Hugna 3

Ang Dispensasyon sa Kahingpitan sa Panahon

Isip mga Santos sa Ulahing mga Adlaw, duna kitay sagrado nga katungdanan sa pagtabang sa pagpalambo sa gingharian sa Dios niining katapusang dispensasyon.

Gikan sa Kinabuhi ni Wilford Woodruff

Sa nagkalain-laing mga panahon sa tibuok kasaysayan sa kalibutan, ang Ginoo miistablisar sa mga dispensasyon sa ebanghelyo. Sa matag dispensasyon Iyang gipadayag ang Iyang ebanghelyo pinaagi sa usa o daghan pang gitugutan nga mga sulugoon. Si Propeta Joseph Smith maoy nahimong instrumento sa pagtukod sa kasamtangang dispensasyon, nga gipasabut sa mga kasulatan nga “ang dispensasyon sa kahingpitan sa mga panahon” (Mga Taga-Efeso 1:10; D&P 128:20).

Sa tingpamulak niadtong 1834, si Wilford Woodruff mitambong sa usa ka miting sa priesthood didto sa Kirtland, Ohio. Atol niini nga miting nagsugod siya sa pagkasabut sa padulngan sa Simbahan niini nga dispensasyon. Unya iyang giasoy:

“Ang Propeta mitawag sa tanan nga naghupot sa Priesthood nga magpundok ngadto sa gamay nga eskwelahan nga kahoy didto. Gamay kini nga balay, tingali mga 14 ka pye kwadrado. Pero nasulod ang tanang mga Priesthood sa Simbahan ni Jesukristo sa mga Santos sa Ulahing mga Adlaw nga didto sa lungsod sa Kirtland. … Mao kadto ang unang higayon nga akong nakita si Oliver Cowdery, o nakadungog kaniya nga namulong; unang higayon nga akong nakita si Brigham Young ug Heber C. Kimball, ug ang duha ka mga Pratt [Orson ug Parley], ug si Orson Hyde ug daghan pa. Wala pay mga apostoles sa Simbahan niadtong higayona gawas kang Joseph Smith ug Oliver Cowdery. Sa nagkapundok na kami ang Propeta mitawag sa mga Elder sa Israel sa pagpamatuod niini nga buhat uban kaniya. Kadtong akong gihinganlan namulong, ug daghan pa nga wala nako mahinganli mihatag sa ilang mga pagpamatuod. Sa dihang nahuman na sila ang propeta miingon, ‘Mga kaigsoonan nalig-on ako pag-ayo ug natudloan sa inyong mga pagpamatuod karong gabhiona, pero gusto kong mosulti ninyo sa atubangan sa Ginoo, nga kamo walay nahibaloan mahitungod sa padulngan niini nga Simbahan ug gingharian kay sa usa ka bata sa sabakan sa iyang inahan. Wala kamo makasabut niini.’ Nasurprisa ako. Miingon siya ‘gamay ra nga mga Priesthood ang inyong nakita karong gabhiona, pero kini nga Simbahan molukop sa Amihanan ug Habagatang Amerika—molukop kini sa kalibutan.’ ”¹

Gipahinungod ni Wilford Woodruff ang iyang kinabuhi sa pagpalambo sa gingharian sa Dios, ug nagpadayon sa pagdawat og instraksyon gikan ni Joseph Smith, bisan og patay na ang Propeta. Miistorya siya sa pananawon nga iyang nadawat diin siya nakig-istorya ni Joseph Smith: “Nakita nako siya sa pultahan sa templo sa langit. Miduol siya kanako ug namulong ngari kanako. Miingon siya nga dili siya mahimong mohunong aron makig-istorya nako tungod kay nagdali siya. Ang sunod nga tawo nga akong gikahimamat mao si Papa Smith [Joseph Smith Sr.]; dili siya makaistorya nako tungod kay nagdali siya. Nakahimamat ako og tunga sa dosena ka mga kaigsoonan kinsa naghupot og taas nga katungdanan dinhi sa yuta, ug walay usa kanila nga mihunong aron sa pagpakigsulti kanako tungod kay sila nagdali. Nahibulong kaayo ako. Pagkataudtaud akong nakita ang Propeta pag-usab ug nakahigayon ako sa pagpangutana kaniya.

“ ‘Karon’, miingon ako, ‘Gusto kong masayud nganong nagdali ka man. Pirme kong nagdali sa akong tibuok kinabuhi; mao nga naghandom ako nga ang akong pagdalidali matapos na inig adto nako sa langit, kon makaadto man ako.’

“Miingon si Joseph: ‘Sultihan nako ikaw, Brother Woodruff. Ang matag dispensasyon nga adunay priesthood dinhi sa yuta ug nakaadto na sa celestial nga gingharian adunay buluhaton nga himoonon sa pangandam sa pag-anhi sa yuta uban sa Manluluwas sa higayon nga siya mohari na sa yuta. Ang matag dispensasyon adunay igong panahon sa paghimo niini nga buhat. Kita wala. Kita ang katapusang dispensasyon, ug daghan kaayong buhatunon, ug kinahanglan kita nga magdali aron matuman kini.’ ”²

Mga Pagtulun-an ni Wilford Woodruff

Ang Ginoo ug ang Iyang mga propeta nakakita na niini nga dispensasyon sa wala pa malalang ang kalibutan.

Ang tanang dinasig nga mga tawo, gikan sa mga adlaw ni amahang Adan ngadto sa mga adlaw ni Jesus, nakakita, sa importante ug katapusang dispensasyon sa kahingpitan sa mga panahon, sa panahon nga ang Ginoo mogamit sa iyang gahum sa pagandam sa yuta ug sa katawhan alang sa pag-anhi sa Anak sa Tawo ug maghari sa katarung.³

Giisip nako nga kining trabahoa … nga nagpadayon gikan pa sa panahon nga naorganisar kini nga simbahan, mao ang pagpadayon sa importante nga plano sa atong Amahan sa Langit,—kana nga plano giorden na sa wala pa ang pundasyon sa kalibutan. Gani walay laing dispensasyon nga gipaabut uban sa tumang tinguha sa tanang mga propeta sa Dios ug sa dinasig nga mga tawo. …

Si Isaias, nga nagtan-aw sa mapanagnaong panan-awon niining panahona, migamit og bug-at nga pinulongan sa pagpaningkamot sa pagpadayag sa iyang mga pagbati kalabut niini. Sa usa ka higayon niana siya miingon “Panag-awit, Oh mga langit; ug pagmalipayon, Oh yuta: ug humunat sa pag-awit, Oh mga bukid, kay nagalipay si Jehova sa iyang katawhan, ug adunay kalooy sa iyang ginasakit.” Ang Zion nag-ingon “Gibiyaan ako ni Jehova, ug hingkalimtan ako sa Ginoo.” “Malimot ba ang usa ka babaye sa iyang masuso nga bata, nga dili siya magabaton ug kalooy sa anak nga lalaki sa iyang tagoangkan?” “Oo,” kini sila mahikalimot tingali, apan ako dili gayud malimot sa Zion. Miingon siya “ako na ikaw gipatik sa mga palad sa akong mga kamot, ang imong kuta ania kanunay sa akong atubangan.” [Tan-awa sa Isaias 49:13–16.]

Karon kini nga Zion sa Dios anaa sa Iyang atubangan gikan pa sa katukuran sa kalibutan.⁴

Ang Ginoo wala molalang niini nga kalibutan nga sulagma lang, wala gayud siya mohimo sa bisan unsang buhat nga sulagma. Ang yuta gilalang tungod sa usa ka katuyoan; ug usa niini nga katuyoan mao ang katapusang pagtubos niini ug sa pagestablisar sa iyang panggobyerno ug gingharian diha niini sa ulahing mga adlaw, sa pag-andam niini alang sa paghari sa Ginoo nga si Jesukristo, kansang katungod mao ang paghari. Ang gitakda nga panahon miabut na, kana nga dispensasyon ania na karon kanato, nagpakabuhi kita taliwala niini.⁵

Walay makapugong sa Simbahan sa pagtuman sa padulngan niini.

Kini nga simbahan nagpadayon sa pagtubo. Kini ang bugtong tinuod nga simbahan ibabaw sa tibuok yuta. Ang kasaysayan niini dayag sa kalibutan. Nagpadayon kini sa pagtubo ug pagdaghan sukad niadtong adlaw nga kini giorganisar hangtud karong panahona. … Giplano kini sa Labawng Makagagahum nga Dios nga matukod sa yuta nga may gahum, ug himaya ug ginsakupan, sama sa nakita sa mga propeta sa Dios sa ilang panahon ug henerasyon. Kini ang gingharian nga nakita ni Daniel, ug kini magpadayon sa pagkaylap hangtud nga kini mopuno sa tibuok yuta [tan-awa sa Daniel 2:34–35, 44–45; D&P 65:2].⁶

Kita nagtuo nga kini nga Simbahan moandam sa pag-anhi ni Kristo nga magdumala isip hari, ug nga kini nga Simbahan mahimong gingharian sa Dios, nga giampo sa tanang mga Kristiyano nga matuman, nga ang kabubut-on sa Dios matuman dinhi sa yuta maingon man didto sa langit [tan-awa sa Mateo 6:10].⁷

Walay gahum sa ibabaw sa yuta nga makapukan niini nga Simbahan. Ngano? Tungod kay ang Dios nagkupot niini sa Iyang mga kamot. Siya ang Tigpasiugda niini, ug misaad Siya, pinaagi sa mga ba-ba sa daghang mga propeta, nga kini matuman.⁸

Sa dihang ilang gipatay si Joseph ug si Hyrum wala nila mapatay ang “Mormonismo,” wala nila mapatay ang pagtuo sa Dios, wala nila mapatay ang paglaum ug gugma nga putli, wala nila mawagtang ang mga ordinansa sa balay sa Dios, ni ang gahum sa Balaang Priesthood. Ang Dios sa langit miorden niining mga butanga.⁹

Ang gingharian sa Dios padayong magtubo, dili kini mokunhod.¹⁰

Hain ang Santos sa Ulahing mga Adlaw o si bisan kinsang nga nakakita niini nga simbahan o gingharian nga mikunhod? … Bisag unsa pay atong kahimtang kini nga gingharian padayong magtubo ug modaghan sa walay hunong hangtud karong panahona. Mokunhod ba kini? Dili, dili mahitabo. Kining Zion sa Ginoo, ang tanan niyang katahum, gahum ug himaya napatik diha sa mga palad sa Makagagahum nga Dios, ug kini anaa kanunay sa iyang atubangan; ang iyang mga mando napahimutang na ug walay tawo nga makausb niini.¹¹

Bisan og ang tanang gahum sa kangitngit makiggubat batok kanato, ang Ginoo atong Higala ug Siya mopaluyo kanato ug mohatag kanato sa gahum sa pagtukod sa Zion ug sa pagpadayon niini nga buhat hangtud sa pag-anhi sa Anak sa Tawo. Busa, himoa nga ang inyong kasingkasing magmaya. … Kinahanglang magkahiusa kitang tanan sa kawsa nga atong giapilan. Kon ato kining buhaton kita mogawas nga magmadaugon.¹²

Dili kini sayon alang kanato, duna kitay mga gubat ug oposisyon gikan sa pasugod hangtud niining adlawa; pero kita ug ang kalibutan mahimong mopahulay sa atong mga kasingkasing mahitungod sa “Mormonismo,” kay kini dili mohunong hangtud nga moabut si Jeuskristo sa mga panganud sa langit.¹³

Ang bulawan ug pilak mahimong mahanaw; mga balay ug kayutaan mahimong mangaguba; ang tanang temporal nga mga butang mangawala; pero ang priesthood dili gayud mawala, ang kaluwasan dili gayud mawala, ang gingharian sa Dios dili gayud mawala, ug ang panagna dili gayud mahitabo nga dili matuman.¹⁴

Gitagana kita didto sa kalibutan sa espiritu aron sa pagtukod sa gingharian sa Dios niini nga dispensasyon.

Gitagana kita didto sa kalibutan sa espiritu sa liboan ka mga tuig, aron matawo niining ulahing mga adlaw, ug sa pagdala sa gingharian sa Dios ug sa pagtukod niini. Ang pagsabut niining mga butanga, unsay atong gihunahuna isip mga Santos sa Ulahing mga Adlaw? Aduna kitay mangilngig nga gubat. Si Lucifer, ang anak sa kabuntagon, ug ang iyang tanang mga ginsakpan, nagkahiusa sa pagpakigbatok kanato. Maihap ra kita, kon ikomparar sa mga lumulupyo sa yuta. Dunay gamay ra kaayo nga mga lalaki ug babaye, sa bisan unsang panahon sa kalibutan, kinsa may pagsalig sa kaugalingon sa pagsalikway sa dautan ug sa pag-alagad sa Ginoo. Pero kita giisip nga takus nga iphon isip Iyang mga katawhan. Busa, panahon na, nga kita kinahanglang makaamgo, nga kita mahigmata, ug nga, sinul-uban sa gahum sa Dios ug sa Balaang Priesthood, kiinahanglang atong palamboon kini nga Priesthood ug dawaton ang mga panalangin nga kauban niini.¹⁵

Wala pay mga tawo nga sama niini. Wala pay buhat nga sama niini sukad gilalang sa Dios ang kalibutan. Tinuod, adunay mga tawo nga misangyaw sa ebanghelyo; pero diha sa kahingpitan sa mga panahon ang Ginoo misugod sa pag-establisar sa iyang gingharian. Mao kini ang katapusan dispensasyon. Mipadala siyag mga lalaki ug mga babaye nga mopadayon sa iyang buluhaton, ug sama sa akong gisulti pirme, kadaghanan kanato gipugngan didto sa kalibutan sa espiritu gikan sa pagkaorganisar niini nga kalibutan hangtud niini nga henerasyon sa atong panahon.¹⁶

Ang mga pagpadayag sa Dios diha sa Biblia, sa Basahon ni Mormon ug Doktrina ug mga Pakigsaad natuman. Kita ang nagpatuman niini. Ug samtang ania kita dinhi kinahanglang magmatinud-anon kita ngadto sa Dios, ang Gamhanang Elohim, ang Dios sa mga Judeo ingon man usab sa mga Hentil. Kita ang Iyang gisaligan ug wala nay lain. Naglaum Siya sa mga Santos sa Ulahing mga Adlaw. Ngano? Tungod kay walay laing nakadawat sa kahingpitan sa walay katapusan nga Ebanghelyo; walay laing nangusog sa pagtukod niini nga gingharian. Ang akong pagtuo ug pagbati mahitungod niining butanga mao nga kita gipili sa wala pa ang kalibutan, sama sa karaang mga apostoles, nga matawo dinhi sa yuta ug modawat sa responsibilidad niini nga Gingharian, ug kinahanglan nga ato kining buhaton, kay kon dili kita panghimarauton. Kana ang atong katungdanan. Ang mga mata sa langitnong mga panon nagtan-aw kanato; ang mga mata sa Dios mismo ug sa iyang anak nga si Jesukristo ug kadtong tanang mga apostoles ug mga propeta kinsa mi-sealed sa ilang mga pagpamatuod pinaagi sa ilang dugo nagtan-aw niini nga mga katawhan. Mobisita sila kaninyo, moobserbar sila kaninyo, kay nasayud gayud sila nga ang inyong kapalaran mao ang pagpalambo niini nga Gingharian, sa pagtukod sa Zion, pagbalaan niini, pagbalaan sa yuta ug pag-andam sa kalibutan alang sa pag-anhi sa Anak sa Tawo.¹⁷

Isip mga Santos sa Ulahing mga Adlaw, duna kitay dakong buluhaton nga pagahimoon.

Si Joseph Smith … miabut agig katumanan sa panagna, nakatuman sa unsay gikinahanglan gikan kaniya, mipahimutang sa pundasyon sa buluhaton, nakadawat sa mga yawe sa priesthood ug pagka-apostol, ug ang tanang gasa ug grasya sa organisasyon sa simbahan nga gikinahanglan sa pagpadayon niini. Kita gitawag aron sa pagtukod sa pundasyon nga iyang gipahimutang.¹⁸

Kon atong mabuksan ang panan-awon sa atong mga hunahuna ug ipaabut kini ngadto sa umaabut ug makakita niini nga gingharian ug unsa gayud ang mahimo niini, ug unsay atong buluhaton, sa mga gubat nga atong maagian, sigurado natong makita nga kita adunay importanting mga buluhaton nga giatubang.¹⁹

Ang atong talagsaon nga katungdanan mao ang pagtukod sa Zion, ug sa pag-andam sa mga katawhan nga mobarug sa balaang mga dapit samtang ang mga paghukom sa Ginoo gibu-bu diha sa mga dautan.²⁰

Maoy hunahuna ug kabubut-on sa Dios nga ang mga Santos sa Ulahing mga Adlaw kinahanglang makasabut pag-ayo alang sa ilang mga kaugalingon nga sila nagbarug taliwala sa importante ug katapusang dispensasyon sa Dios ngadto sa mga tawo; ug nga sila kinahanglan gayud nga makasabut nga ang mga responsibilidad nga gitugyan diha kanila miabut diha kanila isip mga trabahante niini nga dispensasyon. Ug kinahanglan nga dili sila makalimot sa kamatuoran nga ang tanang gahum sa kangitngit bisan magkahiusa dili gayud makahimo sa pagpakyas sa mga katuyoan sa Dios mahitungod sa buhat nga Iyang gisugdan sa pagpahigayon, niining panahona ug sa henerasyon nga atong gipuy-an. Ang mga Santos sa Ulahing mga Adlaw kinahanglang magpuyo sa atubangan sa Ginoo sa paagi nga atong masabtan ang mga katungdanan nga atong gidawat, ug ang mga katungdanan nga gipangayo gikan kanato; kay ang Ginoo nanginahanglan og butang niining atong panahon ug henerasyon, sama sa Iyang gipangayo sa Iyang mga katawhan sa kada panahon, sa dihang Iyang gihatag ngadto kanila ang kahingpitan sa walay katapusan nga Ebanghelyo, ug ang gahum ug awtoridad sa balaan nga Priesthood.…

Kabubut-on usab sa Dios nga kita kinahanglang mobayad sa atong mga ikapulo ug mga halad; Iyang kabubut-on nga kita mosunod sa Pulong sa Kaalam; Iyang kabubut-on nga kita mosunod sa mga sugo, ug motudlo niini ngadto sa uban. Kita maoy responsible sa tanan nga wala nato himoa nga kinahanglan unta natong himoon, ingon man usab sa atong gipangbuhat. Kinahanglan nga usa ang atong kasingkasing ug usa ang atong hunahuna, ug dili motugot sa bisan unsa nga matang temporal man o espiritwal nga mopabulag kanato gikan sa gugma sa Dios ug sa tawo.

…Kinahanglang maghiusa kita ug kinahanglang magtinguha kita sa kaayohan sa usag usa. Kinahanglan itudlo nato ang mga baruganan sa Ebanghelyo ni Kristo ngadto sa atong mga anak. Ingon man usab ngadto sa kalibutan, ug andamon ang atong mga kaugalingon sa mga panghitabo nga moabut nga gipamulong diha sa mga pagpadayag nga gihatag sa Ginoo ngari kanato. Nakasugod na Siya sa Iyang buhat, sa Iyang katingalahan ug kahibulongan nga buhat, diha sa mga lumulupyo sa yuta, nga maoy gipasabut ni Isaias [tan-awa sa Isaias 29:14]. Dili gyud Siya mohunong hangtud Iyang matuman ang Iyang mga katuyoan.²¹

Aduna kitay dakong trabaho nga giatubang, ug kini nanginahanglan sa atong tanang mga paningkamot ug sa atong tanang mga talento ug abilidad sa paghimo niini. Kinahanglan nga pangitaon nato ang Espiritu sa Dios sa pagtabang kanato; kay kon wala kini nga Espiritu gamay ra ang atong mahimo.²²

Sultihan nako kamo kon inyong tan-awon ang palibot ug tan-awon ang kahimtang sa kalibutan sa pikas bahin ug unsay pay lain natong buhaton, ug unsay nakab-ot sa sa Simbahan aron matuman ang kapalaran niini ug sa mga pagpadayag ni Jesukristo, ang atong pinakaimportanting tumong mao ang pagpalambo sa gingharian sa Dios ug padayong palamboon kini.…

…Kinahanglang maningkamot kita sa pagpalambo sa gingharian, ug dili lamang pagtipig sa mga panalangin alang sa atong mga kaugalingon, pero maninguha nga mahimong mga manluluwas sa mga tawo sa Bukid sa Zion, ug maningkamot sa pagbuhat sa tanang maayo nga atong mahimo, motrabaho aron ipadayon ang katuyoan ug interes sa Zion sa kada departamento niini diin kita gitawag.

Pinaagi sa pagpadayon niini nga dalan kita mouswag, ug ang kalinaw sa atong mga hunahuna magpadayon ug sama sa gisulti sa Ginoo, walay mopugong ni bisan kinsang tawo nga nagtinguha sa pagkamatarung ug mga panalangin sa gingharian sa Dios.…

…Adunay daghang mga butang nga hapit na mahitabo, daghang importanting mga kausaban nga modangat sa yuta, ug ang gingharian nagtubo; ug ako moawhag sa tanang mga Santos sa Ulahing mga Adlaw nga nakadungog kanako niining adlawa nga magtuon pag-ayo sa inyong katungdanan, ug mosiksik sa inyong mga kasingkasing ug mosiguro kon kita pabor ba sa atong Ginoong Dios, ug dayon atong dugangan kanunay ang pagtuo, pinaagi sa paglaum, sa pagkamatarung, ug sa tanang mahiyason nga baruganan nga kinahanglan natong gamiton aron kita makalahutay sa tanang mga pagsulay nga atong maagian aron mamatud-an nato nga kita mga higala sa Dios, kon motuman ba kita sa pakigsaad o dili; pagasulayan kita gikan niining higayona hangtud sa pag-anhi sa Mesiyas o samtang magpuyo kita dinhi sa yuta.²³

Dili gayud angay mahadlok kon ang mga Santos sa Ulahing mga Adlaw magmatinud-anon lamang sa mga pakigsaad nga ilang gihimo uban sa ilang Dios ug sundon gayud ang mga baruganan nga Iyang gisulti kanato nga maoy modumala kanato sa pagtukod sa Iyang Zion.

Bisan pa niana, kon, makalimtan nato ang atong mga pakigsaad, ug mobiya ug mobaliwala sa mga pagtulun-an nga Iyang gihatag kanato, ipaniguro nako, ang atong kahimtang puno sa katalagman. Ang mga katuyoan sa Dios dili kababagan; pero kita kastigohon, ug kadtong magpadayon niining buhata isalikway ug hikawan sa tanang bahin sa mga panalangin nga gisaad sa Zion.²⁴

Ang Ginoo nagauban niini nga mga katawhan, pero isip mga Santos sa Ulahing mga Adlaw, wala ako magtuo nga kanunay natong gitagaan og bili ang atong mga pribilihiyo. Gitawag kita sa pagbuhat og usa ka buluhaton; gihatag sa Dios kini nga buhat kanato, ug kita responsable atubangan sa langit ug yuta sa paggamit niini nga mga talento—ang kahayag ug kamatuoran, nga gihatag ngari kanato.²⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Ribyuha ang mga pahina 27-28. Sa unsang paagiha nga natuman ang panagna ni Joseph Smith? Unsay atong makat-unan gikan sa panan-awon ni Preisdente Woodruff?
Ngano nga ang mga propeta nag-paabut niini nga dispensasyon? Ngano nga importante alang kanato nga makasabut nga “kita nagpuyo” sa katapusang dispensasyon? (Tan-awa sa mga pahina 28–29).
Unsay atong gipasabut kon kita magpamatuod sa pag-ingon nga kita nahisakop sa “bugtong tinuod nga simbahan sa ibabaw sa tibuok yuta”? (pahina 29; tan-awa usab sa D&P 1:30). Sa unsa nga paagi kita makapaambit niini nga kamatuoran ngadto sa uban?
Unsay nakapadani nimo samtang nagtuon ikaw sa mga pagtulun-an ni Presidente Woodruff mahitungod sa padulngan sa Simbahan? (Tan-awa sa mga pahina 29–32.)
Paklia ang mga pahina 31–32, mangita sa mga butang nga lumalabay ug sa mga butang nga mohangtud sa kahangturan. Unsay mga kalainan tali sa mga butang nga lumalabay ug sa mga butang nga mohangtud?
Basaha ang mga pagtulun-an ni Presidente Woodruff mahitungod sa giingon nga kita “gitagana didto sa kalibutan sa espiritu” nga matawo niini nga dispensasyon (tan-awa sa mga pahina 32–33). Unsay inyong gibati samtang namalandong kamo niini nga mga pamahayag?
Tan-awa ang litrato naa sa pahina 34. Unsay kalabutan niini nga litrato sa pagpalambo sa gingharian sa Dios? Sumala ni Presidente Woodruff, unsay atong mga katungdanan samtang motabang kita sa pagpalambo sa gingharian sa Dios? (Tan-awa sa mga pahina 33–36.)
Basaha ang katapusang paragrap sa pahina 36. Unsay atong mga pribilihiyo niini nga dispensasyon? Unsa sa inyong hunahuna ang gipasabut sa “paghatag bili sa atong mga pribilihiyo”?

May Kalabutan nga mga Kasulatan:D&P 6:32–34; 64:33–34; 121:26–32; 138:53–56

Isip miyembro sa Korum sa Napulog Duha ka mga Apostoles, si Elder Wilford Woodruff mitabang pag-ayo sa pag-establisar sa Simbahan ni Jesukristo dinhi niini nga dispensasyon sa kahingpitan sa mga panahon.

Daniel interpreting dreams — “Kini nga Simbahan nagpadayon sa pagtubo. … Mao kini ang gingharian nga nakita ni Daniel, ug kini magpadayon hangtud nga kini molukop sa tibuok kalibutan.”

family praying together — “Ang atong espesyal nga calling mao ang pagtukod sa Zion, ug mag-andam sa mga katawhan nga mobarug sa balaang mga dapit.”