Pebrero 26

Sa Unsang Paagi ang mga Pagtulon-an sa Manluluwas Nagtabang Kanako sa Paghimo og Matarong nga mga Paghukom?

Mateo 6–7

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga mga hilisgotan ang gihisgotan sa bishopric diha sa atong mga miting sa konseho sa kabatan-onan sa ward? Unsay atong mahimo isip usa ka klase o korum base niana nga mga panaghisgot?

• Mag-atiman alang niadtong nanginahanglan. Sa unsang paagi kita makatabang ngadto sa mga tawo sa Kristohanong mga paagi kon makakita kita og panginahanglan ug wala makahibalo kon unsa ang isulti?

• Magdapit sa tanan sa pagdawat sa ebanghelyo. Unsa ang atong nakaplagan diha sa ebanghelyo ni Jesukristo nga nagdala kanato og hingpit nga kalipay? Sa unsang paagi kita makahimo sa pagpakigbahin niana nga kalipay ngadto sa uban?

• Maghiusa sa mga pamilya alang sa kahangtoran. Unsa ang atong gihimo sa pagpangita og mga ngalan sa atong mga katigulangan kinsa nagkinahanglan og mga ordinansa sa templo? Unsa ang atong mahimo sa pagtabang sa uban sa pagpangita sa mga ngalan sa ilang mga katigulangan?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Adunay kalagmitan sa matag usa kanato––isip resulta sa atong pagkanapokan nga mga kinaiyahan––sa paghukom sa uban, usahay sa dili makiangayong paagi o sa pagtuo nga mas matarong. Apan ang Manluluwas mitudlo, “Ayaw paghukom sa dili matarong nga paagi, aron ikaw dili pagahukman: apan paghukom sa matarong nga paghukom” (Hubad ni Joseph Smith, Mateo 7:1 [sa Mateo 7:1, footnote a]). Pamalandonga kon unsaon nga ang pagsunod niini nga tambag makapanalangin kanimo ug niadtong imong gitudloan. Ang Manluluwas mipakita pinaagi sa ehemplo kon unsa ang Iyang gipasabot sa “matarong nga paghukom.” Sama pananglit, hunahunaa kon giunsa Niya pagtagad ang babaye kinsa nakasala sa pagpanapaw. Siya wala mohukom kaniya, apan Siya wala usab mobalewala sa iyang sala. Mimando Siya kaniya nga “lumakaw ka ug ayaw na pagpakasala” (Juan 8:11). Unsa ang imong nakat-onan mahitungod sa matarong nga paghukom gikan sa Manluluwas?

Samtang ikaw namalandong kon unsaon nimo pagtabang ang mga kabatan-onan nga makasabot og matarong nga paghukom, mahimo ninyong tun-an ang Mateo 7:1–2 ug ang mensahe ni Elder Lynn G. Robbins “Ang Matarong nga Maghuhukom” (Liahona, Nob. 2016, 96–98).

Pagkat-on og Dungan

Makasugod ka og usa ka panaghisgotan mahitungod sa matarong nga paghukom pinaagi sa paghangyo sa mga sakop sa klase o sa korum sa paghunahuna og panahon sa dihang gibati nila ang dili matarong nga paghukom sa uban. Unsa ang bation ninii? Unsa ang atong makat-onan mahitungod sa paghukom gikan sa mga pagtulon-an sa Manluluwas diha sa Mateo 7:1–5? (tan-awa ang Hubad ni Joseph Smith diha sa footnote 1a). Unsa kaha ang gipasabot sa hugpong sa mga pulong nga “matarong nga paghukom”? Mahimo ka nga makahisgot niini nga mga bersikulo pinaagi sa pagdapit sa mga sakop sa klase o sa korum sa pagsulti og usab sa matag bersikulo diha sa ilang kaugalingong mga pulong. Ang mga kalihokan sama sa mosunod makatabang usab niadtong imong gitudloan sa paghukom og matarong.

• Ang mga pagtulon-an sa Manluluwas diha sa Mateo 6–7 makatabang kanato sa “paghukom sa matarong nga paghukom.” Sa pagtabang sa mga sakop sa klase o sa korum sa pagdiskobre niini nga mga pagtulon-an, makahatag ka sa matag usa kanila og usa sa mosunod nga mga tudling sa pagpamalandong: Mateo 6:14–15; 7:3–5; 7:12; 7:15–20. Unsa ang gisugyot sa mga pulong sa Manluluwas niini nga mga bersikulo mahitungod kon unsa ang gipasabot sa paghukom sa matarong nga paagi? Unsa ang atong makat-onan gikan sa ehemplo sa Manluluwas diha sa Juan 8:1–11 ug Mateo 9:10–13? Unsa nga mga kalainan ang atong mamatikdan tali sa paagi ang Manluluwas naghukom kanato ug ang paagi kita sa kasagaran naghukom sa usag usa?

• Tungod kay kitang tanan adunay kabubut-on, kita kinahanglan gayod nga kanunay maghimo og mga paghukom mahitungod sa unsay atong buhaton ug dili buhaton. Apan isip mga sumusunod sa Manluluwas, kita naninguha sa dili paghukom o pagsaway sa ubang mga tawo. Sa pagtabang sa kabatan-onan sa pagsabot sa kalainan, pakigbahin kanila sa pamahayag ni Presidente Dallin H. Oaks diha sa “Suporta nga mga Kapanguhaan.” Isip usa ka klase o korum, pag-uban og trabaho sa paghunahuna og mga ehemplo sa paghukom og usa ka sitwasyon––sama sa usa ka kalihokan, usa ka panghitabo, o usa ka pakig-istoryahay––kaysa paghukom sa usa ka tawo kinsa apil. Nganong mas maayo ang paghukom sa usa ka sitwasyon kay sa usa ka tawo? Ang kabatan-onan mahimong adunay ubang mga pangutana mahitungod sa matarong nga paghukom (tan-awa ang mga ehemplo diha sa “Suporta nga mga Kapanguhaan”). Hisgoti ang ilang mga pangutana og dungan naggamit sa impormasyon ubos sa “Suporta nga mga Kapanguhaan” sa pagpangita sa mga tubag. Dapita ang kabatan-onan sa pagpakigbahin kon unsa ang ilang gibati nga nadasig nga buhaton tungod sa unsay ilang nakat-onan.

• Sa iyang mensahe sa kinatibuk-ang komperensiya “Ang Pag-ugmad og Maayong Paghukom ug Dili ang Paghukom sa Uban” (Liahona, Mayo 2010, 103–5), si Elder Gregory A. Schwitzer miasoy og duha ka istorya—kabahin sa higala ni Jesus nga si Martha ug sa usa ka lalaki nga gitabangan ni Elder Schwitzer. Unsa ang gitudlo niini nga mga istorya mahitungod kon unsaon nato sa pagtan-aw ug pagtagad sa uban? Unsa nga mga baroganan ang makatabang kanato nga mahimong mas mahisama ni Kristo ug mohukom sa matarong nga paagi?

Samtang kita nagkat-on nga mahimong mas mahisama ni Kristo, makahimo kita og mas matarong nga paghukom.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mga ehemplo sa mga pangutana mahitungod sa paghukom sa uban: “Gitudloan ako sa pagpili sa akong mga higala sa mabinantayong paagi. Apan unsaon nako pagbuhat niana nga dili maghukom sa mga tawo?” “Kon ako maninguha sa pagpuyo [diha] sa ebanghelyo, pasanginlan ako sa pagkamahukmanon. Sa unsa nga paagi ako makahimo nga tinuod sa unsay akong gituohan ug makapakita og gugma ngadto niadtong kinsa dili mouyon?”

• 1 Samuel 16:7; Moroni 7:12–19; Doktrina ug mga Pakigsaad 11:12

• Si Presidente Dallin H. Oaks mitudlo: “Bisan kanus-a nga posible pugngan nato ang paghukom sa mga tawo ug mohukom lamang sa mga sitwasyon. Kini importante bisan kanus-a kita mosulay sa paglihok diha sa lainlaing mga sumbanan kay sa uban kang kinsa kita kinahanglang makig-uban––sa panimalay, sa trabahoan, o diha sa komunidad. Makahimo ug makabuhat kita subay sa taas nga mga sumbanan alang sa atong mga kaugalingon o sa atong mga panimalay nga dili manghimaraot niadtong mobuhat sa laing paagi” (“‘Judge Not’ and Judging,” Ensign, Ago. 1999, 11).

Pagtudlo sumala sa Pamaagi sa Manluluwas

Ang inyong mga paningkamot kinahanglan nga mosuporta sa mga paningkamot sa mga ginikanan. Ipakigbahin ngadto sa mga ginikanan sa kabatan-onan kon unsay imong gitudlo. Pakigtambag kanila aron mahibalo mahitungod sa mga panginahanglan sa kabatan-onan diha sa imong klase ug sa labing maayo nga mga paagi sa pagtabang nga matubag kadto nga mga panginahanglan.