Jisas mo woman ia we i bin silip wetem man we i no man blong hem

26 Febwari

?Olsem Wanem Nao Ol Tijing blong Sevya Oli Stap Helpem Mi blong Mekem Ol Jajmen we Oli Stret mo Gud?

Matiu 6–7

kaonsel tugeta pikja bokis

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem topik nao bisoprik i bin toktok raon long hem long wod yut kaonsel miting blong yumi? ?Wanem nao bae yumi mekem, olsem wan klas o wan kworom, folem ol toktok storian ia?

• Kea long olgeta we oli stap long nid. ?Olsem wanem nao yumi save openem han long ol pipol long ol wei we i olsem hemia blong Kraes taem se yumi luk se i gat wan nid, mo yumi no save wanem blong talem?

• Invaetem evriwan blong akseptem gospel. ?Wanem nao yumi faenem insaed long gospel blong Jisas Kraes we i tekem glad i kam long yumi? ?Olsem wanem nao yumi save serem glad ia wetem ol narawan?

• Joenem ol famli blong taem we i no save finis. ?Wanem nao yumi stap mekem blong faenem nem blong ol bubu blong yumi we oli nidim blong kasem ol odinens blong tempol? ?Wanem nao yumi save mekem blong helpem ol narawan blong oli faenem nem blong ol bubu blong olgeta?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

I gat wan fasin we i stap wetem wanwan long yumi—from we yumi gat fasin we i folem fasin blong wol—blong yumi save jajem ol narawan, mo samtaem, yumi save jajem olgeta long fasin we i no stret, o from yumi ting hae long yumiwan, se yumiwan ia nao i stret gud. Be Sevya i bin tijim: “Yufala i no mas jajem man long fasin we i no stret mo i no gud; be yufala i jajem man wetem ol stret mo gud jajmen.” (Josef Smit Translesen, Matiu 7:1 [long Matiu7:1, futnot a] long Inglis). Tingting hevi long wei we, kaonsel ia, sapos yu folem, i save blesem yu mo olgeta we yu stap tijim. Sevya i bin soem, wetem eksampol blong Hem, wanem Hem i minim taem Hem i talem “ol stret mo gud jajmen.” Eksampol: tingting long olsem wanem nao Hem i bin tritim woman ia we i bin slip wetem man we i no man blong hem. Hem i no bin panisim hem, be tu, Hem i no bin talem long hem se sin blong hem i wan oraet samting blong mekem. Hem i talem long woman ia “go hom mo yu nomo mekem sin bakegen” (Jon 8:11). ?Wanem nao yumi bin lanem abaot fasin blong jajmen man long stret mo gud fasin, aot long Sevya?

Taem yu stap tingting hevi long wei we bae yu helpem ol yut blong andastanem wanem i wan stret mo gud jajmen, maet bae yu save stadi long Matiu 7:1–2 mo stadi long mesej blong Elda Lynn G. Robbins “Jaj Ia we I Stret mo Gud” (Jeneral Konfrens, Okt 2016, ChurchofJesusChrist.org/general-conference/conferences?lang=bis).

Stap Lan Tugeta

Bae yu save statem toktok storian long klas abaot fasin blong stap jajem ol man long stret mo gud fasin, taem yu askem ol memba blong klas o blong kworom blong oli tingting long wan taem we oli bin filim se ol nara man oli no bin jajem olgeta i stret. ?Olsem wanem nao oli bin filim? ?Wanem nao yumi lanem abaot fasin blong stap jajem man, aot long ol tijing blong Sevya olsem we oli stap long Matiu 7:1–5? (luk long Josef Smit Translesen, long futnot 1a). ?Wanem nao sentens ia “ol jajmen we oli stret mo gud” i minim? Yufala i save toktok raon long ol ves ia taem yu invaetem ol memba blong klas o blong kworom blong oli talembak wanwan long ol ves ia wetem stret toktok blong olgeta. Ol aktiviti olsem olgeta aktiviti ia, oli save helpem olgeta we yu stap tijim blong oli save jajem man long wan stret mo gud fasin.

• Ol tijing blong Sevya we oli stap long Matiu 6–7 oli save helpem yumi blong “jajem man wetem ol stret mo gud jajmen” Blong helpem ol memba blong klas o blong kworom blong faenemaot ol tijing ia, yu save givim long wanwan long olgeta, ol skripja ia blong oli save go tingting hevi long olgeta: Matiu 6:14–15; 7:3–5; 7:12; 7:15–20. ?Wanem nao, ol toktok blong Sevya insaed long ol ves ia, oli stap talem abaot fasin blong jajem man long stret mo gud fasin? ?Wanem nao yumi save lanem aot long eksampol blong Sevya, we i stap long Jon 8:1–11 mo Matiu 9:10–13? ?Wanem samting we i defren, we yu yu luk, bitwin wei we Sevya i jajem yumi mo wei we yumi stap jajem wanwan long yumi?

• From se yumi evriwan i gat fridom blong mekem joes, oltaem yumi mas mekem ol jajmen abaot wanem nao bae yumi mekem, mo wanem bae yumi no mekem. Be, olsem ol man we i stap folem Sevya, yumi traehad blong no stap jajem man, o stap poenem fingga long ol nara pipol. Blong helpem ol yut blong oli andastanem wanem i defren bitwin tufala samting ia, serem long olgeta, toktok ia we i kam long Presiden Dallin H. Oaks we i stap long “Ol Sapot Risos.” Olsem wan klas o wan kworom, wok tugeta blong tingting long ol eksampol blong stap jajem wan situesen—olsem wan aktiviti, wan samting we i hapen, o wan storian—be i no blong stap jajem wan man o woman, we i stap insaed long situesen. ?From wanem hem i gud moa blong jajem wan situesen bitim blong jajem wan man? Ol yut oli save gat ol nara kwestin abaot fasin blong stap mekem jajmen long stret mo gud fasin (luk long ol eksampol we oli stap long “Ol Sapot Risos”). Tugeta, toktok raon long ol kwestin we oli gat, mo yusum infomesen anda long “Ol Sapot Risos” blong faenem ol ansa. Invaetem ol yut blong oli serem wanem we oli filim insperesen blong mekem, hemia from ol samting we oli stap lanem.

• Long mesej blong hem long jeneral konfrens “Developing Good Judgment and Not Judging Others” (Liahona, May 2010, 103–5), Elda Gregory A. Schwitzer i tokbaot tu stori—wan blong fren blong Jisas, Mata, mo wan blong wan man we Elda Schwitzer i bin helpem. ?Wanem nao tufala stori ia oli stap tijim yumi abaot wei we yumi sapos blong lukluk mo tritim ol narawan? ?Wanem prinsipol nao i save helpem yumi blong stap moa olsem Kraes mo save gat ol stret mo gud jajmen? Ol vidio ia: “Looking through Windows” mo “Judging Others? Stop It!” (ChurchofJesusChrist.org) i save givim sam niu lukluk.

sam yang adalt oli stap toktok

Taem yumi stap lan blong stap moa olsem Kraes, yumi save jaj wetem ol jajmen we oli moa stret mo oli moa gud.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Ol eksampol blong ol kwestin abaot fasin blong stap jajem ol narawan: “Oli bin tijim mi blong mi lukaotgud mo jusum gud ol fren blong mi. ?Be hao nao bae mi save mekem hemia mo no stap jajem ol pipol?” “Taem mi traem blong stap laef folem gospel, oli stap talem se mi mi stap jajem man. Olsem wanem mi save stap tru long wanem we mi mi biliv long hem, mo semtaem soem lav long olgeta we oli no agri wetem ol bilif blong mi?”

• 1 Samuel 16:7; Moronae 7:12–19; Doktrin mo Ol Kavenan 11:12

• Gospel Topics, “Judging Others,” topics.ChurchofJesusChrist.org

• Presiden Dallin H. Oaks i tijim: “Taem we i posibol, bambae yumi holemtaet yumi blong stap jajem ol pipol, mo bae yumi jajem ol situesen nomo. Hemia i wan samting blong mas mekem taem yumi stap traem blong tekem aksen folem ol standet we oli defren long hemia blong ol nara man, we yumi mas joen wetem olgeta—long hom, long wok, o long komuniti. Yumi save putum mo tekem aksen folem ol hae standet we yumi putum blong yumiwan, o hom blong yumi, mo semtaem yumi no panisim olgeta we oli wantem mekem i defren” (“‘Judge Not’ and Judging,” Ensign, Aug. 1999, 11).

Tij Folem Wei blong Sevya

Ol hadwok blong yu oli mas sapotem ol traehad blong ol papa mo mama. Serem wetem ol papa mo mama blong ol yut wanem ia yu stap tijim. Kaonsel wetem olgeta blong lanem abaot ol nid blong ol yang pipol insaed long klas blong yu, mo ol bes wei blong help blong lukluk long ol nid ia.