Pagsiguro og Matarung nga Paghukom

Ni Elder James R. Rasband

Sa Seventy

Sa pagsiguro sa matarung nga paghukom, ang Manluluwas mohawan sa sagbut sa pagkaignorante ug sa masakit nga mga tunok sa kasakit nga nahimo sa uban.

Ang Basahon ni Mormon Nagtudlo sa Doktrina ni Kristo

Sa miaging Oktubre, si Presidente Russell M. Nelson mihagit kanato sa pagkonsiderar kon unsa kaha ka lahi ang atong kinabuhi kon ang atong “kahibalo nga naangkon gikan sa Basahon ni Mormon kalit nga kuhaon?”¹ Ako namalandong sa iyang pangutana, sama sa kadaghanan ninyo. Usa ka hunahuna nga nagsige og balik-balik—kon wala ang Basahon ni Mormon ug sa kaklaro niini bahin sa doktrina ni Kristo ug sa Iyang maulaong sakripisyo, asa ako mangita og kalinaw?

Ang doktrina ni Kristo—nga naglangkob sa makaluwas nga mga baruganan ug mga ordinansa sa hugot nga pagtuo kang Kristo, paghinulsol, bunyag, sa gasa sa Espiritu Santo, ug paglahutay hangtud sa katapusan—gitudlo sa makadaghan sa tanang mga kasulatan sa Pagpahiuli apan uban sa piho nga gahum sa Basahon ni Mormon.² Ang doktrina magsugod sa hugot nga pagtuo kang Kristo, ug ang matag usa sa mga elemento niini nagdepende sa pagsalig sa Iyang maulaong sakripisyo.

Sama sa gitudlo ni Presidente Nelson “Ang Basahon ni Mormon naghatag sa kahingpitan sa labing masaligon nga pagsabut sa Pag-ula ni Jesukristo nga makaplagan bisan asa.”³ Kon nakasabut kita sa langitnong gasa sa Manluluwas, mas makahibalo ta, sa atong hunahuna ug sa atong kasingkasing,⁴ sa katinuod sa kasiguroan ni Presidente Nelson nga “ang mga kamatuoran sa Basahon ni Mormon adunay gahum sa pag-ayo, paghupay, pagpahiuli, pagtabang, paglig-on, pagpakalma, ug pag-abiba sa atong mga kalag.”⁵

Ang Pag-ula sa Manluluwas Nagtagbaw sa Tanang Gipangayo sa Kaangayan

Ang importante ug nakahatag og kalinaw nga kontribusyon sa Basahon ni Mormon sa atong pagsabut sa Pag-ula sa Manluluwas mao ang pagtulun-an niini nga ang maloloy-ong sakripisyo ni Kristo nagtuman sa tanang gipangayo sa kaangayan. Sa gipasabut ni Alma: “Ang Dios sa iyang kaugalingon miula sa iyang dugo alang sa mga sala sa kalibutan, aron pagpadangat sa laraw sa kalooy, pagtagbaw sa mga gipangayo sa kaangayan, nga ang Dios unta mahimo nga usa ka mahingpit, makiangayon nga Dios, ug usa ka maloloy-on nga Dios usab.”⁶ Ang laraw sa kalooy sa Amahan⁷—nga gitawag usab sa mga kasulatan nga laraw sa kalipay⁸ o ang laraw sa kaluwasan⁹—dili matuman hangtud ang tanang gipangayo sa kaangayan mahatag.

Apan unsa gayud ang “mga gipangayo sa kaangayan”? Ikonsiderar ang kaugalingong kasinatian ni Alma. Hinumdumi nga isip batan-on si Alma nagtinguha “sa paglaglag sa simbahan.”¹⁰ Gani, si Alma misulti sa iyang anak nga si Helaman nga siya “gihasol uban sa mga kasakit sa imperno” tungod kay siya epektibo nga “nakabuno sa daghan nga mga anak sa [Dios]” pinaagi sa paglingla “kanila ngadto sa kalaglagan.”¹¹

Si Alma mipasabut ngadto ni Helaman nga ang kalinaw sa katapusan miabut kaniya sa dihang “nahinumdom usab” siya sa mga pagtulun-an sa iyang amahan “mahitungod sa pag-anhi ni … Jesukristo … sa pag-ula sa mga sala sa kalibutan.”¹² Ang mahinulsulon nga Alma nangamuyo sa kalooy ni Kristo¹³ ug mibati sa kalipay ug kahupayan sa dihang siya nakaamgo nga si Kristo miula sa iyang mga sala ug mibayad sa tanang gikinahanglan sa kaangayan. Usab, unsa ang gikinahanglan sa kaangayan gikan ni Alma? Si Alma mitudlo mismo, “Walay mahugaw nga butang nga makapanunod sa gingharian sa Dios.”¹⁴ Sa ingon, kabahin sa kahupayan ni Alma tingali mao, gawas kon mangaliya og kalooy, ang kaangayan makapugong unta kaniya sa pagpuyo uban sa Langitnong Amahan.¹⁵

Ang Manluluwas Moayo sa mga Samad nga Dili Nato Maayo

Apan ang kalipay ba ni Alma sa iyang kaugalingon lamang—sa iyang paglikay sa silot ug sa iyang pagbalik ngadto sa Amahan? Kita nasayud nga si Alma nagbangutan usab niadtong iyang gipalayo sa kamatuoran.¹⁶ Apan si Alma dili makaayo ug makabalik niadtong tanan nga iyang gipahisalaag. Siya dili makapaniguro nga sila hatagan og makiangayon nga oportunidad nga makat-on sa doktrina ni Kristo ug mapanalanginan pinaagi sa pagsunod sa makalipay nga mga baruganan. Siya dili makapabalik niadtong kinsa nangamatay nga nabutaan gihapon sa iyang bakak nga pagtulun-an.

Sumala sa gitudlo ni Presidente Boyd K. Packer makausa: “Ang hunahuna nga miluwas ni Alma … mao kini: Pagpahiuli unsay dili nimo mapahiuli, pag-ayo sa samad nga dili nimo maayo, pag-ayo nianang imong naguba ug dili nimo maayo mao ang katuyoan gayud sa pag-ula ni Kristo.”¹⁷ Ang malipayong kamatuoran nga “gihinuktokan” sa hunahuna ni Alma dili lamang nga siya mahimong limpyo apan usab kadtong iyang nahimoan og kadaot mamaayo ug mahingpit.

Ang Sakripisyo sa Manluluwas Nagsiguro sa usa ka Matarung nga Paghukom

Mga tuig sa wala pa si Alma naluwas niining siguradong nga doktrina, si Haring Benjamin mitudlo sa gilapdon sa pagkaayo nga gitanyag sa maulaong sakripisyo sa Manluluwas. Si Haring Benjamin mipahayag nga ang “malipayon nga mga balita sa dako nga kalipay” nga gihatag kaniya “sa usa ka anghel nga gikan sa Dios.”¹⁸ Apil niadtong malipayon nga mga balita mao ang kamatuoran nga si Kristo mag-antus ug mamatay alang sa atong mga sala ug mga sayop sa pagsiguro nga “usa ka matarung nga paghukom unta moabut nganha sa mga katawhan.”¹⁹

Unsa gayud ang gikinahanglan sa “matarung nga paghukom? Sa sunod nga bersikulo, si Haring Benjamin mipasabut nga, sa pagsiguro sa usa ka matarung nga paghukom, ang dugo sa Manluluwas miula “alang sa mga sala niadtong kinsa napukan pinaagi sa kalapasan ni Adan” ug alang niadtong kinsa “namatay nga walay kasayuran sa kabubut-on sa Dios mahitungod kanila, o kinsa sa walay kasayuran nakasala.”²⁰ Ang matarung nga paghukom nagkinahanglan usab, iyang gitudlo, nga ang “dugo ni Kristo [mi]ula alang” sa mga sala sa gagmay nga mga bata.²¹

Kini nga mga kasulatan nagtudlo og mahimayaong doktrina: ang maulaong sakripisyo sa Manluluwas moayo, isip libre nga gasa, kadtong kinsa nakasala nga walay kasayuran, niadtong kinsa sama sa gisulti ni Jacob, “walay balaod nga gihatag.”²² Ang pagkamaytulubagon alang sa sala nagdepende sa kahayag nga gihatag kanato ug depende sa atong abilidad sa paggamit sa atong kabubut-on.²³ Kita nasayud niining makaayo ug makahupay nga kamatuoran tungod lang sa Basahon ni Mormon ug sa ubang kasulatan sa Pagpahiuli.²⁴

Dayag lang, kon dunay balaod nga gihatag, diin kita dili ignorante sa kabubut-on sa Dios, kita may tulubagon. Sumala sa gihatagan og gibug-aton ni Haring Benjamin: “Apan alaot, alaot ngadto kaniya kinsa nasayud nga siya misukol batok sa Dios! Kay ang kaluwasan dili modangat kaniya gawas kon kini pinaagi sa paghinulsol ug hugot nga pagtuo diha sa Ginoong Jesukristo.”²⁵

Kini usab mao ang maayong balita sa doktrina ni Kristo. Dili lamang ang Manluluwas moayo ug mopahiuli niadtong kinsa nakasala nga walay kasayuran apan usab, alang niadtong nakasala batok sa kahayag, ang Manluluwas nagtanyag og pagkaayo sa kondisyon sa paghinulsol ug hugot nga pagtuo diha Kaniya.²⁶

Si Alma tingali “nakahibalo” niining duha ka kamatuoran. Nabati ba gayud kaha ni Alma unsay iyang gihulagway nga “wala nay labaw ka talagsaon … sa hingpit nga kalipay”²⁷ kon siya nagtuo nga si Kristo miluwas kaniya apan pasagdan sa kahangturan kadtong iyang gipahisalaag gikan sa kamatuoran? Dili gayud. Aron si Alma mobati og kompleto nga kalinaw, kadtong iyang napasakitan nagkinahanglan usab sa oportunidad nga mahimong maayo.

Apan unsaon gyud nila—o kadtong atong napasakitan—nga maayo? Bisan og wala nato masabti sa hingpit ang sagradong paagi diin ang maulaong sakripisyo sa Manluluwas moayo ug mopahiuli, kita nasayud nga sa pagsiguro sa matarung nga paghukom, ang Manluluwas mohawan sa sagbut sa pagkaignorante ug sa masakit nga mga tunok sa kasakit nga nahimo sa uban.²⁸ Pinaagi niini Siya misiguro nga ang tanang mga anak sa Dios hatagan sa oportunidad, ubanan sa tin-aw nga panan-aw, sa pagpili sa pagsunod Kaniya ug pagdawat sa mahinungdanon nga laraw sa kalipay.²⁹

Ang Manluluwas Moayo sa Tanan nga Atong Naguba

Kini nga mga kamatuoran mao ang nakahatag ni Alma og kalinaw. Ug kini nga mga kamatuoran ang makahatag nato usab og dakong kalinaw. Isip kinaiyanhon nga mga lalaki ug mga babaye, kitang tanan makaigo, o usahay makapasakit sa usag usa, ug makahimo og kadaot. Sama sa ipamatuod ni bisan kinsa nga ginikanan, ang kasakit tungod sa atong mga sayop dili lang ang kahadlok sa atong kaugalingong silot apan ang kahadlok nga nalimitahan nato ang kalipay sa atong mga anak o sa ubang paagi nakapugong nila sa pagkakita ug pagsabut sa kamatuoran. Ang mahimayaong saad sa maulaong sakripisyo sa Manluluwas mao nga, kon bahin sa atong mga sayop isip mga ginikanan, Iyang gipawalay sala ang atong mga anak ug misaad og pagkaayo alang kanila.³⁰ Ug bisan kon sila nakasala batok sa kahayag—nga kitang tanan makahimo—ang Iyang bukton sa kalooy gipatuy-od,³¹ ug Siya motubos kanila kon sila motan-aw lamang Kaniya ug mabuhi.³²

Bisan og ang Manluluwas adunay gahum sa pag-ayo sa unsay dili nato maayo, Siya misugo nato sa pagbuhat kutob sa atong mahimo sa pagpahiuli isip kabahin sa atong paghinulsol.³³ Ang atong mga sala ug mga sayop dili lang makapalayo sa atong relasyon sa Dios apan usab sa atong relasyon sa uban. Usahay ang atong mga paningkamot nga mamaayo ug mapahiuli tingali sama ka yano sa pagpangayog pasaylo, apan sa ubang panahon ang pagpahiuli magkinahanglan og mga katuigang mapainubsanong paningkamot.³⁴ Apan, alang sa atong daghang mga sala ug mga sayop, dili lang gyud kita makahimo sa pagpaayo sa hingpit niadtong atong napasakitan. Ang talagsaon, naghatag og kalinaw nga saad sa Basahon ni Mormon ug sa gipahiuli nga ebanghelyo mao nga ang Manluluwas moayo sa tanan natong nasad-an.³⁵ Ug Siya usab moayo nato kon kita mobalik ngadto Kaniya pinaagi sa hugot nga pagtuo ug paghinulsol sa kadaot nga atong nahimo.³⁶ Siya mitanyag niining duha ka gasa tungod kay Siya nahigugma natong tanan uban ang hingpit nga paghigugma³⁷ ug tungod kay Siya mipasalig sa pagsiguro sa matarung nga paghukom nga nagsunod sa kaangayan ug kalooy. Ako mopamatuod nga kini tinuod sa ngalan ni Jesukristo, amen.