Dali ug Pasakop
Kami modapit sa tanang mga anak sa Dios sa tibuok kalibutan sa pagpakig-uban namo niining dakong buluhaton.
Minahal kong kaigsoonan, minahal kong mga higala, matag semana, ang mga miyembro sa Ang Simbahan ni Jesukristo sa mga Santos sa Ulahing mga Adlaw sa tibuok kalibutan mosimba sa atong minahal nga Langitnong Amahan, ang Dios ug Hari sa uniberso, ug sa Iyang Pinalanggang Anak, si Jesukristo. Kita mamalandong sa kinabuhi ug mga pagtulun-an ni Jesukristo—ang bugtong walay sala nga sukad nabuhi, ang walay lama nga Kordero sa Dios. Kutob sa atong mahimo, kita moambit sa sakramento agig paghinumdom sa Iyang sakripisyo ug makaila nga Siya ang sentro sa atong kinabuhi.
Kita nahigugma Kaniya ug kita nagtahud Kaniya. Tungod sa Iyang dako ug mahangturong gugma, si Jesukristo nag-antus ug namatay alang kaninyo ug kanako. Siya miabli sa mga ganghaan sa kamatayon, miguba sa nag-ulang mga bong-bong nga mibulag sa mga higala ug mga minahal,1 ug midala og paglaum sa walay paglaum, miayo sa masakiton, ug kagawasan sa binilanggo.2
Ngadto Kaniya kita mohalad sa atong kasingkasing, sa atong kinabuhi, ug sa atong inadlaw nga debosyon. Tungod niini nga rason “[kita] naghisgot mahitungod kang Kristo, [kita] nalipay diha kang Kristo, [kita] nagsangyaw mahitungod kang Kristo … nga ang [atong] mga anak mahimo nga masayud sa unsa nga tinubdan sila mahimo nga mangita alang sa kapasayloan sa ilang mga sala.”3
Pagbansay sa Pagkadisipulo
Hinoon, ang pagkadisipulo ngadto ni Jesukristo labaw pa sa pagsulti ug pagsangyaw ni Kristo. Ang Manluluwas Mismo mipahiuli sa Iyang Simbahan aron sa pagtabang nato diha sa dalan nga mahimong mas sama Kaniya. Ang Simbahn ni Jesukristo sa mga Santos sa Ulahing mga Adlaw gitukod aron sa paghatag og mga oportunidad sa pagbansay sa sukaranan sa pagkadisipulo. Pinaagi sa atong pag-apil diha sa Simbahan, kita makat-on sa pag-ila ug pagsunod sa mga aghat sa Balaan nga Espiritu. Kita nagpalambo sa kinaiya sa pagtabang pinaagi sa kalooy ug pagkamabination ngadto sa uban.
Kini mao ang usa ka paningkamot sa tibuok kinabuhi, ug kini nagkinahanglan og pagbansay.
Ang malampusong mga atleta naggahin og daghang mga oras sa pagbansay sa mga sukaranan sa ilang sport. Ang mga nurse, mga networker, mga enhinyero sa nuclear, ug gani ako isip tigluto sa kusina ni Harriet makamao ug mahanas lamang kon kita magkugi sa pagbansay sa atong trabaho.
Isip usa ka kapitan sa eroplano, ako sa kasagaran mobansay og mga piloto gamit ang flight simulator—usa ka makuti nga makina nga nagkopya sa kasinatian sa paglupad. Ang simulator dili lamang makatabang sa mga piloto nga makat-on sa mga sukaranan sa pagpalupad; kini usab makahatag nila og kasinatian ug sa pagtubag sa wala paabuta nga mga panghitabo nga ilang masugatan kon sila na ang magdumala sa tinuod nga eroplano.
Mao usab ang samang baruganan alang sa mga disipulo ni Jesukristo.
Aktibong pag-apil sa Simbahan ni Jesukristo ug sa daghang nagkalain-laing mga oportunidad niini makatabang nato nga mas makaandam alang sa nagkausab nga mga sirkumstansya sa kinabuhi, bisan unsa man kini. Isip mga miyembro sa Simbahan, kita giawhag sa pagsubsob sa atong kaugalingon diha sa mga pulong sa Dios pinaagi sa Iyang mga propeta, karaan ug moderno. Pinaagi sa sinsero ug mapainubsanong pag-ampo ngadto sa atong Langitnong Amahan, kita makat-on sa pag-ila sa tingog sa Balaang Espiritu. Kita modawat og mga tawag sa pagserbisyo, pagtudlo, pagplano, ug pagpangalagad. Kini nga mga oportunidad nagtugot nato nga motubo diha sa espiritu, hunahuna, ug kinaiya.
Kini makatabang nato sa pag-andam sa paghimo ug pagtuman sa sagrado nga mga pakigsaad nga mopanalangin nato niini nga kinabuhi ug sa kinabuhi nga moabut.
Dali, Pakig-uban Kanamo!
Kami modapit sa tanang mga anak sa Dios sa tibuok kalibutan sa pagpakig-uban namo niining dakong buluhaton. Dali ug tan-awa! Bisan atol niining mahagiton nga panahon sa COVID-19, pakigkita namo sa online. Pakigkita sa among mga misyonaryo sa online. Susiha sa inyong kaugalingon unsa kini nga Simbahan! Kon kining malisud nga panahon molabay, pakigkita namo sa among mga panimalay ug sa among mga dapit sa pagsimba!
Kami modapit kaninyo sa pagduol ug pagtabang! Dali ug serbisyo uban namo, mangalagad sa mga anak sa Dios, magsunod sa mga tunob sa Manluluwas, ug sa paghimo niini nga kalibutan nga mas maayo nga dapit.
Dali ug pasakop! Kamo makahimo namo nga mas lig-on. Ug kamo mahimong mas maayo, mas mabination, ug mas malipayon usab. Ang inyong hugot nga pagtuo molawom ug motubo nga mas malig-on—mas makahimo sa pagbatok sa kagubot ug sa wala damha nga mga pagsulay sa kinabuhi.
Ug unsaon nato sa pagsugod? Adunay daghang posible nga mga paagi.
Kami modapit kaninyo sa pagbasa sa Basahon ni Mormon. Kon kamo walay kopya, kamo makabasa niini sa ChurchofJesusChrist.org4 o i-download ang Book of Mormon app. Ang Basahon ni Mormon mao ang laing tugon ni Jesukristo ug usa ka kompanyon sa Daan ug Bag-ong Tugon. Kami nagmahal niining balaan nga mga kasulatan ug magkat-on gikan niini.
Kami modapit kaninyo sa paggahin og panahon sa ComeuntoChrist.org sa pagsusi unsay gitudlo ug gituohan sa mga miyembro sa Simbahan.
Dapita ang mga misyonaryo sa pagbisita ninyo sa online o sa pribado diha sa inyong panimalay kon kini posible—sila adunay mensahe sa paglaum ug pagkaayo. Kini nga mga misyonaryo mao ang among bililhong mga anak nga lalaki ug babaye kinsa nagserbisyo sa daghang mga dapit sa tibuok kalibutan sa ilang kaugalingong panahon ug kwarta.
Sa Simbahan ni Jesukristo, kamo makakita og pamilya sa mga tawo nga dili kaayo lahi gikan ninyo. Kamo makakita og mga tawo nga kinahanglan sa inyong tabang ug gustong motabang ninyo samtang kamo maningkamot nga mahimong labing maayong bersyon sa inyong kaugalingon—ang tawo nga gilalang sa Dios aron mahimo.
Ang Pagdawat sa Manluluwas Gipadangat Kanatong Tanan
Kamo tingali maghunahuna, “Ako nakahimo og mga sayop sa akong kinabuhi. Ako dili makasiguro kon ako mobati ba nga nahisakop sa Simbahan ni Jesukristo. Ang Dios dili interesado sa tawo nga sama nako.”
Si Jesukristo, bisan Siya mao ang “Hari sa mga hari,”5 ang Mesiyas, ang Anak sa buhing Dios,”6 nagpakabana pag-ayo sa matag usa nga mga anak sa Dios. Siya nagpakabana bisan pa sa posisyon sa tawo—unsa ka kabus o ka datu, unsa ka dili hingpit o namatud-an nga ang usa ka tawo dili hingpit. Atol sa iyang mortal nga kinabuhi, ang Manluluwas nangalagad sa tanan: ngadto sa malipayon ug malampuson, ngadto sa masulub-on ug nahisalaag, ug ngadto sa nawad-an og paglaum. Sa kasagaran, ang mga tawo nga Iyang gipangalagaran dili mga indibidwal nga inila, matahum, o adunahan. Sa kasagaran, ang mga tawo nga Iyang gibayaw walay ikasukli kon dili ang pagpasalamat lamang, mapainubsanong kasingkasing, ug tinguha sa hugot nga pagtuo.
Kon si Jesus migahin sa Iyang mortal nga kinabuhi sa pagpangalagad ngadto “sa labing gagmay niini,”7 dili ba Siya mohigugma nila karon? Wala bay luna sa Iyang Simbahan alang sa tanang mga anak sa Dios? Bisan kadtong mibati nga dili takus, gikalimtan, o nag-inusara?
Walay piho nga ang-ang sa pagkahingpit nga inyong kab-uton aron angayan sa grasya sa Dios. Ang inyong mga pag-ampo dili kinahanglan nga kusog o larino o sakto sa grammar aron moabut sa langit.
Sa tinuod, ang Dios walay pinalabi8—ang mga butang nga dunay bili sa kalibutan walay bili ngadto Kaniya. Siya nasayud sa inyong kasingkasing, ug Siya nahigugma kaninyo bisan pa sa inyong titulo, sa gidaghanon sa kwarta, o sa mga sumusunod sa Instagram.
Sa atong pagpatumong sa atong mga kasingkasing ngadto sa atong Langitnong Amahan ug magpaduol Kaniya, kita mobati Kaniya nga nagpaduol ngari kanato.9
Kitang tanan Iyang hinigugma nga mga anak.
Bisan kadtong misalikway Kaniya.
Bisan kadtong, gahig ulo, lisud kontrolahon nga anak, nasuko sa Dios ug sa Iyang Simbahan, ingnon ta nga miputos sa ilang mga bag, ug daling mipalayo namahayag nga sila mopahilayo ug dili na mobalik.
Kon ang usa ka anak mopahilayo sa panimalay, siya tingali dili makamatikod sa nabalaka nga mga ginikanan nga nagtan-aw sa may bintana. Uban sa malumong mga kasingkasing, sila nagtan-aw sa ilang anak nga molakaw—naglaum nga ang ilang anak makakat-on gikan niining makapasakit nga kasinatian ug makakita sa kinabuhi sa bag-ong panglantaw—ug sa katapusan mopauli.
Mao usab kini sa atong mahigugmaong Langitnong Amahan. Siya naghulat sa atong pagbalik.
Ang inyong Manluluwas, ang mga luha sa gugma ug kalooy sa Iyang mga mata, naghulat sa inyong pagbalik. Bisan kon kamo mobati nga layo gikan sa Dios, Siya makakita kaninyo, Siya adunay kalooy kaninyo ug modagan aron sa paggakus kaninyo.10
Dali ug pasakop.
Ang Dios Motugot Nato nga Makat-on gikan sa Atong mga Sayop
Kita mga pilgrim [nagbiyahi padulong sa balaang dapit] nga naglakaw sa dalan sa pagkamortal sa pagpangita sa kahulugan ug sa kamatuoran. Sa kasagaran, ang tanan natong makita mao ang dalan sa unahan—kita dili makakita asa padulong ang likoanan. Ang atong mahigugmaong Langitnong Amahan wala mohatag nato sa tanang tubag. Siya misalig nga masulbad nato ang mga hagit pinaagi sa atong paningkamot. Siya nagpaabut nato nga motuo—bisan lisud ang pagbuhat sa ingon.
Siya nagpaabut nato sa paglihok uban ang pagsalig ug pagpalambo og kadasig—ug kalig-on—nga mopadayon pag usab.
Mao kana ang paagi nga kita makat-on ug motubo.
Sa tinuod gusto ba kamo nga ang tanan ipasabut sa matag detalye? Sa tinuod gusto ba kamo nga ang matag pangutana natubag? Ang matag destinasyon giplano?
Ako nagtuo nga kadaghanan nato dali kaayo nga kapuyon niini nga matang sa langitnong pagdumala. Kita makat-on sa importante nga mga leksyon sa kinabuhi pinaagi sa kasinatian. Pinaagi sa pagkat-on gikan sa atong mga sayop. Pinaagi sa paghinulsol ug pagkaamgo alang sa atong kaugalingon nga ang “pagkadautan dili mahitabo nga kalipay.”11
Si Jesukristo, ang Anak sa Dios, namatay aron nga ang atong mga sayop dili mokondenar nato ug sa kahangturan mahunong ang atong kauswagan. Tungod Kaniya, kita makahinulsol, ug ang atong mga sayop mahimong makatabang ngadto sa mas dakong kalipay.
Kamo dili kinahanglan nga maglakaw niini nga dalan nga mag-inusara. Ang atong Langitnong Amahan wala mobiya nato aron maglatagaw sa kangitngit.
Mao nga, sa tingpamulak niadtong 1820, Siya nagpakita uban sa Iyang Anak, nga si Jesukristo, ngadto sa batan-on, nga si Joseph Smith.
Hunahunaa kana sa makadiyot! Ang Dios sa uniberso nagpakita ngadto sa tawo!
Kini mao ang una sa daghang panagtagbo ni Joseph uban sa Dios ug sa ubang langitnong mga binuhat. Daghan sa mga pulong niining balaan nga mga binuhat nga gipamulong ngadto kaniya narekord diha sa mga kasulatan sa Ang Simbahan ni Jesukristo sa mga Santos sa Ulahing mga Adlaw. Kini sayon ra nga makuha. Si bisan kinsa ang makabasa niini ug makat-on alang sa ilang kaugalingon sa mensahe sa Dios alang kanato sa atong panahon.
Kami nagdapit kaninyo sa pagtuon niini alang sa inyong kaugalingon.
Si Joseph Smith batan-on pa sa dihang siya nakadawat niini nga mga pagpadayag. Kadaghanan kanila miabut sa wala siya mag 30 anyos.12 Siya kulang sa kaalam, ug sa pipila ka tawo, siya tingali ingon og dili kwalipikado nga mahimong propeta sa Ginoo.
Ug sa gihapon ang Ginoo mitawag kaniya—nagsunod sa usa ka sumbanan nga atong makita sa tibuok balaan nga mga kasulatan.
Ang Dios wala maghulat nga mangita og hingpit nga tawo aron ipahiuli ang Iyang ebanghelyo.
Kon naghulat pa Siya, Siya naghulat pa gihapon.
Si Joseph sama kaayo kaninyo ug kanako. Bisan og si Joseph nakahimo og mga sayop, ang Dios migamit kaniya sa pagtuman sa Iyang importante nga mga katuyoan.
Si Presidente Thomas S. Monson sa kasagaran mobalik-balik niini nga mga pulong sa tambag: “Kinsa ang tawagon sa Ginoo, ang Ginoo mopasarang.”13
Si Apostol Pablo mirason uban sa mga Santos sa Corinto: “Kay palandunga ra ang pagtawag kaninyo, mga igsoon: dili daghan kaninyo ang manggialamon sumala sa sukdanan nga kinalibutanon, dili daghan ang makagagahum; dili daghan ang mga hamili sa pagkatawo.”14
Ang Dios migamit sa huyang ug sa yano sa pagpahinabo sa Iyang mga katuyoan. Kini nga kamatuoran nagbarug isip pagpamatuod nga kini ang gahum sa Dios, dili sa tawo, nga nakahimo sa Iyang buhat sa yuta.15
Paminaw Kaniya, Sunod Kaniya
Sa dihang ang Dios nagpakita ngadto ni Joseph Smith, Siya mipaila sa Iyang Anak, si Jesukristo, ug miingon, “Paminaw Kaniya.”16
Si Joseph migahin sa nahibilin sa iyang kinabuhi nga nagpaminaw Kaniya ug nagsunod Kaniya.
Sama sa nahitabo ni Joseph, ang atong pagkadisipulo nagsugod sa desisyon sa pagpaminaw sa Manluluwas nga si Jesukristo.
Kon kamo nagtinguha sa pagsunod Kaniya, lig-una ang inyong pagtuo ug pas-ana ang Iyang krus.
Kamo makahibalo nga kamo gayud nahisakop sa Iyang Simbahan—usa ka dapit sa mainit ug maabi-abihon diin kamo makaapil sa talagsaong pagtinguha sa pagkadisipulo ug kalipay.
Akong panghinaut nga, niining ikaduha ka gatus ka tuig nga kasaulogan sa Unang Panan-awon, sa atong pagpamalandong ug pagkat-on sa Pagpahiuli sa Simbahan ni Jesukristo, kita makaamgo nga dili lang kini usa ka makasaysayanong hitabo. Ikaw ug ako adunay importante nga bahin niining, talagsaon, nagpadayon nga istorya.
Unsay bahin ninyo ug nako?
Mao ang pagkat-on bahin ni Jesukristo. Sa pagtuon sa Iyang mga pulong. Sa pagsunod Kaniya pinaagi sa aktibong pag-apil niining talagsaong buhat. Ako modapit kaninyo nga dali ug pasakop!
Kamo dili kinahanglan nga hingpit. Kamo kinahanglan lamang nga adunay tinguha sa pagpalambo sa inyong pagtuo ug magpaduol ngadto Kaniya matag adlaw.
Ang atong bahin mao ang paghigugma ug pagserbisyo sa Dios ug sa paghigugma ug pagserbisyo sa mga anak sa Dios.
Kon buhaton ninyo, ang Dios molibut kaninyo sa Iyang gugma, kalipay, ug piho nga giya pinaagi niini nga kinabuhi, bisan ubos sa labing seryoso nga mga sirkumstansya, ug lapas pa.
Niini ako mopamatuod, ug mobilin sa akong panalangin ug dakong pasalamat ug gugma alang sa matag usa kaninyo, sa sagradong ngalan sa atong Manluluwas, sa atong Agalon—pinaagi sa ngalan ni Jesukristo, amen.