Hugna 19

Pagsunod sa Buhing Propeta

Samtang magsunod kita sa pulong sa Ginoo nga gipadayag nganha sa buhi nga propeta, makakaplag kita og kaluwasan ug kalipay niini nga kalibutan ug pagkabayaw sa umaabot nga kalibutan.

Gikan sa Kinabuhi ni Wilford Woodruff

Usa ka hapon niana didto sa pinuy-anan ni Elder Wilford Woodruff gisultihan siya nga buot makigkita kaniya si Presidente Brigham Young didto sa Church Historian Office. Sa pagkadawat niini nga hangyo gikan sa Presidente sa Simbahan, “miadto dayon sa opisina,” si Elder Woodruff ¹ diin nagserbisyo pa siya isip Assistant Church Historian. Sa kaulahian girekord niya kini sa iyang journal:

“Si Presidente Young miingon kanako sa akong pag-sulod, ‘Aduna ka bay parisan [nga kabayo]?’ Ako siyang gisultihan nga aduna akoy parisan sa gagmayng’ mga kabayo. Mihangyo siya kon ako ba kining ikatagana. Nagpanuko ako og kadiyut ug miingon, ‘Oo sir, mabuhat nako ang tanang gikinahanglan.’ Dayon miingon siya, ‘aduna akoy maayong parisan nga mga kabayo nga akong ipahulam kanimo, tungod kay nagtrabaho ikaw dinhi.’ Mao ra og nakalitan ako. Wala ako magdahum niini. Akong gidawat ang mga kabayo ug mapasalamaton, bisan og wala dayon ako makasulti niini nianang panahona.”²

Sa dihang miuyon si Elder Woodruff sa paghatag sa iyang gagmay nga kabayo, mihukom lang siya sa pagsunod sa mga sugo ni Presidente Young; wala siya magpaabut og ganti sa iyang gibuhat. Hinoon, nasayud siya sa mga panalangin nga moabut sa pagsunod sa buhi nga propeta. Sa milabayng’ pipila ka mga bulan, siya mipahayag, “Ang Ginoo molamdag sa hunahuna ni Brother Brigham ug mogiya kaniya sa daghang mga baruganan kabahin sa kaluwasan niini nga katawhan, ug dili mahimong pugngan ang atong mga hunahuna ug moingon nga layo na ang atong naabtan ug kutob na lang diha; dili kita makahimo niini nga dili mahimutang sa kakuyaw ang atong relasyon sa Dios.”³

Kini nga pamahayag makanunayon nga walay paglubad nga pagkaloyal ngadto sa mga Presidente sa Simbahan sa dihang miserbisyo siya isip miyembro sa Korum sa Napulog Duha ka mga Apostoles. Sa diha nga siya na mismo and nahimong Presidente sa Simbahan, mipamatuod siya sa iyang balaanon nga katungdanan ug mipasalig sa mga Santos nga kanunay gayud sila nga pangulohan sa usa ka buhi nga propeta. Siya miingon:

“Sa dihang mihatag ang Ginoo sa mga yawe sa gingharian sa Dios, ang mga yawe sa Melchizedek Priesthood, sa pagka apostol, ug gi-seal kini sa ulo ni Joseph Smith, gi-seal Niya kini diha sa iyang ulo aron magpabilin dinhi sa yuta hangtud nga muabot ang Anak sa Tawo. Angayan si Brigham Young nga moingon, ‘Ang yawe sa gingharian sa Dios ania na.’ Diha kini kaniya hangtud sa adlaw sa iyang kamatayon. Unya gipatong nila kini sa ulo sa laing tawo—si Presidente John Taylor. Gikuptan niya kadtong mga yawe hangtud sa oras sa iyang kamatayon. Dayon gitugyan kini, o sumala sa kabubut-on sa Dios, diha ni Wilford Woodruff.

“Moingon ako sa mga Santos sa Ulahing mga adlaw ang mga yawe sa gingharian sa Dios ania na, ug magpabilin usab kini dinhi, hangtud muabot ang Anak sa Tawo. Pasabta niana ang mga katawhan sa Israel. Mahimong dili magdugay kini kanako, apan mahiadto unya kini ngadto sa laing apostol, ug lain sunod kaniya, ug magpadayon sa ingon hangtud sa pag-abut ni Ginoong Jesukristo diha sa mga panganod sa langit.”⁴

Ang mga Pagtulun-an ni Wilford Woodruff

Gikan sa panahon ni Adan, ang Ginoo mitawag og mga propeta aron pagdumala sa Iyang Simbahan ug mopasidaan sa mga lumulupyo sa yuta.

Ang Dios nangulo niini nga Simbahan sukad pa sa sinugdanan, pinaagi sa mga propeta ug dinasig nga mga tawo. Pagadumalahon Niya kining Simbahan hangtud matapus ang kalibutan.⁵

Ang Dios wala gayuy simbahan o katawhan, sa bisan kanus-a nga panahon sa kalibutan, nga gidumala ug gikontrolar gawas kon ipaagi sa pagpadayag. Ang buhi nga mga manalagna sa Dios diha uban kanila—kadtong naghupot sa mga yawe sa gingharian, ug kinahanglan nga makadawat sila og pagpadayag aron pagtabang kanila sa ilang mga buluhaton.⁶

Ang Ginoo wala gayud mohatag og mga paghukom sa bisan kinsa nga kaliwatan nga wala kita makahibalo hangtud nga mitawag siya og mga propeta ug dinasig nga mga tawo aron sa pagpasidaan sa mga lumulupyo sa yuta. Mao kini ang paagi ang paagi sa Ginoo pagdumala sa tanang mga tawo sukad pa sa panahon ni Amahan Adan hangtud karong panahona.⁷

Pinaagi sa buhing mga propeta, ang Ginoo mopadayag sa Iyang kabubut-on alang sa Simbahan ug mogiya kanato sa dalan paingon sa kinabuhing dayon.

Ang Ginoo nagtudlo kanato … nga walay kalainan kon nagsulti siya gikan sa langit pinaagi sa iyang kaugalingong tingog, o pinaagi sa pagpangalagad sa mga anghel, o pinaagi sa baba sa iyang mga sulugoon kon sila madasig sa Espiritu Santo, pareho ra kini sa hunahuna ug kabubut-on sa Dios [tan-awa sa D&P 1:38].⁸

Ang balaod sa Dios anaa sa baba niadtong kinsa gitahasan sa pagpangulo kanato.⁹

Kon anaa pa kanato ang matag pagpadayag nga gihatag sa Dios sa kada tawo, kon anaa pa kanato ang Basahon ni Enoch, kon anaa pa kanato ang wala mahubad sa pinulungang ingles nga pinulongan nga bahin sa mga palid; kon anaa pa kanato ang mga rekord sa Tigpadayag nga si San Juan nga gitaguan, ug ang ubang mga pagpadayag, ug gipundok dinhi mga traynta ka mitros ang gitas-on, ang simbahan ug ang gingharian sa Dios dili molambo, karon o sa bisan unsang panahona sa kalibutan, kon walay buhi nga mga manalagna sa Dios.¹⁰

Ania kanato ang pagpadayag. Tinuod, nga ang mga lider niini nga Simbahan sukad sa kamatayon ni Propeta Joseph Smith wala [makapamahayag] og daghang mga pagpadayag. Gipagawas ni Joseph Smith ang Basahon sa Doktrina ug mga Pakigsaad, ug kini usa ka dako kaayo nga libro sa pagpadayag—usa sa labing mahimayaon nga mga rekord nga sukad gikahatag sa Dios ngadto sa tawo dinhi sa yuta. Apan buot ako nga mosulti nga si Brother Brigham Young walay panahon sa iyang kinabuhi nga walay pagpadayag. Kanunay gayud siya nga nakadawat og pagpadayag. Dili siya makatrabaho kon wala kini, dili siya makasangyaw o mobuhat sa kabubut-on sa Dios nga wala kini. Ni bisan kinsa nga tawo nga maghupot niana nga katungdanan. Dili motugot ang Ginoo sa tawo nga mangulo niini nga Simbahan gawas kon siya gidumala ug gikontrolar pinaagi sa pagpadayag. Huyang ra kaayo kita nga mga instrumento—huyang nga mga ulod sa abug, apan ang Dios mipili sa huyang nga mga butang sa yuta aron sa paglibug sa maalamon, ug sa pagpalambo sa Iyang Zion, ug gihatagan kita Niya og pagpadayag ug gipahibalo ngari kanato ang Iyang hunahuna ug kabubut-on.¹¹

Lahi kita kaysa kalibutan; aduna kitay’ daku nga tinubdan diin atong madawat ang kahayag, kahibalo ug mga panalangin. … Mahimo nga sulayan nimo ang may mahait og salabutan nga mga tawo nga sukad nakaangkon sa talento ug kahibalo ug ibutang kini diha sa simbahan sa Dios, ug dili gayud sila makalupig sa ilang lider. Ang ilang kaalam mahimo nga binuang. Ngano? Tungod kay wala sila matawag aron mangulo. Bisan kon ang tawo wala makakat- on sa pagbasa, kon tawagon siya sa Ginoo aron mangulo sa simbahan ug gingharian sa Dios, hatagan siya og gahum sa Ginoo sa pagbuhat niini. Ania kanato ang mga leksyon nga gipahimutang sa atong atubangan matag adlaw, nagtawag kanato nga maghiusa, ug ang atong mga kasingkasing maingon sa kasingkasing sa usa ra ka tawo, nga ang atong mga pag-ampo ug mga buhat maghiusa sa pagsunod sa tambag sa atong pangulo.

Ang Ginoo mogiya [sa Presidente sa Simbahan] ngadto sa buot niya nga padulngan. Nasayud kita nga ang Dios nag-uban kaniya, ug mogiya kaniya sa tanang panahon. … Gisugo niini [ang propeta] sa pagsulti kanato unsa ang husto ug unsa ang sayop sa daghang mga butang, tungod kay mao kana ang iyang kapangakuhan ug katungdanan. … Usa ka perpekto nga paagi sa pagpadayag anaa tali sa Ginoo ug kaniya, diin iyang nakuha ang kaalam, unya mosangyaw sa dugang nga pamaagi paingon ngadto sa katawhan. Nasayud na kita niana. Kinahanglan nga makat-on kita unsaon sa paggamit niini nga kahibalo.¹²

Ang Ginoo dili gayud motugot kanako o ni bisan kinsa nga tawo kinsa mobarug ingon nga Presidente niini nga Simbahan sa paggiya kaninyo nga mahisalaag. Kini wala sa plano. Kini wala sa hunahuna sa Dios. Kon ako mangahas niana, ang Ginoo mopapahawa kanako gikan sa akong katungdanan.¹³

Nanghinaut ako nga atong subayon ang agianan nga gipahimutang kanato sa mga sulugoon sa Ginoo, kay kon kini atong sundon nasayud ako nga luwas kita niining kalibutana, ug makaangkon og kalipay ug kahimayaan sa umaabot nga kalibutan. … Kon kita matinud- anon modala sila kanato sa dalan sa kinabuhi, ug ingon nga aduna kitay hugot nga pagtuo sa pagsunod sa ilang mga panudlo, sa mga pagtulun-an sa Espiritu Santo pinaagi kanila, kita anaa kanunay sa luwas nga dalan, ug makasiguro sa atong ganti.¹⁴

Nagpaluyo [sustain] kita sa buhing propeta ug ubang mga lider sa Simbahan pinaagi sa pag-ampo alang kanila ug pagsunod sa ilang tambag.

Ako ug ang ubang mga tawo, ang mga apostoles, ug ang tanan nga gitawag aron pagpangatungdanan diha sa pangalan sa Ginoo nagkinahanglan sa hugot nga pagtuo ug mga pag-ampo sa mga Santos sa Ulahing mga adlaw.¹⁵

Samtang buhi pa ako buot ako nga magmatinud-anon ug magmasulundon sa akong Dios ug sa mga Santos. Usa sa pinakamahinungdanon nga mga panalangin sa Dios ngari kanako mao ang kamatuoran nga ako ug ang mga magtatambag pinangga sa mga Santos sa Ulahing mga adlaw, ug akong gibati ang pagkaubos diha sa atubangan sa Ginoo tungod niini. Nasayud kami nga nag-ampo kamo alang kanamo. Nasayud kami nga inyo kaming gitahud. Ug nabuhi kami tungod niini nga baruganan. … Ang Ginoo “mipili sa pinakahuyang sa kalibutan aron sa pagpakaulaw sa mga kusgan; … ug mga butang nga wala magalungtad aron pagwagtang sa mga butang nga nagalungtad.” [Tan-awa sa 1 Mga Taga-Corinto 1:27–28.] Among giila ang among mga kahuyang. Akong gipangandoy mismo nga unta mahimo akong labaw pa ka maayo nga tawo. Sa pagkatinuod naninguha ako sa pinakamaayo nga akong mahimo sa akong huyang nga paagi. Nangandoy gihapon ako sa pagbuhat sa ingon. Apan nagsalig ako sa Ginoo ug sa mga pag-ampo sa mga Santos, ingon man sa akong kaigsoonan.¹⁶

Nanghinaut ako sa akong mga kaigsoonan nga kinasingkasing sila nga mopaluyo sa mga Kapangulohan niini nga Simbahan pinaagi sa ilang pagtuo, mga buhat ug sa pag-ampo, ug dili sila pasagdan nga magpas-an sa tanang responsibilidad, samtang kami lakip ang mga miyembro molikay sa among katungdanan. Kon amo kining buhaton dili kami takus sa among katungdanan isip mga Elder sa Israel, ug mga amahan ug inahan sa Israel. Kinahanglan nga ang kada usa kanato mobuhat sa iyang bahin; ug kon atong tul-iron ang ato mismong mga kabuang, ug husayon ang atong kaugalingong panimalay, ug buhaton ang matarung, makabuhat kita og maayo nga butang, ug makatabang nga magaan ang buluhaton niadtong kinsa nangulo. … Hilabihan ka bug-at alang [sa Presidente sa Simbahan] kon makita niya ang mga katawhan nga mapasagaron sa pagpadayon sa ilang buluhaton nga modala kanila sa kalaglagan; kon wala silay tinguha nga motuman sa iyang tambag ug mosunod sa mga doktrina nga iyang gitudlo; apan kon makita niya ang mga katawhan nga andam nga motuman sa maayo nga tambag, ug magtinguha aron mabalaan ang ilang mga kaugalingon sa atubangan sa Ginoo, mobati siya nga nalig-on ug gipaluyohan.¹⁷

Kinahanglan gayud nga dili kita mobaliwala sa tambag sa Presidente sa Simbahan.

Kon ang Ginoo modasig sa mga tawo ug mopadala kanila ngadto sa bisan asa nga kaliwatan, patubagon niya kana nga kaliwatan kon giunsa nila pagdawat ang pagpamatuod sa iyang mga sulugoon.¹⁸

Kinahanglan nga ang tanan nga mga miyembro sa Simbahan mogamit sa ilang mga gahum sa pangatarungan ug panghunahuna, ug sabton og maayo kon ngano nga ila gayud nga pilion ang agianan nga gitudlo sa Dios. Maalamon nga pagsunod diha sa Iyang mga Santos ang gitinguha sa atong Langitnong Amahan. Gihatagan kita Niya og kabubut-on sa paghunahuna ug pagbuhat alang sa atong mga kaugalingon, sa ato mismong kabubut-on, sa pagbaton og pagpamatuod alang sa atong mga kaugalingon gikan Kaniya kabahin sa kamatuoran sa mga baruganan nga Iyang gitudlo, ug dayon magmaligdong ug dili matarug sa pagpahigayon sa tanang gikinahanglan alang sa kaluwasan.¹⁹

Atong kahigayonan sa pagpakabuhi nga anaa ang Espiritu sa Dios nga mosaksi sa kamatuoran sa bisan unsa nga pagpadayag nga moabut gikan sa Dios pinaagi sa baba sa Iyang propeta nga nangulo sa Iyang mga katawhan, ug kini mao gayud ang akong nag-una nga baruganan nga kon ang propeta kinsa nangulo og mopresentar sa usa ka doktrina o baruganan o moingon “ang Ginoo nagaingon niini” naningkamot ako sa pagdawat niini bisan sukwahi kini sa akong tradisyon o mga panan-aw, kay nakapaniguro gayud ako nga ang Ginoo mopadayag sa kamatuoran ngadto sa Iyang propeta nga Iyang gitawag aron mangulo sa Iyang Simbahan sa dili pa Niya ako tawagon. Ug ang pulong sa Ginoo pinaagi sa propeta mao ang katapusang Balaod ngari kanako.²⁰

Buot ako nga mosulti ngadto sa akong mga kaigsoonan nga [ang Presidente sa Simbahan] mao ang atong lider, siya ang atong tighatag og balaod diha sa Simbahan ug sa Gingharian sa Dios. Gitawag siya niini nga katungdanan; katungod niya ang pagsulti sa mga katawhan kon unsay buhaton, ug atong katungdanan ang pagsunod sa tambag nga iyang gihatag karon sa mga kaigsoonan. Kita, isip mga katawhan, dili gayud mobaliwala niini nga tambag, kay ako moingon kaninyo sa pangalan sa Ginoo, ug ako nakabantay niini sa una pa nakong pagkamiyembro niining Simbahan, walay tawo nga mangako sa pagsupak sa tambag sa matuod nga gihatagan og awtoridad nga lider niini nga mga katawhan nga milambo, ug wala gayuy ingon nga tawo nga molambo.²¹

Sumala sa karaan nga paagi atong nakat-unan nga [ang mga magbalantay sa karnero] kanunay nga mag-una ug moandam sa agianan, aron makabantay siya kon adunay peligro sa unahan aron pagluwas sa karnero. Kon [ang karnero] tugotan nga mag-una sa magbalantay, malagmit nga madakpan kini sa lobo ug patyon kini, ug sa higayon nga ang mga tawo niini nga gingharian mosulay sa pagsupak og unsay gitudlo sa ilang mga lider, bisan sa unsa pa nga katarungan, sa higayon nga mobuhat sila niini mamiligro sila sa kadaut niadtong buot molaglag kanila.

Mao kini ang hilisgutan nga ako nang gihunahuna sa makadaghan, ug nakaangkon ako og igo-igong kahibalo diha sa akong kasinatian pinaagi sa pagpaniid sa kinaiya sa mga tawo, ug wala pa gayud nako makita nga kini napakyas sulod sa akong kinabuhi nga kon ang mga tawo mosupak sa tambag sa ilang mga lider, … kanunay sila nga malambigit sa mga problema ug mag-antus sa kadaut sa pagbuhat sa ingon.

Karon bisan unsa nga kahibalo nga akong nakat-unan, pinaagi sa pagsiksik ug pagtuon mahitungod sa mga arte ug syensya sa mga tawo, bisan unsa nga mga baruganan nga akong nadawat atol sa akong syentipikanhon nga mga pagsiksik, bisan pa niana kon ang propeta sa Dios mosulti kanako nianang dili kadudahan nga baruganan, o teyoriya nga tingale akong makat-unan nga sayop, bisan unsa pa kadtong mga ideya, akong gihunahuna nga akong katungdanan, ang pagtuman sa sugyot sa akong lider sa priesthood sa pagsalikway nianang sayop nga baruganan o teyoriya. …

Akong nakit-an ang daghang mga tawo sa panahon ni Joseph nga mipahayag og mga baruganan, ug mibasa ug mitudlo, ug miduso og mga teyoriya nga kon moingon ang propeta “dili kini husto nga buhaton, dili kini tinuod.” Makiglalis lang gihapon kadtong mga tawhana, mopabilin sa ilang baruganan, ug modepensa sa ilang mga teyoriya pinaagi sa pagsulat kon sawayon sila sa propeta, ug moingon nga, “wala kamiy’ pagtuo sa imong teyoriya, ni sa sistema nga imong gipresentar.”

Sa higayon nga buhaton kana sa tawo misupak siya sa sulugoon sa Dios nga gibutang aron sa paggiya sa dalan sa kinabuhi ug kaluwasan. Mao kini ang usa ka butang nga kinahanglang likayan sa mga Elder. Sa pagkatinuod may daghang mahinungdanong mga butang nga gitudlo sa pagtukod niini nga gingharian nga mao ra og kahibulongan alang kanato, nga sukwahi sa atong mga tradisyon, ug giandam aron pagsulay sa mga tawo. Si Brother Joseph migamit og daghang mga paagi sa pagsulay sa ka ligdong sa mga tawo, ug mitudlo siya og daghang mga butang nga tungod sa tradisyon nanginahanglan og pag-ampo, hugot nga pagtuo ug pagpamatuod gikan sa Ginoo una pa motuo niini ang daghang mga Santos. …

Kabahin sa pagsupak ni bisan kinsa nga tawo nga gitudlo nga mangulo kanato, ako moingon nga dili gayud kini nato buhaton, ug dili nako igsapayan kon unsay atong mga pagbati ug panan-aw niana kon atong hisgutan ang atong mga tradisyon ug edukasyon.

Kon ang Dios adunay bisan unsang butang nga ipadayag, kini iyang ipadayag ngadto sa tawo nga nangulo. … Walay laing plano, walay laing sistema nga mogiya ug modumala sa mga tawo niini nga gingharian, gawas lamang sa giestablisar nga pinaagi sa mga pagpadayag sa Dios diha sa han-ay sa Iyang simbahan ug gingharian, ug kana alang sa pangulo nga mangulo, motambag ug modumala sa tanang mga dispensasyon diin ang kabubut-on sa Dios gipadayag ngadto sa tawo.²²

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa nga mga baruganan ang atong makat-unan gikan sa istorya sa pahina 217–18?
Unsay mga responsibilidad sa mga propeta? (Tan-awa sa mga pahina 219–21.) Unsaon man sa Presidente sa Simbahan karon pagtuman niining mga responsibilidad?
Ribyuha ang ikatulo nga tibuok paragrap diha sa pahina 219. Nganong mas importante ang pagagiyahan sa usa ka buhi nga propeta kaysa pagbaton og mga rekord sa karaan nga mga propeta?
Ribyuha ang ikaduhang tibuok paragrap sa pahina 220. Sa unsa nga paagi kini nga pasalig makatabang kanimo?
Unsay atong buhaton aron paluyohan ug suportahan ang Presidente sa Simbahan? (Tan-awa sa mga pahina 221–25.) Hunahunaa kon unsay buhaton nimo aron sa pagpaluyo sa buhi nga propeta.
Unsa nga mga tambag nga atong nadawat gikan sa bag-o nga Presidente sa Simbahan? Unsay inyong gibuhat aron sa pagsunod niana nga tambag? Unsang mga panalangin ang inyong nadawat isip resulta sa inyong pagkamasulundon?
Unsa nga mga pasidaan ang gihatag ni Presidente Woodruff niadtong mosalikway o mobaliwala sa mga pulong sa buhi nga propeta? (Tan-awa sa mga pahina 223–25.)
Basaha ang ikaduhang tibuok paragrap sa pahina 222. Unsay imong makat-unan sa hugpong nga mga pulong “maalamon nga pagsunod”?
Sa unsa nga paagi kita makatudlo sa atong mga anak sa pagpaluyo sa Presidente sa Simbahan?

May kalabutan nga mga Kasulatan: Amos 3:7; Mateo 10:41; 1 Mga Taga-Tesalonica 5:25; Mosiah 2:7–9; D&P 21:4–7; 28:6–7; 43:1–3; 107:22

President Woodruff — Si Wilford Woodruff nagserbisyo isip Presidente sa Simbahan ni Jesukristo sa mga Santos sa Ulahing mga Adlaw gikan sa Abril 7, 1889, ngadto sa Septyembre 2, 1898.

sustaining vote — Sa diha nga mipataas kita sa atong mga kamot sa pagpili, misaad kita sa “sa pagpaluyo sa Kapangulohan niini nga Simbahan pinaagi sa [atong] pagtuo, mga buhat, ug mga pag-ampo”