Long Wel, i kam long Crystal Suzanne

Long Wel, i kam long Crystal Suzanne

12 Febwari

?Olsem Wanem Mi Save Kam Antap long Fasin we Mi Mi Stap Wosipim God?

Jon 2–4

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao bae yumi ansarem ol kwestin blong ol fren blong yumi abaot Jos long wan wei we i bildimap fet blong olgeta long Sevya?

• Joenem ol famli blong taem we i no save finis. ?Wanem nao samfala wei we yumi save toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Woman Sameria ia we oli tokbaot long Jon 4, maet i stap go long wel plante taem. Be tetaem ia, i bin defren. Hem i mitim wan man Jiu we i bin askem wota long hem blong dring. Taem ia nomo, i no wan taem olsem oltaem, from se Ol Jiu oli no stap go kolosap long Ol Man Sameria. Be i gat wan nara samting we i no bin semmak wetem man ia. From se maet Hem i mas wan profet, woman Sameria ia i bin askem hem ol kwestin abaot fasin blong wosip long God. ?Weswe? ?I oraet long tetaem ia blong man i stap wosipim God long Sameria? O, ol pipol oli mas wosip long Jerusalem, olsem we Ol Jiu oli stap klemem? (luk long Jon 4:19–20 Man ia i eksplenem se, ples we yumi stap wosip long hem, i no impoten bitim wei we yumi stap wosip: “I gat taem i stap kam, yes, taem ya i kam finis, we Spirit blong God bambae i givhan long ol man we oli stap mekem wosip long Papa blong yumi, blong oli save mekem long fasin we oli savegud se hem i tru God. Fasin ya nao, Papa blong yumi i wantem blong yumi mekem wosip long hem” (Jon 4:23). Afta, man ia i talem long hem se huia Hem—Hem i bin Kraes, Sevya blong wol ia (luk long Jon 4:25–26).

?Olsem wanem? ?Ol yut ia we yu stap tijim, oli andastanem se i minim wanem blong wosip long Papa long Heven? Antap long taem blong wosip long jos (luk long Doktrin mo Ol Kavenan 59:9–10), ?wanem nara janis nao ol yut oli gat blong save wosipim Hem,? mo hemia i save tekem tu ol taem we oli no luksave se i wan taem blong stap wosip. Olgeta risos ia oli save helpem yu blong rere blong tijim olgeta abaot wei blong mekem gud moa long fasin blong olgeta blong wosipim God: Ol Sam 95:1–7; Matiu 4:8–10; Alma 32:4–11; Doktrin mo Ol Kavenan 20:17–19; 93:19–20, mo mesej blong Bisop Dean M. Davies: “Ol Blesing blong Wosip” (Jeneral Konfrens, Okt 2016, ChurchofJesusChrist.org/general-conference/conferences?lang=bis).

Stap Lan Tugeta

Blong statem wan toktok storian abaot fasin blong mekem wosip i kam gud moa, yu save invaetem ol memba blong klas, o blong kworom, blong wanwan i luklukbak long Jon 4:19–26 mo givim ol ansa long ol kwestin olsem olgeta ia: ?From wanem nao mi mi stap wosipim God? Long mi, ?hem i minim wanem blong stap wosipim God? Bae i save help tu blong, tugeta, yufala i luklukbak long mining blong toktok ia we i stap anda long “Wosip” insaed long Gaed long Ol Skripja (olskripja.ChurchofJesusChrist.org). Afta we oli bin gat taem blong tingting hevi long ol kwestin ia, invaetem olgeta blong serem ol tingting blong olgeta. Olgeta aktiviti ia oli save helpem olgeta blong kasem ol kwaet toktok blong Tabu Spirit.

• Ol memba blong klas o blong kworom blong yu bae oli gat ol gudfala tingting abaot mining blong stap wosipim God. Yu save askem olgeta blong serem wan eksperiens abaot wan taem we oli bin filim se oli stap wosipim God. Ol skripja olsem olgeta ia we oli kam afta, oli save mekem se oli andastanem moa samting, mo i save givim olgeta moa aedia abaot wei blong stap mekem wosip blong olgeta long God, i gat moa mining: Ol Sam 95:1–7; Matiu 4:8–10; Alma 32:4–11; Doktrin mo Ol Kavenan 20:17–19; 93:19–20. Mo tu, oli save toktok raon long toktok we i kam long Elda Bruce R. McConkie, we i stap long “Ol Sapot Risos.”

• Blong helpem ol yut blong oli kam antap long wei we oli stap wosip long God, tingting blong raetem ol heding ia long bod: Hu, From Wanem, Weaples, mo Hao. Askem olgeta blong oli luklukbak long ol skripja we oli putum long lis insaed long “Wosip,” insaed long Gaed long Ol Skripja (olskripja.ChurchofJesusChrist.org), mo lukaotem ol ves we oli helpem olgeta blong oli andastanem huia, from wanem, weaples, mo hao yumi sapos blong wosip. Taem oli stap faenem wan ves we i go wetem, invaetem olgeta blong toktok raon long hemia wetem klas o wetem kworom, mo raetemdaon refrens anda long stret heding. Leftemap tingting blong olgeta blong oli serem ol eksperiens we oli bin filim se oli stap kolosap long God tru long fasin blong wosip.

• Mesej blong Bisop Dean M. Davies: “Ol Blesing blong Wosip” i tekem plante eksampol blong ol pipol we oli stap wosip long God. Tugeta, yufala i save ridim seksen ia: “?Wanem Ia Wosip?” Afta, wanwan i save luklukbak long wan long ol eksampol blong ol pipol we oli stap wosip we i stap long ol nara trifala seksen afta long hemia, insaed long mesej ia. ?Wanem nao wanwan long ol eksampol ia i stap tijim yumi abaot fasin blong wosip long God? ?Wanem nao las pat blong mesej ia i stap tijim yumi abaot ol blesing we oli stap kam taem yumi stap wosipim Hem wetem ful tingting mo hat blong yumi? ?Wanem insperesen nao yumi kasem blong kam antap long wosip blong yumi long God?

yang man i stap rid

Blong wosip, hem i minim tu blong stap stadi long ol skripja mo ol nara praktis we oli soem we yu givim tingting mo hat blong yu long God, mo yu gat lav long God.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• “Elements of Worship,” Teachings of Presidents of the Church: David O. McKay (2003), 29–37

• Donald L. Hallstrom, “The Conversion of the Children of God” (Seminaries and Institutes of Religion broadcast, June 13, 2017), broadcasts.ChurchofJesusChrist.org

• Elda Bruce R. McConkie i tijim: “Tru wosip mo wosip we i stret evriwan, i blong stap folem ol step o wokbaot blong Pikinini blong God; hem i blong stap obei long ol komanmen, mo stap obei long tingting blong Papa i go kasem mak ia we bae yumi stap go, yumi kasem wan gladhat folem wan nara gladhat kasem we yumi kasem glori long Kraes, semmak olsem we Hem i kasem glori ia long Papa blong Hem. Hem i moa bitim prea mo givim toktok, mo singsing. Hem i blong stap laef, blong stap mekem, mo blong stap obei. Hem i blong stap kopi long laef blong Hae Man ia we I Hae Eksampol” (“How to Worship,” Ensign, Dec. 1971, 130; fasin blong raetem speling, oli stretem).

Tij Folem Wei blong Sevya

“Doktrin we oli faenem insaed long ol skripja mo insaed long ol toktok blong ol profet blong lata-dei, oli gat paoa blong jenisim hat blong man mo mekem man i gat moa fet. Taem yu, mo olgeta we yu stap tijim, yufala i “traem paoa blong toktok blong God,” bae yu faenem we “hem i gat fasin ia blong lidim ol pipol blong mekem samting we i stret” (Alma 31:5).