Sa Unsang Paagi ang Pagkapari Mopanalangin sa Kabatan-onan
Pinaagi sa pagkapari, kita mabayaw. Ang pagkapari nagdala og kahayag ngadto sa atong kalibutan.
Ako mapasalamaton nga maanaa dinhi. Sa dihang una nakong nahibaloan nga mamulong ako kaninyo karon, gibati nako ang tumang kahinam apan sa samang higayon ang kamapainubsanon kaayo. Ako migahin og dakong panahon sa paghunahuna kon unsa ang akong mapaambit, ug nanghinaut ko nga ang Espiritu direkta nga mamulong kaninyo pinaagi sa akong mensahe.
Sa Basahon ni Mormon, si Lehi mihatag og panalangin sa matag usa sa iyang mga anak nga lalaki sa wala pa siya mamatay nga nakatabang nila nga mailhan ang ilang mga kalig-on ug mahangturong potensyal. Ako ang kinamanghuran sa walo ka anak, ug niining milabay nga tuig ako ra ang nag-inusarang anak diha sa panimalay sa unang higayon. Ang kawalay mga igsoon nga kauban og puyo sa panimalay ug kawalay usa ka tawo nga makaistorya kanunay lisud alang nako. Adunay mga gabii nga gibati nako ang tumang pag-inusara. Mapasalamaton ko alang sa akong mga ginikanan, kinsa naningkamot kutob sa ilang mahimo aron nga matabangan ko. Usa ka pananglitan niini mao ang sa dihang ang akong papa mitanyag sa paghatag nako og panalangin sa pagkapari nga kahupayan atol sa usa ka lisud nga panahon. Human sa iyang panalangin, ang mga butang wala mausab diha-diha dayon, apan gibati nako ang kalinaw ug gugma gikan sa akong Langitnong Amahan ug gikan sa akong papa. Ako mibati nga bulahan nga adunay takus nga amahan kinsa makahatag og mga panalangin sa pagkapari sa matag higayon nga ako kining gikinahanglan ug kinsa mitabang nako nga mailhan ang akong mga kalig-on ug mahangturong potensyal, sama sa gibuhat ni Lehi sa dihang gipanalanginan niya ang iyang mga anak.
Bisan unsa pa man ang inyong mga kahimtang, mahimo kamo nga kanunay nga makaangkon og mga panalangin sa pagkapari. Pinaagi sa mga sakop sa pamilya, kahigalaan, tigpangalagad nga mga brother, mga lider sa pagkapari, ug usa ka Langitnong Amahan nga dili gayud mopakyas ninyo, makadawat kamo sa mga panalangin sa pagkapari. Si Elder Neil L. Andersen miingon: “Ang mga panalangin sa pagkapari sa hangtud mas gamhanan kay sa tawo kinsa gisugo sa pagpangalagad sa gasa. … Kon kita takus, ang mga ordinansa sa pagkapari magpalambo sa atong mga kinabuhi.”1
Ayaw pagpanagana og pangayo alang sa usa ka panalangin kon nagkinahanglan ka og dugang nga giya. Diha sa atong lisud nga mga higayon labihan natong gikinahanglan ang tabang sa Espiritu. Walay usa nga hingpit, ug kitang tanan makasinati og mga kalisdanan. Ang uban kanato tingali nag-antus sa kabalaka, depresyon, adiksyon, o mga pagbati nga dili igo ang atong kamaayo. Ang mga panalangin sa pagkapari makatabang nato nga mabuntog kini nga mga hagit ug madawat ang kalinaw samtang nagpadayon kita ngadto sa umaabut. Ako nanghinaut nga maningkamot kita nga mahimong takus sa pagdawat niini nga mga panalangin.
Ang laing paagi nga kita gipanalanginan sa pagkapari mao ang pinaagi sa patriyarkal nga mga panalangin. Ako nakat-on sa pagbasa sa akong patriyarkal nga panalangin sa matag higayon nga mobati ko og kaguol o kamingaw. Ang akong panalangin nakatabang nako nga masabtan ang akong potensyal ug ang piho nga plano sa Dios alang kanako. Kini mihupay kanako ug mitabang nako nga makakita lapas sa akong kalibutanong panglantaw. Kini mipahinumdom kanako sa akong mga gasa ug sa mga panalangin nga akong madawat kon magpuyo ko nga takus. Kini mitabang usab kanako nga mahinumdom ug mobati og kalinaw nga ang Dios mohatag og mga tubag ug bag-ong mga oportunidad alang kanako sa tukma nga higayon diin kini labi nakong gikinahanglan.
Ang patriyarkal nga mga panalangin motabang sa pag-andam kanato nga makabalik og puyo uban sa atong Langitnong Amahan. Ako nakahibalo nga ang patriyarkal nga mga panalangin nagagikan sa Dios ug makatabang nato nga himoong mga kalig-on ang atong mga kahuyang. Kini dili mga mensahe gikan sa mga mananag-an; kini nga mga panalangin nagsulti kanato sa unsay angay natong madungog. Kini sama sa Liahona alang sa matag usa kanato. Kon atong unahon ang Dios ug adunay hugot nga pagtuo Kaniya, Iya kitang giyahan tadlas sa atong kaugalingon nga kamingawan.
Sama sa pagpanalangin sa Dios ni Joseph Smith sa pagkapari aron mapahiuli ang mga panalangin sa ebanghelyo, mahimo natong madawat ang mga panalangin sa ebanghelyo diha sa atong kinabuhi pinaagi sa pagkapari. Matag semana gihatagan kita og pribilihiyo ug kahigayunan nga moambit sa sakramento. Pinaagi niini nga ordinansa sa pagkapari, mahimong makabaton kita kanunay sa Espiritu, nga makalimpyo ug makapaputli kanato. Kon bation nimo ang panginahanglan sa pagwagtang sa usa ka butang gikan sa imong kinabuhi, pagpakigsulti sa usa ka gisaligan nga lider kinsa makatabang nimo nga mabuhat ang maayong mga butang. Ang imong mga lider makatabang nimo nga madawat ang tibuok gahum sa Pag-ula ni Jesukristo.
Salamat sa pagkapari, madawat usab nato ang mga panalangin sa mga ordinansa sa templo. Sukad nga ako nakasulod sa templo, gihimo na nako nga tumong ug prayoridad ang regular nga pagtambong. Pinaagi sa paggahin og panahon ug paghimo og mga sakripisyo nga gikinahanglan aron mas mapaduol sa akong Langitnong Amahan diha sa Iyang balaan nga balay, napanalanginan ko nga makadawat og mga pagpadayag ug mga pag-aghat nga nakatabang gayud nako sa tibuok nakong kinabuhi.
Pinaagi sa pagkapari, kita mabayaw. Ang pagkapari nagdala og kahayag ngadto sa atong kalibutan. Si Elder Robert D. Hales miingon: “Kon wala ang gahum sa pagkapari, ‘ang tibuok yuta sa hingpit pagalaglagon’ (tan-awa sa D&P 2:1–3). Walay kahayag, walay paglaum—kangitngit lang.”2
Ang Dios miabiba kanato. Siya gusto nga kita makabalik Kaniya. Siya nakaila kanato sa personal gayud. Siya nakaila kaninyo. Siya nahigugma kanato. Siya kanunay nga nakamatikud kanato ug mopanalangin kanato bisan og atong gibati nga dili kita angayan niini. Siya nasayud unsa ang atong gikinahanglan ug kanus-a nato kini kinahanglana.
“Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan:
“Kay ang tanan nga magapangayo makadawat; ug ang magapangita makakaplag; ug ang magatuktok pagaablihan” (Mateo 7:7–8).
Kon kamo wala pay pagpamatuod kabahin sa pagkapari, awhagon ko kamo nga mag-ampo ug mangutana aron mahibalo sa inyong kaugalingon sa gahum niini, dayon basaha ang mga kasulatan aron madungog ang mga pulong sa Dios. Ako nahibalo nga kon maningkamot kita nga masinati ang gahum sa pagkapari sa Dios diha sa atong kinabuhi, kita mapanalanginan. Sa ngalan ni Jesukristo, amen.