Fakatatau ki Hoʻo Folofolá, tā fakatātaaʻi ʻe Elspeth Young

Naʻe fakahoko ʻe Mele ha fakamoʻoni mālohi ki he misiona ʻo e Fakamoʻuí (vakai, Luke 1:46–55). Fakatatau ki Hoʻo Folofolá, tā fakatātaaʻi ʻe Elspeth Young

8 Sānuali

Te u Tāpuekina Fēfē e Niʻihi Kehé ʻaki ʻEku Fakamoʻoni Kia Sīsū Kalaisí?

Mātiu 1; Luke 1

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá pea tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 10.2, 11.2, ChurchofJesusChrist.org). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e meʻa naʻa tau aleaʻi ʻi he kalasi kuo ʻosí, pea ko e hā ʻa e ngaahi fakaafe pe ngāue naʻe fakahokó? Ko e hā kuo tau fakahoko ke ngāue ai ki he ngaahi fakaafe pe ngāue ko ia ne vahe maí?

• Tokanga kiate kinautolu ʻoku faingataʻaʻiá. Ko e hā ha meʻa ʻe lava ke tau fakahoko pe lea ʻaki ke tokoni kiate kinautolu ʻoku ongoʻi tuenoa pe mamaʻo mei he Tamai Hēvaní?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha ngaahi founga ʻe niʻihi ʻe lava ke tau tokoni ai ki he niʻihi kehé ke nau ongoʻi ʻa e ʻofa ʻa Sīsū Kalaisí?

• Fakatahaʻi ʻa e ngaahi fāmilí ke taʻengata. Ko e hā ha ngaahi fakakaukau te tau lava ʻo fevahevaheʻaki ke tokoni ke fakamālohia hotau fāmilí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Hangē ko e tokolahi taha ʻo e kau Siu faivelenga ʻi hono taimí, naʻe fakaʻānaua moʻoni ʻa Mele ki he hāʻele mai ʻa e Mīsaiá. Hili hono ʻilo ʻe Mele mei ha ʻāngelo kuo mei ʻosi ʻa e tatalí—pea te ne hoko ko e faʻē ʻo e Huhuʻi kuo talaʻofá—naʻá ne fakahoko ha fakamoʻoni fakaʻofoʻofa ki he “ʻOtuá ko [hono] Fakamoʻui.” ʻOku lekooti ʻa e fakamoʻoni ko ʻení ʻi he Luke 1:46–55, pea ʻoku ʻofeina ia ʻe he kau Kalisitiane ʻi he funga ʻo e māmaní. ʻI hoʻo lau e ngaahi veesi ko ʻení, fakakaukau ki he kakai ʻi hoʻo kalasí pe kōlomú. ʻOku nau hangē ko Melé ʻo teuteu ki he hāʻele mai ʻa Sīsū Kalaisí—ʻa ia ko ʻEne Hāʻele Nāunauʻia Hono Uá mai ia. Pea hangē foki ko Melé, ʻe lava ke tākiekina mālohi ʻe heʻenau fakamoʻoní ʻa e tui ʻa kinautolu ʻoku nau feohí.

Ko e hā e ongo ʻoku maʻu ʻe he kakai ʻokú ke akoʻí fekauʻaki mo Sīsū Kalaisí? ʻE tāpuekina fēfē ʻe heʻenau fakamoʻoni kiate Iá ʻa e niʻihi kehé? ʻI hoʻo teuteu ke faiakó, te ke lava foki ʻo ako ʻa e 2 Nīfai 25:23–26 mo e pōpoaki ʻa ʻEletā Niila L. ʻEnitaseni “ʻOku Mau Lea ʻia Kalaisí” (Liahona, Nōvema 2020, 88–91).

Ako Fakataha

Ko ha founga lelei ke tokoniʻi ai e toʻu tupú ke nau fakakaukau ki heʻenau ngaahi fakamoʻoni kia Sīsū Kalaisí ko hono vakavakaiʻi fakataha e fakamoʻoni ʻa Melé ʻi he Luke 1:46–55. ʻE lava ke nau fevahevaheʻaki ha ngaahi kupuʻi lea ʻokú ne fakamatalaʻi ʻa e meʻa naʻe tui mo ongoʻi ʻe Mele fekauʻaki mo e Fakamoʻuí. Ko e fē ʻi he ngaahi kupuʻi lea ko ʻení ʻokú ne toe fakamatalaʻi ʻa e ongo ʻoku tau maʻu fekauʻaki mo Iá? Hangē ko ʻení, ko e hā ʻokú ne ʻai hotau laumālié ke “[fiefia] ʻi he ʻOtuá”? (veesi 47). Ko e hā ha “ngaahi meʻa lahi” kuó Ne fakahoko maʻatautolu? (veesi 49). Kuó Ne fakahaaʻi fēfē Hono mālohí ʻi heʻetau moʻuí? (vakai, veesi 51). ʻE lava ke iku e ngaahi fakakaukau ʻekitivitī ʻi laló ki ha ngaahi fepōtalanoaʻaki fekauʻaki mo e founga ʻe lava ke faitāpuekina ai ʻe heʻetau ngaahi fakamoʻoni kia Kalaisí ʻa e niʻihi kehé.

• ʻOku tokoni e pōpoaki ʻa ʻEletā Niila L. ʻEnitasoni “ʻOku Mau Lea ʻia Kalaisí” ke fakamatalaʻi e ʻuhinga ʻoku totonu ke tau talanoa tauʻatāina ange ai ʻo kau i he Fakamoʻuí—mo e founga te tau lava ʻo fakahoko ai iá. ʻE lava ke mou lau fakataha ha ngaahi konga ʻo e pōpoaki ʻa ʻEletā ʻEnitasení. ʻE lava ke aleaʻi ʻe he kau mēmipa ʻo e kalasí pe kōlomú ʻa e ngaahi ʻuhinga naʻá ne ʻomiki hono vahevahe ʻetau fakamoʻoni kia Sīsū Kalaisí mo ʻene faleʻi ki he founga hono fakahoko iá. Ko e hā ha ngaahi meʻa pau te tau lava ʻo fakahoko ke tau lea tauʻatāina ange ai kau kia Kalaisi?

• ʻI heʻetau hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau ʻilo ha ngaahi moʻoni mahuʻinga fekauʻaki mo Sīsū Kalaisi te tau lava ʻo vahevahe. Te ke tokoniʻi fēfē nai e toʻu tupú ke nau fakakaukau ki he ngaahi moʻoni ko ʻení? ʻE lava ke ke kole ange ke nau ako fakafoʻituitui pe fakakulupu ʻa e “Ko e Kalaisi Moʻuí, Ko e Fakamoʻoni ʻa e Kau ʻAposetoló” ʻo kumi ha ngaahi tali ki he fehuʻi “Ko e hā ha ngaahi moʻoni fekauʻaki mo e Fakamoʻuí ʻoku makehe hono ʻuhingá kiate koe?” Fakaafeʻi kinautolu ke vahevahe e ngaahi moʻoni ne nau maʻú pea fakamatalaʻi ʻa e ʻuhinga ʻoku ʻuhingamālie ai e ngaahi moʻoni ko ʻení kiate kinautolú. ʻE lava ke nau vahevahe ha ngaahi potufolofola mo ʻenau ngaahi aʻusiá ʻi heʻenau fakahoko iá. ʻE lava leva ke nau aleaʻi e ngaahi moʻoni fekauʻaki mo e Fakamoʻuí te nau lava ʻo vahevahe ʻi he mītia fakasōsialé, mo ha kaungāmeʻa ʻoku fefaʻuhi mo ha fakamoʻoni, pe ko ha taha ʻoku ʻikai kau ki hotau Siasí.

• Makehe mei he Luke 1:46–55, ʻoku maʻu ʻi he folofolá ha ngaahi potufolofola kehe te ne lava ʻo ueʻi kitautolu ke vahevahe ʻa e meʻa ʻoku tau ʻilo fekauʻaki mo Sīsū Kalaisí. ʻOku lisi ʻi he “Ngaahi Maʻuʻanga Tokoníha ngaahi sīpingá.” ʻE lava ke mou lau fakataha e ngaahi potufolofola ko ʻení. Ko e hā ʻoku nau akoʻi mai fekauʻaki mo e founga ke vahevahe ai mo e niʻihi kehé ʻetau fakamoʻoni kia Sīsū Kalaisí? Ko e hā mo ha toe meʻa ʻoku tau ako mei he ngaahi veesi folofola ko ʻení? ʻE lava foki ke vahevahe ʻe he kau mēmipa ʻo e kalasí pe kōlomú ha ngaahi meʻa kuo nau ako mei he kakai ʻoku nau ʻiloʻi ʻoku vahevahe tauʻatāina ʻenau tui kia Sīsū Kalaisí.

kau finemui ʻoku ako folofola

ʻI heʻetau ako ke ʻiloʻi mo ʻofa ʻi he Fakamoʻuí, ʻoku tau ʻilo ai ha ngaahi founga ke vahevahe ʻetau fakamoʻoni kiate Iá.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Mātiu 5:14–16; 1 Pita 3:15; 2 Nīfai 25:26; ʻAlamā 5:43–50; Tokāteline mo e Ngaahi Fuakava 100:5–8

• Russell M. Nelson, “Tuku ke Hā Hoʻomou Tuí” (Liahona, Mē 2014, 29–31)

• Cristina B. Franco, “Ko e Fiefia ʻi Hono Vahevahe ʻo e Ongoongoleleí” (Liahona, Nōvema 2019, 83–86)

Ko e Faiako ʻi he Founga ʻa e Fakamoʻuí

ʻE lava ke hoko hono fakahoko ha ngaahi fehuʻi ʻoku poupouʻi ai e kau akó ke fakahoko ha fakamoʻoní, ko ha founga lelei ke fakaafeʻi ʻaki ʻa e Laumālié. Te ke lava ʻo fai ha ngaahi fehuʻi hangē ko e “Naʻá ke ʻiloʻi fēfē naʻe fakahoko ʻe Sīsū Kalaisi ʻa e fakaleleí maʻa hoʻo ngaahi angahalá?” pe “Kuó ke fakahoungaʻi fēfē nai ʻa e meʻa naʻe fakahoko ʻe he Fakamoʻuí maʻatautolu ʻi Ketisemaní?”