Paggamit sa Dali, Sunod Kanako—Alang sa mga Korum sa Aaronic nga Pagkapari ug mga Klase sa Young Women

Unsa Ang mga Katuyoan sa Atong mga Miting sa Klase ug sa Korum?

Ang Ginoo mihatag kanimo og sagradong pagsalig: Siya mitawag kanimo nga moserbisyo diha sa klase sa kapangulohan sa Young Women o kapangulohan sa korum sa Aaronic nga Pagkapari. Kabahin sa imong responsibilidad mao ang paggiya ug pagpahigayon sa Dominggo nga mga miting sa inyong klase o sa korum. Sa pagbuhat niini, makatabang ang pagsabot kon nganong aduna kita niini nga mga miting.

Ang klase sa Young Women ug mga miting sa korum sa Aaronic nga Pagkapari lahi kay sa mga klase sa Simbahan sama sa Sunday School o seminary. Sa klase o mga miting sa korum, nagkat-on kita mahitungod sa buluhaton nga gihatag sa Dios kanato, ug atong gi-organisar ang mga sakop sa atong klase o korum sa pagbuhat niana nga buluhaton diha sa atong mga panimalay, diha sa Simbahan, ug sa atong mga komunidad. Niini nga mga miting, dili lamang kita maghisgot mahitungod sa buluhaton—maghimo kita og mga plano aron matuman ang atong mga tahas isip kabahin sa batalyon sa kabatan-onan sa Ginoo, lakip ang pagtabang og pundok sa Israel.

Diha sa mga miting sa klase ug sa korum, maghimo kita og mga plano sa pagtuman sa atong mga tahas isip kabahin sa batalyon sa kabatan-onan sa Ginoo.

Kining paghatag og gibug-aton sa buluhaton wala magpasabot nga atong biyaan ang doktrinal nga mga panaghisgotan alang lamang sa Sunday School. Sa tinuod, ang pagkat-on sa doktrina diha sa mga klase sa Young Women ug mga miting sa Aaronic nga Pagkapari mahinungdanon—nagtabang kini kanato sa paglig-on sa atong relasyon ngadto ni Jesukristo, pagsabot sa plano sa Langitnong Amahan, ug pag-apil sa Ilang buluhaton. Samtang mag-uban kitang magtuon sa ebanghelyo, ang mga kamatuoran nga atong makat-onan makausab sa atong mga kasingkasing ug makatabang kanato sa pagkahibalo kon unsaon sa paglihok sa mas Kristohanong mga paagi. Makadawat kita og mga pag-aghat mahitungod sa mga paagi sa pagtubo “sa kaalam ug sa gidak-on, ug kahimuot sa Dios ug sa tawo” (Lucas 2:52). Samtang mahimo kitang mas nakabig ngadto ni Jesukristo ug sa Iyang ebanghelyo, makakaplag kita og hingpit nga kalipay ug makapamati sa mga tinguha sa pagtabang sa uban subay sa dalan sa pakigsaad.

Kinsa ang Mangulo Niini nga mga Miting?

Ang Dios nagtawag kaninyo isip mga kapangulohan sa klase ug sa korum ug naghatag kaninyo og awtoridad sa pagpangulo. Kana mao ngano nga ang matag miting sa inyong klase o korum kinahanglan nga ipahigayon sa usa ka sakop sa inyong klase o kapangulohan sa korum. Ang hamtong nga mga lider kinahanglang motanyag og giya ug suporta, apan dili sila mopuli kaninyo. Tan-awa ang seksiyon nga giulohan og “Pagtinambagay” diha sa sinugdanan sa matag latid niini nga kapanguhaan alang sa mga ideya sa pagtabang kanimo nga mahibalo kon unsaon sa pagpangulo sa usa ka miting ug sa pagtuman sa tinuod nga mga katuyoan niini. Gamita ang mga miting sa kapangulohan sa pagplano kon unsaon ninyo sa pagpahigayon niini nga mga miting sa Dominggo.

Kinsa ang Kinahanglang Motudlo sa Leksiyon?

Ang mga hamtong nga lider, usa ka sakop sa klase o kapangulohan sa korum, o bisan kinsa nga sakop sa klase o sa korum makahimo sa pagtudlo sa mga leksiyon. Isip klase o kapangulohan sa korum, pakigkonsulta sa inyong hamtong nga mga lider mahitungod kon kinsa ang kinahanglang sangonan nga motudlo sa mga leksiyon. Hinumdomi nga ang inyong hamtong nga mga lider adunay daghang ikahatag. Tinguhaa ang pagkat-on gikan sa ilang kasinatian ug mga pagpamatuod. May mga kaayohan usab ang paghangyo sa kabatan-onan sa pagtudlo—ang pagtudlo makatabang sa pagpalig-on sa ilang pagkakabig ug makatabang kanila sa pagtukod og mas lig-ong mga relasyon ngadto sa ubang sakop sa klase o sa korum. Busa hatagi sila og tukmang mga oportunidad sa pagtudlo sa tanan o bahin sa leksiyon, nga maghinumdom sa mga panginahanglan ug mga abilidad sa mga tawo sa inyong klase o korum. Sama pananglit, ang hamtong nga mga lider mahimong motudlo nga mas kanunay diha sa mga klase o sa mga korum uban sa mas batan-on o mga batan-on kinsa minos og mga kasinatian sa pagtudlo sa ebanghelyo. Kon ang mga batan-on dapiton sa pagtudlo, usa ka ginikanan o hamtong nga adviser kinahanglang motabang kanila sa pag-andam ingon nga gikinahanglan.

Kadtong gisangonan sa pagtudlo makagamit sa seksiyon nga giulohan og “Itudlo ang Doktrina” diha sa matag latid niini nga kapanguhaan sa pagtabang kanila sa pagpangandam. Kini nga seksiyon naglangkob sa mga sugyot alang sa pagtudlo ug paghisgot sa doktrina alang niana nga semana, apan ang mga magtutudlo kinahanglang dili mobati nga gikutohan niining mga gisugyot lamang. Ingon sa paggiya sa Espiritu, ang mga magtutudlo makapahiangay niining mga ideya o makagamit og ilang kaugalingon sa pagtudlo sa paagi nga labing maayo nga motubag sa mga panginahanglan sa mga sakop sa klase o sa korum ug motabang kanila sa pagsabot ug paggamit sa doktrina.

Unsa nga mga Hilisgotan nga Doktrina ang Atong Hisgotan diha sa Atong mga Miting?

Ang hilisgotan sa matag semana nga latid usa ka baroganan sa doktrina nga gipili aron motukma sa girekomendar nga basahonon diha sa Bag-ong Tugon alang niana nga semana, makaplagan diha sa Dali, Sunod Kanako—Alang sa mga Indibidwal ug mga Pamilya. Niini nga paagi, ang mga panaghisgotan nga doktrina diha sa mga miting sa klase o sa korum mosuporta sa unsa ang nakat-onan sa kabatan-onan sa panimalay.

Bisan og ang mga latid itudlo sa piho nga mga Dominggo, kamo may mga pagpilian gihapon sa paghisgot og ubang mga hilisgotan nga doktrina base sa mga panginahanglan sa inyong klase o korum.

Kini nga kapanguhaan naglakip sa mga latid alang sa matag semana kon ipahigayon ang mga miting sa mga klase sa Young Women ug korum sa Aaronic nga Pagkapari. Sa panagsang higayon, mahimo kang molaktaw og leksiyon tungod sa mga komperensiya sa stake o ubang mga rason.

Unsa ang Tahas sa Atong Hamtong nga mga Lider?

Ang inyong hamtong nga mga lider nagdala og importanting tahas sa mga klase sa Young Women ug mga korum sa Aaronic nga Pagkapari. Mogiya ug motambag sila kaninyo sa inyong mga calling sa pagkapangulo. Mosuporta sila ug moawhag kaninyo samtang magbuhat kamo sa buluhaton diha sa inyong klase o korum. Motudlo sila kaninyo og doktrina, ug mopanalangin sila kaninyo pinaagi sa ilang ehemplo, kasinatian, ug pagpamatuod.