Meri i bin talem wan strong testemoni abaot misin blong Sevya (luk long Luk 1:46–55). Folem Toktok blong Yu, i kam long Elspeth Young

8 Jenuware

?Olsem Wanem Mi Save Blesem Ol Narawan wetem Testemoni blong Mi Abaot Jisas Kraes?

Matiu 1; Luk 1

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, o toktok raon long wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save mekem o talem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Semmak olsem Ol Jiu we oli fetful tru, long taem blong hem, Meri i bin wantem tumas mo i bin stap wet se bae Mesaea i kam. Afta we wan enjel i talem long hem se, bae i no longtaem hemia bae i hapen—mo bae hem i mama blong Ridima ia we oli tokbaot long promes—nao Meri i bin talem wan naes testemoni abaot “God, Sevya blong mi.” Testemoni ia, oli raetemdaon long Luk 1:46–55, mo plante Kristin man raon long wol oli laekem. Taem yu stap ridim ol ves ia, tingting ol pipol insaed long klas o insaed long kworom blong yu. Olgeta, olsem Meri, oli stap rere from taem ia we bae Jisas Kraes i kam—be naoia, from Seken Kaming blong Hem we i gat glori. Mo tu, semmak olsem Meri, testemoni blong olgeta i save gat wan strong paoa long bilif blong olgeta we oli stap raonabaot long olgeta.

?Olsem wanem nao ol pipol we yu stap tijim oli filim abaot Jisas Kraes? ?Olsem wanem testemoni blong olgeta abaot Hem i save blesem ol narawan? Taem yu stap rere blong tij, maet bae yu wantem stadi tu long 2 Nifae 25:23–26 mo mesej blong Elda Neil L. Andersen: “Yumi Tokbaot Kraes” (Liahona, Nov 2020, 88–91).

Stap Lan Tugeta

Wan gudfala wei blong helpem ol yut blong oli tingting abaot testemoni blong olgeta abaot Jisas Kraes, i blong, tugeta, yufala i luklukgud long testemoni blong Meri we i stap long Luk 1:46–55. Maet oli save serem, bitwin olgeta, ol nara sentens we oli tokbaot wanem nao Meri i bin biliv long hem, mo wanem nao hem i bin filim abaot Sevya. ?Wijwan long ol sentens ia tu i tokbaot olsem wanem yumi stap filim abaot Hem? Eksampol: ?Wanem nao i mekem se spirit blong yumi wanwan i “glad tumas from God ya ? (ves 47). ?Wanem nao ol bigfala samting we Hem i “mekem i gud tumas” long yumi? (ves 49). ?Olsem wanem nao Hem i soem se Hem i gat paoa insaed long laef blong yumi? (luk long ves 51). Ol aktiviti aedia we oli stap andanit ia, oli save lidim yufala blong storian abaot wei we, testemoni blong yumi abaot Kraes, i save blesem ol narawan.

• Mesej blong Elda Neil L. Andersen, “Yumi Tokbaot Kraes” i stap helpem yumi blong eksplenem from wanem yumi mas tokbaot Sevya wetem moa open hat—mo olsem wanem yumi save mekem hemia. Tugeta, yufala i save ridim samfala pat blong mesej blong Elda Andersen. Ol memba blong klas o kworom oli save toktok raon long ol risen we hem i givim long saed blong fasin blong serem testemoni blong yumi abaot Jisas Kraes, mo yufala i save toktok raon tu long kaonsel blong hem abaot wei blong mekem hemia. ?Wanem sam spesifik samting we yumi save mekem blong tokbaot Kraes wetem moa open hat mo tingting?

• Olsem ol memba blong Jos Ia blong Jisas Kraes blong Ol Lata-dei Sent, yumi save ol impoten trutok abaot Jisas Kraes, mo yumi save serem olgeta trutok ia. ?Olsem wanem nao bae yu helpem ol yut oli tingting abaot ol trutok ia? Yu save askem olgeta blong stadi long “Kraes we I Stap Laef: Testemoni blong Olgeta Aposol.” Oli save stadi olgetawan, o long ol grup, mo oli lukaotem ol ansa long kwestin ia: “?Wanem trutok abaot Sevya nao we oli gat wan spesel mining long yu?” Askem olgeta blong serem ol trutok we oli faenem, mo blong oli eksplenem from wanem ol trutok ia oli gat mining long olgeta. Oli save serem ol skripja, mo oli save serem eksperiens blong olgeta taem oli stap mekem hemia. Afta, oli save toktok raon mo jusum se wijwan trutok nao abaot Sevya oli save serem long sosol media; oli save serem wetem wan fren we i gat hadtaem blong kasem wan testemoni, o wetem wan we i no memba blong Jos blong yumi.

• Antap long Luk 1:46–55, insaed long ol skripja, i gat plante nara ves we oli save givim insperesen long yumi blong stap serem wanem we yumi save abaot Jisas Kraes. I gat sam eksampol we oli stap long “Sam Moa Risos.” Tingting blong stap ridim ol skripja ia tugeta. ?Wanem nao ol skripja ia oli stap tijim yumi abaot wei blong serem testemoni blong yumi abaot Jisas Kraes wetem ol nara man? ?Wanem moa yumi lanem aot long ol ves ia? O memba blong klas o blong kworom oli save serem tu sam samting we oli bin lanem aot long ol pipol we oli save, we oli bin serem, wetem open hat mo tingting, abaot bilif blong olgeta long Jisas Kraes.

Taem yumi stap lan blong save mo lavem Sevya, yumi faenem ol wei blong serem testemoni blong yumi abaot Hem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 5:14–16; 1 Pita 3:15; 2 Nifae 25:26; Alma 5:43–50; Doktrin mo Ol Kavenan 100:5–8

• Russell M. Nelson, “Let Your Faith Show” (Liahona, May 2014, 29–31)

• Cristina B. Franco, “Hiling Han blong Sevya,” (Liahona, Nov 2019, 90–93)

Tij Folem Wei blong Sevya

Blong stap askem ol kwestin we oli leftemap tingting blong olgeta we oli stap lan blong talem testemoni blong olgeta, i wan wei we i gat paoa blong stap invaetem Spirit. Maet bae yu askem ol kwestin olsem: “?Olsem wanem nao yu kam blong save se Jisas Kraes i bin pem praes from ol sin blong yu?” o “?Olsem wanem nao yu yu kam blong talem tangkyu from samting ia we Sevya i bin mekem blong yumi long Getsemane?”