Sumala sa Imong Pulong, ni Elspeth Young

Mihatag si Maria og usa ka gamhanan nga pagpamatuod sa misyon sa Manluluwas (tan-awa sa Lucas 1:46–55). Sumala sa Imong Pulong, ni Elspeth Young

Enero 8

Unsaon Ko nga Makapanalangin sa Uban pinaagi sa Akong Pagpamatuod ni Jesukristo?

Mateo 1; Lucas 1

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 10.2, 11.2, ChurchofJesusChrist.org). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa ang atong gihisgotan sa miaging panahon, ug unsa nga mga pagdapit o mga buluhaton ang gihimo? Unsa ang atong nahimo aron malihok kadto nga mga pagdapit o mga buluhaton?

• Mag-atiman alang niadtong nanginahanglan. Unsa ang atong mabuhat o masulti nga makatabang niadtong kinsa tingali mibati nga nag-inusara o nahilayo gikan sa Langitnong Amahan?

• Magdapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Maghiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sama sa matinud-anong mga Judeo sa iyang panahon, sa tinuod si Maria kanunay nga nangandoy alang sa pag-anhi sa Mesiyas. Human makahibalo gikan sa anghel nga ang pagpaabot hapit na matapos––ug nga siya ang mahimong inahan sa gisaad nga Manunubos––mihatag si Maria og usa ka maanindot nga pagpamatuod kabahin sa “Dios nga Akong Manluluwas.” Kini nga pagpamatuod narekord diha sa Lucas 1:46–55, ug kini nagustohan sa mga Kristiyanos sa tibuok kalibotan. Samtang ikaw magbasa niini nga mga bersikulo, paghunahuna mahitungod sa mga tawo sa imong klase o korum. Sila sama ni Maria, nangandam alang sa pag-anhi ni Jesukristo––niini nga panahon, alang sa Iyang mahimayaong Ikaduhang Pag-anhi. Ug usab sama ni Maria, ang ilang mga pagpamatuod makahatag og gamhanang impluwensya sa hugot nga pagtuo niadtong naglibot kanila.

Unsa ang gibati sa mga tawo nga imong gitudloan mahitungod ni Jesukristo? Unsaon sa ilang mga pagpamatuod Kaniya pagpanalangin sa uban? Samtang ikaw nag-andam sa pagtudlo, mahimong ikaw magtuon usab sa 2 Nephi 25:23–26 sa mensahe ni Elder Neil L. Andersen nga “Kita Naghisgot Kang Kristo” (Liahona, Nob. 2020, 88–91).

Pagkat-on og Dungan

Usa ka importanting paagi sa pagtabang sa mga kabatan-onan sa paghunahuna mahitungod sa ilang mga pagpamatuod ni Jesukristo mao ang pag-eksamen og dungan sa pagpamatuod ni Maria diha sa Lucas 1:46––55. Tingali sila mahimong makigbahin ngadto sa usag usa og mga hugpong sa mga pulong nga naghulagway sa unsay gituohan ni Maria ug gibati mahitungod ni Jesukristo. Hain niining mga hugpong sa mga pulong ang naghulagway usab kon sa unsang paagi kita mibati mahitungod Kaniya? Sama pananglit, unsa ang hinungdan nga ang atong mga espiritu “[nagakalipay] diha sa Dios”? (bersikulo 47). Unsa nga “dagkong mga butang” ang Iyang nabuhat alang kanato? (bersikulo 49). Sa unsang paagi Siya mipakita sa Iyang kusog diha sa atong mga kinabuhi? (tan-awa sa bersikulo 51). Ang mga ideya sa kalihokan makagiya ngadto sa mga panag-istoryahanay mahitungod kon sa unsang paagi ang atong mga pagpamatuod kabahin ni Kristo makapanalangin sa kinabuhi sa uban.

• Ang mensahe ni Elder Neil L. Andersen diha sa “Kita Naghisgot Kang Kristo” nagtabang sa pagpasabot nganong kinahanglan kitang mas dayag mosulti kabahin sa Manluluwas––ug unsaon nato nga kita makabuhat niini. Mahimo ninyong basahon og dungan ang mga seksiyon sa mensahe ni Elder Aldersen. Ang mga sakop sa klase o sa korum makahisgot og mga rason nga iyang gihatag alang sa pagpakigbahin sa atong mga pagpamatuod ni Jesukristo ug sa iyang tambag kon unsaon sa pagbuhat sa mao. Unsa ang mga piho nga mga butang kita makahimo sa pagsulti kabahin ni Kristo sa mas dayag nga paagi?

• Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nahibalo kita og importanting mga kamatuoran mahitungod ni Jesuktisto nga atong ikapakigbahin. Unsaon kaha nimo sa pagtabang ang mga kabatan-onan sa paghunahuna mahitungod niini nga mga kamatuoran? Mahimo nimo silang hangyoon sa pagtuon sa “Ang Buhi nga Kristo: Ang Pagpamatuod sa mga Apostoles” sa tinagsa o sa grupo, mangita sa mga tubag sa pangutana “Unsa nga mga kamatuoran mahitungod sa Manluluwas nga adunay talagsaong kahulogan alang kanimo?” Dapita sila sa pagpakigbahin sa mga kamatuoran nga ilang nakit-an ug sa pagpasabot nganong kini nga mga kamatuoran makahuluganon ngadto kanila. Makahimo sila sa pagpakigbahin og mga kasulatan ug sa ilang kaugalingong mga kasinatian samtang sila nagbuhat sa mao. Dayon sila mahimong maghisgot hain nga mga kamatuoran mahitungod sa Manluluwas sila makahimo sa pagpakigbahin diha sa social media, ngadto sa usa ka higala nga nakigbisog sa pagbaton og pagpamatuod, ngadto sa usa ka tawo kinsa dili miyembro sa atong Simbahan.

• Agi og dugang sa Lucas 1:46–55, ang mga kasulatan adunay daghang uban nga mga tudling nga makapadasig kanato sa pagpakigbahin unsay atong nahibaloan mahitungod ni Jesukristo. Ang pipila ka mga ehemplo gilista diha sa “Suporta nga mga Kapanguhaan.” Hunahunaa ang pagbasa og dungan niini nga mga kasulatan. Unsa ang gitudlo niini kanato mahitungod kon unsaon sa pagpakigbahin sa atong mga pagpamatuod ni Jesukristo ngadto sa uban? Unsa pa ang atong makat-onan gikan niini nga mga bersikulo? Ang mga sakop sa klase o sa korum mahimo usab nga makigbahin og mga butang nga ilang nakat-onan gikan sa mga tawo nga ilang kaila kinsa bukas nga makigbahin sa ilang hugot nga pagtuo diha ni Jesukristo.

batan-ong mga babaye nagtuon sa mga kasulatan

Samtang kita nagkat-on nga mahibalo ug mahigugma sa Manluluwas, mangita kita og mga paagi sa pagpakigbahin sa atong mga pagpamatuod Kaniya.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mateo 5:14–16; 1 Pedro 3:15; 2 Nephi 25:26; Alma 5:43–50; Doktrina ug mga Pakigsaad 100:5–8

• Russell M. Nelson, “Ipakita ang Inyong Hugot nga Pagtuo” (Liahona, Mayo 2014, 29–31)

• Cristina B. Franco, “Pagkaplag og Hingpit nga Kalipay sa Pagpaambit sa Ebanghelyo” (Liahona, Nob. 2019, 83–86)

Pagtudlo sumala sa Pamaagi sa Manluluwas

Ang pagpangutana nga makaawhag sa mga tigkat-on sa paghatag sa ilang mga pagpamatuod mahimong usa ka gamhanang paagi sa pagdapit sa Espiritu. Mahimo ka nga mangutana sama sa “Giunsa ninyo pagkahibalo nga si Jesukristo mitubos sa inyong mga sala?” o “Sa unsang paagi kamo mapasalamaton sa unsay gibuhat sa Manluluwas alang kanato didto sa Getsemani?”