Gel, Yu Girap, i kam long Simon Dewey

12 Maj

?Olsem Wanem Sevya I Save Helpem Mi blong Winim Ol Fraet blong Mi?

Matiu 9–10; Mak 5; Luk 9

Kaonsel Tugeta

Wan memba blong klas presidensi o kworom presidensi i lidim; kolosap 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo fasin blong kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk, 10.2, 11.2). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Long wanem wei nao yumi bin luk han blong Lod insaed long laef blong yumi?

• Kea long olgeta we oli stap long nid. ?Olsem wanem yumi save sapsapotem wanwan long yumi long ol samting we yumi stap gotru long hem?

• Invaetem evriwan blong akseptem gospel. ?Olsem wanem yumi save yusum teknoloji long wan wei we i gud moa, mo olsem wan tul blong stap serem gospel?

• Joenem ol famli blong taem we i no save finis. ?Wanem nao yumi stap mekem blong helpem ol famli blong yumi blong kam long Kraes?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Japta 5 insaed long Buk blong Mak i rekodem se i gat trifala man we oli kam luk Jisas, mo evriwan i gat ol risen blong oli stap fraet. Wan man, we “devel i stap long hem,” i fesem wan laef ia we hem i mas stap hemwan, i stap laef “long beregraon mo antap long ol hil, i stap singaot, mo i tekem ston we i sap, i stap katkatem bodi blong hem long hem” (Mak 5:2, 5). Jaeras, wan lida blong haos blong prea, i fraet blong lusum gel blong hem, we “klosap i ded” (Mak 5:23). Mo wan woman, we “hem i gat sik blong woman, we sik ya i stap long hem oltaem gogo kasem twelef yia, we i no finis nating,” mo “hem i pas long plante dokta finis, i lusum ol mane blong hem” (Mak 5:25–26). Wanwan we yu stap tijim i spesel, i no gat tu man olsem hem, mo hem i stap fesem ol fraet blong hemwan. Be semmak olsem we Sevya i save ronemaot ol devel, i mekem ol dedman oli girap, mo i hilim wan nogud sik, Hem i save helpem yumi taem yumi stap fraet. Kaonsel blong hem long Jaeras i gat bigfala paoa insaed long laef blong yumi tedei: “Yu no harem nogud. Yu bilif long mi nomo” (Mak 5:36).

Blong rere blong tij, tingting blong gohed blong stadi long mesej blong Elda Ronald A. Rasband “Yufala I No Mekem Tingting blong Yufala I Trabol” (Liahona, Nov 2018, 18–21) mo mesej blong Sista Lisa L. Harkness “Yu Gat Pis, Yu Stap Kwaet” (Liahona, Nov 2020, 80–82).

Stap Lan Tugeta

Yu save invaetem wan memba blong klas, o wan memba blong kworom blong talem sot stori we i stap long Mak 5 we i tokbaot Jisas we i stap invaetem Jaeras blong “no fraet” (luk long ol ves 22–24, 35–43), o, olsem wan grup, yufala i save luklukbak long stori ia. Yu save mekem semmak wetem ol nara stori we oli stap long japta ia—man ia we i gat devel i stap long hem, mo woman ia we i gat problem blong sik blong ol woman. ?Olsem wanem ol situesen ia, wetem fraet, i semmak long olgeta situesen we yumi stap fesem long laef blong yumi naoia? ?Wanem nao yumi save lanem aot long ol stori ia abaot Sevya, mo olsem wanem blong askem help blong Hem? Olgeta aktiviti ia oli save helpem ol yut blong kam antap long bilif blong olgeta long Jisas Kraes, mo blong oli lanem blong folem kaonsel blong Hem: “Yu no harem nogud. Yu bilif long mi nomo” (Mak 5:36).

• Ol invitesen blong Lod, blong no stap fraet, we oli stap ripitim olgeta truaot long ol skripja, bambae oli blesem ol yut taem oli stap fraet. Invaetem olgeta blong ridim olgeta skripja we oli stap long “Ol Sapot Risos,” mo mekem wan posta we oli save hangem long hom—o mekem wan dijitol posta we oli save serem onlaen—hemia, folem ol skripja we oli ridim. Taem oli stap serem wanem we oli bin mekem wetem wanwan long olgeta, invaetem olgeta tu blong serem wanem we oli bin lanem, we i save helpem olgeta taem we oli fraet. ?Wetaem nao Sevya i bin helpem yumi long wan taem blong fraet?

• Tingting blong soem wan pikja blong Sevya we i mekem strong win i stop, olsem pikja ia insaed long dijitol vesen blong mesej blong Sista Lisa L. Harkness, “Yu Gat Pis, Yu Stap Kwaet” (luk tu long Gospel Art Buk [2009], namba 40). Afta, yu o wan we yu givim wok ia long hem, i save serem stori blong Sevya we i mekem strong win i kwaet, we i stap long Mak 4:35–41 o, aot long mesej blong Sista Harkness. ?Long wanem wei nao, yumi tu, yumi olsem olgeta ia insaed long bot ia? ?Wanem nao yumi lanem aot long stori ia abaot wei we Sevya i save helpem yumi taem we yumi stap fraet? Invaetem ol yut blong luklukbak long mesej blong Sista Harkness, mo lukaotem ol sentens we i helpem olgeta blong gat moa strong bilif long Jisas Kraes. Oli save raetem ol samting ia long bod. ?Olsem wanem nao, bilif blong yumi long Sevya, i save helpem yumi taem we i no tingting blong Hem blong mekem ol strong win insaed long laef blong yumi oli stop?

• I gat samfala hym we oli presem Sevya from kamfot ia, mo paoa ia we Hem i stap givim long taem we yumi stap fesem jalenj, mo tingting i no stret; ol hym ia, i gat “Mi Nidim Yu Oltaem” o “Abide with Me!” (Singsing Tabu mo Singsing blong Ol Pikinini, mo Hymns, pej 12, namba 223). O maet yufala i save singsing o ridim sam long ol ves ia tugeta, mo lukaotem ol wei we Sevya i save helpem yumi.

• Fraet mo wari, oli nomol blong gat long taem we yumi stap fesem ol jalenj blong laef. Long sam, ol filing ia, oli save stopem yumi long plante samting. Maet bae i gud blong klas o kworom blong yu i toktok raon long hao nao Sevya i save helpem olgeta we oli gat hadtaem from oli stap wari, mo oli gat ol defren mak blong stap wari. Ol memba blong klas o ol memba blong kworom oli save luklukbak long mesej blong Elda Ronald A. Rasband, “Yufala I No Mekem Tingting blong Yufala I Trabol,” o mesej blong Elda Erich W. Kopischke “Stap Luksave Helt blong Tingting” (Liahona, Nov 2021, 36–38), mo lukaotem ol trutok we oli gat mining long olgeta, mo serem wanem we oli faenem. Leftemap tingting blong ol yut blong oli toktok wetem wan famli, o lida we oli trastem, o visitim mentalhealth.ChurchofJesusChrist.org sapos oli nidim help.

Sevya i bin promes blong helpem yumi taem yumi tanem yumi long Hem long ol taem ia we yumi stap fraet, mo ol taem ia we yumi no save stret wanem bae i hapen.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Josua 1:9; Ol Sam 56:3–4; Aesea 41:10; Jon 14:27; 2 Timoti 1:7; Doktrin mo Ol Kavenan 50:41–44; 68:6

Tij Folem Wei blong Sevya

Taem yu stap tij, yu no stap givimaot infomesen nomo, be yu helpem ol yut blong oli faenemaot ol trutok blong gospel olgetawan insaed long ol skripja, mo tu, insaed long ol toktok blong ol profet.