Yufala I Laet blong Wol, i kam long Simon Dewey

22 Jenuware

?Olsem Wanem Nao Jisas Kraes I Wan Laet Insaed long Laef blong Mi?

Jon 1

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi save filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol nara memba blong famli o fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren, be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Aposol Jon i bin statem Gospel blong hem taem hem i bin stap komperem Jisas Kraes long wan laet we i “stap saen long tudak” (Jon 1:5). Ol memba blong klas o blong kworom blong yu, oli stap groap long wan taem we i gat tudak long saed blong spirit. Be tu, i wan taem we “gudfala laet” blong Sevya i saen i stap, i rere blong helpem olgeta blong oli luk rod i klia, mo blong oli save faenem rod blong olgeta (1 Pita 2:9).

Taem yu stap ridim Jon 1 long wik ia, tingting hevi long, from wanem laet ia i wan mas long laef blong yu, mo olsem wanem nao Sevya i wan laet insaed long laef blong yu (luk tu long Joseph Smith Translation, John 1:1–34 [insaed long Bible appendix]). ?Olsem wanem laet blong Hem i save blesem olgeta we yu stap tijim? ?Olsem wanem yu save givim insperesen long olgeta blong oli wokbaot long laet blong Hem? Blong helpem yu blong tingting hevi long ol kwestin ia, maet bae yu wantem stadi long Doktrin mo Ol Kavenan 88:5–13, 67; 93:2–9 mo mesej blong Sista Sharon Eubank: “Kraes: Laet Ia we I Stap Saen long Tudak” (Liahona, Mei 2019, 73–76).

Stap Lan Tugeta

Plante taem, hem i help blong statem toktok storian blong yu taem yu givim wan janis long klas o long kworom blong yu blong oli tokbaot wanem oli bin stap lanem aot long ol skripja stadi blong olgeta. Eksampol: long wik ia, yu save askem olgeta blong oli serem wan toktok, o wan sentens we i stap long Jon 1:1–17 we i stap tijim wan samting long olgeta abaot Sevya. Letem olgeta oli tokabaot from wanem oli jusum toktok ia, o sentens ia, mo wanem nao hemia i stap tijim olgeta abaot Jisas Kraes. Serem wetem olgeta olsem wanem Jisas Kraes i wan laet insaed long laef blong yu. Ol aktiviti andanit ia oli save helpem yu blong gohed long toktok storian blong yu.

• Blong helpem olgeta we yu stap tijim blong oli laekem mo talem tangkyu from laet blong Sevya, maet wan memba blong klas o wan memba blong kworom i save serem se, i olsem wanem blong stap insaed long tudak. I gat wan stori we i save help, we i stap long stat blong mesej blong Elda Timothy J. Dyches: “Laet I Folem Laet” (Liahona, Mei 2021, 112–15). ?From wanem nao, samtaem, ol pipol oli fraet long tudak? ?From wanem nao yumi nidim laet? ?From wanem, Jisas Kraes, oli stap singaotem Hem se Hem i Laet blong Wol? Yu save askem ol yut blong oli stadi long mesej blong Elda Dyches we i stat wetem: “Bae mi askem se, ating, hemia i taem blong askem yuwan.” Oli save luklukgud long wanem yumi save mekem blong tekem laet blong Sevya i kam saen fulwan moa insaed long laef blong yumi.

• Ol skripja we oli putum lis anda long “Ol Sapot Risos,” oli save helpem klas o kworom blong yu blong i andastanem gud moa laet ia we Jisas Kraes i gat blong givim. Olsem wan klas, maet bae yufala i save ridim mo toktok raon long samfala long ol fas set blong skripja. Afta, raetem: Olsem wanem yumi save tekem laef blong Sevya i go insaed long laef blong ol nara man? Raetem hemia long bod, mo invaetem ol yut blong oli raetem wan lis blong ol ansa we oli faenem long nambatu set blong ol skripja. Yu save putum ol yut oli sidaon tutu, mo askem olgeta blong oli serem long tufala olsem wanem Jisas Kraes i bin stap olsem wan laet insaed long laef blong olgeta.

• Sista Sharon Eubank i bin talem: “Wan long ol stamba nid we yumi gat blong save gro, i blong joen i stap wetem stamba blong laet —we i Jisas Kraes” (“Kraes: Laet Ia we I Stap Saen long Tudak,” 73). Maet bae yu save soemaot hemia wetem wan lesen we yu yusum wan samting long hem—maet yu save soem wan tojlaet, o wan mobaelfon mo toktok raon long risen, from wanem, paoa tul ia i impoten. Ol memba blong klas o blong kworom, oli save luklukbak long mesej blong Sista Eubank, mo oli save lukaotem ol wei we Setan i stap traem blong “katemaot paoa saplae blong yumi.” ?Olsem wanem nao yumi kipim yumi i joen strong long Jisas Kraes? ?Wanem kaonsel o advaes nao yumi faenem insaed long mesej blong Sista Eubank?

• Ol hym, olsem: “The Lord Is My Light” mo “Lead, Kindly Light” (Hymns, ol namba 89, 97) oli stap testifae se Jisas Kraes i laet blong yumi. Tingting blong singsing tugeta long ol singsing ia ( o sam narawan moa we yu save) mo faenemaot ol toktok, o ol sentens we oli stap tijim yumi olsem wanem Jisas Kraes i stap olsem wan laet. ?Olsem wanem ol narawan oli tekem laet blong Sevya i kam insaed long laef blong yumi? ?Olsem wanem nao yumi save serem laet ia blong Hem wetem ol narafala man?

Wan Presen we I Laet, i kam long Eva Timothy

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Ol Sam 27:1; Aesea 60:19–20; Jon 8:12; 3 Nifae 18:16, 24 (Sevya i wan laet)

• Ol Proveb 4:18–19; 1 Jon 2:8–11; Doktrin mo Ol Kavenan 50:23–24; 93:26–28; 138:20–24 (Olsem wanem yumi save tekem laet blong Sevya i kam insaed long laef blong yumi)

• “Patterns of Light: The Light of Christ” (vidio), ChurchofJesusChrist.org

Tij Folem Wei blong Sevya

Sapos yu rili lukluk long wanem i stap hapen insaed long laef blong ol memba blong klas, o blong kworom blong yu, bambae yu faenem ol gudfala janis blong tij. Ol tingting we olgeta we oli lan oli givim, o ol kwestin we oli askem, oli save kam ol janis blong save tij.