saunia outou lava, ma faapaia outou lava.”6
“Ia outou aoao i le tasi mataupu faavae o le malo.”7
“Ia outou aoao atu ma le filiga ma o le a i ai lo’u alofa tunoa ia te outou.”8
“Ia outou saili ma le filiga ma aoao i le tasi upu o le poto.”9
“Saili i le aoaoina, e ala lava lea i le suesue ma le faatuatua foi.”10
“Tofi se faiaoga i totonu o outou lava, ma ia le tuu atu i tagata uma e tautala i le taimi e tasi.”11
“Tuu atu i tagata e tautala taitoatasi mai ae tuu i isi tagata uma e faalogologo … o le a faapea ona mafai ona faagaeetia ai o tagata uma.”12
“Ma silisili i luga o mea uma, ia outou faaoofu outou lava i le fusi o le alofa mama.”13
O nei fuaitau matagofie mai le vaega e 88 o le Mataupu Faavae ma Feagaiga ua faailoa mai ai ni elemene fegalegaleai ma fefaamalosiaua’i e tolu i le ala a le Alii ina ia aoaoina loloto. O le muamua o le suesue ma le maelega, sailiili, sauniuni, ma le usiusitai.14 O le lona lua o le potopoto e aoao atu e le tasi le isi, i noataga o le alofa mama, e taitaia e se faiaoga musuia, ma auai ai le alofa tunoa o Iesu Keriso. O le lona tolu o le mauaina o faaaliga, musumusuga, ma isi meaalofa faaleagaga e ala i le mana o le Agaga Paia.
E faia e se faiaoga i le ala a le Alii se matafaioi ola ma musuia i le faaauai mai o tamaiti aoga i elemene uma o le aoaoina loloto. E lua ni mea taua: muamua, ia e maua le Agaga Paia e faatasi ma oe, ma le lona lua, ia e alofa i tamaiti aoga.
Ua ia te outou se punaoa matagofie—o le tusitaulima o le Aoao Atu ma le Aoao Mai o le Talalelei15e fesoasoani ia te outou e aoao atu ina ia aoaoina au tamaiti aoga i le ala a le Alii. Ia, sei ou tuuina atu ia te outou se galuega: Ou te manao ia outou faitauina ma suesue i le tusitaulima ma se vaaiga o le aoaoina loloto, aemaise lava le aoaoga faavae a Iesu Keriso, lea e taitai atu ai i le olioli. O le taimi lava tou te malamalama ai i lena aoaoina loloto aua o le olioli o la outou sini lena, o le a suia le auala tou te faaaogaina ai mataupu faavae mamana ua faamautuina i le tusitaulima. Sei ou tuuina atu ia te outou ni faataitaiga faigofie se tolu (ae o loo tele isi):
-
O le a outou fai atu i a outou tamaiti aoga e o mai saunia i le vasega e aoao atu e le tasi le isi.
-
O le a outou tuu le faamuamua i le fesoasoani atu i a outou tamaiti aoga e atiae ni uiga faaKeriso.
-
O le a outou faia le olioli o se faamoemoega autasi i totonu o o outou potuaoga, ma o le a faasoa soo mai e tamaiti aoga ni molimau o le olioli.
O’u uso e ma tuafafine pele, ou te iloa ua leva ona outou faia le tele o mea ofoofogia ma matagofie e fesoasoani ai i a outou tamaiti aoga ina ia faagoto loloto ifo le talalelei a Iesu Keriso i o latou loto ma lagona le olioli ia te Ia. Ou te iloa a outou osigataulaga ma lo outou tuuto. Ma e faapena foi le Alii.
Ou te fia faaiu i le asō i ni valaaulia se tolu. Ou te iloa afai tou te galulue i nei valaaulia o le a outou fesoasoani i a outou tamaiti aoga ia aoao loloto atili i le ala a le Alii ma lagona le olioli atili ia te Ia.
Valaaulia 1: Faasinomaga ma le Faamoemoega Faavavau Ou te valaaulia outou e fesoasoani i a outou tamaiti aoga ia iloa po o ai moni lava i latou. Fesoasoani ia i latou ia vaai ma lagona ma iloa o i latou moni lava o ni fanau a le Atua, o Ona atalii ma afafine faapelepele. Fesoasoani ia latou malamalama i le uiga ma le faatatauga “O Le Aiga: O Se Folafolaga i le Lalolagi” ina ua folafola mai e tofu au tamaiti aoga ma “se natura paia ma se taunuuga … ma [o se] faasinomaga e faavavau ma le faamoemoega.”16
Faamolemole fesoasoani ia latou lagona loloto i o latou loto o i latou o ni tagata faaleagaga o i ai se aafiaga faaletino. Na puapuagatia ma maliu le Alii ma le Faaola, o Iesu Keriso mo i latou ina ia mafai ona latou “maua ai le atoatoaga ma iloa tino ai lo latou taunuuga paia o ni suli o le ola e faavavau.”17 O le fuafuaga lena a le Tama Faalelagi mo i latou. Faamolemole ia fesoasoani atu ia faia Lana fuafuaga ia moni mo i latou.
Aoao atu i latou sa latou fananau mai i ni Matua Faalelagi ina ia aoao ma tuputupu ae ma avea faapei o i Laua. O le aoaoina e totonugalemu i le faamoemoega o le muai olaga ma le olaga faitino ma lo latou faaolataga e faavavau. E manaomia lo latou aoao e uiga i mea a le Atua ma mea a le lalolagi ina ia mafai ona latou faataunuuina ia faamoemoega a le Atua i o latou olaga. Fesoasoani ia latou vaai ma aoao i le taua o le fuafuaga e faavavau a le Atua ma, i lo latou faamoemoega e faavavau ma le taunuuga paia.
Valaaulia 2: O Le Ala a le Alii i le Aoaoina Loloto Ou te valaaulia outou ia fesoasoani atu i a outou tamaiti aoga ia iloa pe faapefea ona aoao i le ala a le Alii. E te faia lenei mea i se vaega e ala i faataitaiga. I se auala mamana, o le auala o tou aoao atu ai o le mea lea o loo tou aoao atu ai a outou tamaiti aoga e uiga i le ala a le Alii e aoao ai. Afai tou te fatuina mo i latou ni aafiaga i le aoaoina i le ala a le Alii, o le a latou aoaoina Lona ala. Afai tou te le faia, latou te le [aoaoina foi].
Ou te faamoemoe o le a outou aoao atu a outou tamaiti aoga i le ala a le Alii ina ia aoao e ala i a outou lava faataitaiga. Ae ou te faamoemoe foi o le a outou aoao tuusao atu ma le malamalama i latou i Lana ala, ma le manatu i ai. E i ai se avanoa matagofie e faia ai lena mea i le Atamai i Aoaoga Faavae, lea e aoao atu ai e mataupu faavae o le “Mauaina o le Malamalama Faaleagaga” le tulaga tonu lava o le aoaoina i le ala a le Alii. A o outou aoao atu na mataupu faavae i le aluga o le tausaga, o le a outou aoao atu ia i latou le ala a le Alii e aoao ai. E mafai ona faia lena aoaoga faapea foi i kosi o loo e aoao atua i le inisitituti.
Faamolemole ia fesoasoani i au tamaiti aoga ina ia iloa o le ala a le Alii e faatatau i mea uma o latou suesue ai. O metotia patino o fetaiai ma i latou i a latou vasega i aoga tulagalua pe maualuga atu o le a tuu atu lava i le faitalia a o latou faiaoga.Ae e mafai lava e a outou tamaiti aoga ona auai ma le punouai, filiga i a latou suesuega, ma faamanuiaina i le mafutaga a le Agaga Paia. Faamolemole ia valaaulia a outou tamaiti aoga ia o ma ave le Agaga Paia i le aoga.
Valaaulia 3: Salamo ma le Aoaoina. Ou te valaaulia outou ia aoao atu a outou tamaiti aoga o le salamo e totonugalemu i le aoaoina loloto. O le salamo o le faagasologa lea a le Alii mo le aoaoina patino, tuputupu ae faaleagaga, ma le avea atili faapei o Ia. E aoao a outou tamaiti aoga i le ala a le Alii e ala i le mana togiola ma faamalosiau o Iesu Keriso o loo galue i o latou olaga, tatalaina ia i latou Lona alofa mutimutivale ma Lona alofa tunoa.
Faamolemole fesoasoani atu i a outou tamaiti aoga ina ia malamalama o le salamo o se faagasologa paia lea e mafai ai ona latou avea atili e faapei o le Faaola i taimi uma. O nisi taimi o lo latou salamo o le a faatatau i se mea latou te manaomia ona tuu e le toe faia. O nisi taimi o le a faatatau i se mea latou te manaomia ona amata fai. Faamolemole fesoasoani atu ia i latou ia iloa o le salamo e sili atu nai lo le tauina atu i le Alii ma lo latou epikopo sa latou faia se mea sese. O le agasala o le liliuese lea mai le Alii. O le salamo o le toe foi atu lea ia te Ia. O le salamo e manaomia ai se suia o le loto ma le mafaufau, o se suiga o le olaga ua faapatinoina i tulaga faaletagata lava ia a tamaiti aoga.
Ae faamolemole ia aoao atu foi i latou o le salamo e mafai ona faamanuiaina ai i latou e le aunoa. O le ala lea a le Alii e fesoasoani ai ia i latou ina ia lelei atili ma ia lelei atili i o latou olaga atoa. E manaomia ai lo latou suia ma tuputupu ae, ma o le uiga o lena mea ia salamo, liliu atoa atu i le Faaola, tuu atoa atu ia te Ia o latou loto i taimi uma. O lena faagasologa o le liliu ma lena faagasologa o le tuuina atu e mo le olaga atoa. E taua tele mo le aoaoina loloto.
Molimau
Ou te tuuina atu ia te outou lenei folafolaga: Afai tou te aoao atu a outou tamaiti aoga i le tagata o i ai moni i latou, le ala e aoao loloto ai i le ala a le Alii, ma le mataupu faavae paia o le salamo, o le a latou aoao loloto le aoaoga faavae a Iesu Keriso, o le a tuputupu ae lo latou faatuatua ia te Ia ma le alofa mo Ia, ma o le a latou maua le olioli i le Alii. O le a maua e oe ma au tamaiti aoga lenei folafolaga ofoofogia a le Alii: “E moni, e moni, Ou te fai atu ia te oe, o le a Ou faaali atu ia te oe ʼai loʼu Agaga, lea o le a faapupula ai lou mafaufau, lea o le a faatumulia ai lou agaga i le olioli.”18
Ou te iloa e moni lena folafolaga. Ou te tuuina atu la’u molimau o loo soifua le Atua lo tatou Tama. O Iesu o le Keriso. O loo soifua o Ia! O La La’ua galuega paia lenei. Ou te molimau atu ai ma tuuina atu ai ia te outou o’u alofaaga, i le suafa o Iesu Keriso, amene.
© 2017 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 5/17. Faamaonia le faaliliuga: 5/17. Faaliliuga o le “Deep Learning and Joy in the Lord.” Samoan. PD60004121 890