Nagkahiusa sa Pagtuman sa Buhat sa Dios
Ang labing epektibong paagi sa pagtuman sa atong balaang potensyal mao ang pagtambayayong, napanalanginan sa gahum ug awtoridad sa pagkapari.
Minahal nga kaigsoonan kong mga babaye ug mga lalaki, usa kini ka hingpit nga kalipay nga makig-uban kaninyo. Bisan asa kamo naminaw, akong ipaabut ang paggakus sa akong kaigsoonan nga mga babaye ug kinasingkasing nga paglamano sa akong kaigsoonan nga mga lalaki. Kita nagkahiusa sa buhat sa Ginoo.
Kon kita maghunahuna nila ni Adan ug Eva, ang unang mahunahuna nato mao ang ilang perpektong kinabuhi sa Tanaman sa Eden. Ako naghanduraw nga ang klima perpekto kanunay—dili kaayo init ug dili kaayo bugnaw—ug nga ang abunda, lamian nga mga prutas ug utanon mitubo ra sa duol aron sila makakaon kon sila gusto. Tungod kay kini bag-ong kalibutan alang nila, daghan kaayo ang talan-awon, mao nga matag adlaw makapahinam samtang sila dunay inter-aksyon sa mga hayop ug nagsuhid sa ilang matahum nga palibut. Sila usab gihatagan og mga sugo nga sundon ug lain-lain ang mga paagi sa pagsabut niadtong mga instruksyon, nga nakaingon sa inisyal nga kabalaka ug kalibug. 1 Apan sa ilang paghimo og mga desisyon nga nakapausab sa ilang kinabuhi sa kahangturan, sila nakat-on sa pagtambayayong ug nagkahiusa sa pagtuman sa mga katuyoan sa Dios alang kanila—ug alang sa tanan Niyang mga anak.
Karon ihulagway kining maong magtiayon sa pagka-mortal. Sila maghago aron makakaon, ang pipila ka mga hayop miisip nila nga pagkaon, ug dihay lisud nga mga hagit nga mabuntog lamang samtang sila magtinambagay ug mag-ampo. Ako naghunahuna nga dihay pila ka higayon nga sila dunay managlahing opinyon kon unsaon sa pag-atubang niadtong mga hagit. Hinoon, pinaagi sa Pagkapukan, sila nakat-on nga importante ang paglihok diha sa panaghiusa ug paghigugma. Sa pagtudlo nga ilang nadawat gikan sa balaang mga tinubdan, sila gitudloan sa plano sa kaluwasan ug sa mga baruganan sa ebanghelyo ni Jesukristo nga nakapahimo sa plano nga epektibo. Tungod kay sila nakasabut nga ang ilang yutan-ong katuyoan ug mahangturong tumong pareho, sila nakakita og katagbawan ug kalampusan sa pagkat-on sa paghago pinaagi sa gugma ug pagkamatarung.
Samtang nangatawo ang ilang mga anak, sila si Adan ug Eva mitudlo sa ilang pamilya unsay ilang nakat-unan gikan sa langitnong mga mensahero. Sila nakatutok sa pagtabang sa ilang mga anak nga makasabut usab ug makadawat sa mga baruganan nga makapalipay nila niini nga kinabuhi, ingon man makaandam sa pagbalik ngadto sa ilang langitnong mga ginikanan human makapauswag sa ilang mga abilidad ug namatud-an ang ilang pagkamasulundon ngadto sa Dios. Sa pagbuhat sa ingon, sila si Adan ug Eva nakat-on sa pagdawat sa ilang managlahi nga mga kalig-on ug nagsuportahay sa ilang mahangturong buhat. 2
Samtang ang mga siglo ug milenyum miabut ug milabay, ang kaklaro sa dinasig ug pagsalig sa mga kontribusyon sa usag usa nausab tungod sa sayop nga impormasyon ug walay pagsinabtanay. Sa panahon tali nianang talagsaong sinugdanan sa Tanaman sa Eden ug karon, ang kaaway nagmalampuson sa iyang tumong nga mabahin ang mga lalaki ug babaye sa iyang paningkamot sa pag-angkon sa atong mga kalag. Si Lucifer nakahibalo nga kon iyang maguba ang gibati nga panaghiusa sa mga lalaki ug babaye, kon siya makapalibug nato sa atong balaang bili ug mga responsibilidad sa pakigsaad, siya magmalampuson sa paglaglag sa mga pamilya, nga mao ang importanting mga unit sa kahangturan.
Si Satanas nag-agni og panagtandi isip usa ka himan nga mobati nga mas taas o mas ubos, nagtago sa mahangturong kamatuoran nga ang kalainan sa mga lalaki ug babaye gituyo sa Dios ug parehang gihatagan og bili. Siya misulay sa pagbaliwala sa mga kontribusyon sa mga babaye ngadto sa pamilya ug sa sibil nga katilingban, sa ingon mipakunhod sa ilang makabayaw nga impluwensya alang sa maayo. Ang iyang tumong mao ang pag-awhag og pakigbisog sa gahum kay sa pagsaulog sa mga kontibusyon sa mga lalaki ug mga babaye nga nagsangkap sa usag usa ug nakasalmot sa panaghiusa.
Sa milabayng katuigan ug sa tibuok kalibutan, ang pagsabut sa balaang pagsalig sa usag usa ug magkalahing mga kontribusyon ug mga responsibilidad sa mga babaye ug mga lalaki nawala na. Ang mga babaye sa daghang mga katilingban sunod-sunod sa mga lalaki imbis managkauban, ang ilang mga kalihokan limitado sa gamay nga bahin. Ang espirituhanong kauswagan hinay atol niadtong mangitngit nga mga panahon, sa tinuod, gamay ra nga espirituhanong kahayag ang makasulod sa mga hunahuna ug mga kasingkasing nga puno sa mga tradisyon sa pagkadominante.
Ug dayon ang kahayag sa gipahiuli nga ebanghelyo misanag “labaw sa kahayag sa adlaw” 3 sa dihang ang Dios nga Amahan ug ang Iyang Anak nga si Jesukristo, nagpakita sa batan-on nga si Joseph Smith sayo sa tingpamulak sa 1820 nianang balaang kakahoyan sa amihanang New York. Kana nga hitabo misugod sa modernong paghatag og pagpadayag gikan sa langit. Usa sa unang mga elemento sa orihinal nga Simbahan ni Kristo aron mapahiuli mao ang awtoridad sa pagkapari sa Dios. Samtang ang Pagpahiuli nagpadayon, ang mga lalaki ug mga babaye nakaamgo sa kaimportante ug potensyal sa pagtambayayong isip managkauban, Iyang gitugutan ug gigiyahan niining sagradong paghago.
Niadtong 1842, sa dihang ang mga babaye sa bag-ong Simbahan gustong magporma og opisyal nga grupo sa pagtabang sa buhat, si Presidente Joseph Smith mibati nga nadasig sa pag-organisar kanila “ubos sa priesthood subay sa sumbanan sa priesthood.” 4 Siya miingon, “Ako karon mohatag sa yawe nganha kaninyo sa ngalan sa Dios; …—kini mao ang sinugdanan sa maayong mga adlaw.” 5 Ug tungod kay ang yawe gihatag, ang edukasyon, politikanhon, ug ekonomikanhong mga oportunidad alang sa mga babaye nagsugod sa paglapad sa tibuok kalibutan. 6
Kining bag-ong organisasyon sa Simbahan alang sa mga babaye, nga ginganlan og Relief Society, dili pareha sa ubang mga kapunongan nianang panahona tungod kay kini giestablisar sa usa ka propeta kinsa naglihok uban ang awtoridad sa pagkapari sa paghatag sa mga babaye og awtoridad, sagrado nga mga responsibilidad, ug opisyal nga mga katungdanan diha sa estraktura sa Simbahan, dili lahi gikan niini. 7
Gikan sa panahon ni Propeta Joseph Smith hangtud karon, ang nagpadayon nga pagpahiuli sa tanang mga butang nakahatag og kahayag sa panginahanglan sa awtoridad ug gahum sa pagkapari sa pagtabang sa mga lalaki ug mga babaye nga matuman ang ilang balaang mga responsibilidad. Karong bag-o kita gitudloan nga ang mga babaye nga gi-set apart ubos sa direksyon sa usa ka tawo nga naghupot sa mga yawe sa pagkapari naglihok uban sa awtoridad sa pagkapari sa ilang mga calling. 8
Niadtong Oktubre 2019, si Presidente Russell M. Nelson mitudlo nga ang mga babaye nga natugahan sa templo adunay gahum sa pagkapari sa ilang kinabuhi ug sa ilang mga panimalay samtang sila motuman niadtong sagrado nga mga pakigsaad nga ilang gihimo uban sa Dios. 9 Siya mipasabut nga “ang kalangitan abli sa mga babaye kinsa natugahan sa gahum sa Dios nga gikan sa ilang mga pakigsaad sa pagkapari sama ngadto sa mga lalaki kinsa naghupot sa pagkapari.” Ug siya miawhag sa matag sister sa “paggamit kanunay sa gahum sa Manluluwas sa pagtabang sa inyong pamilya ug sa uban nga inyong gimahal.” 10
Unsay gipasabut niana alang kaninyo ug kanako? Sa unsa nga paagi nga ang pagsabut sa awtoridad ug sa gahum sa pagkapari makapausab sa atong kinabuhi? Usa sa mga importane mao ang pagsabut nga kon ang mga babaye ug mga lalaki magtambayayong kita makahimo og dako kay sa magbinugtong. 11 Ang atong mga tahas gikinahanglan sa usag usa kay sa magkompetensyahay. Bisan og ang mga babaye wala ma-orden ngadto sa katungdanan sa pagkapari, sumala sa gihisgutan sa miagi, ang mga babaye napanalanginan og gahum sa pagkapari samtang sila motuman sa ilang mga pakigsad, ug sila naglihok uban sa awtoridad sa pagkapari sa dihang gi-set apart sa usa ka calling.
Sa usa ka matahum nga adlaw sa Agosto, ako dunay pribilehiyo nga molingkod uban ni Presidente Russell M. Nelson sa gitukod pag-usab nga panimalay nila ni Joseph ug Emma Smith sa Harmony, Pennsylvania, duol diin ang Aaronic nga Pagkapari gipahiuli niining ulahing mga adlaw. Sa among panag-istorya, si Presidente Nelson naghisgot mahitungod sa importante nga tahas nga gidala sa mga babaye sa Pagpahiuli.
Presidente Nelson: “Usa sa labing importante nga mga aspeto nga akong nahinumduman bahin kon ako moanhi niining dapit sa pagpahiuli sa pagkapari mao ang importante nga tahas sa mga babaye diha sa Pagpahiuli.
“Sa dihang si Joseph unang nagsugod sa paghubad sa Basahon ni Mormon, kinsa ang nagsulat? Hinoon, gamay ra iyang nahimo, dili daghan. Si Emma miapil.
“Ug ako naghunahuna ni Joseph nga miadto sa kakahoyan aron mag-ampo duol sa ilang panimalay sa Palmyra, New York. Diin siya miadto? Siya miadto sa Sagrado nga Kakahoyan. Nganong miadto siya didto? Tungod kay didto miadto si Mama kon siya gusto nga mag-ampo.
“Mao kadto ang duha ka babaye kinsa adunay mga tahas sa pagpahiuli sa pagkapari ug sa Pagpahiuli sa Simbahan. Walay duha-duha, kita makaingon nga ang atong mga asawa sama ka importante karon sama kaniadto. Siyempre sila importante.”
Sama nila ni Emma ug Lucy ug Joseph, kita labing epektibo kon kita andam nga makat-on sa usag usa ug nagkahiusa sa atong tumong nga mahimong mga disipulo ni Jesukristo ug motabang sa uban subay niana nga dalan.
Kita gitudloan nga ang “pagkapari manalangin sa mga kinabuhi sa mga anak sa Dios sa daghang paagi. … Sa mga calling sa [Simbahan], mga ordinansa sa templo, mga relasyon sa pamilya, ug sa hilum, indibidwal nga pagpangalagad, ang Santos sa Ulahing Adlaw nga mga babaye ug mga lalaki naglihok uban sa gahum ug awtoridad sa pagkapari. Ang pagsinaligay sa mga lalaki ug mga babaye sa pagtuman sa buhat sa Dios pinaagi sa Iyang gahum usa ka mahinungdanong bahin sa ebanghelyo ni Jesukristo nga gipahiuli pinaagi ni Propeta Joseph Smith.” 12
Ang panaghiusa importante sa balaan nga buhat nga kita dunay pribilehiyo ug gitawag sa pagbuhat, apan dili lang kini mahitabo. Kini nagkinahanglan og paningkamot ug panahon nga magtinambagay—sa pagpaminaw sa usag usa, pagsabut sa panglantaw sa uban, ug mag-ambitay og mga kasinatian—apan ang proseso moresulta sa mas madasigong mga desisyon. Bisan sa mga responsibilidad sa panimalay o sa Simbahan, ang labing epektibong paagi sa pagtuman sa atong balaang potensyal mao ang pagtambayayong, napanalanginan sa gahum ug awtoridad sa Iyang pagkapari sa atong managlahi apan igsasangkap nga mga tahas.
Unsa kaha nga matang ang panag-uban sa mga kinabuhi sa mga babaye sa pakigsaad karon? Mopakigbahin ko og ehemplo.
Sila si Alison ug John adunay talagsaon nga panag-uban. Silang duha mosakay og biseklita sa mga lumba nga duol ug lagyo. Aron malampusong makig-indigay niana nga sakyanan, ang duha ka nanakay kinahanglan magkahiusa. Sila kinahanglang motakilid sa samang direksyon sa saktong panahon. Ang usa dili modominar sa lain, apan sila kinahanglang magkasinabot ug ang matag usa mohimo sa iyang bahin. Ang kapitan, sa atubangan, maoy mokontrol kon kanus-a mohunog ug kanus-a mobarug. Ang nagsakay sa luyo, kinahanglang magbantay unsay nahitabo ug andam nga mohatag og dugang ayuda kon sila nabiyaan og gamay o mohinay kon sila duol ra kaayo sa ubang seklista. Sila kinahanglang mosuporta sa usag usa aron mouswag ug makab-ot ang ilang tumong.
Si Alison mipasabut: “Sa sinugdanan, ang tawo nga mao ang kapitan moingon ‘Barug’ kon kita kinahanglan nga mobarug ug ‘Hunong’ kon kita kinahanglan nga mohunong sa pagtindak. Pagkahuman, ang tawo nga anaa sa luyo magbantay kon ang kapitan hapit na mobarug o mohunong, ug dili na kinahanglan nga mosulti. Kami makahibalo kon ang usa namo naglisud ug [dayon] ang wa maglisud maoy maningkamot nga mopaspas mi og usab. Mahitungod gayud kini sa pagsalig ug pagtambayayong.” 13
Sila si John ug Alison nagkahiusa dili lamang sa ilang pagsikad sa ilang biseklita, apan sila nagkahiusa sa ilang kaminyoon usab. Ang matag usa nagtinguha sa kalipay sa lain labaw sa iyang kaugalingon; ang matag usa mangita sa maayong gawi sa usag usa ug maningkamot sa pagbuntog sa dili kaayo maayong kaniya. Sila magpuli-puli sa pagpangulo ug magpuli-puli sa paghatag og dugang kon ang usa ka partner nagkalisud. Ang matag usa mohatag og bili sa mga kontribusyon sa lain ug nakakita og mas maayong mga tubag sa ilang mga hagit samtang sila mohiusa sa ilang mga talento ug mga kapanguhaan. Sila sa tinuod nagkahiusa pinaagi sa Kristohanong gugma.
Mahimong mas mahiusa sa balaang sundanan sa pagtambayayong sa panaghiusa importante niining panahon sa “akoy una” nga mga mensahe nga naglibut kanato. Ang mga babaye adunay lahi, balaang mga gasa 14 ug gihatagan og talagsaong mga responsibilidad, apan kadto dili labaw—o ubos—kaimportante kay sa mga gasa ug mga responsibilidad sa mga lalaki. Ang tanan gidesinyo ug gikinahanglan sa pagpahinabo sa balaang plano sa Langitnong Amahan sa paghatag sa matag usa sa Iyang mga anak sa labing maayong oportunidad sa pagtuman sa iyang balaang potensyal.
Karon, “nagkinahanglan kita og mga babaye nga adunay kaisug ug panglantaw sa atong Inahan nga si Eva” 15 sa paghiusa sa ilang kaigsoonan sa pagdala og mga kalag ngadto ni Kristo. 16 Ang mga lalaki kinahanglang mahimong tinuod nga mga kauban kay sa magtuo nga sila mao lang ang responsable o paglihok ingon nga “nagpakaaron-ingnon” nga mga kauban samtang ang mga babaye maoy naghimo sa daghang trabaho. Ang mga babaye kinahanglan nga “moabante [ug] moangkon sa [ilang] tukma ug importanting dapit” 17 isip mga kauban kay sa maghunahuna nga sila kinahanglang mobuhat niining tanan o maghulat nga sultihan unsay buhaton. 18
Ang pagtan-aw sa mga babaye isip importante nga mga partisipante dili mahitungod sa “pagkasama” apan mahitungod sa pagsabut sa kamatuoran sa doktrina. Imbis mag-establisar og programa sa pagpahinabo niana, kita aktibong motrabaho sa paghatag bili sa mga babaye sama sa gibuhat sa Dios: isip importante nga mga kauban sa buhat sa kaluwasan ug kahimayaan.
Andam na ba kita? Kita ba maningkamot sa pagbuntog sa dili patas tungod sa atong kultura ug mosagop sa balaan nga mga sundanan ug mga binuhatan basi sa pundasyon nga doktrina? Si Presidente Russell M. Nelson midapit kanato nga “magtinabangay kita niining sagradong buhat … [nga] motabang sa pag-andam sa kalibutan alang sa Ikaduhang Pag-anhi sa Ginoo.” 19 Kon buhaton nato, kita makat-on sa paghatag og bili sa indibidwal nga mga kontribusyon sa usag usa ug dugangan ang kaepektibo diin kita makatuman sa atong balaan nga mga tahas. Kita mobati og mas dakong kalipay kay sa atong nasinati na.
Hinaut nga ang matag usa nato mopili nga magkahiusa diha sa dinasig nga paagi sa Ginoo sa pagtabang sa Iyang buhat nga magpadayon. Sa ngalan sa atong minahal nga Manluluwas, nga si Jesukristo, amen.