Kristo nagbuhi sa anak nga babaye ni Jairus

Daughter, Arise [Inday, Bangon], ni Simon Dewey

Marso 12

Sa Unsang Paagi ang Manluluwas Makatabang Kanako sa Pagbuntog sa Akong mga Kahadlok?

Mateo 9–10; Marcos 5; Lucas 9

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Giunsa nato pagkakita sa kamot sa Ginoo diha sa atong mga kinabuhi?

• Mag-atiman alang niadtong nanginahanglan. Unsaon nato sa pagsuporta ang matag usa diha sa mga butang nga atong gisagubang?

• Magdapit sa tanan sa pagdawat sa ebanghelyo. Sa unsa nga paagi kita mas makagamit sa teknolohiya isip usa ka himan sa pagpakigbahin sa ebanghelyo?

• Maghiusa sa mga pamilya alang sa kahangtoran. Unsa ang atong gibuhat sa pagtabang sa atong mga pamilya nga moduol ngadto ni Kristo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang Kapitulo 5 diha sa basahon ni Marcos nagrekord nga tulo ka tawo miduol ni Jesus kinsa ang tanan adunay mga rason nga mahadlok. Usa ka tawo nga may “mahugaw nga espiritu” miatubang og kinabuhi nga nag-inusara, nagpuyo “sa kabukiran, ug sa mga lubong, magsinggit, ug magbun-og sa iyang kaugalingong lawas sa mga bato” (Marcos 5:2, 5). Si Jairo, usa ka magmamando sa usa ka sinagoga, nahadlok nga mamatay ang iyang anak nga babaye, kinsa “himalatyon” (Marcos 5:23). Ug usa ka babaye nga “gitalinug-an sulod na sa napulog duha ka tuig” wala maayo human magasto ang “tanan niyang katigayonan” sa “daghang mananambal” (Marcos 5: 25–26). Ang matag tawo nga imong tudloan talagsaon ug nag-atubang sa iyang kaugalingong mga kahadlok. Apan sama lamang sa Manluluwas nga makasalikway sa mahugaw nga mga espiritu, makabuhi sa patay, ug makaayo og makahahadlok nga sakit, Siya makatabang kanato kon kita mahadlok. Ang Iyang tambag ngadto ni Jairo adunay dakong gahom sa atong mga kinabuhi karon: “Ayaw kahadlok, sumalig ka lamang” (Marcos 5:36).

Sa pagpangandam sa pagtudlo, hunahunaa ang nga sa mensahe ni Elder Ronald A. Rasband nga “Ayaw Kabalaka” (Liahona, Nob. 2018, 18–21) ug sa mensahe ni Sister Lisa L. Harkness “Hilom, Hunong” (Liahona, Nob. 2020, 80–82).

Pagkat-on og Dungan

Mahimo nimong dapiton ang usa ka sakop sa klase o sa korum sa pag-summarize sa istorya sa Marcos 5 bahin ni Jesus nga nagdapit ni Jairo nga “ayaw kahadlok” (tan-awa sa mga bersikulo 22–24, 35–43), o makarebyo ka sa istorya isip usa ka grupo. Mahimo nimong buhaton ang sama alang sa ubang mga istorya niini nga mga kapitulo––ang tawo nga may mahugaw nga espiritu ug ang babaye nga may talinugo nga kahimtang. Sa unsang paagi kini nga makahahadlok nga mga sitwasyon susama niadtong atong mahimong atubangon sa atong mga kinabuhi? Unsa ang atong makat-onan gikan niini nga mga istorya mahitugod sa Manluluwas ug unsaon sa pagtinguha sa Iyang panabang? Ang mosunod nga mga kalihokan makatabang sa kabatan-onan sa pagpatubo sa ilang hugot nga pagtuo diha ni Jesukristo ug sa pagkat-on sa pagsunod sa Iyang tambag: “Ayaw kahadlok, sumalig ka lamang” (Marcos 5:36).

• Ang pagdapit sa Ginoo sa dili pagkahadlok, gibalik-balik sa tibuok mga kasulatan, mopanalangin sa kabatan-onan kon sila mahadlok. Dapita sila sa pagbasa sa mga kasulatan diha sa “Suporta nga mga Kapanguhaan” ug paghimo og poster nga ilang ikapasundayag sa panimalay––o usa ka digital nga poster nga ilang ikapakigbahin sa online––base sa mga kasulatan nga ilang nabasa. Samtang sila makigbahin sa unsay ilang nahimo ngadto sa usag usa, dapita sila sa pagpakigbahin usab kon unsay ilang nakat-onan nga makatabang kanila kon sila mahadlok. Kanus-a kita gitabangan sa Manluluwas atol sa usa ka makahahadlok nga panahon?

• Hunahunaa ang pagpakita og usa ka hulagway sa Manluluwas nga naghunong sa unos, sama sa usa diha sa digital nga bersyon sa mensahe ni Sister Lisa L. Harkness “Hilom, Hunong” (tan-awa usab sa Libro sa mga Hulagway sa Ebanghelyo [2009], nu. 40). Dayon ikaw o usa ka tawo nga imong gipabuhat makapakigbahin sa asoy sa Manluluwas sa pagpahunong sa unos gikan sa Marcos 4:35-41 o gikan sa mensahe ni Sister Harkness. Sa unsang paagi kita usahay sama niadtong anaa sa bapor? Unsa ang atong makat-onan gikan niini nga istorya mahitungod kon unsaon sa Manluluwas nga makatabang kanato kon kita mahadlok? Dapita ang mga kabatan-onan sa pagrebyo sa mensahe ni Sister Harkness, mangita sa mga hugpong sa mga pulong o mga kapahayag nga nagtabang kanila sa pagbaton og mas dakong hugot nga pagtuo diha ni Jesukristo. Makalista sila niini diha sa pisara. Unsaon sa atong hugot nga pagtuo diha sa Manluluwas nga makatabang kanato kon kini dili Iyang kabubut-on sa paghunong sa mga unos sa atong mga kinabuhi?

• Daghang mga himno nagdayeg sa Manluluwas tungod sa Iyang paghupay ug kalig-on sa mga panahon sa hagit ug walay kasiguroan, sama sa “Nagkinahanglan Ko Nimo sa Matag Takna” o “Ubani Ako!” (Mga Himno, nus. 54, 97). Tingali mahimo mong mokanta o mobasa og dungan sa pipila niini, mangita kon unsaon sa Manluluwas nga makatabang kanato.

• Ang kahadlok ug kakulba mga normal samtang kita nag-atiman sa mga hagit sa kinabuhi. Alang sa uban, kini nga mga pagbati makawagtang og gahom. Ang imong klase o korum tingali makabenipisyo gikan sa usa ka panaghisgotan mahitungod kon sa unsang paagi ang Manluluwas makatabang niadtong nakigbisog sa nagkalainlaing mga ang-ang sa kahingawa. Ang mga sakop sa klase o sa korum mahimong magdungan og rebyo sa mensahe ni Elder Ronald A. Rasband nga “Ayaw Kabalaka” o sa mensahe ni Elder Erich W. Kopischke nga “Paghisgot Bahin sa Kahimsog sa Pangisip” (Liahona, Nob. 2021, 36–38), mangita alang sa mga kamatuoran nga mga makahuloganon ngadto kanila ug sa pagpakigbahin kon unsa ang ilang nakaplagan. Awhaga ang kabatan-onan sa pagpakigsulti ngadto sa usa ka kasaligan nga ginikanan o lider o bisitaha ang MentalHealth.ChurchofJesusChrist.org kon nagkinahanglan sila og tabang.

batan-ong lalaki nga nagtuon

Ang Manluluwas nagsaad sa pagtabang kanato kon kita moduol ngadto Kaniya sa mga panahon sa kahadlok ug walay kasiguroan.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Josue 1:9; Salmo 56:3–4; Isaias 41:10; Juan 14:27; 2 Timoteo 1:7; Doktrina ug mga Pakigsaad 50:41–44; 68:6

Pagtudlo sumala sa Pamaagi sa Manluluwas

Samtang ikaw magtudlo, kaysa mohatag lamang og impormasyon, tabangi ang kabatan-onan sa pagdiskobre og mga kamatuoran sa ebanghelyo sa ilang mga kaugalingon diha sa mga kasulatan ug sa mga pulong sa mga propeta.