yang man i stap ridim ol skripja

Stap Yusum Kam Folem Mi—Blong Ol Kworom blong Aronik Prishud mo Ol Yang Woman Klas

?Wanem Nao Ol Stamba Tingting blong Ol Klas mo Ol Kworom Miting blong Yumi?

Lod i bin givim yu wan tabu tras: Hem i bin singaotem yu blong wok long wan Yang Woman klas presidensi, o long wan Aronik Prishud kworom presidensi. Pat blong responsabiliti blong yu i blong lidim mo kondaktem klas mo kworom miting blong yu long Sandei. Blong mekem hemia, bae i helpem yu blong andastanem from wanem yumi gat ol miting ia.

Ol Yang Woman klas mo ol Aronik Prishud kworom miting oli defren long ol klas blong Jos olsem Sandei Skul o seminari. Insaed long ol miting blong klas o blong kworom, yumi lan abaot wok we God i bin givim long yumi, mo yumi oganaesem ol memba blong kworom blong yumi o klas blong mekem wok ia long ol hom blong yumi, insaed long Jos, mo long ol komuniti blong yumi. Long ol miting ia, yumi no stap toktok abaot wok nomo, yumi mekem ol plan blong fulfilim ol rol blong yumi olsem pat blong yut ami blong Lod blong help blong karem Isrel i kam tugeta.

ol yang woman oli stap long klas

Long ol klas o ol kworom miting, yumi stap mekem ol plan blong mekem ol rol blong yumi olsem pat blong yut ami blong Lod.

Blong tokbaot plante wok ia, i no minim se yumi lego ol storian long saed blong doktrin i stap blong Sandei Skul nomo. Wanem i tru, i we, blong stap lanem doktrin long ol Yang Woman klas, mo miting blong kworom blong Aronik Prishud i wan mas—hem i helpem yumi blong mekem rilesensip blong yumi wetem Jisas Kraes i kam strong moa, i mekem yumi andastanem moa plan ia blong Papa long Heven, mo i mekem yumi tekpat moa long wok blong Tufala. Taem yumi stadi gospel tugeta, ol trutok we yumi stap lanem oli save jenisim hat blong yumi, mo helpem yumi save olsem wanem blong mekem samting long ol wei we oli moa olsem hemia blong Kraes. Yumi save kasem ol kwaet toktok blong Spirit abaot ol wei blong kam antap moa “long bodi mo long waes. Mo oltaem God i glad tumas mo ol man tu oli glad tumas” (Luk 2:52 Taem yumi stap kam blong jenisim moa laef blong yumi i go long Jisas Kraes mo gospel blong Hem, bambae yumi faenem glad mo bambae yumi filim se yumi wantem helpem ol narawan folem kavenan rod ia.

?Huia Bae I Stap Lidim Ol Miting Ia?

God i bin singaotem yufala olsem ol kworom mo klas presidensi mo i bin givim atoriti long yufala blong lidim ol yut. Hemia i from wanem wan memba blong kworom o blong klas presidensi blong yu i mas lidim wanwan miting blong kworom o blong klas. Ol adalt lida oli mas soem rod mo givim sapot, be oli no mas tekova long yufala. Luk long seksen we taetol blong hem “Kaonsel Tugeta” long stat blong wanwan aotlaen long risos ia blong luk ol aedia blong helpem yufala blong save olsem wanem blong lidim wan miting mo winim ol stret stamba tingting blong hem. Yusum ol presidensi miting blong mekem plan blong wei blong lidim ol Sandei miting ia.

?Huia I Mas Tijim Lesen Ia?

Ol adalt lida, wan memba blong klas o kworom presidensi, o eni nara memba blong klas o kworom i save tijim ol lesen ia. Olsem klas o kworom presidensi, kaonsel wetem ol adalt lida blong yu abaot huia bae yu givim wok ia blong tijim ol lesen ia. Tingbaot se ol adalt lida blong yu oli gat fulap blong givim. Lukaotem blong lan aot long ol eksperiens mo testemoni blong olgeta. I gat ol gudfala saed blong stap askem ol yut blong tij—blong stap tij, i save help blong mekem jenis long hat blong olgeta i kam moa dip, mo i save help blong bildim wan rilesensip we i moa strong wetem ol nara memba blong klas o kworom. Givim olgeta ol stret janis blong tijim evri pat o pat blong wan lesen, be tingbaot ol nid blong ol pipol long klas o kworom blong yu, mo tingbaot hamas oli save mekem. Eksampol, ol adalt lida oli save tij fulap moa insaed long ol klas o kworom wetem ol yangfala yut o wetem ol yut we oli no gat tumas eksperiens blong stap tijim gospel. Taem oli invaetem ol yut blong tij, wan mama o papa o wan adalt advaesa i mas helpem olgeta blong rere olsem we i nid.

Olgeta we oli givim wok long olgeta blong tij oli save yusum seksen we taetol blong hem “Stap Tijim Doktrin” long wanwan aotlaen long risos ia blong helpem olgeta blong rere. Insaed long seksen ia i gat ol tingting blong stap tij folem, mo blong stap storian raon long doktrin blong wik ia, be ol tija oli no mas filim se oli mas yusum ol tingting ia nomo. Olsem we Spirit i stap talem, ol tija oli save stretem ol aedia o yusum ol aedia blong olgetawan blong tij long wan wei we bae i mitim ol nid blong ol memba blong klas o blong kworom, mo helpem olgeta blong andastanem mo praktisim doktrin.

?Wijwan Doktrin Topik Nao Bae Yumi Toktok Raon long Ol Insaed long Ol Miting blong Yumi?

Topik blong wanwan aotlaen blong wik i wan doktrin prinsipol we oli bin jusum blong go wetem riding long Niu Testeman blong wik ia, we yu save faenem long Kam Folem Mi—Blong Wanwan Man, Woman mo Famli. Long wei ia, ol storian blong doktrin long ol miting blong klas o kworom bae oli sapotem wanem ol yut oli stap lanem long hom.

Nomata oli sapos blong tijim ol aotlaen ia long ol spesifik Sandei, yufala i save storian raon long ol nara doktrin topik folem ol nid blong klas o kworom blong yu.

Risos ia, insaed long hem i gat ol aotlaen blong evri wik taem i gat miting blong ol klas blong Ol Yang Woman mo miting blong Kworom blong Aronik Prishud. Wanwan taem, maet bae yu nidim blong skipim wan lesen from ol stek konfrens o ol narafala risen.

?Wanem Nao I Rol blong Ol Adalt Lida blong Yumi?

Ol adalt lida blong yufala oli gat wan impoten rol insaed long ol klas blong Ol Yang Woman mo Ol Kworom blong Aronik Prishud. Bae oli gaedem mo advaesem yu long ol lidasip koling blong yu. Bae oli sapotem mo leftemap tingting blong yu taem yu stap mekem wok blong klas o kworom blong yu. Bae oli tijim yu doktrin, mo bae oli blesem yu tru long eksampol, eksperiens mo testemoni blong olgeta.