Siya Mag-una Kanato
Ang Ginoo naggiya sa Pagpahiuli sa Iyang ebanghelyo ug sa Iyang Simbahan. Siya hingpit nga nahibalo sa umaabut. Siya nagdapit ninyo ngadto sa buhat.
Minahal kong mga kaigsoonan, ako mapasalamaton nga makauban kamo niining kinatibuk-ang komperensya sa Ang Simbahan ni Jesukristo sa mga Santos sa Ulahing mga Adlaw. Sa iyang pagdapit sa pagpamalandong sa paagi nga ang Pagpahiuli sa Ginoo sa Iyang Simbahan niining katapusang dispensasyon mipanalangin nato ug sa atong mga minahal, si Presidente Russell M. Nelson misaad nga ang atong kasinatian dili lang halandumon apan dili makalimtan.
Ang akong kasinatian halandumon, sigurado ko ang inyoha mao usab. Kon kini dili ba makalimtan nagdepende sa matag usa kanato. Importante kana nako tungod kay ang kasinatian sa pag-andam alang niini nga komperensya nakausab nako sa paagi nga gusto nakong molungtad. Tuguti ko sa pagpasabut.
Ang akong pagpangandam midala nako sa pagbasa sa talaan sa usa ka panghitabo sa Pagpahiuli. Akong nabasa kana nga panghitabo kadaghan, apan kini kanunay alang nako report sa usa ka importante nga miting nga naglambigit kang Joseph Smith, ang propeta sa Pagpahiuli. Apan karon akong nakita diha sa asoy sa unsang paagi ang Ginoo naggiya nato, Iyang mga disipulo, sa Iyang Simbahan. Akong nakita unsa kamahinungdanon alang nato nga mga mortal nga magiyahan sa Manluluwas sa kalibutan, ang Tiglalang—kinsa nasayud sa tanang mga butang, kaniadto, karon, ug sa umaabut. Siya nagtudlo nato sa anam-anam ug mogiya nato, dili gayud mamugos.
Ang miting nga akong gihulagway usa ka mahinungdanon nga higayon sa Pagpahiuli. Kini usa ka miting sa adlaw nga Igpapahulay nga gipahigayon niadtong Abril 3, 1836, sa Templo sa Kirtland sa Ohio, pito ka adlaw human kini gipahinungod. Si Joseph Smith mihulagway niining talagsaon nga higayon sa kasaysayan sa kalibutan sa yanong paagi. Kadaghanan sa iyang asoy girekord diha sa Doktrina ug mga Pakigsaad seksyon 110:
“Sa kahapunon, ako mitabang sa uban nga mga Presidente sa pag-apud-apod sa Panihapon sa Ginoo ngadto sa Simbahan, nadawat kini gikan sa Napulog Duha, kansang kahigayunan mao ang pagpanalangin sa sakrament niining adlawa. Human mahimo kini nga pag-alagad ngadto sa akong mga kaigsoonan, ako mipaingon sa pulpito, ang mga tabil gipaubos, ug ako miluhod, uban ni Oliver Cowdery, sa maligdong ug mahilum nga pag-ampo. Human motindog gikan sa pag-ampo, ang mosunod nga panan-awon gipadayag ngari kanamong duha”.1
“Ang tabil gikuha gikan sa among mga hunahuna, ug ang mga mata sa among panabut nabuksan.
“Kami nakakita sa Ginoo nga nagtindog diha sa barandilya sa pulpito, sa among atubangan; ug ubos sa iyang mga tiil mao ang usa ka hinlo nga buhat sa lunsay nga bulawan, diha sa bulok nga sama sa baga.
“Ang iyang mga mata ingon sa usa ka siga sa kalayo; ang buhok sa iyang ulo puti sama sa lunsay nga yelo; ang iyang panagway mihayag labaw sa kahayag sa adlaw; ug ang iyang tingog ingon sa dahunog sa dagko nga mga katubigan, gani ang tingog ni Jehova, nag-ingon:
“Ako mao ang sinugdanan ug ang katapusan; Ako mao siya kinsa nabuhi, Ako mao siya kinsa gipatay; Ako mao ang inyong manlalaban ngadto sa Amahan.
“Tan-awa, ang inyong mga sala gipasaylo diha kaninyo; kamo malimpyo sa akong atubangan; busa, ihangad ang inyong mga ulo ug pagmaya.
“Himoa ang mga kasingkasing sa inyong mga kaigsoonan nga magmaya, ug himoa ang mga kasingkasing sa akong tanan nga mga katawhan nga magmaya, kinsa, uban sa ilang kusog, nagtukod niini nga balay ngadto sa akong ngalan.
“Kay tan-awa, Ako midawat niini nga balay, ug ang akong ngalan maania dinhi; ug Ako magpakita sa akong kaugalingon ngadto sa akong mga katawhan diha sa kalooy dinhi niini nga balay.
“Oo, Ako mopakita ngadto sa akong mga sulugoon, ug mosulti ngadto kanila sa akong kaugalingon nga tingog, kon ang akong mga katawhan maghupot sa akong mga sugo, ug dili maghugaw-hugaw niining balaan nga balay.
“Oo ang mga kasingkasing sa mga kaliboan ug napulo ka mga kaliboan malipay sa hilabihan sa sangputanan sa mga panalangin nga ibu-bu, ug ang pagtuga diin ang akong mga sulugoon gitugahan dinhi niini nga balay.
“Ug ang pagkabantog niini nga balay mokaylap ngadto sa langyaw nga mga yuta; ug kini mao ang sinugdanan sa panalangin nga ibu-bu diha sa mga ulo sa akong mga katawhan. Bisan pa niana. Amen.
“Human matapos kini nga panan-awon, ang mga kalangitan naabli pag-usab ngari kanamo; ug si Moises mipakita diha sa among atubangan, ug mitugyan ngari kanamo sa mga yawe sa pagpundok sa Israel gikan sa upat ka mga bahin sa yuta, ug sa pagdala sa napulo ka mga kaliwatan gikan sa yuta sa amihanan.
“Human niini, si Elias mipakita, ug mitugyan sa kapaigoan sa ebanghelyo ni Abraham, miingon nga diha kanamo ug sa among binhi sa tanan nga mga kaliwatan nga mosunod kanamo pagapanalanginan.
“Human matapos kini nga panan-awon, lain nga mahinungdanon ug mahimayaon nga panan-awon miabut diha kanamo; kay si Elijah ang propeta, kinsa gidala ngadto sa langit nga wala makatilaw og kamatayon, nagbarug diha sa among atubangan, ug miingon:
“Tan-awa, ang panahon miabut na sa hingpit, nga gipamulong pinaagi sa ba-ba ni Malaquias—nga nagpamatuod nga siya [Elijah] kinahanglan nga ipadala, sa dili pa moabut ang mahinungdanon ug makalilisang nga adlaw sa Ginoo—
“Sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo—
“Busa, ang mga yawe niini nga kapaigoan gitugyan ngadto sa inyong mga kamot; ug pinaagi niini kamo masayud nga ang mahinungdanon ug makalilisang nga adlaw sa Ginoo duol na, gani diha sa mga pultahan.”2
Karon, ako nakabasa na kadaghan niana nga asoy. Ang Espiritu Santo mikumpirmar ngari nako nga ang asoy tinuod. Apan samtang ako nagtuon ug nangandam alang niini nga komperensya, akong mas klarong nasabtan ang gahum sa Ginoo sa paggiya sa detalye sa Iyang mga disipulo sa Iyang buhat.
Pito ka tuig sa wala pa gitugyan ni Moises kang Joseph ang mga yawe sa pagpundok sa Israel didto sa Templo sa Kirtland, “Si Joseph nakakat-on gikan sa ulohang pahina sa Basahon ni Mormon nga ang katuyoan niini mao ang ‘pagpakita ngadto sa salin sa balay ni Israel …nga sila unta mahibalo sa mga pakigsaad sa Ginoo, ug nga aron sila dili ipahimulag sa kahangturan.’ Niadtong 1831, ang Ginoo misulti kang Joseph nga ang pagpundok sa Israel magsugod sa Kirtland, ‘Ug gikan dinhi [Kirtland], kinsa kadto nga Ako motugot nga moadto taliwala sa tanan nga mga nasud … kay ang Israel pagaluwason, ug Ako mogiya kanila.’”3
Bisan og ang misyonaryo nga buhat gikinahanglan sa pagpundok sa Israel, ang Ginoo midasig sa Iyang mga lider sa pagtudlo sa Napulog Duha, kinsa nahimong pipila sa atong unang mga misyonaryo, “Hinumdumi kamo dili moadto sa ubang nasud, hangtud nga inyong madawat ang inyong pagtuga.”4
Ingon og ang Templo sa Kirtland importante sa anam-anam nga plano sa Ginoo alang sa duha ka rason: Una, si Moises nagpaabut hangtud nahuman ang templo aron ipahiuli ang mga yawe sa pagpundok sa Israel. Ug ikaduha, si Presidente Joseph Fielding Smith mitudlo nga “ang Ginoo misugo sa mga Santos sa pagtukod og templo [ang Templo sa Kirtland] diin siya mopadayag sa mga yawe sa awtoridad ug diin ang mga apostoles matugahan ug maandam sa pagpul-ong sa iyang ubasan sa katapusang higayon.”5 Bisan og ang pagtuga sa templo nga atong nahibaloan karon wala gipahigayon sa Templo sa Kirtland, agig katumanan sa panagna, ang pagpangandam nga mga ordinansa sa templo nagsugod nga gipaila didto, uban sa pagbu-bu sa espiritwal nga mga pagpakita nga misangkap niadtong gitawag og mga misyon sa gisaad nga pagtuga sa “gahum gikan sa kahitas-an”6 nga misangput sa dakong pagpundok pinaagi sa misyonaryo nga pagserbisyo.
Human ang mga yawe sa pagpundok sa Israel gitugyan ngadto ni Joseph, ang Ginoo midasig sa Propeta sa pagpadala sa mga sakop sa Napulog Duha sa mga misyon. Samtang ako nagtuon, nahimong klaro nako nga ang Ginoo miandam sa detalye sa paagi alang sa Napulog Duha sa pag-adto sa mga misyon gawas sa nasud diin ang mga tawo giandam nga motuo ug mopaluyo kanila. Wala madugay, kaliboan ang, pinaagi nila, mahimong sakop sa gipahiuli nga Simbahan sa Ginoo.
Sumala sa atong mga talaan, gibana-bana nga tali sa 7,500 ug 8,000 ang nabunyagan atol sa duha ka misyon sa Napulog Duha didto sa British Isles. Kini mipahimutang sa pundasyon sa misyonaryo nga buhat sa Europe. Sa katapusan sa ika-19 nga siglo mga 90,000 ang mipundok ngadto sa Amerika, diin ang kadaghanan gikan sa British Isles ug Scandinavia.7 Ang Ginoo midasig ni Joseph ug niadtong matinud-anong mga misyonaryo kinsa mitrabaho sa pagkab-ot og usa ka ani nga tingali, nianang panahona, ingon og lapas sa ilang abilidad. Apan ang Ginoo, uban sa Iyang hingpit nga panglantaw ug pagpangandam, mihimo niini nga posible.
Inyong mahinumduman ang tataw nga simple ug dul-an sa balaknon nga pinulongan gikan sa ika-110 nga seksyon sa Doktrina ug mga Pakigsaad:
“Tan-awa, ang panahon miabut na sa hingpit, nga gipamulong pinaagi sa ba-ba ni Malaquias—nga nagpamatuod nga siya [Elijah] kinahanglan nga ipadala, sa dili pa moabut ang mahinungdanon ug makalilisang nga adlaw sa Ginoo—
“Sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan, basin pa unya ang tibuok yuta pagahampakon uban sa usa ka tunglo—
“Busa, ang mga yawe niini nga kapaigoan gitugyan ngadto sa inyong mga kamot; ug pinaagi niini kamo masayud nga ang mahinungdanon ug makalilisang nga adlaw sa Ginoo duol na, gani diha sa mga pultahan.”8
Ako magpamatuod nga ang Ginoo nakakita layo ngadto sa umaabut ug sa unsa nga paagi Siya moggiya nato sa pagtabang Niya sa pagtuman sa iyang mga katuyoan sa katapusang mga adlaw.
Samtang ako nagserbisyo sa Presiding Bishopric daghang katuigan ang milabay, ako gitahasan sa pagdumala sa tigdesinyo ug tig-ugmad nga grupo nga mihimo sa ginganlan nato og FamilySearch. Ako mabinantayon sa pagsulti nga ako “midumala” sa paghimo niini kay sa pagsulti nga ako “midirekta” niini. Daghang maalamong mga tawo mibiya sa mga panarbaho ug miabut aron sa paghimo unsay gusto sa Ginoo.
Ang Unang Kapangulohan mitakda og tumong sa pagpakunhod sa pagkadoble sa mga ordinansa. Ang ilang dakong kabalaka mao ang among dili pagkahibalo kon ang ordinansa sa usa ka tawo napahigayon na ba. Sulod sa mga tuig—o daw mga tuig—ang Unang Kapangulohan nangutana nako, “Kanus-a ninyo kini mabuhat?”
Uban sa pag-ampo, kakugi, ug personal nga sakripisyo sa katawhan nga may talagsaong abilidad, ang buluhaton natuman. Kini anam-anam nga natuman. Ang unang buluhaton mao ang paghimo sa FamilySearch nga dali masabtan o daling gamiton alang niadtong dili komportable sa computer. Dugang nga mga kausaban miabut, ug ako nasayud nga kini magpadayon sa pag-abut, kay matag higayon nga kami mosulbad og dinasig nga problema, among giablihan ang pultahan alang sa dugang nga pagpadayag alang sa mga kauswagan nga sama ka importante apan wala pa makita. Bisan karon, ang FamilySearch nagpadayon nga nahimong unsay gikinahanglan sa Ginoo nga kabahin sa Iyang Pagpahiuli—ug dili lang sa paglikay sa pagkadoble sa mga ordinansa.
Ang Ginoo mitugot namo sa paghimo og mga kalamboan sa pagtabang sa mga tawo nga makaangkon og pamilyar nga mga pagbati ug gani gugma alang sa ilang katigulangan ug pagkompleto sa ilang mga ordinansa sa templo. Karon, ingon nga ang Ginoo nasayud gyud nga mahitabo, ang mga batan-on nahimong mga magtutudlo sa computer sa ilang mga ginikanan ug miyembro sa ward. Tanan nakakaplag og hingpit nga kalipay niini nga pagserbisyo.
Ang espiritu ni Elijah nag-usab sa kasingkasing sa mga batan-on ug tigulang, mga anak ug ginikanan, mga apo ug apohan. Ang mga templo sa dili madugay malipayong mag-iskedyul pag-usab og mga oportunidad sa pagbunyag ug ubang sagradong ordinansa. Ang tinguha sa pagserbisyo sa atong katigulangan ug ang kasuod sa mga ginikanan ug anak nagtubo.
Ang Ginoo nakakita nga kining tanan moabut. Iyang giplano kini, anam-anam, sama sa Iyang gibuhat sa ubang mga kausaban sa Iyang Simbahan. Siya mipasanay ug miandam og matinud-anon nga katawhan kinsa mopili sa pagbuhat sa maayong paagi sa lisud nga mga butang. Siya kanunay nga mapailubon sa mahigugmaong paagi sa pagtabang nato nga makat-on “pagtulun-an human sa usa ka pagtulun-an, lagda human sa usa ka lagda, diyutay dinhi ug diyutay didto.”9 Siya piho sa pagpili sa panahon ug pagkahan-ay sa Iyang mga intensyon, apan Siya mosiguro nga ang sakripisyo kanunayng magdala og padayon nga mga panalangin nga dili nato makita daan.
Ako motapos pinaagi sa pagpahayag sa akong pasalamat sa Ginoo—Siya kinsa midasig ni Presidente Nelson sa pagdapit nako sa paghimo og sakripisyo sa pag-andam alang niining komperensya. Matag oras ug pag-ampo atol sa akong pagpangandam nagdala og panalangin.
Akong gidapit tanan nga makadungog niining mensahe o makabasa niining mga pulong nga magbaton og pagtuo nga ang Ginoo naggiya sa Pagpahiuli sa Iyang ebanghelyo ug Simbahan. Siya mag-una kanato. Siya hingpit nga nahibalo sa umaabut. Siya nagdapit ninyo ngadto sa buhat. Siya makig-uban ninyo niini. Siya dunay plano alang sa inyong pagserbisyo. Ug gani samtang kamo magsakripisyo, kamo mobati og kalipay samtang kamo motabang sa uban nga molambo aron maandam sa Iyang pag-anhi.
Ako mopamatuod kaninyo nga and Dios nga Amahan buhi. Si Jesus mao ang Kristo. Kini Iyang Simbahan. Siya nakaila ug nahigugma kaninyo. Siya naggiya kaninyo. Siya miandam sa agianan alang kaninyo. Sa sagradong ngalan ni Jesukristo, amen.