O Le Faatuatua o se Mataupu Faavae o Faatinoga ma le Mana
Faasalalauga Faasatelite mo Seminare ma Inisitituti o Mataupu Faalelotu • 13 Iuni, 2017
Ou te tulimatai atu lava e faatasi ma outou i lenei faatasiga taua. I tapenaga mo lenei fonotaga, sa ou aioi atu ai i le Alii ia iloa po o le a se mea Na te finagalo tatou te faia mo Lana fanau o loo nonofo i o tatou potuaoga ma o tatou aiga. I ni taimi toafilemu ou te lagona ai lava Lana faamaoniga mo a outou taumafaiga filiga ma osigataulaga lemafaitaulia. Ou te lagonaina foi le tele o Lona fiafia e faamanuia outou ma o outou aiga. Ma ua ou lagonaina Lona finagalo e faamanuia tou tamaiti aoga i se alofa ma se molimau e uiga i Lona Alo Pele.
E le mafai ona ausia atoa lenei mea i ni polokalama se tele atu pe lelei atu, mataupu aoaoina, ni aoaoga faamasani, po o ni tekinolosi ona e leai ma se mea o na mea e suitulaga i le pa’i faavavega mai o le lagi i olaga o o tatou tamaiti aoga. O le mea ua matou faamoemoe i ai e na o le pau le ala e oo mai ai o se meaalofa mai lo tatou Tama oi le Lagi ma o le a manaomia ai Lona mana e faatino ai vavega i olaga o tagata taitoasi.
O le mea o loo manaomia mai ia i tatou o le faatinoina o se faatuatua sili atu, aua o le faatuatua e muamua lava i vavega uma. Na saunoa mai Elder Dallin H. Oaks: “E mate le faatuatua pe a leai ni galuega.’ Ae [na ia toe faaopoopo mai], ‘O galuega e aunoa ma le faatuatua e sili atu ona mate.’”1 I nisi upu, o a tatou galuega faigata uma o le a le maua ai ni taunuuga manaomia pe a faatinoina e aunoa ma le faatuatua. Aua o le faatuatua o se mataupu faavae uma o le faatinoga ma le mana. O se faatelega o lo tatou faatuatua autasi o le a avea ma se faailoga i le Alii o loo tatou faalagolago atu ia te Ia ma faatuatuaina Lona mana e musuia ai, liuaina, faamalosia, saunia, ma puipuia le tupulaga faiae. O se faatelega o le faatuatua i le Faaola o le a faamalosia ai lo tatou aoao atu, a tatou valaaulia mo le autalavou ma talavou matutua e auai pe faitau ia tusitusiga paia, e oo lava i a tatou mafutaga ma matua ma taitai perisitua. O lea la, i vaiaso ma masina a sau, e mafai ona outou auai faatasi ma au e ole atu i le Tama oi le Lagi ia faateleina lo tatou faatuatua? Ou te talitonu ua Ia tu saunia e fesoasoani mai pe afai tatou te ole atu.
O Le Faatinoina o le Faatuatua o se Mataupu Faavae o le Faatinoga
Na aoao mai e Iosefa Samita o le faatinoina o le faatuatua i le Atua e manaomia ai lo tatou mauaina o “se manatu sa’o e uiga i lona ituaiga tagata, atoatoaga, ma uiga mama” ma se “malamalamaaga o le auala o le olaga o loo [tatou] tulitulimatagauina e tusa lea ma lona finagalo.”2 O nei tulaga taua uma e manaomia ai lo tatou faatinoina o le faatuatua o se mataupu faavae o le faatinoga.3
I le konafesi aoao lata mai nei, na faasoa mai ai e Peresitene Russell M. Nelson se tasi o auala lea e mafai ona tatou faia ai le mea muamua o nei tulaga manaomia e lua:
“O le faateleina o lo tatou iloa e uiga i le galuega ma le misiona—o le faateleina lea o lo tatou malamalama i Lana aoaoga faavae ma le mea na Ia faia mo i tatou—o le faateleina foi lena o lo tatou iloaina e mafai ona Ia auina mai le mana lea tatou te manaomiaina mo o tatou olaga.
“I le amataga o lenei tausaga, sa ou talosagaina ai talavou matutua o le Ekalesia ia faapaiaina se vaega o lo latou taimi i vaiaso taitasi e suesue ai i mea uma na fetalai ai Iesu ma fai e pei ona tusia i tusitusiga faavae. Sa ou valaauliaina i latou ia avea ia mau o tusitusiga paia e uiga ia Iesu Keriso o loo i le Taiala i Tusitusiga Paia ma a latou mataupu aoaoina autu faaletagata lava ia.
“Sa ou tuu atua lena lu’i ona ua uma ona ou taliaina e a’u lava ia. Sa ou faitauina ma vase lalo o fuaiupu uma o loo ta’ua ai Iesu Keriso, e pei ona lisiina i lalo o ulutala autu ma soa ulutala e 57 i le Taiala i Tusiusiga Paia. Ina ua ou faamaeaina lena galuega, sa fesili mai lo’u toalua ia te a’u po o le a se aafiaga ia te au o lena mea. Sa ou ta’u atu ia te ia, ‘O a’u o se tagata ua sui!’”4
Sa ou manao e faamanatu atu ia te oe e uiga i lenei valaaulia aua na ou vaai patino lava i faamanuiaga o lenei suesuega taulai ma iloa o le tele o lo tatou malamalama ma alofa i le Faaola, o le atili faateleina lea o lo tatou faatuatua ia te Ia.
E pei ona ou ta’ua muamua, na aoao mai e le Perofeta o Iosefa o le isi elemene taua o le faatuatua o le aoao lea ia ogatusa o tatou olaga ma le finagalo o le Alii. Ina ia faamanino lenei mea, sei ou faasoa atu lava ia te outou se faataitaiga e mafai ona faatatau i ai tina o i ai iinei:
O Celeste Davis o se tina talavou e toatolu le fanau e ala soo lana pepe i po uma. Sa amata ona ia tatalo ina ia la maua ma lana pepe le malologa la te manaomia. Ae sa foliga mai sa lei taliina ana tatalo. O lea sa mafua ai ona ia manao ia malamalama atili i le tatalo ma le mafuaaga e le o faamanuiaina ai o ia i se toomaga. Sa ia aoao mai le Bible Dictionary, e faapea, “tatou tatalo atu i le suafa o Keriso pe afai o o tatou mafaufau o le mafaufau o Keriso, ma o o tatou manaoga o manaoga ia o Keriso. … Ona tatou ole atu ai lea mo mea ua saʼo ma o le a mafai e le Atua ona tuuina mai. O ni isi tatalo e lē mafai ona maua mai ni tali ona ua le faia i le suafa o Keriso: ua lē tusa ai ma Lona finagalo ae ua faia ia tatalo i le manatu faapito o le tagata.”5
O lea sa tonu ai ia Celeste e fai se lisi o mea na ia manao ai ma mea sa ia tatalo atu ai. O le faia o le lisi, sa ia iloaina ai o le autu o ana tatalo o le ole atu lea i le Tama Faalelagi mo mea sa ia manao ai, o le tuu atu lea [i le Atua] e sui ona tulaga. Ona tonu lea ia te ia e fai se isi lisi, ma tusi i lalo na mea na ia mautinoa sa finagalo i ai le Tama Faalelagi mo ia. Ioe o lisi uma e lua sa lei eseese tele—e alofa o Ia ia i tatou ma finagalo ia tatou fiafia. Ae o lenei tamai faatinoga sa aoaoina ai se upumoni taua. E ui sa ia manao e suia ona tulaga, ae sa ia manao foi ia suia o ia. O lea, sa ia filifili ai e fetuunai lana auala e tatalo ai ina ia mafai ona faaogatusa lelei lona loto ma le finagalo o le Tama Faalelagi. Na ia tusia:
“Sa ou mauaina se tamai mamanu e fesoasoani ai ia te au i au tatalo. O le mea faigofie lenei—soo se taimi lava e te ole atu ai mo se mea e te manao ai ae e te le o mautinoa atoa po o se mea ua finagalo ai le Atua mo oe, fai le fuaitau ‘ae afai e leai’ ona toe faaopoopo lea o se mea e te mautinoa e finagalo i ai le Atua mo oe.
Mo se faataitaiga: ‘[Le Tama Faalelagi], faamolemole fesoasoani mai ia ou maua se moe i lenei po, fesoasoani mai ia lava lo’u malosi ia fiafia ai ma galue malosi ai.’ ‘[Le Tama Faalelagi], faamolemole faamanuia mai ina ia te’a le mai o la’u pepe ma lagona ai le malosi, ae a leai, fesoasoani mai ia matou faalagolago atu i Lau Afio ma ia onosai i le tasi ma le isi.’ ‘[Le Tama Faalelagi], faamolemole faamanuia mai ina ia faaaofia au i vaega o au uo, ae afai e leai, e tusa lava pe faiesea au, fesoasoani mai ia ou agalelei ma agaalofa.’”
Sa faaauau lana faamatalaga:
“Ua ou faataitaia lenei mea pe tusa nei ma se tausaga, ma e mafai ona ou faapea atu ua matua siitia lava le tulaga manuia o au tatalo. …
“Ou te lagonaina ua iu ina ou faataunuuina le faamoemeoga moni o tatalo, e le o le fetuunaia o ou manaoga, ae ia faaogatusa au lava ma le Atua. …
“O se tulaga manuia sa lei faamoemoeina o lo’u le fefe lea i ni tulaga faigata po o le le mauaina o le mea ou te manao ai e toetoe lava o le tele o mea na ou masani ai ona na ou vaai ma lagona le tali a le Atua i au tatalo—i ou manaoga uma ma a’u ‘ae a leai.’”6
Ua saunia e le aafiaga a Celeste se mamanu lea e mafai ona fesoasoani ia i tatou ma a tatou tatalo ma a tatou taumafaiga ina ia faatino le faatuatua o se mataupu faavae o le faatinoga. Ina ia manino, o le a le aveesea e le faatuatua le faitalia o a tatou fanau po o a tatou tamaiti aoga ma o le a le aveesea ai tofotofoga uma ma luitau i o tatou olaga. Ae e mafai ona fesoasoani ia i tatou ia onosai lelei ma aoao mai ai i tulaga faigata. O le a suia ai foi le auala tatou te vaai atu ai i a tatou tamaiti aoga [ma a tatou fanau] ma le auala tatou te tatalo ai mo i latou. O le a suia ai a tatou fegalegaleaiga i totonu o a tatou potuaoga ma o tatou aiga. O le a fesoasoani ia i tatou e tutu ma le faamoemoe, fiafia, ma le talitonuga i se lalolagi pogisa. O le a fatuai ai ni avanoa mo faaaliga patino ma aumai ai le mana i a tatou aoaoga. O le a molioo atu a tatou molimau i loto o i latou tatou te alolofa i ai.
O le faatuatua moni e faaitiitia ai alofaga. E taitai atu ai i le suesuega a le tagata lava ia, ma taitai atu ai i le salamo faamaoni ma le tuputupu ae anoa. E faamalosia i tatou ia aloese mai le mailei o le faamoemoe i le mauaina o tali pe a suia isi, e pei o le tatou faapea atu “Pe ana faapea e lagolagoina tele a’u e matua po o taitai o le Ekalesia, semanu o le a sili atu ona lelei ia mea.” O lena auala e le faalagolago i le Faaola, ma o lea, o le a le maua ai Lona mana. O le a le maua ai le vavega tatou te manaomiaina. Ua lava mea tatou te maua ma ua lava i tatou e faataunuuina le galuega a le Alii pe a lava lo tatou faatuatua e ole atu ai ma le faamaoni ia te Ia e sui ai i tatou ma ia mamanuina i tatou e fai ma meafaigaluega i Ona aao.
E moni lenei mea e tusa lava pe tatou te lagonaina le le atoatoa ma le lofituina. Sa ou aoaoina lenei lesona o se alii talavou a o sauniuni mo se misiona. Sa ou mafaufau pea i taimi uma o le a ou auauna atu, ae i ou tausaga talavou o le mafaufau i ai na ou popole ai. Sa ou le maua le toafimalie e tautala atu ai i luma o tagata. E i ai so’u aunty e fai mai lava o ia sa lei vaai i ou mata seia oo ina ou talavou ona sa ou savali punou solo ma nana ou foliga. I le aoga tulagalua sa ou maua se D i vasega o talafaatino, o le togi pito sili lea ona maualalo e pasi ai. Sa le mafai ona ou tu atu i luma o le vasega, e oo lava i le faitauina o se tusiga ua uma ona saunia na tuuina mai e lo’u faiaoga ia te a’u.
Ina ua maua lo’u valaauga o le misiona i Mekisiko, sa talosagaina a’u ou te lauga i se faeasaite a le autalavou faatasi ma lo’u uso matua. Pe na o le lima minute na ou avea, ae sa ia faaaogaina le taimi na totoe. Ou te le manatu e lava le faamamafaina o le faapea atu masalo o la’u [lauga] o le lauga sili lea ona leaga na tuuina atu i lenei ekalesia po o se isi lava ekalesia. Ina ua maea le faeasaite, sa toatele le autalavou na laina atu e faafeiloai lo’u uso. Sa punou teisi mai se tasi tagata lelei mai le laina ma fai mai ia te au, “Faafetai lava.O se lauga lelei lena.” Sa ou manatu moni lava, “E ese lou agalelei, ae matua e pepelo tele.” Sa ou alu ma le lotovaivai i le fale, ma tomanatu pe mafai faapefea ona ou faamoemoe e auauna i se misiona.” Sa ou lei lagonaina le atoatoa e aoao atu le talalelei i le Igilisi, ae le ta’ua ai le gagana Sipaniolo lea e moomia pea ona ou aoaoina.
I ni nai aso mulimuli ane, a o mamafatu pea le loto, sa ou susue ai tusitusiga paia ma faitau i le tala ia Enoka. Ina ua faatonuina Enoka e valaau tagata ia salamo, fai mai le fuaiupu e 31, “sa ifo o ia lava i le eleele, i luma o le Alii, ma tautala atu i luma o le Alii, ua fai atu: Aisea ua amanaia ai aʼu i lau silafaga, ma o aʼu ua nao se tama, ma ua inoino mai tagata uma ia te aʼu; ona e amu laʼu tautala; o lea, aisea ua avea ai aʼu ma au auauna?”7 I se tali mai i le masalosalo ma le manino o le leai o se talitonuga o Enoka i lona valaauga, sa tuuina mai e le Alii lenei tali matagofie ma faamautinoa o loo maua i le fuaiupu e 34, “Faauta ua i ou luga loʼu Agaga, o le mea lea o au upu uma o le a Ou taʼutonuina; ma o le a sosola ese mauga i ou luma, ma o le a liliu vaitafe mai i o latou alātafe; ma o le a mau oe ia te aʼu, ma aʼu ia te oe; o lea, savali faatasi ma aʼu.”8
I le popole, lo’u le mautinoa ia te au lava ia, ma le le saunia mo mea o i luma atu, ae sa piimau i na upu e pei o se lainaola, sa ou ulufale atu ai i se vaalele mo le taimi muamua lava i lo’u olaga ma lele atu ai i Mekisiko e auauna ai. O iina sa ou aoao ai afai tatou te loto i ai, e mafai moni lava ona tatou savavali faatasi ma le Alii. Sa ou iloa ai e moni lava le saunoaga a Peresitene Ezra Taft Benson: “O alii ma tamaitai o e ua liliu atu o latou ola i le Atua o le a latou iloa ai e mafai ona ia faia le anoanoai o mea aoga i o latou olaga nai lo mea latou te mafaia.”9
O Le Faatinoina o le Faatuatua o se Mataupu Faavae o le Faatinoga
Mai le tala ia Enoka, sa ou aoao ai foi se isi mea e uiga i le faatuatua. Faafofoga i le faamatalaga o le tagata na avea ai lenei taulealea, lea sa telegese lana tautala ma itagiaina e tagata. Mose 7:13 e faitauina faapea, “Ma sa faapea ona matua tele lava le faatuatua o Enoka sa ia taitaia ai le nuu o le Atua, ma sa o mai o latou fili e tau faasaga mai ia te i latou; ma sa ia fetalai atu le afioga a le Alii, ma sa gatete le laueleele, ma sosola ese mauga, e tusa ma lana faatonu atu; ma sa liliu ese vaitafe mai i o latou alatafe; ma sa faalogoina le tagi a leona mai le vao; ma sa matataʼu tele atunuu uma, ona o le mamana tele o le upu a Enoka, ma ona o le matua tele o le mana o le gagana na tuu mai e le Atua ia te ia.”10 Ia te au e le faapena se taulealea e telegese le tautala. E foliga mai o se alii o le faatuatua, na savavali faatasi ma le Alii, na aveesea mauga.
O nisi taimi tatou te faaaogaina ai fuaitau “mimilo le ‘au” po o le “faaminoi le nila” e faatusa i ai ni nai mea iti e manaomia ona faaleleia, ae e le o valaauliaina i tatou e le Alii e faaminoi le nila. O loo ia valaauliaina i tatou e faaminoi pe aveese mauga. Sa Ia fetalai mai, “Afai e tusa lo outou faatuatua ma le fua o le sinapi, e fai atu outou i lenei mauga, Alu atu ia oe i le la mea; ona alu atu ai lea; e leai foi se mea tou te le mafaia.”11
O lenei faatuatua e alu ese ai mauga—pe o ni mauga moni po o ni faatusa—o le isi na tulaga o le faatuatua. E pei ona aoao mai Elder D. Todd Christofferson:
“[O loo i ai] se maualuga o le faatuatua lea e aofia ai le faamautinoaga faaleagaga lea e maua ai ni galuega lelei, aemaise lava o le usiusitai i mataupu faavae ma poloaiga o le talalelei. O se faatuatua moni lea ia Keriso. …
“Ae peitai, e i ai se tulaga o le faatuatua e le gata o le a puleaina ai a tatou amioga, ae e faamalolosia ai foi i tatou ina ia suia mea o loo i ai nei ma ia faatupuina nisi mea semanu e le mafai ona tutupu. O lea ou te tautala atu i le faatuatua e le na o se mataupu faavae o le faatinoga ae o se mataupu faavae foi o le mana.”12
O le ituaiga lenei o faatuatua lea o loo faamatalaina i le Eperu 11 lea sa faaaogaina e Enoka, Aperaamo, Sara, ma Mose. O le faatuatua lea “na faatoilaloina [ai e perofeta ia] malo, na fai ai amiotonu, na maua ai mea na folafolaina, na pupuni ai gutu o leona, na tineia ai le malosi o le afi, ma sao ai i le mata o le pelu, mai mea vaivai na avea ma mea malolosi, … [ma] na maua mai e fafine o latou tagata oti ua toetutu mai.”13
O le ituaiga lenei o faatuatua lea o loo faamatalaina i le Eperu 12, lea o loo faasino atu ia Alema, Amoleka, Nifae, Liae, ma Amona.14 O le faatuatua lea na faaalia e “le uso o Iareto [lea na] fai atu i le mauga o Serima, Alu ese—ma sa alu ese lava. Ma a na fai e le ia te ia le faatuatua po ua le alu ese.”15 Ma i le iuga, “sa i ai le toatele o e sa matua malosi tele lava lo latou faatuatua, i le taimi lava ae lei afio mai Keriso, o e sa le mafai ona taofia mai totonu o le veli”—faafofoga la i le fuaitau lea—“ae sa latou vaai moni lava ma o latou lava mata mea ia sa latou vaai i ai ma se mata o le faatuatua.”16
O ni faataitaiga uma nei e manatua pea o le faatuatua, o se mataupu faavae o le mana. Ae o le faataitaiga mulimuli lava e faagaeetia faapitoa ai lava au. Sa latou muai vaaia nei mea i le mata o le faatuatua a o lei vaaia i latou i o latou mata faaletino. O loo i ai se faataitaiga iloga o aso nei o lenei mea mai ia Peresitene Polika Iaga. Ina ua faasino atu i le eleele o loo tu ai le Malumalu o Sate Leki, sa ia fai mai: “E le tele sa’u tala e fai atu e uiga i faaaliga po o faali’ali’aga, ae ua lava le faapea atu … Sa ou i ai iinei, ma vaaia i la le agaga le Malumalu. … Ou te lei vaai lava i lena eleele, ae o lefaaaliga [e faatatau i ai] sa i ai iina.”17
Ina ia i ai se faaaliga o mea e mafai ona i ai, o mea e finagalo i ai le Alii, o se vaega talafeagai o le faatinoina o le faatuatua o se mataupu faavae o le mana.
O mafai ona e vaaia le vavega lea tatou te manaomiaina i lou mata o le faatuatua? O mafai ona e vaaia oe lava o aoao atu ni vasega i se faatuatuaga sili atu i le Alii, i Lana afioga, ma au tamaiti aoga? O mafai ona e vaai atu i au tamaiti aoga o tuua lou potuaoga ua sili atu ona ola faalagolago i aoaoga ma le Togiola a le Faaola, sili atu ona tetee i le agasala, ma sili atu ona saunia e faia mea uma ua fetalai mai ai le Alii ia i latou? Ma o mafai ona e vaai atu i lou mata o le faatuatua i ni talavou toatele atu, o e auai i le ekalesia ma i latou e le o nisi o lo tatou faatuatuaga, o tali mai i a tatou valaaulia ia o mai ma auai faatasi i lenei vavega? O le a se mea e ono faia e le Alii pe afai e faatino lo tatou faatuatua autasi, i mea uma o le mataupu faavae o le faatinoga ma se mataupu faavae o le mana?
“O Loo ia te i Tatou Ieova; Aua Tou Te Matatau ia te i Latou”
Ae ou te lei faamaea atu, ou te fia faasoa atu se faataitaiga mulimuli se tasi. O loo i ai i lo’u ofisa se laupapa olive ua vaneina o loo i ai se tasi o a’u tala faatusipaia e sili ona ou fiafia i ai ma o se faamanatu faifai pea ia te a’u o le manaomiaina o le faatuatua. O se ata o Kalepo ma Iosua, o e na tofia e Mose faatasi ma isi alii e toa 10, e o e saili le nuu o Kanana, ma toe aumai se lipoti. Sa foi mai isi alii e toa 10 ma fai mai, “E malolosi lava tagata o nonofo i le nuu, o aai foi e nofo ‘olo e matua tetele lava.”18
“Ona vavao ai lea e Kalepo i le nuu ia filemu i luma o Mose, ua faapea atu, Se’i o tatou matuā o a’e lava i ai ma fai ai mo i tatou; aua e mafai lava ona tatou manumalo ai.
“Ona fai ane ai lea o ia tagata na o a’e ma ia, Tatou te le mafaia ona o a’e e tau ma lena nuu; aua e sili lo latou malosi i lo tatou.”19
Ona o le leai o so latou faatuatua, “na latou fai [ai] tala leaga … i le nuu … ua faapea mai, … na matou iloa ai foi tagata maualuluga, … [ma] pei ni sē lava i matou i o matou manatu.”20
Ae sa tali atu Iosua ma Kalepo, “O loo ia te i tatou Ieova; aua tou te matatau ia te i latou.”21
Ae o tagata, sa pei o le toa 10 o avefeau le faatuatuaina, sa le mafai ona vaaia le mea na finagalo le Alii e fai ma latou le fia mulimuli ai ia Iosua ma Kalepo. Ona o le leai o le faatuatua, sa fesēa’i solo ai le nuu i le vao mo le isi 39 tausaga. Mai lena uluai vaega, sa na o Iosua ma Kalepo na sao mai ma sa faatagaina e ulu atu i le nuu folafolaina. Atonu tou te manatuaina upu lauiloa a Kalepo a o la tutu ai ma Iosua i luma o le Mauga o Heperona, le nofoaga tonu lea na la sailia i le tele o tausaga na muamua atu. Sa fai atu Kalepo:
“O loo tumau lo’u malosi i le aso nei e pei o le aso na auina atu ai a’u e Mose. …
“O lenei ia e tuuina mai ia te au o lenei mauga.”22
Ona o lona faatuatua, sa ia maua ai ma lona aiga mo augatupulaga lona mauga i le nuu folafolaina.
O loo i ai se luitau i luma atu. Atonu e faaosoosoina i tatou ia masalosalo ma aumai se lipoti leaga e tumu i le fefe ma le masalosalo. O le leai o se faatuatua i le Alii o le a le mafai ona tatou oo atu ai i le nuu folafolaina. E pei o Kalepo ma Iosua, e tatau ona tatou lafoaiese lo tatou fefe ma faatino lo tatou faatuatua e maua ai faamanuiaga ua Ia faapolopoloina mo i tatou. E tatau ona tatou vaai atu i luitau ma tofotofoga uma i o tatou olaga o se avanoa e faalolotoina ai lo tatou faatuatua ia Iesu Keriso.
O le a se mea e faia e le Alii pe a tatou suitulagaina faatasi le fefe ma le masalosalo i le faamoemoe ma le faatuatua? Ou te talitonu e le gata o le a Ia faaminoiina le nila ae faapena foi ona aveesea mauga—ina ia tutupu ai vavega i olaga o le autalavou ma talavou matutua o le Ekalesia. A o faateleina lo tatou faatuatua, e faapena foi le faatuatua a i latou tatou te aoao atu. Ou te iloa o le a faamanuiaina e lo tatou Tama i le Lagi a tatou tamaiti aoga pe a tatou faatinoina lo tatou faatuatua i Lona Alo alofa ma atoatoa, le Faaola, le Togiola, ma le Laveai o le lalolagi. I le suafa, o Iesu Keriso, amene.
© 2017 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 5/17. Faamaonia le faaliliuga: 5/17. Faaliliuga o le “Faith as a Principle of Action and Power.” Samoan. PD60004121 890