Katumanan sa Panagna
Ang mga panagna nga natuman sa Pagpahiuli sa kahingpitan sa ebanghelyo ni Jesukristo daghan.
Akong minahal nga mga kaigsoonan, akong dungog nga makapamulong niining makasaysayanong kinatibuk-ang komperensya nga naghandum sa Unang Panan-awon ni Joseph Smith bahin sa Dios nga Amahan ug sa Iyang Anak, si Jesukristo, nga sa walay pagduha-duha, diha sa usa ka Sagradong Kakahoyan. Kana nga panan-awon usa ka talagsaong sinugdanan sa Pagpahiuli sa ebanghelyo ug sa tanang nahitabo, gikan sa Basahon ni Mormon hangtud sa pagbalik sa awtoridad ug mga yawe sa pagkapari, sa pag-organisar sa tinuod nga Simbahan sa Ginoo, sa mga templo sa Dios, ug sa mga propeta ug mga apostoles nga nangulo sa buhat niining ulahing mga adlaw.
Pinaagi sa balaanong plano, ang karaang mga propeta sa Dios, dihang giaghat sa Espiritu Santo, nanagna bahin sa Pagpahiuli ug sa unsay moabut sa atong panahon, ang katapusang dispensasyon ug ang kahingpitan sa panahon. Ang mismong buhat “nga midasig sa mga kalag” sa nag-unang mga manalagna.1 Sulod sa mga henerasyon, sila nagtagna, nagdamgo, naglantaw, ug nanagna bahin sa umaabut nga gingharian sa Dios dinhi sa yuta, sa unsay gitawag ni Isaias nga “usa ka katingalahang buhat ug usa ka kahibulongan.”2
Ang mga panagna nga natuman sa Pagpahiuli sa kahingpitan sa ebanghelyo ni Jesukristo, lakip na Ang Simbahan ni Jesukristo sa mga Santos sa Ulahing mga Adlaw, daghan. Karon, hinoon, akong hatagan og gibug-aton ang pipila lamang sa akong mga paborito. Gitudlo kini kanako sa akong minahal nga mga magtutudlo sa Primary ug sa tiilan sa boutan nako nga inahan.
Si Daniel, kinsa mipugong sa mga leon pinaagi sa iyang pagtuo ni Ginoong Jesukristo ug sa panginlabut sa tigpangalagad nga mga anghel sa Dios, nakakita sa atong panahon sa usa ka panan-awon. Nag-interpretar og damgo alang sa taga-Babelon nga si Haring Nabucodonosor, nanagna si Daniel sa Simbahan sa Ginoo nga motungha sa katapusang mga adlaw sama sa gamay nga bato nga “gipikas gikan sa bukid nga walay gigamit nga mga kamot.”3 Sa “walay gigamit nga mga kamot,” nagpasabut pinaagi sa balaanong panginlabut, ang Simbahan sa Ginoo modako hangtud nga mopuno kini sa tibuok yuta, nga “dili gayud malumpag … [apan] molungtad sa walay katapusan.”4
Usa kini ka talagsaong saksi nga ang mga pulong ni Daniel nangatuman samtang ang mga miyembro sa Simbahan, gikan sa tibuok kalibutan, nagtan-aw ug naminaw sa komperensya karon.
Ang mapahinunguron nga si Apostol Pedro mihulagway sa “panahon sa pagtuman na sa tanan … sukad pa sa karaang kapanahonan.”5 Si Apostol Pablo misulat nga sa kahingpitan sa panahon, ang Dios “[mo]hiusa … diha kang Kristo sa tanang mga butang,”6 “si Jesukristo mao ang ulohang bato sa pamag-ang.”7 Ako mibati niadtong mga panagna sa hilabihan sa dihang miapil ko sa pagpahinungod sa Templo sa Rome Italy. Ang tanang propeta ug mga apostoles anaa didto nga nagpamatuod bahin ni Jesukristo, ang Manunubos sa kalibutan, sama kang Pedro ug Pablo. Ang Simbahan usa ka buhi nga ehemplo nianang restitusyon, mga kaigsoonan, ug ang atong mga miyembro mga saksi niadtong balaang mga panagna sa dugay nang panahon.
Si Jose sa Ehipto nanagna nga sa ulahing mga adlaw “usa ka manalagna ang pasanayon sa Ginoo nga akong Dios, kinsa mao ang usa ka pinili nga manalagna ngadto sa bunga sa akong mga kaliwat.”8 “Kay siya mobuhat sa buhat [sa Ginoo].”9 Si Joseph Smith, ang propeta sa Pagpahiuli, mao kana nga manalagna.
Si Juan ang Tigpadayag nanagna bahin sa usa ka anghel sa Labawng Makagagahum nga nagdala sa importanting mga elemento sa Pagpahiuli pinaagi niining mga pulong: “Ug nakita ko ang laing manulonda nga naglupad sa taliwala sa kalangitan, ug kini siya may gidalang walay katapusang maayong balita aron imantala ngadto sa mga nanagpuyo sa yuta, ug sa tanang kanasuran, ug kabanayan, ug pinulongan, ug katawhan.”10 Si Moroni mao kana nga anghel. Nakita niya ang atong panahon sigun sa narekord diha sa Basahon ni Mormon. Sa balik-balik nga pagpakita, iyang giandam si Joseph Smith alang sa iyang pangalagad, lakip na ang paghubad sa Basahon ni Mormon: Lain nga Tugon ni Jesukristo.
Ang ubang mga propeta nanagna sa atong panahon. Si Malaquias naghisgot ni Elijah nga pabalikon “ang kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan.”11 Si Elijah miabut, ug isip resulta, karon kita adunay 168 ka templo nga makita sa tibuok yuta. Ang matag templo nagserbisyo sa takus nga mga miyembro nga naghimo og sagradong mga pakigsaad ug nagdawat og makapanalangin nga mga ordinansa alang sa ilang kaugalingon ug sa ilang namatay nga mga katigulangan. Kining sagrado nga buhat nga gihulagway ni Malaquias “mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak.”12
Kita nagpuyo nianang gipanagna nga panahon; kita ang katawhan nga gitahasan sa responsibilidad sa dili pa moabut ang Ikaduhang Pag-anhi ni Jesukristo; kita ang mopundok sa mga anak sa Dios, kadtong maminaw ug mohangup sa mga kamatuoran, mga pakigsaad, ug mga saad sa walay katapusang ebanghelyo. Si Presidente Nelson mitawag niini nga mao “ang labing dakong hagit, ang labing dakong kawsa, ug ang labing dakong buhat sa yuta karon.”13 Niana nga milagro ako mohatag sa akong pagsaksi.
Pinaagi sa pagsangun gikan ni Presidente Russell M. Nelson, pagka-Pebrero niining tuiga akong gipahinungod ang Templo sa Durban South Africa. Usa kadto ka adlaw nga akong mahinumduman sa tibuok nakong kinabuhi. Kauban nako ang mga miyembro nga mihangup sa ebanghelyo sama sa gipanagna ni Jeremias sa dugay nang panahon—“usa ka siyudad, ug duruha sa usa ka panimalay.”14 Ang doktrina ni Jesukristo naghiusa natong tanan—sa tibuok kalibutan—isip mga anak sa Dios, isip managsoon diha sa ebanghelyo. Bisan unsa pa ang atong panagway o sininaan, usa kita ka katawhan nga adunay Amahan sa Langit kansang plano gikan pa sa sinugdanan ug alang sa Iyang pamilya aron mahiusa pag-usab pinaagi sa paghimo ug pagtuman sa sagradong mga pakigsaad sa templo.
Ngadto sa gamay nga pundok sa mga naghupot sa pagkapari didto sa usa kaeskwelahan sa Kirtland, Ohio, niadtong 1834, si Propeta Joseph nanagna, “Gamay ra nga mga Priesthood ang inyong nakita karong gabhiona, pero kini nga Simbahan molukop sa Amihanan ug Habagatang Amerika––molukop kini sa kalibutan.”15
Sa bag-ong katuigan nakabiyahe ko sa tibuok kalibutan aron mahimamat ang mga miyembro sa Simbahan. Ang akong mga Kaigsoonan sa Korum sa Napulog Duha adunay susama nga mga buluhaton. Sa gihapon, kinsa man ang makaapas sa iskedyul sa atong minahal nga propeta, si Presidente Nelson, kansang pagbiyahe sa iyang unang duha ka tuig isip Presidente sa Simbahan midala kaniya aron mahimamat ang mga Santos sa 32 ka nasud ug mga teritoryo sa U.S.16 aron mosaksi sa buhi nga Kristo.
Ako nahinumdom sa dihang nadawat nako ang akong mission call samtang batan-on pa. Gusto kong moserbisyo sa Germany, sama sa akong papa, igsoong lalaki, ug bayaw nga lalaki. Wala maghulat ni bisan kinsa nga makapauli, midali kog adto sa mailbox ug miabli sa call. Akong nabasa nga gitawag ko ngadto sa Eastern States Mission, nga ang ulohang buhatan anaa sa Siyudad sa New York. Nasagmuyo ko, busa misulod ko ug giabli ang akong mga kasulatan alang sa kahupayan. Nagsugod ko pagbasa sa Doktrina ug mga Pakigsaad: “Tan-awa, ug sud-onga, Ako adunay daghan nga mga katawhan niini nga dapit, sa naglibut nga mga rehiyon; ug ang usa ka masangputon nga pultahan pagabuksan diha sa naglibut nga mga rehiyon niining silangan nga bahin sa yuta.”17 Kana nga panagna, nga gihatag ngadto ni Propeta Joseph Smith niadtong 1833, usa ka pagpadayag ngari nako. Nasayud ko nianang higayuna nga gitawag ko sa eksaktong misyon nga gusto sa Ginoo nga akong serbisyuhan. Nagtudlo ko sa Pagpahiuli ug sa talagsaong sinugdanan niini sa dihang ang atong Amahan sa Langit namulong ngadto ni Joseph Smith ug miingon, “Kini mao ang Akong Hinigugmang Anak. Paminaw Kaniya!”18
Mahinungdanon alang sa tibuok Simbahan mao ang panagna ni Isaias, nga gihatag sobra na sa 700 ka tuig sa wala pa matawo si Jesukristo: “Ug mahinabo sa ulahing mga adlaw, ang bukid sa balay sa Ginoo pagatukuron sa ibabaw sa tumoy sa kabukiran, … ug ang tanang mga nasud magaganayan ngadto kaniya.”19
Sa akong hunahuna karon, naghunahuna ko sa minilyon sa atong mga miyembro ug mga higala nga konektado niining mga kahimoan [proceedings] sa elektronik nga paagi pinaagi sa telebisyon, internet, o sa ubang pamaagi. Kita daw kaubang naglingkod “sa ibabaw sa tumoy sa kabukiran.”20 Si Brigham Young kadtong namulong sa propetikanhong mga pulong nga “Kini ang tukma nga dapit.”21 Ang mga Santos, ang uban kanila kaugalingon nakong mga katigulangan nga pioneer, nagtrabaho aron maestablisar ang Zion sa Rocky Mountains “pinaagi sa kabubut-on ug kahimuot Niya kinsa nagamando sa mga nasud sa yuta.”22
Ako nagbarug karon sa sagradong luna nga nakadani og minilyon ka mga bisita. Niadtong 2002, ang Siyudad sa Salt Lake maoy mi-host sa Winter Olympic Games. Ang Tabernacle Choir nanganta sa pangbukas nga mga seremonya, ug ang Simbahan mitanyag og mga konsyerto ug mga programa alang sa mga bisita ug mga partisipante gikan sa daghan kaayong mga nasud. Ako kanunay nga mahinumdom nga makita ang templo diha sa likod sa panggabii nga mga sibya sa mga balita sa tibuok kalibutan.
Sulod sa katuigan, ang mga presidente sa Estados Unidos, mga hari, mga huwes, mga prime minister, mga ambasador, ug mga opisyales gikan sa daghang dapit miabut sa Siyudad sa Salt Lake ug nahimamat ang atong mga lider. Si Presidente Nelson mi-host sa mga lider sa National Association for the Advancement of Colored People, usa ka organisasyon sa Estados Unidos nga mapasaligon sa parehas nga mga katungod nga walay diskriminasyon base sa kaliwat. Ako nahinumdom nga nagbarug tupad niining mga higala ug mga lider samtang si Presidente Nelson miapil kanila nga nanawagan alang sa mas dakong pagtahud ug panag-uyon sa mga kaliwatan dinhi sa kalibutan.23
Daghan pa ang miabut sa Temple Square ug nakigtambag uban sa mga lider sa Simbahan. Pananglitan, sa miaging tuig, sa paghingalan lang og pipila, atong gi-welcome ang ika-68 nga Civil Society Conference sa United Nations, usa ka tibuok kalibutan nga panagtigum ug ang una nga nahitabo sa gawas sa Siyudad sa New York. Kita nakighimamat sa Committee for Religious Affairs sa Vietnam ug mga ambasador gikan sa Cuba, sa Pilipinas, Argentina, Romania, Sudan, Qatar, ug Saudi Arabia. Kita mi-welcome usab sa secretary general sa Muslim World League.
Unsay akong gihulagway mao ang katumanan sa panagna ni Isaias nga sa katapusang mga adlaw, ang mga nasud moadto “sa bukid sa balay sa Ginoo.”24 Ang nabantog nga Templo sa Salt Lake nagbarug diha sa sentro nianang kahalangdon ug himaya.
Dili ang talan-awon ang nakadani sa mga tawo, bisan kon ang atong nahimutangan talagsaon; kini ang kahulugan sa putli nga relihiyon nga gipakita diha sa diwa, paglambo, kaayo, ug kamanggihatagon sa Ang Simbahan ni Jesukristo sa mga Santos sa Ulahing mga Adlaw ug sa katawhan niini; ang atong gugma sama sa paghigugma sa Dios; ang atong pasalig sa mas halangdon nga kawsa, nga gitawag ni Joseph Smith nga “[ang] kawsa ni Kristo.”25
Kita wala masayud kon kanus-a mobalik ang Manluluwas, apan kita nasayud niini. Kita kinahanglang andam sa kasingkasing ug hunahuna, takus nga modawat Kaniya, ug dungganon nga mahimong kabahin sa tanang gipanagna sa dugay na kaayong panahon.
Ako mopamatuod nga si Presidente Russell M. Nelson mao ang propeta sa Ginoo dinhi sa yuta, ug anaa sa iyang kiliran ang mga Apostoles nga gitwag sa Dios, gipaluyohan isip mga propeta, mga manalagna, ug mga tigpadayag. Ug, akong minahal nga kaigsoonan, ang Pagpahiuli nagpadayon.
Akong tapuson uban sa panagna ni Joseph Smith, mga pulong nga ako mopamatuod nga tinuod: “Walay dili balaan nga kamot ang makapugong sa buhat sa paglambo; mga pagpanggukod mahimong magkakusog, ang mga manggugubot mahimong maghiusa, mga kasundaluhan magpundok, mga pasangil mahimong modaot sa kadungganan, apan ang kamatuoran sa Dios magpadayon nga maisugon, halangdon ug gawasnon, hangtud nga kini makasulod sa matag yuta, makabisita sa matag dapit, molukop sa matag nasud, ug makasulti sa matag dunggan, hangtud ang mga katuyoan sa Dios matuman, ug ang Halangdong Jehova moingon nga ang buhat nahuman na.”26 Ako mopamatuod nga kining mga panagna ni Joseph Smith nangatuman.
Ako mosaad nga sa inyong pagsunod sa dinasig nga tambag sa atong minahal nga propeta, si Presidente Russell M. Nelson, sa iyang mga magtatambag, sa mga Apostoles, ug sa ubang mga lider sa Simbahan, ug samtang mopatalinghug kamo sa karaang mga propeta nga nanagna sa atong panahon, kamo mapuno, sa kinauyukang bahin sa inyong kasingkasing ug kalag, sa diwa ug sa buhat sa Pagpahiuli. Ako mosaad kaninyo nga inyong makita ang kamot sa Dios diha sa inyong kinabuhi, makadungog sa Iyang mga pag-aghat, ug mobati sa Iyang gugma. Sa ngalan ni Jesukristo, uban sa pasalamat alang sa Pagpahiuli sa Iyang ebanghelyo ug sa Iyang Simbahan, agig ebidensya sa Iyang dili hitupngan nga gugma, amen.