Marso 26

Unsaon sa Batan-ong mga Babaye ug Batan-ong mga Lalaki Pagtinabangay og Trabaho sa Pagtukod sa Gingharian sa Dios?

Mateo 13; Lucas 8; 13

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita nagkaplag og hingpit nga kalipay pinaagi sa pagsunod ni Jesukristo?

• Mag-atiman alang niadtong nanginahanglan. Kinsa sa atong ward o komunidad ang nagkinahanglan sa atong tabang? Sa unsang paagi kita makatabang kanila?

• Magdapit sa tanan sa pagdawat sa ebanghelyo. Sa unsang paagi kita makatabang sa usag usa nga maandam alang sa misyonaryo nga pagserbisyo?

• Maghiusa sa mga pamilya alang sa kahangtoran. Sa unsang paagi kita makatampo sa mga paningkamot sa ward sa paghimo sa buhat sa family history ug sa templo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Uban sa mga serye sa mga sambingay nga makaplagan diha sa Mateo 13, ang Manluluwas mitudlo og importanting mga kamatuoran mahitungod sa gingharian sa Dios ug ang talagsaong pagtubo niini sa atong panahon. Sa duha niini ka sambingay, usa ka butang nga gamay ug yano miresulta sa usa ka butang nga importante kaayo. Ug kini mao ang mga lihok sa usa ka anak nga lalaki o anak nga babaye sa Dios nga mitabang sa milagro nga mahitabo. Usa ka gamay nga liso sa mustasa mitubo ngadto sa usa ka dako nga kahoy igo alang sa mga langgam nga “magahimog mga batuganan diha sa iyang mga sanga” sa dihang “gidala sa usa ka tawo, ug gipugas [kini] diha sa iyang uma” (Mateo 13:31–32). Ug usa ka diyutay nga igpapatubo mihimo og usa ka dako nga masa sa pan sa pagtubo sa dihang “gikuha sa usa ka babaye, ug gilubong [kini] sa tulo ka takos nga harina” (Mateo 13:33). Ang gingharian sa Dios sa atong panahon nagtubo ug nagkaylap tungod kay ang Iyang mga Santos––lakip sa batan-ong mga babaye ug batan-ong mga lalaki––nagtinabangay uban Kaniya sa pagtukod niini.

Agi og dugang sa pagbasa sa Mateo 13 ug Lucas 8; 13 niini nga semana, hunahunaa ang pagbasa sa mensahe ni Presidente M. Russell Ballard nga “Men and Women in the Work of the Lord” (New Era, Abr. 2014, 2–5) ug mensahe ni Presidente Jean B. Bingham nga “Nagkahiusa sa Pagtuman sa Buhat sa Dios” (Liahona, Mayo 2020, 60–63).

Pagkat-on og Dungan

Sa pagtabang sa kabatan-onan nga imong gitudloan sa paghanduraw sa mga sambingay sa Mateo 13, hunahunaa ang pagpasundayag sa mga hulagway sa liso sa mustasa, igpatubo (sama sa libadora), perlas, ug sibot sa isda. Ang kabatan-onan makarebyo sa Mateo 13:31–33, 45–48 ug makapakigbahin unsa ang gitudlo sa matag sambingay kanila mahitungod sa gingharian sa langit. Sa unsang paagi kita makagamit sa mga mensahe niini nga mga sambingay diha sa atong kaugalingong mga kinabuhi? Unsa ang atong gibuhat sa pagtabang sa Ginoo sa pagtukod sa Iyang gingharian? Aniay pipila ka mga kalihokan nga makatabang sa panaghisgotan.

• Sa wala pay miting, dapita ang mga sakop sa klase o sa korum sa pagkat-on mahitungod sa mga babaye ug mga lalaki kinsa karon o kaniadto dalaygon sa pagtabang og tukod sa gingharian sa Dios. Kining mga tawhana mahimong gikan sa mga kasulatan (tan-awa sa “Suporta nga mga Kapanguhaan”), gikan sa kasaysayan sa Simbahan, o gikan sa ilang kaugalingong mga kinabuhi. Dapita ang kabatan-onan sa pagpakigbahin sa unsay ilang nakat-onan. Sa unsa nga mga paagi kining mga tawhana mitabang sa Ginoo sa pagtukod sa Iyang gingharian? Unsaon nga makasunod kita sa ilang mga ehemplo?

• Kon ikaw nagtudlo og batan-ong mga lalaki, dapita sila sa pagrebyo sa mensahe ni Presidente Bonnie L. Oscarson nga “Young Women nga anaa sa Buhat” (Liahona, Mayo 2018, 36–38) ug siksika ug pakigbahin sa mga paagi nga ang batan-ong mga babaye nagtampo ngadto sa buhat sa Dios sa kaluwasan ug kahimayaan. Ang batan-ong mga babaye makahimo og susamang pagsisik diha sa mensahe ni Brother Douglas D. Holmes nga “Unsay Kinahanglang Masabtan sa Matag Naghupot sa Aaronic Priesthood” (Liahona, Mayo 2018, 50–53). Sa unsang paagi ang mga responsibilidad sa batan-ong mga babaye ug batan-ong mga lalaki susama? Unsaon nga kita makatrabaho og mas maayo samtang nagtinabangay kita sa buhat sa Dios?

• Sa pagtabang sa kabatan-onan sa pagsabot kon unsaon sa mga babaye ug sa mga lalaki pagtinabangay sa pagtukod sa gingaharian sa Dios, makasulat ka og mga pangutana diha sa pisara sama niini: Ngano nga ang Dios nagkinahanglan sa pagtinabangay sa mga babaye ug sa mga lalaki sa pagtabang og tukod sa Iyang gingharian? Unsaon nga ang klase ug mga kapangulohan sa korum makatrabaho og mas maayo nga magtinabangay? Makarebyo sila sa mga bahin sa mensahe ni Presidente M. Russell Ballard nga “Men and Women in the Work of the Lord” o sa mensahe ni Presidente Jean B. Bingham nga “Nagkahiusa sa Pagtuman sa Buhat sa Dios,” ilabi na sa bahin nga nagsugod sa “Unsay gipasabot niana alang kaninyo ug kanako?” Ang kabatan-onan makahimo sa pagpakigbahin sa mga tubag ngadto sa mga pangutana nga ilang makaplagan.

• Sa pagtabang sa kabatan-onan sa pagsabot kon unsaon nga sila makatabang sa pagtukod sa gingharian sa Dios, hunahunaa ang paghangyo sa presidente sa klase ug sa korum sa paghatag og mga isyu nga gihisgotan diha sa ward youth council nga mga miting nga angay nga ipakigbahin. Dapita ang mga sakop sa klase o sa korum sa pagpakigbahin og mga panabot mahitungod kon sa unsang paagi sila makatabang sa mga isyu. Unsa ang atong gibuhat diha sa atong mga panimalay, atong ward, ug sa atong komunidad sa pagtabang sa buhat sa Dios? Hunahunaa ang paghangyo sa presidente sa klase o sa korum sa paghatag og mga isyu nga gihisgotan diha sa youth council nga mga miting nga mga angay nga ipakigbahin. Dapita ang mga sakop sa klase o sa korum sa pagpakigbahin og mga panabot kon unsaon nga sila makatabang sa mga isyu.

Ang Dios nagkinahanglan og mga babaye ug mga lalaki sa pagtinabangay sa pagtukod sa Iyang gingharian.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Lucas 2:21–38 (Simeon ug Ana); Mga Buhat 9:36–41 (Tabita, o Dorcas); Mosiah 18:1–17 (Alma); Mosiah 28:1–3 (anak nga mga lalaki ni Mosiah); Alma 8:18–27 (Amulek); Alma 19:15–17 (Abish); Doktrina ug mga Pakigsaad 25:5–8 (Emma Smith); Moises 5:10–12 (Adan ug Eva)

Pagtudlo sumala sa Pamaagi sa Manluluwas

Kon ikaw mohatag og usa ka pagdapit nga puy-an ang usa ka piho nga baroganan, tabangi ang mga tigkat-on sa pagdiskobre sa mga panalangin nga gisaad sa Dios niadtong kinsa nagpuyo niana nga baroganan.