Hugna 23

“Panaghiusa sa Kasingkasing ug Hunahuna”

Kon nagkahiusa kita sa ebanghelyo, andam kita nga modawat sa pinakabuhong nga mga panalangin sa langit.

Gikan sa Kinabuhi ni Wilford Woodruff

Si Presidente Wilford Woodruff ganahan sa pagpakigdait sa ubang mga miyembro sa Simbahan. Kadaghanan sa gisulat niya sa journal naglakip sa mga pulong sa pagpasalamat alang sa “espiritu sa panaghiusa ug gugma” nga anaa sa mga miting sa Simbahan.¹ Human sa usa ka ingon nga miting, girekord niya nga duha sa mga mamumulong kinahanglan nga mobiya aron moadto sa lain nga pakigpulong. Naglisud sila sa pag-adto sa ilang sabut tungod kay “halos dili sila makagawas sa balay-tigumanan, kay daghan kaayong buot molamano kanila.” Sa sama gihapon nga miting, misulat siya: “Nag-uban kanamo ang Espiritu sa Ginoo. Gugma ug panaghiusa milukop diha sa kongregasyon. Nalipay ako sa talanawon nga makita ang daghang mga Santos nga naghiusa diha sa bag-o ug walay katapusang pakigsaad.”²

Si Presidente Woodruff nanghinaut nga makita kini nga espiritu sa panaghiusa nga magpadayon gikan sa mga miting sa Simbahan ngadto sa tanang mga aspeto sa kinabuhi. Sa iyang mga pakigpulong sa publiko ug sa iyang kada adlaw nga ehemplo, giawhag niya ang mga Santos nga maghiusa diha sa ilang mga pinuy-anan, sa ilang mga responsibilidad sa Simbahan, ug sa ilang temporal nga mga paghago. Si Matthias F. Cowley misulat: “Sa iyang hunahuna walay luna sa panagbangi diha sa Simbahan, pagduhaduha, ug pagbatok. Ang buhat iya sa Dios—igo na kana. Adunay angayan nga gitudlo nga mga awtoridad. Gitugyan diha kanila ang mga responsibilidad sa gingharian. Mao nga wala siya mabalaka mahitungod sa hunahuna sa uban nga kakulang og kaalam diha nila. Dili siya hakog; ug wala maglisud sa panalapi, sa iyang hunahuna, dili gayud makabalda sa mga katuyoan sa Dios; ug wala siya masamok kon unsa ka daghan sa kaayohan ning kalibutan ang iyang naangkon. Usa ka mahimayaon nga mensahe ang gipadala dinhi sa yuta, ug buot siya nga kada usa masayud sa kabililhon niini ngadto sa tawhanon nga pamilya ug makasabut sa mga panalangin sa kaluwasan niadtong kinsa masulundon.

“Kanunay nga bation ni Wilford Woodruff nga wala siya’y lugar alang sa pakigbangi. Naglikay siya niini, ug dili gustong makig-uban niadtong nangitag’ sayop, manaway, ug magdumot. Wala gayud siya magkinahanglan nila. Dili lisud alang kaniya ang pakig-uyon sa iyang kaigsoonan. Makatarunganon siya sa iyang mga gipanghangyo, walay personal nga katuyoan, ug dili gayud magpanuko kon may importanting butang nga buhaton. Maunongon siya sa Propeta, ug matinud-anon sa iyang mga kaigsoonan.”³

Mga Pagtulun-an ni Wilford Woodruff

Ang Panaghiusa mipatigbabaw diha sa Dios nga Kapangulohan [Godhead] ug didto sa celestial nga gingharian.

Sa unang panahon ang Manluluwas miingon ngadto sa Iyang mga Apostoles, ug sa mga Apostoles karon: “Ako moingon nganha kaninyo, paghiusa, ug kon kamo dili magkahiusa kamo dili ako.” [D&P 38:27.] “Ako ug ang akong Amahan usa ra.” [Juan 10:30.] Adunay baruganan nga may kalabutan niini nga sa akong hunahuna importante kaayo alang kanato isip mga katawhan ug isip usa ka Simbahan dinhi sa yuta. Uban sa tanang panagbahinbahin, ug sa tanang walay panag-uyon, ug sa panag-away ug pagkigbatok sa mga kagamhanan diha sa yuta, o kadtong gipadayag na sa langit, wala pa sukad nako madungog nga gipadayag kini ngadto sa mga anak sa katawhan nga dihay panagkabahin tali Dios nga Amahan, Dios nga Anak ug sa Dios nga Espiritu Santo. Usa ra sila. Permi gayud sila nga naghiusa. Permi gayud sila nga magkahiusa, hangtud ngadto sa kahangturan. Ang atong Langitnong Amahan mao ang pangulo, ang Tinubdan sa kaluwasan sa mga anak sa katawhan, ug milalang ug gipapuy-an og mga tawo ang kalibutan ug mihatag og mga balaod sa mga lumulupyo sa yuta.⁴

Nahiusa si Jesus sa Amahan. Siya miingon: “Kay ako nanaug gikan sa langit dili sa pagbuhat sa akong kaugalingong kabubut-on, kondili sa kabubut-on sa nagpadala kanako.” [Juan 6:38.] Kini nga panaghiusa wala gayud maputol tali sa Amahan ug sa Anak. Ang unang pagpadayag nga gihatag ngadto ni Joseph Smith mao kadtong sa Amahan ug sa Anak. Naabli ang langit, ug ang Amahan, uban sa Iyang Anak, mipakita ngadto ni Joseph, agi og tubag sa iyang pag-ampo, ug Siya mitudlo sa Iyang Anak ug miingon, “Kini mao ang akong hinigugmang Anak paminaw kaniya.” [Tan-awa sa Joseph Smith—Kasaysayan 1:17.]⁵

May usa ka celestial nga gingharian, usa ka terrestrial nga gingharian, ug usa ka telestial nga gingharian. May himaya sa adlaw, may himaya sa buwan, ug may himaya sa mga bitoon; ug ingon nga ang usa ka bitoon lahi ang himaya kay sa lain nga bitoon, mao usab ang pagkabanhaw sa patay [tan-awa sa 1 Mga Taga-Corinto 15:41–42]. Didto sa Gingharian sa Dios adunay panaghiusa, adunay kaangayan.⁶

Kon maghimo og pagtandi, kinsa, ang naglaum nga makaangkon og 16 ka ektarya nga lote didto sa gingharian sa Dios, o sa langit, kon maadto na kita didto? Walay usa nga magpaabut niini, kay dinha nga gingharian, sa langit o diha sa yuta, makita nato ang panaghiusa, ug ang Ginoo nagsugo kanato nga maghiusa sumala sa mga baruganan sa iyang celestial nga balaod.⁷

Ang mga propeta kinahanglan gayud nga mahiusa sa Dios nga kapangulohan, [Godhdead] ug ang tanang miyembro sa Simbahan kinahanglan nga magtinguha sa sama nga panaghiusa.

Sa pagbasa sa kasaysayan sa pagpakigsabut sa Dios uban sa mga tawo, gikan sa Biblia, sa Basahon ni Mormon, ug sa Doktrina ug mga Pakigsaad, atong makita nga, gikan sa panahon ni Amahang Adan, ang Ginoo mipasanay og talagsaon nga matang sa mga tawo, sa kada dispensasyon, kang kinsa Iyang gitugyan ang Iyang Priesthood, ug nga kinsa gihatagan Niya og gahum ug awtoridad sa pagbuhat sa Iyang trabaho dinhi sa yuta taliwala sa mga anak sa mga katawhan. Ug kining mga tawhana nag-angkon og mga baruganan sa pakighiusa sa Dios, uban sa Anak sa Dios ug sa Espiritu Santo. Ang Espiritu Santo gitugyan ngadto ni Amahang Adan, napuno siya niini, sa katapusan niyang mga adlaw, gipanalanginan niya kadtong iyang mga anak nga mga High Priest ug ang nahabilin sa iyang mga kaliwat [tan-awa sa D&P 107:53–56].

Sila si Amahang Adan, Enoch, Moises, Noe, Abraham, Isaac ug Jacob, ug ang tanan niadtong karaang mga patriarch ug mga propeta may katungdaan sa pagpakig-uban sa Dios. Gikinahanglan nila ang panabang sa Ginoo, kon wala kini nga pagpakig-uban dili sila takus nga mobuhat sa ilang katungdanan. Nagsalig sila sa Ginoo sa pagpadayag, sa kahayag, ug alang sa panudlo aron makaangkon og gahum sa pagtuman sa mga sugo sa Dios. Kini nga panaghiusa nga gimando sa Ginoo sa karaan nga mga patriarch ug sa mga propeta, ug kini nga panag-uban nga gimando ni Jesus sa Iyang mga Apostoles, gisugo usab kang Joseph Smith ug sa iyang mga kaigsoonan. Gimando kini sa tanang mga Santos sa Dios gikan pa sa pagkatukod sa kalibutan hangtud karon.⁸

Naamgohan nako nga ang Kapangulohan niini nga simbahan nagpatunga tali niining mga katawhan ug sa Ginoo, kay sila ang pangulo, ug akong naamgohan nga ang Dios mopadayag ngadto kanila sa iyang kabubut-on, busa kinahanglan nga maminaw kita ngadto nila alang sa kahayag ug kasayuran. Ang mga lider sa Simbahan mahimo nga puno sa kahayag, inspirasyon, pagpadayag ug sa hunahuna ug kabubut-on sa Dios, apan kon kadtong mga opisyal nga ilang gisaligan, ug kita mismo dili makugihon sa atong mga katungdanan, ug dili takus nga modawat niana nga kahayag, nakita ba ninyo nga sama ra kini sa suba nga gisampongan sa tinubdan? Walay kahayag ug kahibalo nga modangat ngadto sa mga miyembro sa Simbahan.

Akong naamgohan nga katungdanan kini, dili lamang kanato nga naghupot sa priesthood apan sa mga katawhan sa kinatibukan, sa pagpakita og pagkamapainubsanon ug hugot nga pagtuo sa atong kaugalingon diha sa atubangan sa Ginoo aron atong maangkon ang mga panalangin nga giandam alang kanato, ug madawat nato ang tanang kahayag, kahibalo, hugot nga pagtuo, salabutan ug gahum nga gikinahanglan sa atong kaluwasan pinaagi sa pagpaubos, pagkamasulundon ug pag-uyon sa kabubut-on sa Dios. Kinahanglan nga atimanon nato kini aron ang atong mga hunahuna mahimo nga andam ug ang atong mga lawas takus alang sa pagdawat sa Espiritu Santo, aron ang Espiritu sa Dios gawasnon nga mobuhagay sa tibuok lawas gikan sa ulo ngadto sa tiil. Dayon kon maingon niini pareho ang atong panan-aw, pareho ang atong pagbati, ug managsama ra, ug mahimong usa sumala sa gimbut-an sa ebanghelyo ug sa gingharian sa Dios, sama nga ang Amahan ug Anak usa ra, ug dayon magsugod sa pagkaamgo kini nga mga katawhan sa kahimtang ug relasyon nga atong gipakita sa usag’ usa ug ngadto sa Dios, ug mabati nato ang kaimportante sa pagbuhat sa atong mga katungdanan ug mauyunon kita sa pagpadayon ug mopauswag sa atong panahon, gamiton sa maayo ang atong mga talento ug makadawat sa mga panalangin nga gihatag sa Ginoo kanato aron mapahimuslan, apan wala ba ninyo makita nga kon ang mga katawhan dili makugihon ug tapolan ug wala maninguha sa ilang mga kahigayonan, ug kon ang Espiritu sa Dios magsugod sa pagbuhagay gikan sa mga lider sa Simbahan ngadto sa mga miyembro dili na sila takus sa pagdawat niini?

Mahimo nga subayon nato kini nga baruganan diha sa simbahan ug sa Gingharian sa Dios, ug mahimo ninyo nga gamiton kini diha sa pagdumala sa pamilya. … Sama kini sa ubasan uban sa mga sanga niini ug sa gagmayng’ mga sanga [tan-awa sa Juan 15:1–11]. Usa kini ka maayo nga paghulagway aron pagtudlo kanato sa baruganan sa pagkamatarung.

Aron maandam kita sa pagbuhat sa kabubut-on sa Dios ug mahimong takus aron pagtukod sa iyang gingharian dinhi sa yuta, ug sa pagpadayon sa iyang katuyoan, dili lamang kita magkahiusa ug mobuhat sama sa kasingkasing sa usa ka tawo, apan kinahanglan gayud nga batonan nato ang Balaang Espiritu sa Dios ug ang hunahuna ug kabubut-on sa Dios mahitungod kanato, ug pagadumalahon ug kontrolahon niini sa tanan natong mga lihok ug mga buhat aron luwas ug mosiguro sa atong mga kaugalingong kaluwasan.⁹

Adunay kalig-on sa panaghiusa.

Wala ako maghunahuna nga kinahanglan pang lantugian kini og maayo aron masuta nga may kalig-on sa panaghiusa, ug ang nagkahiusang mga tawo adunay gahum nga wala mabatoni sa nagkabahinbahin nga mga tawo.¹⁰

Kinahanglan nga maghiusa kita ug maghiusang mobarug batok sa mga oposisyon nga atong masugatan.¹¹

Wala maorden nga ang dautan makaangkon og gahum aron sa pagpahinabo og kadautan ngari kanato, kon nagkahiusa kita.¹²

Mahimo nga mabahin ang Babelonia, ang mga lumulupyo sa yuta mahimong magkabahinbahin kutob sa ilang gusto; apan madawat ra nila ang mga resulta nianang panagkabahin, ug nahinabo kini sa kasaysayan. Sa matag siyudad, mga nasud nga gilaglag pinaagi sa mga paghukom sa labing Makagagahum sa panahon nga hinog na kini sa kadautan, sama sa nahitabo sa Sodom ug Gomorrah, sa Babelonia, Nineveh, Tyre ug Sidon, ug daghan pa kaayong karaan nga mga siyudad ug mga nasud. Apan ang mga Santos sa Dios dili mouswag kon dili sila magkahiusa.¹³

Samtang nag-anam kadaghan ang simbahan, ug ang gingharian sa Dios maayo na nga pagkaorganisar, ang pagka importante sa panaghiusa tali sa mga miyembro kinahanglang labaw pa gihapong ipakita. Gikinahanglan gayud kaayo nga dili lamang mangangkon nga may panaghiusa apan tinuod gayud nga panaghiusa sa kasingkasing ug kalag sa mga presidente, mga konseho, ug mga branch sa simbahan ni Kristo, aron matuman ang mga plano sa Dios sa pagpalambo sa Zion, o sa pagdawat niadtong mga panalangin nga ilang katungod sa pagpahimulos; kay, seguro gayud, mga Santos sa Labing Halangdon, nga ang langit dili motabang ni bisan kinsa nga kapangulohan, kurom, konseho, o branch kinsa managlaghi sa kasingkasing, panghunahuna ug pagbati, ug mao nga sila magpabilin, ug ang mga panalangin mapugngan hangtud nga mawala ang kadautan, kay ang Ginoo dili gayud mobubo sa pinakabuhong nga mga panalangin sa langit, ug sa priesthood ug mga gasa sa ebanghelyo, [gawas] sa baruganan niana nga panaghiusa nga gikinahanglan sa celestial nga balaod sa Dios. … Pinaagi lang sa hiniusa nga mga paningkamot, sa mga Santos sa Dios, niining katapusan nga dispensasyon, ang pagpalambo sa Zion matuman, ug ang gingharian sa Dios dinhi sa yuta, maandam sa panaghiusa uban sa gingharian sa Dios didto sa langit; ug sa ingon ang kadena nga nagbugkos sa panaghiusa sa mga panon sa langit molugway ug moangkon sa tanang nagmasulundon sa mga sugo sa Dios.¹⁴

Kinahanglan nga maghiusa kita sa atong doktrina, sa atong paghago sa gingharian sa Dios, ug sa atong gugma sa usag usa.

Doktrina

Kanunay akong magmaya nga magtan-aw sa akong isigkatawo nga makahibalo sa kamatuoran pinaagi sa pagpakamasulundon sa ebanghelyo nga gitudlo sa mga sulugoon sa Ginoo. Sa diha nga ang mga tawo magpabunyag ug makadawat sa gasa sa Espiritu Santo pinaagi sa pagpandong sa mga kamot, ilang nadawat ang sama nga kamatuoran, ang sama nga kahayag nga atong nadawat, ug sa ingon mahimo kitang magkahiusa sa kasingkasing ug magkahiusa sa hunahuna, ug magsunod sa inspirasyon sa Espiritu Santo, nga nag-uban sa Iyang ebanghelyo. Sa pagsangyaw sa ebanghelyo ug sa pagpahigayon sa mga ordinansa sa balay sa Ginoo, ang espiritu sa inspirasyon sa Langit mag-uban niadtong kinsa nagdumala, nga sa ingon magpabilin sa dayon uban kanila, kon matinud-anon, sa tanang katungdanan sa kinabuhi.

Kon makadungog ako sa kaigsoonan nga magsulti mahitungod sa mga pagpakigsabut sa Dios sa mga kaliwatan karon, akong masabut nga ang ilang mga hunahuna nanaghiusa, ang pagpamatuod nga ilang gihatag usa ra, nagkahiuyon sila sa ilang pagpamatuod; naghiusa sila sa pagpamahayag nga ang buhat sa Ginoo nga atong Dios mopatigbabaw sa tanan nilang mga kaaway.¹⁵

May usa ka partikular nga hilisgutan nga may kalabutan sa pagsangyaw sa ebanghelyo: Mahimong magpadala kamo og usa ka libo nga mga elder ug mao lang gihapon nga doktrina ang ilang itudlo, maghago silang tanan alang sa pagpalambo sa mao gihapon nga Simbahan, magkahiusa sila; tungod kay ang ilang pagtuo, ang ilang mga doktrina, ug ang pagpalambo sa Simbahan gipahibalo na ngadto kanila pinaagi sa pagpadayag sa Dios: tungod niini magkasinabut sila kabahin sa mga baruganan sa ebanghelyo. … Ang atong pagpakig-angay ug sa pagkahiusa sa hunahuna naglangkob sa usa ka gidungog nga kaanindot sa organisasyon sa gingharian sa Dios.¹⁶

Paghago diha sa gingharian sa Dios

Kinahanglan nga palambuon nato kini nga gingharian pinaagi sa panaghiusa ug sa matinud-anon nga pagsunod niadtong mga tawo nga nangulo kanato, kay kon dili pagatibulaagon kita; kuhaon gikan kanato ang mga panalangin sa Dios kon mosimang kita og lain nga dalan.¹⁷

Akong katungdanan ang pagpakigdait sa Dios, isip huyang nga instrumento nga sama kanako diha sa mga kamot sa Dios. Akong katungdanan ang pagbaton ug gahum uban sa Dios. Ug kon maako na kini, dayon, ang akong mga magtatambag mobarug gayud sa akong tapad ug mag-uban kanako. Kinahanglan nga kami magkahiusa sa kasingkasing ug hunahuna sa tanang mga butang, temporal man o espirituhanon, nga moabut kanamo diha sa paghago sa Simbahan ug sa gingharian sa Dios. Ug mapasalamaton ako sa pag-ingon nga, mao kini ang kahimtang sukad sa akong pagkatawag niini nga katungdanan, o sukad pa sa pagkaorganisar [niini] nga Kapangulohan sa Simbahan. Nahiusa uban kanamo dinhi mao ang Napulog duha ka mga Apostoles. Katungdanan nila nga magkahiusa sa kasingkasing ug magkahiusa sa hunahuna. Wala silay katungod nga dili maghiusa. Dili sila mahimong mosupak ug unya mouswag sa atubangan sa Dios. Kinahanglan nga makighiusa sila kanato, ug kita maghiusa uban kanila. Sila adunay katungod; sila adunay kabubut-on [agency]. Apan kon ang Kapangulohan sa Simbahan moingon ni bisan kinsa kanila, “Mao kini ang pulong sa Ginoo,” o, “Husto kini,” kinahanglan nga dawaton nila kini ug motrabaho uban kanato. Ang balaod sa Dios nagkinahanglan niini nga panaghiusa diha sa atong mga kamot. Katungdanan kini sa mga seventy, aron usab, mahiusa uban sa Napulog Duha ka mga Apostoles. Ang mga seventy gitawag sa mga apostoles aron manglakaw ug maghago diha sa ubasan sa Ginoo, ug maghiusa sila nga magtrabaho. Busa, mga kaigsoonan, ingon niini ang kada organisasyon sa Simbahan. Kinahanglan nga adunay panaghiusa. Kinahanglan nga walay panagbangi, walay panagbulag. Kon aduna man, ang Ginoo dili mahimuot niini, ug mabalda kita sa atong buluhaton.¹⁸

Bisan asa nga dapit sa yuta atong makita unsay epekto sa dili pagkahiusa. Kon unsa ka dako ang pagkabahin sa mga nasud, mga kumunidad, mga pamilya, o pundok sa mga katawhan sa bisan unsa nga kahimtang ubos sa langit, mas minus ang gahum nga ilang gihuptan aron sa pagpadayon sa katuyoan o baruganan nga maabut sa hunahuna; kon unsa ka lig-on ang ilang panaghiusa, malehislatura man o sa bisan unsa nga kahimtang, mas may labaw pa nga gahum nga ilang maangkon aron molampus sa ilang tinguha. Atong makita nga ang mga katawhan sa kalibutan mas nag-anam og kabahinbahin kada adlaw, ug ang mga kadautan nga resulta niana nga pagkabahinbahin makita bisag’ asa. Gitawag kita aron pagpalambo sa Zion, ug dili nato kini mapalambo gawas kon maghiusa kita, ug niana nga panaghiusa kinahanglan nga sundon nato ang mga sugo sa Dios kanato, ug kinahanglan nga motuman niadtong gitahasan sa pagpangulo ug paggiya sa mga buluhaton sa Gingharian sa Dios. …

… Ang mga baruganan sa ebanghelyo ni Jesukristo nga gipadayag sa atong panahon mao ang gahum sa Dios ngadto sa kaluwasan ngadto sa tanan nga motuo, Judeo man o Hentil, niini nga panahon sa kalibutan ingon usab sa ubang panahon; ug tungod kay magkahiusa kita sa pagsunod sa tambag nga atong nadawat, mabuntog nato ang matag dautan nga nag-ali sa atong agianan, makapalambo sa Zion sa Dios, ug mahimutang ang atong mga kaugalingon aron maluwas kita.¹⁹

Paghigugmaanay sa usa’g usa

Magmaloloy-on sa usa’g usa. Ayaw pangita og sayop sa usa’g usa. … Pagtinabangay.²⁰

Kinahanglan nga walay hinakog nga pagbati ni bisan kinsa sa pamilya,—“Dili ako magsapayan kon unsay mahitabo, niana o bisan kinsa pa, basta makuha lang nako ang akong gusto.” Hinakog kini, makamugna kini og panagbahin ug wala mahiangay sa pagka santos sa Dios. Kinahanglan nga maghago kita, ang kada usa kanato, sa pagsalikway niana nga mga pagbati sa atong mga kasingkasing, ug dayon kita, diha sa atong mga pamilya, kinahanglan nga maningkamot nga mahatagan og pagtagad ang mga interes sa mga miyembro niini.²¹

Kon ang atong relihiyon wala magtudlo kanato nga mahigugma sa Dios ug sa atong isigkatawo ug pagpakigsabut sa makiangayon ug matarung nga paagi sa tanang mga tawo, ang atong pagpangangkon niini kawang lamang. Matud pa sa apostol:

“Kon adunay magaingon, Ako nahigugma sa Dios, apan nagadumot sa iyang igsoon, nan, kini siya babakon; kay siya nga wala maghigugma sa iyang igsoon nga iya rang makita, dili gayud makahimo sa paghigugma sa Dios nga wala niya makita?” [1 Juan 4:20.]

Mas makahatag kita’g labing maayo nga panig-ingnan sa gugma nato sa atong Dios pinaagi sa pagsunod sa atong relihiyon. Kawang lamang ang pagpahayag og gugma sa Dios samtang nagsulti og dautan o nagbuhat og sayop sa Iyang mga anak. Ang sagrado nga mga pakigsaad nga atong gihimo ngadto Kaniya hugot nga gipabuhat kanato ang mga katungdanan nga nagkulang kita sa usag’ usa; ug ang mahinungdanong katungdanan sa relihiyon mao ang pagtudlo kanato kon unsaon sa pagpahigayon niadtong mga katungdanan aron makahatag og labing mahinungdanong kalipay sa atong mga kaugalingon ug sa atong isigkatawo. Kon ang mga obligasyon sa atong relihiyon gituman, walay mga pulong nga gibungat og mga buhat nga gihimo nga makasakit sa silingan. Kon ang mga Santos sa Ulahing mga adlaw magsunod sumala sa angay nilang buhaton, ug sumala sa gitudlo sa ilang relihiyon, walay dautan nga pagbati ni bisan kinsa gawas sa pag-inigsoonay nga kahinangup ug gugma. Wala unta diha kanato ang paglibak ug pagsulti og dautan; apan kalinaw ug gugma ug panagdait ang maghari diha sa atong mga kasingkasing ug mga pinuy-anan. Kita maoy labing malipayon nga mga katawhan dinhi sa yuta, ug maana kanato ang panalangin ug kalinaw sa langit ug sa tanan nga ania kanato.

Kon anaa ang kasub-anan ug hilabihan nga kasina ug mga panag- away ug mga kayugot tali kanato, anaa kini tungod kay wala kita magsunod sa relihiyon nga atong gipanghimatuod. Dili sila ang mga bunga. Diin anaa kini nga kadautan adunay dakong panginahanglan sa paghinulsol. …

Isip mga Santos sa Ulahing mga adlaw, kinaiya na natong tanan ang pag-ambit sa sacrament kausa matag semana. Kon ang mga pagtulun-an sa atong Ginoo, nga atong gihinumdoman pinaagi sa pagsunod niining sagrado nga ordinansa, gisunod, walay usa nga nakasala ang tugotan sa pag-ambit niini hangtud nga nakahimo siya sa pagpakig-uli sa buot. Klaro gyud nga mando kini ni Ginoong Jesus nga walay usa nga tugutang moambit sa Iyang unod ug dugo nga dili takus [tan-awa sa 3 Nephi 18:28–32]. Ang usa ka mas hingpit nga pamaagi aron malikayan ang dautang mga pagbati ug kasaypanan tali sa mga kaigsoonan dili gayud mahunahuna. Kon buhaton sa mga Santos ang ilang katungdanan, walay panagbangi nga dili masulbad dili magpabilin ang kalisdanan lapas sa adlaw sa Ginoo kon magtigum na sila aron sa pagkaon ug pag-inom agi og paghandum Kaniya.²²

Akong awhagon ang tanang mga Santos, nga maghiusa kitang mosunod sa panultihon sa atong Ginoo nga gitala diha sa ika-12, ika-13, ug ika14 nga bersikulo sa [ika-15 nga kapitulo] sa Juan— kon maghigugmaay kita sa usa’g usa sama sa paghigugma ni Kristo kanato, dali ra nato nga mahusay ang tanang mga kalisdanan nga motunga diha kanato, magpinasayloay sa usa’g usa, ug magmaloloy- on. Ug kahayag, gugma, hingpit nga kalipay, panaghiusa, kalinaw, ug panagdait makamugna ug kalig-on sa atong mga panahon, nga mahimong mas ikahimuot sa panan-aw sa Dios, mga anghel ug mga tawo, kay sa dugay nga away-away tungod sa mga sayop sa atong mga kaigsoonan.²³

Kinahanglan nga kita nagkahiusa sa kasingkasing ug nagkahiusa sa hunahuna, ug dili tugotan ang bisa’g unsa nga butang sa temporal o espirituhanon nga kinaiya nga mopahimulag kanato gikan sa gugma sa Dios ug sa tawo.²⁴

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna ug samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Ribyuha ang unang paragrap sa pahina 263 Unsa nga mga kasinatian nga pareho sa imoha?
Sa unsang mga paagi ang Langitnong Amahan, si Jesukristo, ug ang Espiritu Santo “usa ra”? (Tan-awa sa mga pahina 265–67.)
Sa unsang mga paagi ang mga propeta nahiusa ngadto sa Dios nga kapangulohan? [Godhead] (Tan-awa sa mga pahina 266–67.) Unsaon nato pagkab-ut ang ingon nga panaghiusa? (Tan-awa sa mga pahina 267–68.)
Ribyuha ang mga pahina 266–68, mangita sa mga kumentaryo ni Presidente Woodruff mahitungod sa 16 ka ektarya nga lote, usa ka suba, ug ubasan. Unsay atong makat-onan niini nga mga pagkapareho?
Basaha ang unang paragrap diha sa pahina 269. Unsay mga kasinatian ang gipakita nga “may kalig-on sa panaghiusa”?
Hunahunaa o hisguti ang managlahi nga mga kasinatian, kinaiya, interes, talento ug mga katungdanan sa mga miyembro sa inyong ward, branch, o pamilya. Unsa sa inyong hunahuna ang sama nga mga indibidwal magkahiusa sa dayon?
Unsa ang pipila ka mga panalangin nga atong madawat kon nagkahiusa kita sa dayon diha sa atong mga panimalay? sa mga organisasyon sa atong Simbahan? Unsa ang mga sangputanan sa walay panaghiusa diha sa panimalay ug sa simbahan?
Unsa nga mga butang ang gihatag sa Simbahan aron katabangan kita nga magkahiusa sa doktrina nga atong gitudlo? Unsa ang atong buhaton aron sa pagsiguro nga ang atong pagtulunan gihiusa uban sa mga pagtulun-an sa mga propeta sa ulahing adlaw?
Ngano nga imposible ang pag-ingon nga nahigugma kita sa Dios apan nasilag kita sa atong igsoon? (Tan-awa sa pahina 273.)
Tun-i ang ikaduhang tibuok nga paragrap sa pahina 274. Sa unsang paagi ang sacrament makapahiusa kanato?

May kalabutan nga mga Kasulatan: Salmo 133:1; Mosiah 18:21; 3 Nephi 11:28–29