10 Tīsema

ʻOku Malava Fēfē ʻe Sīsū Kalaisi ʻo Fakahoko e Palani ʻa e Tamai Hēvaní?

Fakahā 1–5

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Kuo tau mātā fēfē nai e toʻukupu ʻo e ʻEikí ʻi heʻetau moʻuí?

• Tokanga kiate kinautolu ʻoku faingataʻaʻiá. Te tau lava fēfē nai ʻo fepoupouʻaki ʻi he ngaahi meʻa ʻoku tau fouá?

• Fakaafeʻi ʻa e tokotaha kotoa pē ke nau maʻu e ongoongoleleí. Te tau fakaʻaongaʻi lelei ange fēfē nai ʻa e tekinolosiá ko ha meʻangāue ke vahevahe ai ʻa e ongoongoleleí?

• Fakatahaʻi ʻa e ngaahi fāmilí ke taʻengata. Ko e hā e meʻa ʻoku tau fakahoko ke tokoni ki hotau ngaahi fāmilí ke nau haʻu kia Kalaisí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Naʻe mamata ʻa Sione Fakahā ʻi ha mata meʻa-hā-mai ki ha tohi naʻe “ʻikai ha tokotaha ʻi he langí, pe ʻi māmani, pe ʻi lalo ʻi māmani” naʻe taau ke ne fakaava, pea naʻá ne tangi ai (vakai, Fakahā 5:3–4). Naʻe fakafofongaʻi ʻe he tohí e “ngaahi ngāue ʻa e ʻOtuá,” kau ai ʻEne palani ki heʻetau moʻui taʻe-faʻa-maté mo e moʻui taʻengatá (vakai, Tokāteline mo e Ngaahi Fuakava 77:6; Mōsese 1:39). Ka ʻi he mata meʻa-hā-mai ʻa Sioné, naʻe maʻu ha Lami naʻe “taau … ke toʻo ʻa e tohí, pea ke vete hono ngaahi meʻa fakamaʻú” (Fakahā 5:9). Naʻe fakatupu ʻe he ongoongo nāunauʻia ko ʻení ha kau ʻāngelo ʻe “toko laui mano ngaahi [toko] mano, mo e ngaahi toko laui afe ngaahi toko afe” ke nau hiva mo kalanga ʻi he fiefia (Fakahā 5:11). Naʻe hanga ʻe Sīsū Kalaisi, ko e Lami ʻa e ʻOtuá, ʻo “huhuʻi [kitautolu] ʻaki [Hono] taʻataʻá ki he ʻOtuá” (Fakahā 5:9) mo fakaʻatā e ngaahi tāpuaki ʻo e palani ʻa ʻetau Tamai Hēvaní.

Fakalaulauloto ki he meʻa kuo fai ʻe Sīsū Kalaisi maʻaú. Kuó ke ongoʻi nai ʻo hangē ko kinautolu ʻi he mata meʻa-hā-mai ʻa Sioné, ʻa ia naʻa nau “fakafoʻohifo … ʻo hū kiate iá”? (Fakahā 5:14). Fakakaukau ki he founga te ke lava ai ʻo tokoni ki he kau mēmipa hoʻo kalasí pe kōlomú ke mahino lelei ange kiate kinautolu ʻa e tefitoʻi fatongia ʻo Sīsū Kalaisi ʻi he palani ʻa e Tamai Hēvaní. Makehe mei he Fakahā 1–5, te ke lava foki ʻo lau ʻa e 2 Nīfai 9; “Ko e Kalaisi Moʻuí: Ko e Fakamoʻoni ʻa e Kau ʻAposetoló” (ChurchofJesusChrist.org); pea mo e pōpoaki ʻa ʻEletā ʻUlise Soalasi “Sīsū Kalaisi: Ko e Tauhi ʻo Hotau Laumālié” (Liahona, Mē 2021, 82–84).

Ako Fakataha

Mahalo ʻe fiefia e kau mēmipa hoʻo kalasí pe kōlomú ʻi haʻanau fakangalingali ko ha kau faʻu filimi faiva kinautolu ʻoku kole ange ke nau faʻu ha faiva ʻo e mata meʻa-hā-mai ʻa Sione ʻi he Fakahā 5. ʻOange ha ngaahi miniti siʻi ke nau toe vakaiʻi ai ʻa e vahé mo fakapapauʻi pe ko e ngaahi konga fē te nau fie fakafaivaiʻi. Ko e hā ʻoku nau ongoʻi ko e ngaahi mōmeniti mālohi tahá? ʻE tokoni fēfē e filimi ko ʻení ke langaki ʻa e tui ki he Fakamoʻuí? Ke hokohoko atu hono tokoniʻi hoʻo kalasí pe kōlomú ke ako fekauʻaki mo e fatongia ʻo Sīsū Kalaisi ʻi he palani ʻo e fakamoʻui ʻa e Tamai Hēvaní, ko ha ngaahi fokotuʻu ʻeni ʻe niʻihi:

• Te ke lava ʻo hiki ʻa e ngaahi ʻuluʻi tohi ko ʻení ʻi he palakipoé: Moʻui ʻi he Maama Fakalaumālié, Moʻui Fakamatelié, mo e Moʻui hili ʻa e Maté. Fakaafeʻi e toʻu tupú ke nau toe vakaiʻi e ngaahi potufolofola ʻi he “Ngaahi Maʻuʻanga Tokoni Poupoú” ke ako e founga ʻoku malava ai e palani ʻa e Tamaí ʻi he ngāue fakafaifekau ʻa e Fakamoʻuí ʻi he maama fakalaumālié, lolotonga ʻEne moʻui fakamatelié, pea mo e hili ʻEne Toetuʻú. ʻE lava ke nau fakamatalaʻi fakanounou e meʻa ʻoku nau akó ʻi lalo ʻi he ngaahi ʻuluʻi tohi ʻi he palakipoé. ʻOange ki he kau mēmipa ʻo hoʻo kalasí pe kōlomú ha faingamālie ke vahevahe ʻenau ngaahi ongo fekauʻaki mo e meʻa kuo fai ʻe he Fakamoʻuí maʻanautolú.

• Ke tokoni ke mahino lelei ange ki he toʻu tupu ʻokú ke akoʻí ʻa e meʻa naʻe fakahoko ʻe Sīsū Kalaisi ke malava ai e palani ʻa e Tamai Hēvaní, tā ha hala ʻi he palakipoé ʻokú ne fakafofongaʻi hotau hala fononga ke foki ki heʻetau Tamai Hēvaní. Tā ha ongo fakafeʻātungia ʻi he halá ʻo fakahingoa ko e mate fakasinó mo e mate fakalaumālié. (ʻO ka fie maʻu, ʻe lava ke lau ʻe he toʻu tupú e ngaahi fakaʻuhinga ʻi he “Mate Fakasino” mo e “Mate Fakalaumālie” ʻi he Fakahinohino ki he Ngaahi Folofolá [scriptures.ChurchofJesusChrist.org]). Kuo fakafaingamālieʻi fēfē nai ʻe he Fakamoʻuí maʻatautolu ke tau lava ʻo ikunaʻi e ongo faingataʻa ko ʻení? (vakai, 2 Nīfai 9:7–10). ʻE lava ke toe vakaiʻi ʻe he toʻu tupú e pōpoaki ʻa ʻEletā ʻUlise Soalasi, “Sīsū Kalaisi: Ko e Tauhi ʻo Hotau Laumālié” pea hiki ha ngaahi sētesi mei he pōpoakí ʻi he tafaʻaki ʻo e hala ʻokú ne fakahaaʻi e founga ʻoku tokoniʻi ai kitautolu ʻe Sīsū ke tau toe foki ki he ʻOtuá.

• ʻI he taimi ʻoku ʻeke mai ai ʻe he kakai kehé ha ngaahi fehuʻi fekauʻaki mo ʻetau tuí mo e ngaahi fili ʻoku tau faí, te tau lava ʻo fakaʻaongaʻi e faingamālié ke vahevahe e ʻuhinga ʻoku mahuʻinga ai ʻa Sīsū Kalaisi kiate kitautolú. Ko e founga ʻe taha ke teuteuʻi ai e toʻu tupú ki he ngaahi faingamālie peheé ko hano fakaafeʻi kinautolu ke nau toe vakaiʻi e pōpoaki ʻa Tieta F. ʻUkitofa “Vakai ki he Tangatá!” (Liahona, Mē 2018, 107–10) ʻo kumi ha ngaahi moʻoni ke vahevahe fekauʻaki mo Sīsū Kalaisi. ʻE lava ke ke hiki ha niʻihi ʻo e ngaahi moʻoni ko ʻení ʻi he palakipoé. ʻE lava ke ke ʻoange ki he toʻu tupú ha taimi ke nau akoako fefakamatalaʻiʻaki ʻa e ʻuhinga ʻoku tau fie maʻu ai ʻa Sīsū Kalaisí mo e founga kuo faitāpuekina ai ʻenau moʻuí koeʻuhí ko ʻenau ʻilo ʻa e Fakamoʻuí.

Ko hono Tutuki ʻo Sīsū Kalaisí, tā fakatātaaʻi ʻe Louise Parker

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe heʻenau ngaahi ueʻi fakalaumālié ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Sione 1:1–3, 10; ʻEta 3:14; Mōsese 4:1–2 (Ko e misiona ʻo e Fakamoʻuí ʻi he maama fakalaumālié)

• Mōsaia 3:5–11; ʻAlamā 7:11–13; Tokāteline mo e Ngaahi Fuakava 19:16–19 (Ko e misiona ʻo e Fakamoʻuí lolotonga ʻEne moʻui ʻi he māmaní)

• Sione 14:2–3; 2 Nīfai 9:15–17; Tokāteline mo e Ngaahi Fuakava 45:3–5; 138:28–31 (Ko e misiona ʻo e Fakamoʻuí hili ʻEne pekiá mo e Toetuʻú)

Ko e Faiako ʻi he Founga ʻa e Fakamoʻuí

Ko e tokotaha kotoa pē ʻi hoʻo kalasí ko ha maʻuʻanga tokoni fungani ia ʻo e fakamoʻoní, ʻiló, mo e taukei ʻi hono moʻuiʻaki e ongoongoleleí. Fakaafeʻi kinautolu ke nau vahevahe atu pea mou felangakihakeʻaki.