At the Well [Diha sa Atabay], ni Crystal Close

At the Well [Diha sa Atabay], ni Crystal Close

Pebrero 12

Unsaon Ko Pagpalambo ang Akong Pagsimba sa Dios?

Juan 2–4

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas napaduol ngadto sa Manluluwas? Sa unsang paagi kita naningkamot nga mahimong mas mahisama Kaniya?

• Mag-atiman alang niadtong nanginahanglan. Kinsa ang anaa sa atong hunahuna sa bag-ohay lamang? Sa unsang paagi kita makatabang niini nga mga indibidwal?

• Magdapit sa tanan sa pagdawat sa ebanghelyo. Sa unsang paagi kita makatubag sa mga pangutana sa atong mga higala mahitungod sa Simbahan sa paagi nga maglig-on sa ilang hugot nga pagtuo diha sa Manluluwas?

• Maghiusa sa mga pamilya alang sa kahangtoran. Unsa ang pipila ka mga paagi nga kita mas makakonektar sa mga sakop sa kaliwat sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang babaye nga taga-Samaria nga gihulagway sa Juan 4 tingali miadto kanunay sa atabay sa pagkalos og tubig. Apan kini nga higayon lahi. Nakahimamat siya og Judeo nga lalaki kinsa nangayo kaniya og mainom. Kana lamang dili na sagad tungod kay ang mga Judeo sa kinatibuk-an dili makighigala og mga Samarianhon. Apan adunay lain nga usa ka butang nga dili sagad mahitungod niini nga lalaki. Nakapaniid nga tingali Siya usa ka propeta, nangutana siya Kaniya mahitungod sa pagsimba sa Dios. Madawat ba ang pagsimba sa Dios didto sa Samaria? O kinahanglan ba gayod nga adto mosimba sa Jerusalem, ingon nga giangkon sa mga Judeo? (tan-awa sa Juan 4:19–20). Gipasabot sa lalaki nga asa kita mosimba dili sama ka importante sa unsaon nato sa pagsimba: “Ang tinuod nga mga magsisimba magasimba sa Amahan diha sa espiritu ug sa kamatuoran: kay kini ang gipangita sa Amahan nga maoy managsimba kaniya” (Juan 4:23). Ang lalaki misulti kaniya kon kinsa Siya––Siya mao ang Kristo, ang Manluluwas sa kalibotan (tan-awa sa Juan 4:25–26).

Makasabot ba ang kabatan-onan nga imong gitudloan kon unsa ang kahulogan sa pagsimba sa Langitnong Amahan? Agi og dugang sa pagsimba diha sa balay alampoanan (tan-awa sa Doktrina ug mga Pakigsaad 59:9–10), unsa ang ubang mga oportunidad nga sila aduna sa pagsimba Kaniya, lakip niadtong wala nila mailhi isip pagsimba? Ang mosunod nga mga kapanguhaan makatabang kanimo sa pag-andam sa pagtudlo kanila mahitungod kon unsaon sa pagpalambo sa ilang pagsimba sa Dios: Salmo 95:1–7; Mateo 4:8–10; Alma 32:4–11; Doktrina ug mga Pakigsaad 20:17–19; 93:19–20, ug mensahe ni Bishop Dean M. Davies “Ang mga Panalangin sa Pagsimba” (Liahona, Nob. 2016, 93–95).

Pagkat-on og Dungan

Sa pagsugod sa panaghisgotan mahitungod sa pagpalambo sa pagsimba, ikaw makadapit og mga sakop sa klase o sa korum sa pagrebyo og tinagsa sa Juan 4:19–26 ug makasulat og mga tubag sa mga pangutana sama niini: Nganong simbahon ko ang Dios? Unsay gipasabot ngari kanako ang pagsimba sa Dios? Kini mahimong makatabang ang pagrebyo og dungan sa katin-awan ubos sa “Pagsimba” diha sa Giya ngadto sa mga Kasulatan (scriptures.ChurchofJesusChrist.org). Human sila dihay panahon sa pagpamalandong niini nga mga pangutana, dapita sila sa pagpakigbahin sa ilang mga hunahuna. Ang mosunod nga mga kalihokan makatabang kanila sa pagdawat sa mga pag-aghat sa Espiritu Santo.

• Ang mga sakop sa imong klase o sa korum makabaton og bililhong mga panabot mahitungod sa unsa ang kahulogan sa pagsimba sa Dios. Mahimo nimo silang hangyoon sa pagpakigbahin og kasinatian kon sila mibati nga sila nagsimba sa Dios. Ang mga tudling sa kasulatan sama sa mosunod makadugang sa ilang pagsabot ug makahatag kanila og mga ideya mahitungod sa paghimo sa ilang pagsimba sa Dios nga makahuloganon: Salmo 95:1–7; Mateo 4:8–10; Alma 32:4–11; Doktrina ug mga Pakigsaad 20:17–19; 93:19–20. Mahimo usab silang maghisgot sa pamahayag ni Elder Bruce R. McConkie sa “Suporta nga mga Kapanguhaan.”

• Sa pagtabang sa kabatan-onan sa pagpalambo sa ilang pagsimba sa Dios, hunahunaa ang pagsulat niini nga mga ulohan diha sa pisara: Kinsa, Ngano, Diin, ug Unsaon. Hangyoa sila sa pagrebyo sa gilista nga mga kasulatan sa “Pagsimba” diha sa Giya ngadto sa mga Kasulatan (scriptures.ChurchofJesusChrist.org), mangita og mga bersikulo nga magtabang kanila sa pagsabot kon kinsa, ngano, diin, ug unsaon. Samtang sila makakaplag og usa ka may kalabotan nga bersikulo, dapita sila sa paghisgot niini uban sa klase o sa korum ug isulat ang pakisayran ubos sa angay nga ulohan. Awhaga sila sa pagpakigbahin og mga kasinatian kon ilang gibati nga mas duol ngadto sa Dios pinaagi sa pagsimba.

• Ang mensahe ni Bishop Dean M. Davies “Ang mga Panalangin sa Pagsimba” naglangkob og mga ehemplo sa pagsimba sa Dios. Tingali makahimo kamo sa pagbasa og dungan sa seksiyon “Unsa ang Pagsimba” Dayon ang matag tawo makarebyo sa usa sa mga ehemplo sa mga tawo nga nagsimba nga makaplagan sa sunod nga tulo ka seksiyon sa mensahe. Unsa ang gitudlo sa matag ehemplo kanato mahitungod sa pagsimba sa Dios? Unsa ang gitudlo sa kataposang seksiyon sa mensahe mahitungod sa mga panalangin nga miabot gikan sa pagsimba Kaniya uban ang pagkamatinuoron? Unsa ang nakapadasig nato nga buhaton aron sa pagpalambo sa atong pagsimba sa Dios?

batan-ong lalaki nga nagbasa

Ang pagsimba naglakip sa pagtuon sa kasulatan ug ubang mga kalihokan nga nagpakita sa pagkamatinuoron ug paghigugma alang sa Dios.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• “Ang mga Elemento sa Pagsimba,” Mga Pagtulun-an sa mga Presidente sa Simbahan: David O. McKay (2003), 35–46

• Si Elder Bruce R. McConkie mitudlo: “Ang tinuod ug hingpit nga pagsimba naglakip sa pagsunod sa mga lakang sa Anak sa Dios; kini naglakip sa pagsunod sa mga sugo ug sa pagtuman sa kabubut-on sa Amahan hangtod niana nga ang-ang nga kita mouswag gikan sa grasya ug dugang pa nga grasya hangtod ngadto kita mahimaya diha kang Kristo sama nga Siya diha sa Iyang Amahan. Kini mas labaw pa kay sa pag-ampo ug wali ug awit. Kini mao ang pagpuyo ug pagbuhat ug pagsunod. Kini mao ang pagsunod sa kinabuhi sa halangdong Ehemplo” (How to Worship,” Ensign,, Dis. 1971, 130).

Pagtudlo sumala sa Pamaagi sa Manluluwas

Ang doktrina nga makita sa mga kasulatan ug sa mga pulong sa mga propeta sa ulahing mga adlaw adunay gahom nga mousab sa mga kasingkasing ug mopatubo sa hugot nga pagtuo. Samtang ikaw ug ang imong mga gitudloan “mosulay sa hiyas sa pulong sa Dios”, imong makaplagan nga kini adunay “dako nga kalagmitan sa paggiya sa mga katawhan sa pagbuhat niana nga diin makiangayon” (Alma 31: 5).