Hugna 9

Pagsangyaw sa Ebanghelyo

Kinahanglang magkugi kita ug magmatinud-anon nga motabang sa uban nga madawat ang mga panalangin sa gipahiuli nga ebanghelyo.

Gikan sa Kinabuhi ni Wilford Woodruff

Human gayud siya mabunyagi ug makumpirmahi nga miyembro sa Simbahan, “nakabaton siya og dakong tinguha sa pagsangyaw sa Ebanghelyo.” Nahinumdom siya: “Usa ka gabii Dominggo kadto nag-inusara akong miadto sa kakahoyan, ug nag-ampo sa kinasingkasing ngadto sa Ginoo, nga hatagan akog higayon nga makasangyaw sa Ebanghelyo ngadto sa mga lumulupyo sa yuta.Ang Espiritu sa Ginoo misaksi nga ang akong pag-ampo gidungog, ug pagatubagon. Mibarug ako nga malipayon, ug nakalakaw og mga 40 ka bara [mga duha ka gatus ka metros o duha ka gatus ug baynte ka yarda], ug nasugatan nako si Elias Higbee, usa ka High Priest, nga akong gikauban sulod sa daghang mga bulan.Sa nagkaduol na ako kaniya, miingon siya, ‘Brother Wilford, ang espiritu sa Ginoo misulti kanako nga kinahanglang ordinahan ka, ug magmisyon.’ Mitubag ako, ‘andam na ako.’ ”¹

Ubos sa direksyon sa iyang bishop, si Wilford Woodruff giordinahan nga usa ka priest niadtong Nobyembre 5, 1834, ug gipamisyon ngadto sa habagatang Estados Unidos. Miserbisyo siya uban ang pagtuo ug kakugi, ang sinugdanan sa tibuok kinabuhing misyonaryong pag-alagad diin nakatabang siya og liboan nga modawat sa gipahiuli nga ebanghelyo. Mahitungod kaniya, si Presidente Heber J. Grant miingon, “Nagtuo ako nga walay laing tawo sa ibabaw sa yuta nga gibantog nga maayong mokabig og mga tawo ngadto sa ebanghelyo ni Jesukristo.”²

Niadtong Enero 1840, human dayon maordinahe nga usa ka Apostol, si Elder Wilford Woodruff miadto sa England aron magserbisyo isip usa ka misyonaryo. Iyang gisugdan ang iyang serbisyo sa nasud sa Staffordshire, nakatagamtam og igong kalampusan. “Dihay nadugang nga 40 ka tawo ngadto sa simbahan pinaagi sa bunyag,” mitaho siya, “ug daghang mga pultahan ang giablihan; ug taliwala sa pag-uswag niini nga buhat, sa dihang mibarug ako aron sa pagpamulong atubangan sa dakong kongregasyon sa Hanly, niadtong unang adlaw sa Marso, ang Ginoo mipakita ngari kanako nga mao kadto ang katapusang higayon nga ako mopasidaan niadtong mga katawhan sulod sa daghang mga adlaw, natingala sila, kay sa ilang pagtuo, ingon man usab ako, sa akong pagsulod sa balay, abi nako og makig-uban ako kanila sa daghang mga bulan; pero ang mga pamaagi ug mga hunahuna sa Dios dili sama sa atong mga paagi ug mga hunahuna sa tanang higayon.”

Si Elder Woodruff nag-ampo sa Ginoo pagkasunod adlaw, nangutana asa siya paingon. Iyang giasoy pag-usab: Sa pagtuo nga mao kadtoy higayon ug katungdanan nga masayud sa kabubut-on sa Ginoo sa maong hilisgutan, busa, nangutana ako sa akong Langitnong Amahan pinaagi sa pangalan ni Jesukristo sa pagtudlo kanako sa iyang kabubut-on niining butanga, ug ako nangutana, ang Ginoo mihatag, ug mipakita kanako nga mao kini ang iyang kabubut-on nga moadto dayon ako sa habagatang England. Nakig-istorya ako ni brother William Benbow mahitungod niini, kinsa nagpuyo sa Herefordshire ug adunay mga higala nga nagpuyo didto, ug gusto nga akong bisitahan kadtong dapita, ug [siya] mitanyag sa pag-uban kanako ngadto sa balay sa iyang igsoong lalaki ug mobayad sa akong pamilite, nga akong gidawat dayon.”³

Niadtong Marso 4, 1840, si Elder Woodruff ug si William Benbow miabut sa balay sa igsoon ni William nga si John. “Mga usa ka oras sa akong pag-abut sa iyang balay,” nahinumdom si Presidente Woodruff, “akong nahibaloan ngano nga ang Ginoo mipadala nako dinhi. … Akong nakita ang pundok sa mga lalaki ug mga babaye, mga unom ka gatus, kinsa nagkahiusa ubos sa pangalang Nagkahiusang mga Kaigsoonan [United Brethren], nga naningkamot sa pag-establisar sama sa karaang lagda sa mga butang.Gusto nilang itudlo ang Ebanghelyo nga gitudlo sa propeta ug mga apostoles, sama sa akong gihimo sa batan-on pa ko.”⁴

Ang pamilyang Benbow dali rang midawat sa mensahe sa Pagpahiuli, ug si William mibalik ngadto sa Staffordshire “human sa kalipay nga nakakita sa iyang igsoon nga si John Benbow, ug sa iyang pamilya, … nga nabunyagan ngadto sa bag-o ug walay katapusan nga pakigsaad.”⁵ Si Elder Woodruff nagpabilin sa maong dapit sulod sa walo ka bulan. Unya nahinumdom siya: “Ang unang tranyta ka adlaw human sa akong pag-abut sa Herefordshire nakabunyag ako og kwarentay singko ka mga tigsangyaw ug gatusan ka mga miyembro. … Nakadala kami og duha ka libo sulod sa walo ka bulan nga pagpaningkamot.”⁶

Kabahin niini nga kasinatian, si Presidente Woodruff misulat: “Ang tibuok kasaysayan niining misyon sa Herefordshire nagpaila sa kaimportante sa pagpaminaw sa hinay hinagawhaw nga tingog sa Dios ug sa mga pagpadayag sa Espiritu Santo. Ang Ginoo adunay mga tawo didto nga andam na alang sa Ebanghelyo. Nag-ampo sila alang sa kahayag ug kamatuoran, ug ang Ginoo mipadala kanako ngadto kanila.”⁷

Mga duha ka tuig sa wala pa magserbisyo si Elder Woodruff didto sa England, ang Espiritu migiya kaniya sa pagsangyaw sa ebanghelyo ngadto sa gamayng pundok sa mga tawo––sa iyang kaugalingong pamilya. Sa iyang patriyarkal nga panalangin, nga gihatag ni Joseph Smith Sr., gisaaran siya nga iyang “dad-on ang pamilya sa [iyang] amahan ngadto sa gingharian sa Dios.”⁸ Niadtong 1838, samtang nagserbisyo siyag misyon sa dapit nga duol sa iyang lungsod, iyang gibati nga ang panahon miabut na alang niini nga panagna aron matuman. Siya misulat:

“Migahin ako … og diseotso ka adlaw sa Farmington ug Avon, pagbisita sa kabanay sa akong amahan, ang akong mga uyoan, mga ig-agaw, mga silingan ug mga higala, nagsangyaw sa Ebanghelyo ni Jesukristo ngadto kanila, ug naningkamot sa pagdala kanila ngadto sa gingharian sa Dios. … Pinaagi sa tabang sa Dios, matinudanon nakong gisangyaw ang Ebanghelyo ngadto sa kabanay sa akong amahan ug sa tanan nga diha uban kaniya, ingon man usab sa akong kaparyentihan.”

Niadtong Hulyo 1, 1838, si Elder Woodruff mibunyag og unom ka tawo, lakip na kadtong tanan nga nagpuyo sa balay sa iyang amahan, sumala sa gisaad sa iyang patriyarkal nga panalangin. “Malipayon kaayo ako niadtong adlawa,” miingon siya. “Ang akong amahan, ina-ina ug igsoong babaye apil niadtong gibunyagan.Gidugangan pa kini sa ubang mga kaparyentihan. Akong gibati nga ang nahitabo sulod lamang niining adlawa maoy dakong ganti sa tanang nakong mga paningkamot sa pangalagad.

“Kinsa ang makasabut sa kamaya, sa himaya, sa kalipay ug kahupayan nga gibati sa usa ka Elder sa Israel nga nahimong instrumento sa mga kamot sa Dios sa pagdala sa iyang amahan, inahan, igsoong babaye, igsoong lalaki o bisan kinsa nga kaliwat ni Adan nga mosulod ngadto sa kinabuhi ug kaluwasan? Walay tawo nga mobati niini gawas iyang masinati kining mga butanga, ug makaangkon sa pagpamatuod ni Jesukristo ug sa inspirasyon sa Makagagahum nga Dios.”⁹

Mga Pagtulun-an ni Wilford Woodruff

Gihimo kita sa Dios nga responsable sa pagpakigbahin sa ebanghelyo ngadto sa uban.

Ang katawhan sa tanang panahon nangita sa kalipay; nagtinguha sila sa sosyal nga kalinaw ug kalinaw sa panimalay; ug kon maghunahuna sila sa umaabut, nagtinguha sila nga maapil sa mga panalangin nga gipamulong mahitungod niana nga kahimtang sa pagpuyo; pero wala sila masayud unsaon sa pag-angkon niini, gawas kon dunay usa ka sulugoon sa Dios nga moabut ug motudlo sa pamaagi sa kinabuhi.¹⁰

Kita ra ang mga tawo nga gihatagan niining balaan nga ebanghelyo, priesthood ug mga pakigsaad sa atong panahon, ug kita ang responsable kon unsaon nato paggamit niini. Kinahanglan nga magmakugihon kita ug magmatinud-anon sa pagtanyag niining dakong kaluwasan ngadto sa mga anak sa tawo, ug sa pagtukod sa Zion ug sa gingharian sa atong Dios.¹¹

Bisan unsa pa ka walay hinungdan niining mga tawhana sa mga mata sa kalibutan, ang Dios sa langit mohimo natong responsable sa pagsangyaw niini nga Ebanghelyo ngadto sa tanang nasud ubos sa langit, ug kinahanglang buhaton nato o kita panghimarauton. Dili kita makalikay niini. Ngano? Tungod kay, sama sa gisulti ni Pablo: “Alaut ako kon dili nako iwali ang Maayong Balita.” [1 Mga Taga-Corinto 9:16.] Adunay usa lang ka Ebanghelyo; wala gayuy lain gawas sa usa, ug wala na gayuy lain; ug si Pablo miingon: “Apan bisan pa kon kami, o usa ba ka manulonda nga gikan sa langit, magawali kaninyog Maayong Balita nga sukwahi sa amo nang giwali kaninyo, ipatunglo siya” [Mga Taga-Galacia 1:8.] Kana nga Ebanghelyo, kamong mga Santos sa buhing Dios, … ania sa atong mga kamot, gipadala ngari kanato pinaagi sa pagpangalagad sa mga Anghel––ang samang Ebanghelyo nga gitudlo gikan ni Adan ngadto ni Kristo, ug gikan ni Kristo hangtud sa atong panahon ug henerasyon, kon ang Dios adunay mga katawhan dinhi sa yuta.¹²

Walay pundok sa mga tawo sukad sa paglalang sa Dios niining kalibutan nga dunay dakong responsibilidad sa pagpahimango niini nga henerasyon, sa pagsinggit sa atong lanog nga tingog, adlaw ug gabii kon duna kitay opurtunidad ug mopahayag sa mga pulong sa Dios niini nga henerasyon. Kinahanglan nga buhaton nato kini. Ato kining calling. Ato kining katungdanan. Ato kining buluhaton.¹³

Miubog ako sa kalapukan ug misawom sa mga sapa, ug nangayog pagkaon sa lainlaing balay; ug nakagahin og dul-an sa singkwenta ka tuig niini nga buluhaton. Ug ngano? Duna bay daghang bulawan sa California aron kasuhulan ako sa pagbuhat niini? Wala, sa pagkatinuod; ug kon unsa man ang akong nahimo ug unsa ang nahimo sa akong mga kaigsoonan kini among gibuhat kay gisugo kami sa Dios. Ug mao kini ang atong katungdanan karon. Nagsangyaw kita ug naningkamot dinhi sa ato ug didto sa layong dapit, ug gusto natong padayunon ang atong mga paningkamot, pinaagi sa tabang sa Dios, hangtud nga duna kitay kagawasan sa pagbuhat niini.¹⁴

Naghunahuna ako, sa makadaghan, nga kita, isip mga elder sa Israel ug mga Santos sa Ulahing mga Adlaw, napakyas sa pagsabut sa atong katungdanan sa atubangan sa Ginoo. Ang buluhaton nga gikinahanglan gikan kanato dako ug hilabihan; mao kini ang buhat sa Makagagahum nga Dios. Kita ang responsable alang niining tanan ug alang sa pagtukod og mga templo ngadto sa Labing Halangdon, nga atong kasudlan ug kahimoan sa mga ordinansa alang sa kaluwasan sa atong mga patay.¹⁵

Ug dayon, aduna kitay katungdanan sa pagsangyaw ngadto sa daghang mga tawo nga naglibot sa atong panimalay, kay sama ra kaimportante ang pagsangyaw diha sa panimalay ingon man ngadto sa layong dapit.¹⁶

Makaangkon kitag dakong kalipay sa pagtabang sa uban nga moduol ngadto ni Kristo ug mouswag ngadto sa kahimayaan.

Ihatag ngadto ni bisan kinsang tawo ang mga baruganan sa kinabuhi ug kaluwasan ug ipahigayon kining mga ordinansa ngadto kaniya, ug mahimo kamong instrumento sa mga kamot sa Dios sa kaluwasan niana nga kalag. Walay laing gihatag ngadto sa mga anak sa tawo nga makatupong niini. …

… Ang Ginoo [miingon], “Ug kon kini mahimo nga ikaw manlimbasog sa tanan nimong mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan.” [D&P 18:15.] … Atong gisangyaw ang Ebanghelyo ngadto sa matag kanasuran, kaliwatan, pinulongan ug katawhan, kutob sa gihatag sa Ginoo nga paagi kanato ug nakaangkon kita niana nga kahigayunan sa pagsangyaw. Sa gihapon ang kalibutan puno sa mga tawo nga wala pa makadungog sa Ebanghelyo ni Jesukristo; ug samtang ang Priesthood ania kanato aduna kitay obligasyon ug responsable alang sa kaluwasan sa mga anak sa tawo, samtang duna pa kitay kahigayunan sa paghatag niining mga gasa diha sa mga anak ni Adan. Hunahunaa lamang nga pinaagi sa pagdawat sa Ebanghelyo ni Jesukristo mahimo kitang manununod sa Dios ug isig ka manununod uban kang Kristo, nga kita adunay bahin diha sa unang pagkabanhaw, ug mobangon gikan sa atong mga lubnganan ug sininaan sa himaya, pagka-imortal, ug kinabuhing dayon, ug moagi sa atubangan sa Dios ug sa Kordero ug magpuyo uban kanila sa kahangturan didto sa kalangitan! Kinsa ang nakasabut niini? Ang mga lumulupyo ba sa yuta? Wala sila makasabut. … Nakaamgo ako nga nagsalig kita sa Ginoo sa tanang mga butang. Ang Ginoo mao ang atong tigpatunhay. Siya ang tuburan sa atong kaluwasan. Si Jesukristo misakripisyo sa Iyang kinabuhi aron sa pagtubos kanato pinaagi sa Iyang dugo, ug pinaagi niana gihatag kini nga mga panalangin ngari kanato. . …

… Wala nay madawat pa nga mas dakong katungdanan ang tawo kay sa pag-angkon niini nga katungod ug kahigayunan sa pagadto ug pagluwas sa mga kalag sa tawo––pagluwas kanila pinaagi sa pagsangyaw sa Ebanghelyo ngadto kanila, pinaagi sa pagpangalagad sa mga ordinansa ngadto kanila, aron maandam ang ilang mga kaugalingon sa pag-adto ngadto sa gingharian sa langit ug ngadto sa celestial nga himaya. …

Sa akong pagtuo daghang higayon nga wala nato hatagig bili ang mga panalangin nga atong natagamtam ug naangkon. Ang atong mga kasingkasing kinahanglan nga itumong sa pagpalambo sa gingharian Dios, ang Zion sa Dios, ug ang buluhaton sa Dios, samtang ania kita dinhi ug adunay gahum sa paghimo niining mga butanga. Katungdanan nato isip Kapangulohan ug isip mga Apostoles, dili lamang ang pagpaningkamot sa atong kaugalingon, pero sa pagpadala sa mga Elder sa Israel ngadto sa mga nasud sa yuta aron sa pagsangyaw sa Ebanghelyo. Dunay opurtunidad karon sa daghang mga nasud sa pagsangyaw sa Ebanghelyo ni Kristo, ug sa pagdala sa mga katawhan ngadto ni Kristo, aron ilang madawat kini nga mga panalangin.¹⁷

Hapit ang tibuok nakong kinabuhi gigahin dinhi niini nga Simbahan; ug gikan sa panahon nga miapil ako sa Simbahan nagmisyon ako ug wala gayud mohunong gikan niadtong adlawa hangtud karon. Nalipay ako kanunay niini, ug nalipay karon. Kon ako mamatay ug ilubong ang akong lawas, dili ako gusto nga dunay tawo nga mobarug ug makaingon nga ako nagpasagad sa akong katungdanan sa pagtudlo sa paghatag kaniya sa kaluwasan kutob sa akong mahimo. Nalipay ako kanunay sa pagsangyaw sa Ebanghelyo; nalipay ako sa pagpangalagad sa mga ordinansa sa kinabuhi ug kaluwasan dinhi ug sa layong dapit, tungod kay nasayud ako nga kini mao ang buluhaton sa Dios, ug nasayud ako niini karon.¹⁸

Imbis mosaway sa laing mga relihiyon, kinahanglang magpuyo kita nga magpakita sa kamatuoran ug kaayo sa atong kaugalingon.

Kon moadto kamo sa kasilinganan aron isangyaw ang Ebanghelyo, ayaw gayud sulayi ang pagdaot ang tinuohan sa tawo sa dili pa nimo siya hatagan sa mas maayo nga tinuohan; gani, ayaw gayud atakiha ang relihiyon sa usa ka tawo, bisan asa kamo moadto. Tuguti ang matag tawo nga malipay sa iyang kaugalingong relihiyon. Katungod niya ang pagbuhat sa ingon. Kon dili siya modawat sa inyong pagpamatuod kabahin sa Ebanghelyo ni Kristo, iya kanang kalihokan, ug dili inyo. Ayaw paggahin og panahon sa pag-ataki sa ubang mga sekta ug relihiyosong grupo. Wala kitay panahon sa paghimo niana. Dili gayud husto ang pagbuhat niana.¹⁹

Pangitaa pinaagi sa pagtuo, pag-ampo, ug pagpaubos, ang pagangkon og kaalam, ug sa Espiritu sa Dios nga mogiya sa inyong tanang paningkamot. Ang kaalam maoy usa sa labing importante nga mga gasa sa Dios, ug ang tingog sa kaalam dili mosulti kanato nga igahin ang atong panahon sa pagpakig-away batok sa mga sekta nianang panahona, makigbatok sa mga opinyon sa mga tawo, magtamay sa mga relihiyon nga naglibut kanato, sa ingon ang mga tawo magdumili sa pagpaminaw kanato, mosira sa kasingkasing sa mga tawo batok sa kahayag ug kamatuoran; ang mga opinyon ug mga relihiyon sa ubang mga tawo mahal nila sama nga mahal nato ang atoa. … Himoa nga ang Kaluwasan mao ang inyong hisgutan-, sa kaaghup ug pagpaubos, uban sa gahum sa mahangturong kamatuoran, kaalam, kahayag ug kahibalo nga anaa sa unang mga baruganan sa ebanghelyo sa Anak sa Dios. Kamo mahimong instrumento sa pagluwas sa kalag sa mga tawo, ug malipay sila uban kaninyo nga ilang nakita ang kahayag sa ebanghelyo; dili gayud kita mosangyaw nga wala sa ebanghelyo, o mobiya niini aron mosangyaw og butang nga lahi sa atong katungdanan; o sa pagpakiglalis nga walay hinungdan; ang matag kahoy maila pinaagi sa iyang bunga; kon matinud-anon kita sa Ginoo, padayon sa maalamon ug mabuot nga dalan, ang maayong bunga sigurado nga mosunod sa atong mga paningkamot.²⁰

Mao gyud unta kini ang tumong sa tanang miyembro sa Simbahan sa pagpadayon gayud sa ilang mga kinabuhi ginamit ang mga baruganan sa Ebanghelyo. Walay laing paagi nga atong makombinser ang kalibutan sa kamatuoran gawas sa pagpakita sa atong mga buhat ug pagpakigsandurot sa usag usa ug sa katawhan nga makatuboy kanato. Atong giangkon ang dagkong espirituhanong mga butang, ug kinahanglan nga dunay taas nga sumbanan sa kaputli sa kinabuhi aron sa pagtubag uban niining espirituhanong mga butang.²¹

Ang Espiritu Santo mohatag og giya niadtong kinsa mopakigbahin sa ebanghelyo ug niadtong modawat niini.

Ang tanang sekreto sa atong kalampusan kon ang pagkabig ang hisgutan, mao nga kita nagsangyaw sa mao gihapon nga ebanghelyo sama kasayon ug kayano sa pagsangyaw ni Jesus niini, ug nga ang Espiritu Santo magpabilin niadtong modawat niini, magmaya diha sa ilang mga kasingkasing ug dili matukib nga kalipay, ug sila nagkahiusa; ug dayon sila sa ilang kaugalingon makahibalo sa doktrina kon kini gikan ba sa Dios o sa tawo.²²

Giunsa niining gatusan ug liboan ka mga Elder sa Israel … pagadto sa layong dapit, … ug misangyaw sa Ebanghelyo aron makabig ang mga anak ni Adan? Nahimo kini tungod sa gahum sa Dios. Walay Elder niini nga Simbahan ang adunay gahum sa pagsangyaw ug pagbuhat sa kabubut-on sa Dios [gawas] lang pinaagi sa gahum sa Dios. Kon duna man kitay gahum, kini gikan sa Dios, ug kinahanglang isalig nato kaniya ang tanang mga butang.²³

Kon siya nga adunay awtoridad sa pagsangyaw sa ebanghelyo, mosaad siya, pinaagi sa pangalan ni Jesukristo, ngadto sa tanan nga motuo ug mosunod, nga ang Espiritu Santo ihatag kanila. Pinaagi sa kaligdong niini nga saad, ang tanang mga tawo makahibalo sa ilang mga kaugalingon, kon kini iya ba sa Dios, o kon kini iya ba sa tawo. Kon ang walay awtoridad nga tawo mosangyaw, magpakaaron- ingnon nga nagsangyaw niining sama nga ebanghelyo, bisan unsa pa siya ka maalamon ug ka hanas, ang iyang doktrina mailhan, tungod sa mga saad nga madawat unta sa mga tumutuo pero wala mahitabo, ang Espiritu Santo nga maoy naghatag og mga gasa [wala madawat], ug tungod niini ang pagkabakak sa mga doktrina sa mga tawo mahibaloan, mao nga kinahanglang walay magpailad.²⁴

Gawas nga mag-uban ang Espiritu Santo kaninyo inig sangyaw ninyo sa Ebanghelyo, dili kamo makahimo sa inyong katungdanan; pero kon anaa kaninyo ang Espiritu Santo luwas kamo, bisan asa kamo moadto, ang inyong mga pulong modulot diha sa mga kasingkasing sa matinuoron ug maaghup sa yuta.²⁵

Walay kalainan kon pila may edad sa tawo nga mosangyaw sa ebanghelyo, ma-baynte singko, nubenta, o lima ka gatus ka tuig ang edad, kon nadasig lang siya sa Espiritu ug sa gahum sa Dios.²⁶

Hinaut nga ang Ginoo magauban kanato ug moandam sa agianan ug motabang kanato nga matandog ang kasingkasing sa mga tawo, aron ang maayo mabuhat ug ang gingharian sa Dios magpadayon.²⁷

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Ribyuha ang asoy ni Elder Wilford Woodruff nga miadto sa panimalay ni John Benbow (mga pahina 97–99). Sa unsa nga mga paagi nga gidala si Elder Woodruff ngadto sa uma ni Benbow? Samtang ikaw magbasa niini nga asoy, unsay imong nakat-unan gikan sa ehemplo ni William Benbow?
Sa mga pahina 99–100, pangitaa ang pulong o mga pulong nga nagpakita kon unsay gibati ni William Benbow ug Wilford Woodruff sa dihang ang ilang pamilya midawat sa ebanghelyo. Unsay inyong gibati sa dihang ang minahal miapil sa Simbahan o mibalik sa pagkaaktibo sa Simbahan?
Ribyuha ang mga pulong ni Presidente Woodruff mahitungod sa atong responsibilidad sa pagpakigbahin sa ebanghelyo (mga pahina 100–102). Sa pagkatinuod, unsay atong mahimo aron sa pagpakigbahin sa ebanghelyo ngadto sa mga miyembro sa pamilya ug mga higala? Sa unsang paagi nga atong matabangan ang full-time nga mga misyonaryo niini nga paningkamot?
Sa unsang mga paagi nga atong matuman ang atong responsibilidad sa pagtudlo sa ebanghelyo “ngadto sa tanang mga kanasuran sa yuta”? (pahina 102–103).
Ngano man nga kita usahay magpanagana sa pagpakigbahin sa ebanghelyo? Sa unsang paagi nato mabuntog ang atong kahadlok?
Ngano nga ang misyonaryo nga buhat usa ka malipayon nga kasinatian? (Tan-awa sa pahina 103–104.) Unsay imong mga kasinatian diin imong gibati ang kalipay sa pagpakigbahin sa ebanghelyo?
Nganong importante nga likayan ang pagpanaway sa relihiyon sa uban? (Tan-awa sa pahina 104–105.) Sa unsang paagi kita makapamatuod sa pagkatinuod sa Simbahan nga dili manaway sa laing mga simbahan?
Ribyuha ang katapusang paragrap sa pahina 105. Sa unsang paagi nga ang atong mga aksyon makaimpluwensya sa mga opinyon sa mga tawo kabahin sa Simbahan.?
Samtang ikaw magbasa sa mga pulong ni Presidente Woodruff mahitungod sa Espiritu Santo ug misyonaryo nga pag-alagad, unsay imong nakat-unan? (Tan-awa sa mga pahina 106–107.) Unsay angay natong buhaton aron mahimong takus sa pagpakig-uban sa Espiritu?

May Kalabutan nga mga Kasulatan:Mateo 28:19–20; D&P 4; 18:10–16; 42:11–14; 50:13–22; 60:2–3; 84:88; 88:81

farm of John Benbow — Ang umahan ni John Benbow. Pinaagi sa makugihong pagtuon sa Biblia, si John Benbow ug ang iyang pamilya ug mga higala nakaandam sa ilang mga kaugalingon sa pagdawat sa gipahiuli nga ebanghelyo.

visiting neighbors — Kon sinsero natong amumahan ang atong pakighigala sa uban, ang Ginoo mohatag og mga oportunidad kanato sa pagpakigbahin sa ebanghelyo.

missionary couple praying together — Samtang maningkamot kita sa pagpakigbahin sa ebanghelyo, kinahanglang atong pangitaon ang giya sa Espiritu Santo.