26 Nōvema

Te u Lava Fēfē ʻo Tokoniʻi ʻEku Ngaahi Kuí ke Nau Ofi Ange kia Sīsū Kalaisi?

1 mo e 2 Pita

Fealeaʻaki Fakataha

Tataki ʻe ha mēmipa ʻo e kau palesitenisī fakakalasí pe fakakōlomú; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kau Finemuí pe ko e Kaveinga ʻo e Kōlomu ʻo e Lakanga Taulaʻeiki Faka-ʻĒloné. Hili iá, tataki leva ha fealeaʻaki fekauʻaki mo e ngāue ʻo e fakamoʻuí mo e hakeakiʻí ʻo fakaʻaongaʻi ha fehuʻi ʻe taha pe lahi ange mei he ngaahi fehuʻi ʻi laló pe ngaahi fehuʻi pē ʻaʻau (vakai, Tohi Tuʻutuʻuni Fakakātoa, 10.2, 11.2). Palani ha ngaahi founga ke ngāueʻi ai e meʻa ne mou aleaʻí.

• Moʻui ʻaki e ongoongoleleí. Ko e hā ha ngaahi kaveinga kuo aleaʻi ʻe he kau pīsopelikí ʻi heʻetau fakataha alēlea fakauooti ʻa e toʻu tupú? Ko e hā ha meʻa ʻe lava ke tau fakahoko fakakalasi pe fakakōlomu ʻo makatuʻunga ʻi he ngaahi fealeaʻaki ko iá?

• Tokanga kiate kinautolu ʻoku faingataʻaʻiá. Te tau tokoniʻi fēfē nai ʻa e kakaí ʻi ha ngaahi founga faka-Kalaisi ʻi he taimi ʻoku tau vakai ai ki ha fiemaʻu ka ʻoku ʻikai ke tau ʻilo ʻa e meʻa ke lea ʻakí?

• Fakaafeʻi ʻa e tokotaha kotoa pē ke nau maʻu e ongoongoleleí. Ko e hā ha meʻa kuo tau maʻu ʻi he ongoongolelei ʻo Sīsū Kalaisí ʻokú ne ʻomi ʻa e fiefiá? Te tau lava fēfē nai ke vahevahe ʻa e fiefia ko iá mo e niʻihi kehé?

• Fakatahaʻi ʻa e ngaahi fāmilí ke taʻengata. Ko e hā ha meʻa ʻoku tau fakahoko ke fekumi ai ki he ngaahi hingoa ʻo ʻetau ngaahi kui ʻoku nau fie maʻu ʻa e ngaahi ouau fakatemipalé? Ko e hā ha meʻa ʻe lava ke tau fakahoko ke tokoni ai ki he niʻihi kehé ke nau fekumi ki he ngaahi hingoa ʻo ʻenau ngaahi kuí?

ʻI he fakaʻosinga ʻo e lēsoní, fakahoko e ngaahi meʻa ko ʻení, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kalasí pe kōlomú fekauʻaki mo e ngaahi palani mo e fakaafe naʻe fakahoko ʻi he lolotonga e fakatahá.

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Ko e hā ʻoku hoko ki he kakai ʻe lauipiliona ʻoku mate taʻe ʻi ai ha faingamālie moʻoni ke fanongo ki he ongoongolelei ʻo Sīsū Kalaisí pe maʻu e ngaahi ouau fakamoʻuí? Te tau lava ʻo maʻu ha ngaahi tokoni ki ha tali ʻi he 1 Pita 3:18–20; 4:6, ʻa ia naʻe lea ai ʻa Pita ki hono malangaʻi ʻo e ongoongoleleí ki he kau pekiá. ʻOku ʻomi leva ʻe he Tokāteline mo e Ngaahi Fuakava 138 ʻa e moʻoni kakató—ʻe lava ke haʻu kakato ʻetau ngaahi kuí kia Kalaisi ʻo kapau te nau tui kiate Ia mo tali ʻEne ongoongoleleí pea ʻoku tau fakaʻatā ʻa e ngaahi ouaú kiate kinautolu ʻi he temipalé. ʻOku fie maʻu ʻe he tāpuaki ko ʻení kitautolu—ʻa honau hako ʻoku nau maʻu ʻa e ongoongoleleí—ke fekumi ki honau ngaahi hingoá, ʻalu ki he temipalé, pea maʻu e ngaahi ouau fakamoʻuí maʻanautolu.

Ko e hā ha ngaahi meʻa kuó ke aʻusia ʻi hoʻo tokoniʻi hoʻo ngaahi kuí ke nau omi ʻo ofi ange kia Kalaisí? Te ke tokoniʻi fēfē ʻa kinautolu ʻokú ke akoʻí ke nau fiefia ange ʻi he hisitōlia fakafāmilí mo e ngāue fakatemipalé pea maʻu ha loto falala lahi ange ʻi heʻenau malava ke fai iá? ʻI hoʻo teuteú, te ke lava ʻo lau e pōpoaki ʻa ʻEletā Teili G. Lenilani “Hisitōlia Fakafāmilí mo e Ngāue Fakatemipalé: Silá mo e Fakamoʻuí” (Liahona, Mē 2018, 46–49).

Ako Fakataha

ʻE tali fēfē nai ʻe he kau mēmipa hoʻo kalasí pe kōlomú ha fifili ʻa ha taha fekauʻaki mo e founga ʻe lava ke fakahaofi ai ha kakai lelei naʻe ʻikai ke nau maʻu ha faingamālie ke maʻu ʻa e ongoongoleleí? Ko e hā ʻoku nau maʻu ʻi he 1 Pita 3:18–20; 4:6 ke tokoni ke tali e fehuʻi ko ʻení?   ʻE lava ke hoko atu hoʻomou fealēleaʻakí ʻaki ha ʻekitivitī ʻe taha pe lahi ange ʻi he ngaahi ʻekitivitī ko ʻení.

• ʻOku makehe ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e tokāteline ʻo hono huhuʻi ʻo e kau pekiá. Fakaafeʻi ʻa e kau mēmipa ʻo e kalasí pe kōlomú ke nau ako fakafoʻituitui pe fakakulupu ʻa e Tokāteline mo e Ngaahi Fuakava 138:25–39 pea vahevahe ʻa e meʻa ʻoku nau akó (vakai ki he, ““Ngaahi Maʻuʻanga Tokoni Poupoú” ki ha ngaahi potufolofola kehe ʻi he tefito ko ʻení). Ko e hā ʻoku akoʻi mai ʻe he ngaahi potufolofola ko ʻení fekauʻaki mo e ongo ʻa e Tamai Hēvaní ki Heʻene fānaú kotoa? ʻOku tokoniʻi fēfē ʻetau ngaahi kuí ʻe he papitaiso maʻá e pekiá ke nau ofi ange kia Kalaisi? ʻOku tokoni fēfē ia ke tau toe ofi ange ai kia Kalaisi mo fakatupulaki ʻetau tui kiate Iá?

• Ko e hā te ne ala ueʻi fakalaumālie e toʻu tupú ke nau kau lahi ange ki he ngāue fakatemipalé mo e hisitōlia fakafāmilí? ʻE lava ke nau mamataʻi ha foʻi vitiō ʻe taha pe fakatoloua ʻo e ongo foʻi vitiō ʻoku maʻu ʻi he “Ngaahi Maʻuʻanga Tokoni Poupoú” pea kumi ha ngaahi founga ʻe lava ke faitāpuekina ai kinautolu ʻe he ngāue fakatemipalé mo e hisitōlia fakafāmilí. Te nau lava foki ʻo fekumi ki he ngaahi tāpuaki kuo talaʻofa mai ʻi he lisi ʻi he pōpoaki ʻa Teila G. Lenilani ko e “Hisitōlia Fakafāmilí mo e Ngāue Fakatemipalé: Silá mo e Fakamoʻuí.” Fakaafeʻi kinautolu ke vahevahe pe ko e ngaahi tāpuaki fē ʻoku mahuʻingamālie kiate kinautolú mo hono ʻuhingá. ʻE lava foki ke mou aleaʻi ha niʻihi ʻo e ngaahi faingataʻa te ne ala taʻofi kitautolu mei heʻetau kau atu ki he ngāue fakatemipalé mo e hisitōlia fakafāmilí. ‘E tokoniʻi fēfē kitautolu ʻe he Fakamoʻuí ke tau ikunaʻi e ngaahi faingataʻa ko ʻení?

• Kapau ʻoku maʻu ʻe he kau mēmipa hoʻo kalasí pe kōlomú ha ngaahi naunau fakaʻilekitulōnika, ʻe lava ke mou fakaʻaongaʻi ha taimi ke fakahaaʻi kiate kinautolu e founga kuo fakafaingofuaʻi ange ai ʻe he ʻEikí hono kumi e ngaahi kui ʻoku nau fie maʻu e ngaahi ouau fakamoʻuí (vakai, “Ngaahi Maʻuʻanga Tokoni Poupoú”). Te ke lava ʻo fakaafeʻi ha faifaleʻi fakauooti ki he temipalé mo e hisitōlia fakafāmilí ke tokoni ke fakamahino ki he toʻu tupú ʻa e ngaahi maʻuʻanga tokoni ko ʻení. Te ke lava foki ʻo poupouʻi e toʻu tupú ke nau faʻu ha palani ke vakaiʻi e ngaahi maʻuʻanga tokoni ko ʻení ʻi ʻapi pea lipooti mai ʻi ha kalasi he kahaʻú.

ʻI heʻetau fakahoko e ngaahi ouau toputapu ʻi he temipalé, ʻoku tau tokoni ai ke fakaʻatā ʻa e ngaahi tāpuaki ʻo e ongoongoleleí kiate kinautolu kuo pekiá.

Ngāue ʻi he Tui

Poupouʻi e kau mēmipa ʻo e kalasí pe kōlomú ke nau fakalaulauloto mo lekooti ʻa e meʻa te nau fakahoko ke ngāueʻi ai e ngaahi ongo ne nau maʻu ʻi he ʻaho ní. ʻE lava ke nau vahevahe ʻenau ngaahi fakakaukaú, ʻo kapau te nau loto ki ai. Fakaafeʻi ke nau fakakaukau ki he founga ʻe fakamālohia ai ʻe ngaahi ongo ʻoku nau maʻú ʻa honau vā fetuʻutaki mo e Tamai Hēvaní mo Sīsū Kalaisí.

Ngaahi Maʻuʻanga Tokoni Poupoú

• Malakai 4:5–6; Mātiu 16:18–19; Sione 5:25; 1 Kolinitō 15:29; Tokāteline mo e Ngaahi Fuakava 137:7–9 (Ko e tokāteline ʻo e huhuʻí maʻá e pekiá)

• Polokalama ʻAkau Fakafāmilí (fie maʻu e toʻu tupú ke nau hū ki heʻenau ʻakauni he Siasí)

• RootsTech (ʻE lava ke fekumi e toʻu tupú ʻi he ngaahi fakatahaʻanga mei he ngaahi konifelenisi ʻi he ʻinitanetí.)

• FamilySearch.org (ʻE lava ke ke ʻaʻahi ki he FamilySearch.org/discovery ʻo mou fekumi fakataha ʻi he ngaahi ʻekitivitī ko ʻení.)

Ko e Faiako ʻi he Founga ʻa e Fakamoʻuí

ʻI hoʻo fakaafeʻi e toʻu tupú ke nau faiakó, toʻo ha kiʻi taimi ke tokoni ai ke nau teuteu feʻungá. Fakamatalaʻi e meʻa ʻokú ke fai ke teuteu ke faiakó. ʻI he foungá ni, he ʻikai ngata pē ʻi hoʻo tokoni ki he toʻu tupú ʻi ha lēsoni ʻe tahá, ka ʻi he toenga ʻo ʻene moʻuí ke akoʻi ʻa e ongoongoleleí ʻi he founga ʻa e Fakamoʻuí.