Fakahaofitā ʻe Jenedy Paige

24 Tīsema

ʻOku Fakahaaʻi Fēfē ʻe Sīsū Kalaisi ʻEne ʻOfa kiate Aú?

Kilisimasi

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ʻa e founga ʻoku tau maʻu ai ʻa e fiefiá ʻi he muimui kia Sīsū Kalaisí?

• Tokanga kiate kinautolu ʻoku faingataʻaʻiá. Ko hai ʻi hotau uōtí pe tukui koló ʻokú ne fie maʻu ʻetau tokoní? Te tau lava fēfē nai ʻo tokoniʻi kinautolu?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fetokoniʻaki fēfē nai ke mateuteu ki he ngāue fakafaifekaú?

• Fakatahaʻi ʻa e ngaahi fāmilí ke taʻengata. Te tau tokoni fēfē nai ki he ngaahi ngāue ʻa hotau uōtí ke fakahoko ʻa e hisitōlia fakafāmilí mo e ngāue fakatemipalé?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Kimuʻa pea ʻaloʻi ʻa Sīsū Kalaisí, naʻe ʻiloa Ia ko e [ʻEiki] maʻongoʻongá. Naʻá Ne hoko ko e “ʻOfaʻanga mo e Tokotaha Kuo Fili [ʻe he Tamaí] talu mei he kamataʻangá” (Mōsese 4:2), [naʻá Ne] fonu ʻi he nāunauʻia, ʻaloʻofa mo e moʻoni (vakai, Sione 17:5; Tokāteline mo e Ngaahi Fuakava 93:11). Ka ʻi hono ʻaloʻi Iá, naʻe “fakatokoto ia [ʻe Mele] ʻi he ʻaiʻanga-kai ʻo e manú; koeʻuhí naʻe ʻikai te nau hao ʻi he fale talifonongá” (Luke 2:7). Ko e hā naʻe loto-fiemālie ai ʻa Sīsū Kalaisi ke tali Hono fatongia ko e Fakamoʻuí neongo naʻe ʻuhinga ia ke hāʻele mai ki he māmaní ʻi he ngaahi tūkunga maʻulalo tahá? Ko e tali faingofuá ʻokú Ne ʻofa ʻiate kitautolu. ʻI he mamata ʻa Nīfai ki hono ʻaloʻi ʻo e Fakamoʻuí ʻi ha mata meʻa-hā-maí, naʻá ne fakamoʻoni ʻo pehē, “ko e ʻofa ʻa e ʻOtuá, ʻa ia ʻoku aʻu atu ki he loto ʻo e fānau ʻa e tangatá; ko ia, ʻoku lelei taha ia ʻi he ngaahi meʻa kotoa pē” (1 Nīfai 11:22.

Ko e Kilisimasí ko ha taimi makehe ia ke fakalaulauloto ai ki he founga ʻoku fakahaaʻi ai ʻe he ʻaloʻi mo e feilaulau fakalelei ʻa e Fakamoʻuí ʻa ʻEne ʻofa kiate koé. ʻI hoʻo teuteu ke tokoniʻi e toʻu tupu ʻokú ke akoʻí ke nau ongoʻi e ʻofa ʻa e Fakamoʻuí, fakakaukau ke toe vakaiʻi ʻa e Luke 4:16–21; Sione 3:16–17; 3 Nīfai 27:13–16; pea mo e pōpoaki ʻa ʻEletā D. Toti Kulisitofasoni “Ko e ʻOfa ʻa e ʻOtuá” (Liahona, Nōvema 2021, 16–19).

Ako Fakataha

ʻI he fakaofi atu hoʻo kalasí pe kōlomú ki he fakaʻosinga hoʻomou ako e Fuakava Foʻoú he taʻu ní, te ke lava ʻo kole ki he toʻu tupú ke nau vahevahe ha niʻihi ʻo e ngaahi talanoa manakoa ʻo e Fuakava Foʻoú ʻa ia naʻe fakahaaʻi ai ʻe he Fakamoʻuí ʻEne ʻofa kiate kinautolu ne nau feohí. Te mou lava foki ʻo lau fakataha ha niʻihi ʻo e ngaahi talanoa ko ʻení. Ko e hā ʻoku akoʻi mai ʻe he ngaahi talanoa ko ʻení fekauʻaki mo e ʻofa ʻa e Fakamoʻuí ʻiate kitautolú? Fakaʻaongaʻi e ngaahi ʻekitivitī hangē ko ʻení, ke tokoni atu ke mou toe alēlea lahi ange ai ki he ʻofa ʻa e Fakamoʻuí.

• Fakaafeʻi e kau mēmipa hoʻo kalasí pe kōlomú ke nau fakakaukau ki he ʻofa ʻoku maʻu ʻe he Tamai Hēvaní mo Sīsū Kalaisi maʻatautolú ʻo hangē ha haʻinga matalaʻiʻakau fakaʻofoʻofá (vakai, Russell M. Nelson, “Divine Love,” Ensign, Feb. 2003, 24). ʻE lava ke ke ʻoange ki he tokotaha takitaha ha matalaʻiʻakau kuo kosi mei he laʻipepá pea kole ange ke nau takitaha lau ha taha ʻo e ngaahi potufolofola ʻi he “Ngaahi Maʻuʻanga Tokoni Poupoú.” Kole ange ke nau hiki ʻi heʻenau matalaʻiʻakaú ʻa e meʻa ʻoku nau ako fekauʻaki mo e ʻofa ʻa e Tamai Hēvaní mo Sīsū kiate kitautolú. ʻI heʻenau vahevahe e meʻa ne nau akó, ʻe lava ke nau fakatahatahaʻi ʻenau matalaʻiʻakaú ke faʻu ha haʻinga matalaʻiʻakau. ʻE founga fēfē haʻatau fakatokangaʻi lelei ange ʻa e ngaahi founga ʻoku fakahaaʻi ai ʻe he Tamai Hēvaní mo Sīsū ʻEna ʻofa ʻiate kitautolú?

• ʻOku fakamatalaʻi ʻe ha ngaahi himi ʻe niʻihi ʻa e ngaahi founga ʻoku fakahaaʻi ai ʻe he Fakamoʻuí ʻEne ʻofa kiate kitautolú (hangē ko e, “ʻOku Moʻui Hoku Huhuʻí,” Ngaahi Himi, fika 68). ʻE lava ke fili ʻe he kau mēmipa ʻo e kalasí pe kōlomú ha himi pea vahevahe ha ngaahi aʻusia kuo nau ongoʻi ai e ʻofa ʻa e Fakamoʻuí ʻi ha ngaahi founga ʻoku faitatau mo ia naʻe fakamatalaʻi ʻi he himí. Ko e hā ha ngaahi founga kehe kuo fakahaaʻi ai ʻe he Fakamoʻuí ʻEne ʻofa kiate kitautolú? ʻI heʻetau hoko ko e kau muimui ʻo Kalaisí, te tau tokoni fēfē ki he niʻihi kehé ke nau ongoʻi ʻEne ʻofá?

• ʻOku lahi ha ngaahi fakakaukau hala ʻi he māmaní fekauʻaki mo e ʻofa ʻa e ʻOtuá kiate kitautolú. Hangē ko ʻení, ʻe fakakaukau ha niʻihi ko e taimi ʻoku tuʻumālie pe koloaʻia ai e kakaí, ʻoku ʻuhinga ia ʻoku ʻofa lahi ange ʻa e ʻOtuá ʻiate kinautolu ʻi he niʻihi kehé. Mahalo ʻe ongoʻi ʻe ha niʻihi kapau naʻe ʻofa moʻoni ʻa e ʻOtuá ʻiate kitautolu, te Ne tali kitautolu ʻi he tuʻunga ʻoku tau ʻi aí kae ʻikai kole mai ke tau liliu. Ko e hā ha ngaahi pōpoaki hala fekauʻaki mo e ʻofa ʻa e ʻOtuá kuo tau fanongo ai? Ke lava ke fakafepakiʻi e ngaahi pōpoaki hala ko ʻení, ʻe lava ke ke kole ange ki he toʻu tupú ke nau toe vakaiʻi e pōpoaki ʻa ʻEletā D. Toti Kulisitofasoni “Ko e ʻOfa ʻa e ʻOtuá” pe pōpoaki ʻa Palesiteni Tāleni H. ʻOakesi “ʻOfá mo e Fonó” (Liahona, Nōvema 2009, 26–29). Ko e hā ha ngaahi moʻoni ʻoku tau maʻu ʻi he ngaahi pōpoaki ko ʻení ʻoku tokoni ke mahino e ʻofa ʻa e ʻOtuá ʻiate kitautolú?

ʻE lava ke fakatatau e ʻofa ʻa e Tamai Hēvaní mo Sīsū Kalaisí ki ha haʻinga matalaʻiʻakau fakaʻofoʻofa.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe he ngaahi meʻa ʻoku nau ongoʻí ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Sione 3:16–17; 15:9–13; Loma 8:35–39; Hepelū 12:5–6, 9–11; 1 Nīfai 11:21–23; ʻAlamā 7:11–12; 3 Nīfai 11:13–17; Molonai 7:45–48

• Michael John U. Teh, “Ko Hotau Fakamoʻui Fakatāutahá,” Liahona, Mē 2021, 99–101

• Taniela B. Wakolo, “ʻOku ʻOfa ʻa e ʻOtuá Heʻene Fānaú,” Liahona, Mē 2021, 94–96

Ko e Faiako ʻi he Founga ʻa e Fakamoʻuí

Ko e meʻa kotoa pē naʻe fai ʻe he Fakamoʻuí lolotonga ʻEne ngāue fakafaifekau he māmaní, naʻe fakatupunga ia ʻe he ʻofa — ʻEne ʻofa ki Heʻene Tamaí pea mo ʻEne ʻofa kiate kitautolú kotoa. ʻI heʻetau maʻu e loto ʻofa faka-Kalaisí, te tau fekumi ai ʻi he founga kotoa pē ʻe malavá, ke tokoniʻi e niʻihi kehé ke nau ʻilo kia kalaisi pea haʻu kiate Ia. ʻE hoko ʻa e ʻofá ko e ʻuhinga mo e meʻa te ne fakalotoa ʻetau faiakó.