Kamo ang Kahayag sa Kalibotan, ni Simon Dewey

Ye Are the Light of the World [Kamo ang Kahayag sa Kalibotan], ni Simon Dewey

Enero 22

Sa Unsang Paagi si Jesukristo Kahayag sa Akong Kinabuhi?

Juan 1

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Mag-atiman alang niadtong nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdani ang atong gibati nga buhaton aron sa pagtabang kanila?

• Magdapit sa tanan sa pagdawat sa ebanghelyo. Sa unsa nga paagi kita mahimong kahayag ngadto sa mga sakop sa pamilya o mga higala nga dili sama kanato og mga tinuohan?

• Maghiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Si Apostol Juan misugod sa iyang Ebanghelyo pinaagi sa pagtandi ni Jesukristo ngadto sa usa ka kahayag nga “nagadan-ag taliwala sa kangitngit” (Juan 1:5). Ang mga sakop sa imong klase o sa korum nanagtubo sa usa ka panahon sa espirituhanong kangitngit. Apan kini usa usab ka panahon nga ang “katingalahang kahayag” anaa sa pagtabang kanila sa pagkakita sa tin-aw nga paagi ug sa pagkaplag sa ilang dalan (1 Pedro 2:9).

Samtang kamo magbasa sa Juan 1 niini nga semana, pamalandonga kon ngano nga ang kahayag hilabihan ka importante ug sa unsa nga paagi ang Manluluwas usa ka kahayag sa inyong kinabuhi (tan-awa usab sa Hubad ni Joseph Smith, Juan 1:1–34 [diha sa appendix sa Biblia]). Unsaon sa Iyang kahayag nga makapanalangin niadtong imong gitudloan? Unsaon nimo nga makadasig kanila sa paglakaw diha sa Iyang kahayag? Sa pagtabang kanimo sa pagpamalandong niini nga mga pangutana, mahimo nimong tun-an ang Doktrina ug mga Pakigsaad 88:5–13, 67; 93:2–9 ug ang mensahe ni Sister Sharon Eubank nga “Kristo: Ang Kahayag nga Nagdan-ag taliwala sa Kangitngit” (Liahona, Mayo 2019, 73–76).

Pagkat-on og Dungan

Kini kasagaran nga nagtabang sa pagsugod sa imong panaghisgotan pinaagi sa paghatag sa klase o sa korum og higayon sa pagsulti mahitungod sa unsay ilang nakat-onan gikan sa ilang pagtuon sa kasulatan. Sama pananglit, niini nga semana ikaw makahangyo kanila sa pagpakigbahin og usa ka pulong o hugpong sa mga pulong gikan sa Juan 1:1–17 nga nagtudlo kanila og usa ka butang mahitungod sa Manluluwas. Pasultiha sila mahitungod kon nganong ilang gipili ang ilang pulong o hugpong sa mga pulong ug kon unsa ang gitudlo niini kanila mahitungod ni Jesukristo. Pakigbahin uban kanila kon sa unsang paagi si Jesukristo usa ka kahayag sa imong kinabuhi. Ang mga kalihokan sa ubos makatabang kanimo sa pagpadayon sa inyong panaghisgotan.

• Sa pagtabang niadtong imong gitudloan sa pagpasalamat sa kahayag sa Manluluwas, tingali usa ka sakop sa klase o sa korum makahimo sa pagpakigbahin kon sama sa unsa ang bation nga maanaa sa kangitngit. Adunay usa ka istorya nga anaa sa sinugdanan sa mensahe ni Elder Timothy J. Dyches nga makatabang “Ang Kahayag Mounong ngadto sa Kahayag” (Liahona, Mayo 2021, 112–15). Ngano nga ang mga tawo usahay mahadlok sa kangitngit? Nganong nagkinahanglan kita og kahayag? Nganong gitawag si Jesukristo ang Kahayag sa Kalibotan? Mahimo nimong hangyoon ang kabatan-onan sa pagtuon sa mensahe ni Elder Dyches nga magsugod diha sa “Mosugyot ko nga tingali og kini mao ang panahon sa pagpangutana sa inyong kaugalingon.” Makapangita sila alang sa unsay atong mabuhat sa pagdala sa kahayag sa Manluluwas sa mas hingpit nga paagi nganhi sa atong mga kinabuhi.

• Ang mga kasulatan nga gilista ubos sa “Suporta nga mga Kapanguhaan” makatabang sa imong klase o korum nga mas makasabot sa kahayag nga gitanyag ni Jesukristo. Mahimo nimong basahon ug hisgotan ang pipila sa nag-unang pundok sa mga kasulatan isip usa ka klase. Dayon isulat ang Unsaon nato pagdala ang kahayag sa Manluluwas nganhi sa atong mga kinabuhi? diha sa pisara, ug dapita ang kabatan-onan sa paglista sa mga tubag nga ilang makaplagan diha sa ikaduhang pundok sa mga kasulatan. Mahimo nimong parison ang kabatan-onan ug hangyoon sila sa pagpakigbahin ngadto sa usag usa kon sa unsang paagi si Jesukristo nahimong usa ka kahayag sa ilang mga kinabuhi.

• Si Sister Sharon Eubank miingon, “Usa sa nag-unang mga panginahanglanon nato aron molambo mao ang magpabilin nga konektado ngadto sa tinubdan sa kahayag––si Jesukristo” (Kristo: Ang Kahayag nga Nagdan-ag taliwala sa Kangitngit,” 73). Tingali mahimo nimo kining ihulagway uban sa usa ka leksiyon nga naggamit og butang–– tingali pinaagi sa pagpasundayag og usa ka flashlight o mobile nga galamiton ug sa paghisgot kon nganong ang tinubdan sa kuryente importante. Ang sakop sa klase o sa korum dayon makarebyo sa mensahe ni Sister Eubank, mangita sa mga paagi si Satanas naninguha sa “pagputol sa naghatag [kanato] og gahom.” Unsaon nato sa pagpabilin og lig-on nga koneksyon ngadto ni Jesukristo? Unsa nga tambag ang atong makaplagan diha sa mensahe ni Sister Eubank?

• Ang mga himno sama sa “Ang Dios Kahayag Ko” ug “Giyahi, Maloloy-on nga Kahayag” (Mga Himno, nus. 46, 53) nagpamatuod nga si Jesukristo mao ang atong kahayag. Hunahunaa ang pagkanta niini (o uban nga imong nahibaloan) og dungan ug sa pag-ila sa mga pulong o hugpong sa mga pulong nga nagtudlo kanato kon sa unsang paagi si Jesukristo sama sa usa ka kahayag. Giunsa sa uban pagdala sa kahayag sa Manluluwas nganhi sa atong mga kinabuhi? Sa unsang paagi kita makahimo sa pagpakigbahin sa Iyang kahayag ngadto sa uban?

A Gift of Light [Usa ka Gasa sa Kahayag], ni Eva Timothy

A Gift of Light [Usa ka Gasa sa Kahayag], ni Eva Timothy

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Salmo 27:1; Isaias 60:19–20; Juan 8:12; 3 Nephi 18:16, 24 (Ang Manluluwas usa ka kahayag)

• Mga Proverbio 4:18–19; 1 Juan 2:8–11; Doktrina ug mga Pakigsaad 50:23–24; 93:26–28; 138:20–24 (Unsaon nato pagdala ang kahayag sa Manluluwas nganhi sa atong mga kinabuhi)

Pagtudlo sumala sa Pamaagi sa Manluluwas

Samtang hatagan nimo og pagtagad ang unsay panghitabo sa mga kinabuhi sa mga sakop sa imong klase o sa korum, makaplagan nimo ang labing maayo nga mga oportunidad sa pagtudlo. Ang mga komentaryo nga himoon sa mga tigkat-on o mga panguta nga ilang ipangutana makagiya usab og mga higayon sa pagtudlo.