Hugna 5

Ang Espiritu Santo ug Personal nga Pagpadayag

Sumala sa atong pagkamatinud-anon, atong madawat ang pagpakig-uban sa Espiritu Santo sa paglamdag ug sa paggiya kanato sa atong mga kinabuhi ug sa pagtultol kanato sa kinabuhing dayon.

Gikan sa Kinabuhi ni Wilford Woodruff

Niadtong Oktubre 1880, si Presidente Wilford Woodruff misulti sa mga Santos nga bag-o lang siyang gibisitahan ni Presidente Brigham Young, kinsa namatay niadtong 1877, ug ni Presidente Heber C. Kimball, kinsa namatay niadtong 1868. “Sa dihang miabut na kami sa among destinasyon,” misaysay pag-usab si Presidente Woodruff, “akong gipangutana si Presidente Young kon mosangyaw ba siya kanamo. Miingon siya, ‘Dili, nahuman na nako ang akong pagpamatuod dinhi sa yuta. Dili na ako makigsulti niining mga tawhana.’ ‘Pero,’ miingon siya, ‘mianhi ako aron makigkita kanimo; mianhi ako aron sa pagtabang kanimo, ug tan-awon kon unsay gibuhat sa mga tawo.’ Dayon, siya miingon, ‘Gusto ko nga tudloan nimo ang mga tawo—ug gusto ko nga ikaw mismo kinahangalan mosunod niini nga tambag—kinahanglan silang maningkamot ug magpakabuhi aron makaangkon sa Balaang Espiritu, kay kon wala kini dili kamo makapalambo sa gingharian; kay kon wala ang Espiritu sa Dios kamo anaa sa kapeligro nga maglakaw sa kangitngit, ug sa pagkapakyas sa pagtuman sa inyong calling isip mga apostoles ug mga elder sa simbahan ug gingharian sa Dios.’”¹

Kini nga tambag dili bag-o kang Presidente Woodruff. Ang iyang kaigsoonan nakaila kaniya nga “tawo nga sensitibo sa mga impresyon sa Espiritu sa Ginoo, usa ka tawo nga gigiyahan pinaagi sa inspirasyon sa paghimo sa iyang katungdanan, mas labaw pa kay sa bisan unsang gasa sa kaalam o sa paghukom nga anaa kaniya mismo.”² Kanunay niyang hisgutan ang kasinatian uban sa mga impresyon sa Espiritu. Nahitabo kini sa dihang siya ug ang iyang pamilya mibiyahe ngadto sa silangang Estados Unidos, diin siya gitawag nga moserbisyo og misyon. Miingon siya:

“Akong gipahimutang ang akong karwahe usa ka gabii niana sa nataran ni Brother Williams [usa ka lokal nga miyembro sa Simbahan]. Si Brother Orson Hyde [sa Korum sa Napulog Duha ka mga Apsotoles] mipahimutang sa iyang karwahe tupad sa akoa. Diha ang akong asawa ug mga anak sa karwahe. Human nako mahipos ang akong mga kabayo ug nakapanihapon, natulog ako didto sa karwahe. Bag-ohay pa lang kaayo akong miabut sa dihang ang Espiritu miingon ngari kanako. ‘Bangon ug ibalhin ang karwahe.’ Akong giingnan ang akong asawa nga kinahanglang mobangon ako ug ibalhin ang karwahe. Siya miingon, ‘alang sa unsa?’ ako miingon, ‘wala ako makahibalo.’ Mao ra kadto ang tanan niyang gipangutana sa mao nga higayon; sa dihang gisultihan nako siya nga wala ako makahibalo, igo na kadto. Mibangon ako ug gibalhin ang karwahe. … Gianinaw dayon nako ang palibut ug mihigda. Ang mao gihapon nga Espiritu miingon, ‘Lakaw ug balhina ang imong mga hayop gikan sa kahoy nga tugas.’ … Miadto ako ug gibalhin ang akong mga kabayo ug gibutang sila sa gamay nga kahoy. Mibalik ako sa higdaanan.

“Human sa traynta minutos usa ka alimpulos miabut ug mibali sa kahoy nga tugas mga duha ka pye gikan sa punoan. Miguba kini og tulo o upat ka mga koral ug kini nahagba eksakto sa nataran, duol sa karwahe ni Brother Orson Hyde, ug diha gayud sa dapit diin mahimutang ang akong karwahe. Unsa kaha unta ang sangputanan kon wala pa ako maminaw niadto nga Espiritu? Sa walay duhaduha ako ug ang akong asawa ug mga anak nangamatay unta. Mao kadto ang hinay, hinagawhaw nga tingog ngari kanako—dili linog, dili dugdug, dili kilat, pero hinay, hinagawhaw nga tingog sa Espiritu sa Dios. Nakaluwas kini sa akong kinabuhi. Mao kini ang espiritu sa pagpadayag ngari kanako.”³

Si Presidente Woodruff mihatag og gibug-aton sa panginahanglan alang sa tanang mga miyembro sa Simbahan nga magiyahan sa Espiritu Santo—sa pagtinguha og personal nga pagpadayag. Mipahayag siya, “Ang Simbahan sa Dios dili molungtad og baynte kwatro oras kon walay pagpadayag.”⁴

Mga Pagtulun-an ni Wilford Woodruff

Ang Espiritu Santo usa ka personahe sa espiritu kinsa nagsaksi sa Dios nga Amahan, ni Jesukristo, ug sa pagkatinuod sa ebanghelyo.

Ang Espiritu Santo usa sa mga personahe sa Dios nga Kapangulohan [Godhead]. Ang Dios nga Amahan ug ang Dios nga Anak adunay mga tabernakulo [mga lawas nga unod ug bukog], ug ang Dios mismo milalang sa tawo sunod sa Iyang kaugalingong hitsura; pero ang Espiritu Santo usa ka personahe sa Espiritu, nga nagsaksi sa Amahan ug sa Anak ngadto sa mga anak sa mga tawo [tan-awa sa D&P 130:22].⁵

Unsa ang pinakalig-on nga pagpamatuod nga maangkon ni bisan kinsang lalaki ug babaye nga kini mao ang buhat sa Dios? Sultihan ko kamo unsa ang akong pinakalig-on nga pagpamatuod sukad nga akong naangkon, ang labing siguro nga pagpamatuod, mao kana ang pagpamatuod sa Espiritu Santo, ang pagpamatuod sa Amahan ug sa Anak.⁶

Ang atong mga mata ug mga dunggan mahimong mailad pinaagi sa maliputon ug pangilad sa tawo; pero ang Espiritu Santo dili gayud mangilad ni bisan kinsa.⁷

Ang mga kasulatan nagsulti nato nga adunay espiritu sa tawo ug nga ang inspirasyon sa Makagagahum mihatag niini og panabut [tan-awa sa Job 32:8]. Ania niini nga baruganan nga kita mahimong makahibalo sa kamatuoran, ug sa gahum sa ebanghelyo nga atong nadawat. Ang mga baruganan sa kinabuhing dayon gipakita ngari kanato pinaagi sa inspirasyon sa Espiritu Santo, kay kana nga Espiritu ania kanato, moimpluwensya kini sa atong mga hunahuna, ug kon kita maminaw niadtong mga pagtulun-an, nga mobati og maanindot nga pagbati, klarong masabtan nato ang mga butang.⁸

Ang matag usa ka matinud-anong Santos sa Ulahing mga Adlaw makadawat sa gasa sa Espiritu Santo, nga mao ang pinaka importante nga gasa nga madawat ni bisan kinsa niining mortalidad.

Ang matag tawo nga naghinulsol sa iyang mga sala, ug nabunyagan alang sa kapasayloan, sunod sa kapunongan sa Dios ug adunay pagkahisama ni Jesukristo, kinsa gipaunlod diha sa tubig sa kamatayon nga sama kaniya, ug mobangon diha sa pagkabanhaw nga sama kaniya, adunay katungod sa Balaan nga Espiritu; gisaad kini, ug kini iyaha; katungod sa tanang mga tawo nga makatagamtan niini, ug kon sila makadawat sa Espiritu Santo ug sa [Iyang] mga gasa sila adunay inspirasyon, kahayag ug kamatuoran; duna silay mga mata nga makakita, mga dunggan nga makadungog ug mga kasingkasing nga makasabut.⁹

Karon, kon anaa kanimo ang Espiritu Santo uban kanimo—ug ang tanan kinahanglan nga aduna—ingnon nako ikaw nga walay laing mas importante nga gasa, walay mas importante nga panalangin, walay laing mas importante nga pagpamatuod nga gihatag ngadto ni bisan kinsang tawo sa yuta. Makasinati tingali kamo og pagpangalagad sa mga anghel; makakita tingali kamo og daghang mga milagro; makakita tingali kamo og daghang mga kahibulongan sa yuta; pero moingon ako nga ang gasa sa Espiritu Santo mao ang pinakaimportante nga gasa nga ikatugyan diha sa tawo. Pinaagi niini nga gahum nga kita makapahigayon nianang ania kanato. Mao kini ang makapalahutay nato sa tanang mga pagpanggukod, mga pagsulay ug mga kalisdanan nga moabut kanato.¹⁰

Ang matag lalaki ug babaye nga nagpasakop sa simbahan sa Dios ug nabunyagan alang sa kapasayloan sa mga sala adunay katungod sa pagpadayag, may katungod sa Espiritu sa Dios, sa pagtabang kanila sa ilang mga paningkamot, sa pagtudlo sa ilang mga anak, sa pagtambag sa ilang mga anak ug niadtong gitawag nga maoy magdumala. Ang Espiritu Santo dili lang para sa mga lalaki, ni sa mga apostoles o sa mga propeta; alang kini sa tanang matinud-anong lalaki ug babaye, ug ngadto sa tanang bata kinsa adunay igong pangidaron nga modawat sa ebanghelyo ni Kristo.¹¹

Kinahanglan natong sination ang atong mga kaugalingon sa hinay, hinagawhaw nga tingog sa Espiritu Santo—ang tingog sa pagpadayag.

Adunay gitakda nga paagi … diin ang pagpadayag gikan sa Ginoo alang sa panggobyerno sa iyang simbahan madawat. Adunay usa lamang ka tawo sa yuta, matag panahon, nga naghupot niini nga gahum. Pero ang matag indibidwal nga miyembro adunay pribilihiyo sa pagdawat og pagpadayag gikan sa Ginoo alang sa iyang kaugalingong mga kalihokan, ug mopamatuod ngadto kaniya mahitungod sa pagkasakto sa mga pagtulun-an nga pangpubliko ug mga kalihokan.¹²

Unsa ang pagpadayag? Inspirasyon kini sa Espiritu Santo ngadto sa tawo. Si Joseph Smith miingon ngadto ni Brother John Taylor sa iyang panahon: “Brother Taylor, bantayi ang mga timailhan sa Espiritu sa Dios; bantayi ang mga hunghung sa Espiritu kanimo; buhata kini sa imong kinabuhi, ug [kini] mahimong usa ka baruganan sa pagpadayag diha kanimo, ug ikaw makahibalo ug makasabut niini nga Espiritu ug gahum.” Mao kini ang yawe, ang pundasyon nga bato sa tanang pagpadayag. … Sa akong kaugalingong kasinatian naningkamot ako nga makasinati niana nga Espiritu, ug magkat-on sa iyang mga pamaagi.¹³

Pila man kaninyo ang nakadawat og pagpadayag? Pila man kaninyo ang gihunghungan sa Espiritu sa Dios—ang hinay hinagawhaw nga tingog? … Daghan na ako og pagpamatuod sukad nga ako nahisakop niini nga Simbahan ug gingharian. Gipanalanginan ako sa makadaghan og mga gasa ug mga grasya, mga pagpadayag ug mga pagpangalagad; pero niining tanan wala gayud nako makita ang bisan unsa nga masaligan nako pagayo kay sa hinay hinagawhaw nga tingog sa Espiritu Santo.¹⁴

Ang tawo gusto nga motan-aw og taas o magpaabut og dagko nga mga butang mao nga ilang masaypan ang Espiritu sa Dios ug ang inspirasyon sa Makagagahum. Dili nato pangitaon sa dalugdug o sa alimpulos ang Espiritu sa Dios pero sa hinay hinagawhaw nga tingog [tan-awa sa 1 Mga Hari 19:11–12].¹⁵

Pinaagi sa gasa sa Espiritu Santo, makadawat kita og mga panalangin nga moggiya sa atong mga kinabuhi karon ug sa pag-andam kanato alang sa kinabuhing dayon.

Mahimong imong hatagan si bisan kinsang lalaki o babaye sa tanang bahandi ug himaya kutob sa mahanduraw sa tawo nga maangkon, ug natagbaw ba sila? Wala. Duna gihapoy kulang sa ilang kinabuhi. Sa laing bahin, pakit-a ako og usa ka makililimos diha sa dalan, nga adunay Espiritu Santo, kansang hunahuna napuno niana nga Espiritu ug gahum, ug pakit-on ko kamo og usa ka tawo nga adunay kalinaw sa hunahuna, kinsa adunay tinuod nga mga katigayunan, ug ang katagbawan dili maangkon ni bisan kinsang tawo gikan sa laing tinubdan [source].¹⁶

Kon nakatagamtam kita sa Balaang Espiritu, kon naningkamot kita sa pagsunod sa atong relihiyon dinhi sa yuta, kita ang labing malipayon nga mga tawo dinhi sa yuta, bisag unsa pa ang atong mga kahimtang. Dili nako igsapayan madato man kita o mapobre, anaa ba sa kalipay o kasakit, kon ang tawo nagsunod sa iyang relihiyon ug nakatagamtan sa kahimuot ug Espiritu sa Dios, walay angay kabalak-an alang kaniya unsay mahitabo sa yuta. Mahimong dunay mga linog, gubat o sunog o kagubot sa yuta, pero iyang gibati nga maayo ra ang tanan alang kaniya. Mao kana ang akong gibati.¹⁷

Ang matag tawo nga makadawat niana nga Espiritu adunay maghuhupay nga uban kaniya—usa ka lider nga modiktar ug mogiya kaniya. Kini nga Espiritu mopadayag, adlaw adlaw, ngadto sa tanan nga adunay hugot nga pagtuo, sa mga butang alang sa iyang kaayohan. … Kini ang inspirasyon sa Dios ngadto sa iyang mga anak sa tanang panahon sa kalibutan nga mao ang usa sa gikinahanglan nga mga gasa aron sa pagpatunhay sa tawo ug makahimo kaniya sa paglakaw pinaagi sa pagtuo, ug magpadayon ug magsunod sa tanang mga pagdiktar ug mga kasugoan ug mga pagpadayag nga gihatag sa Dios sa Iyang mga anak sa paggiya ug pag-agak kanila sa kinabuhi.¹⁸

Ang tanang tawo kinahanglan nga makaangkon sa Espiritu sa Ginoo, ug dayon mosunod sa iyang direksyon. Pagpadayag kini. Walay kalainan kon unsa may isulti sa Espiritu nga inyong buhaton; dili gayud kini mosulti kaninyo sa pagbuhat og butang nga dili maayo.¹⁹

Gilibutan kita … sa dautang mga espiritu nga nakiggubat batok sa Dios ug batok sa tanan nga naningkamot sa paglig-on sa gingharian sa Dios; ug nagkinahanglan kita niining Balaang Espiritu aron kita makabuntog niini nga mga impluwensya. …

… Kini ang Espiritu nga atong gikinahanglan aron matuman ang mga katuyoan sa Dios dinhi sa yuta. Nagkinahanglan kita niana labaw pa kay sa bisan unsang gasa. … Kita ania taliwala sa mga kaaway, taliwala sa kangitngit ug tintasyon, ug kinahanglan nga giyahan kita sa Espiritu sa Dios. Kinahanglang mag-ampo kita ngad-to sa Ginoo hangtud nga atong maangkon ang Maghuhupay. Mao kini ang gisaad ngari kanato sa dihang gibunyagan kita. Mao kini ang espiritu sa kahayag, sa kamatuoran, ug sa pagpadayag, ug makig-uban natong tanan sa samang higayon.²⁰

Inyong makita nga kon mohimo kitag butang nga lahi ra kay sa pagsunod sa mga direksyon sa Espiritu Santo, makasum-ok kita ngadto sa gabon ug ngadto sa kangitngit ug kasamok, ug mawadan kita sa direksyon. Kada adlaw sa atong pagpakabuhi nagkinahanglan kita sa gahum sa Ginoo—sa gahum sa iyang Balaan nga Espiritu ug sa kusog sa priesthood nga magauban kanato aron masayud kita unsay buhaton. Ug kon kita magbinuotan atubangan sa Ginoo, ang Espiritu mopadayag ngari kanato kada adlaw unsa ang atong mga katungdanan; wala akoy labot unsay atong mga trabaho, kinahanglan unahon nato ang kabubut-on sa Ginoo ug dayon buhaton kini, ug dayon ang atong buluhaton may kahumanan ug dawaton sa Ginoo.²¹

Sa akong tibuok kinabuhi ug mga paningkamot, bisan unsa ang ipabuhat sa Espiritu sa Ginoo kanako, pirme nakong makaplagan nga maayo ang pagsunod niini. Gipreserbar ako pinaagi niana nga gahum. … Paningkamuti nga inyong maangkon ang espiritu sa pagpadayag. Ug kon inyo kining maangkon maluwas kamo, ug buhaton gayud ninyo unsay gusto sa Ginoo nga inyong buhaton.²²

Ang paghunahuna nga kita makasunod ug mabalaan [sanctified] pinaagi sa ebanghelyo, ug makaandam sa pagpanunod sa kinabuhing dayon, mao ang usa sa labing mahimayaong mga baruganan nga gipadayag ngadto sa tawo. … Aduna kitay paglaum nga wala mahibaloi sa kalibutan, kana nga paglaum dili makasulod sa ilang mga hunahuna. Gawas kon sila gipakatawo sa Espiritu sa Dios dili gani sila makakita sa gingharian sa Dios, ug dili sila makasulod ngadto niini gawas kon sila natawo sa tubig ug sa Espiritu [tan-awa sa Juan 3:5], sa ingon dili sila makaambit sa mahimayaong panglantaw ug paglaum nga atong naangkon. Ang ilang mga mata, mga dunggan ug mga kasingkasing dili makakita ug dili makadungog ug dili mobati sa gahum sa ebanghelyo ni Kristo.²³

Atong pribilihiyo ang pagsunod sa mga direksyon sa Espiritu sa Ginoo, ug sa pagbaton niini isip atong giya ug kauban, ug pinaagi sa paghimo niini ang mga panalangin sa kalangitan moabut dayon kon unsa kita ka andam sa pagdawat niini.²⁴

Ang kanunay nga pagpakig-uban sa Espiritu nanginahanglan sa atong kanunay nga paningkamot ug pagkamatinud-anon.

Akong tinguha … nga kita isip katawhan mobuhat sa atong katungdanan, magsunod sa atong relihiyon, magbaton og pagtuo, magbinuotan atubangan sa Ginoo aron ang Espiritu Santo mahimo natong kauban kanunay nga mogiya kanato sa mga adlaw nga umaabut. Mao kini ang akong pag-ampo ug akong tinguha.²⁵

Nasayud ako nga nagkinahanglan kini og kanunay nga pakigbisog, paningkamot ug pagkamatinud-anon sa atubangan sa Ginoo aron kita magpabilin sa pakigdait sa Balaan nga Espiritu, ug magpuyo sa paagi aron atong maangkon kining mga panalangin.²⁶

Wala kitay lain angay nga paningkamutan nga angkunon samtang buhi pa kay sa Espiritu sa Dios, ang Espiritu Santo, ang Maghuhupay, diin kita adunay katungod sa pagdawat bugti sa atong pagsunod sa mga gikinahanglan sa ebanghelyo.²⁷

Ang pinakaimportanting saad nga nag-uban sa pagsangyaw sa Ebanghelyo, ingon nga gipadayag gikan sa langit sa atong panahon, mao nga ang Espiritu Santo itugyan diha sa mahinulsulon kinsa nagsunod sa balaang mga ordinansa niini. Pinaagi sa Espiritu Santo ang kahibalo sa mga butang nga nangagi, karon ug sa umaabut gipahibalo ug ang hunahuna ug kabubut-on sa Amahan ipahibalo. Niining paagiha ang Makagagahum mopadayag sa Iyang mga katuyoan niadtong mosunod sa Iyang mga kasugoan ug kansang kinabuhi putli ug angayan nga Iyang dawaton, aron sila makaandam alang sa tanang mga hitabo ug mga pagsulay nga anaa sa ilang agianan.

Kon aduna may mga miyembro sa Simbahan nga wala makahibalo pinaagi sa ilang kaugalingong kasinatian nga kini tinuod, kini nasiguro nga sila wala magpakabana sa ilang mga pribilihiyo. Ang tanang mga Santos kinahanglan nga adunay pagpakig-ambit sa Espiritu Santo, ug, pinaagi niini, ngadto usab sa Amahan, o tingali peligro nga sila mabuntog sa dautan ug mahisalaag.

Busa, kami, moingon ngadto sa mga Santos sa Ulahing mga Adlaw: ang Espiritu Santo dili mopuyo sa dili balaan nga tabernakulo. Kon kamo gustong makatagamtam sa hingpit nga gahum ug mga gasa sa inyong relihiyon, kamo kinahanglan gayud nga putli. Kon kamo sad-an sa mga kahuyang, mga kabuang ug mga sala, kinahanglang maghinulsol kamo niini; mao kana, kinahanglan nga inyo kining biyaan. Walay laing paagi nga kita makapahimuot sa Dios. “Tawo sa pagkabalaan” mao ang Iyang pangalan [tan-awa sa Moises 6:57], ug mahimuot Siya sa mga paningkamot sa Iyang mga anak nga buot mahimong putli.²⁸

Kon wala kitay nadawat nga pagpadayag, tungod kini kay kita wala magpuyo sa unsay sakto, tungod kay wala kita mopalambo sa atong balaan nga tawag [calling] sa priesthood nga mao untay angay natong buhaton; kon naghimo kita aduna gayud kitay pagpadayag, walay usa nga dili makadawat.²⁹

Likayan nato ang tanang dautang mga binuhatan, ang tanang kinaiya nga makapugong sa pagpakig-uban sa Dios. … Kon kining gagmayng mga butang adunay kalagmitan nga makapugong sa atong pagtagamtam ug makapaubos sa atong kahimtang sa mga mata sa Ginoo, kinahanglan nga ato kining isalikway ug ipakita ang determinasyon nga buhaton ang kabubut-on sa atong Amahan sa Langit, ug sa pagtuman niana nga buluhaton nga gihatag ngari kanato. … Kon mobuhat ako og butang nga makapugong nako sa pagtagamtam sa Espiritu sa Ginoo, dihadiha dayon, kini akong likayan.³⁰

Naningkamot kita sa pagsunod sa celestial nga balaod sa Dios; nagsangyaw kita sa ebanghelyo ni Jesukristo ug naningkamot sa pagpadayon sa mga baruganan niini. Karon ang pangutana, makakuha ba kitag kaayohan niini? Mapuslan ba ang pagkamatinudanon? Mapuslan ba nga moagi sa mga pagsulay o mga kasakit, o pagpanggukod, o bisan kamatayon, alang sa gingharian sa Dios, alang sa kaluwasan ug kinabuhing dayon, nga maoy pinakadako sa tanang mga gasa nga ikahatag sa Dios sa mga anak sa tawo? Moingon ako nga kini mapuslan, ug nanghinaut ako nga ang mga Santos sa Ulahing mga Adlaw, nga ang tanang mga lalaki nga dunay awtoridad—nga kitang tanan magmatinud-anon sa atubangan sa Dios, nga atong hinumduman ang pag-ampo, maningkamot alang sa Espiritu Santo, maningkamot nga masayud sa hunahuna ug kabubut-on sa Dios, nga kita makahibalo sa dalan nga pagalaktan, nga kita makabaton sa Espiritu sa Ginoo ug sa Espiritu Santo, ug nga kita makabuntog sa kalibutan ug mopalambo sa atong calling hangtud nga kita makalatas niini nga pagsulay.³¹

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsay imong nakat-unan gikan sa mga istorya nga naa sa mga pahina 51–52?
Samtang magtuon ikaw niini nga hugna, unsay imong nakat-unan mahitungod sa Espiritu Santo ug sa Iyang mga tahas?
Ribyuha ang ikaduhang tibuok paragrap sa pahina 53–54. Nganong atong giisip ang gasa sa Espiritu Santo nga “ang pinakaimportante nga gasa” nga atong madawat sa pagkamortal? Ribyuha ang katapusang paragrap sa hugna, sa mga pahina 59–60. Sa unsang paagi nga ang gasa sa Espiritu Santo nag-andam nato alang sa kinabuhing dayon, “nga mao ang pinakaimportante sa tanang mga gasa”?
Sa unsang paagi nga ang mga pagtulun-an ni Presidente Woodruff makatabang kanato sa pag-ila sa mga pag-aghat sa Espiritu Santo? (Tan-awa sa mga pahina 52, 55; tan-awa usab sa D&P 6:15, 22–23; 11:12–14]). Nganong importante man nga hinumduman nga ang Espiritu Santo sa kasagaran makigsulti sa “hinay hinagawhaw nga tingog”?
Basaha ang paragrap nga nagsugod sa kinaubsan sa pahina 55–56. Unsa ang pipila sa “tinuod nga mga katigayunan” nga atong madawat kon kita makabaton sa Espiritu Santo? (Tan-awa sa mga pahina 55–58.)
Paghunahuna og kasinatian sa dihang gigiyahan ikaw sa Espiritu Santo. Sa unsang mga paagi nga ikaw napanalanginan pinaagi sa pagpakig-uban sa Espiritu Santo?
Ribyuha ang katapusang seksyon sa hugna (mga pahina 58–60). Nganong gikinahanglan ang padayon nga paningkamot aron makadawat sa kanunay nga pagpakig-uban sa Espiritu Santo? Unsay makapugong kanato nga mobati sa impluwensya sa Espiritu Santo? Unsay makatabang nato nga mobati sa impluwensya sa Espiritu Santo?

May Kalabutan nga mga Kasulatan: Juan 14:26; 15:26; 16:13; 1 Mga Taga-Corinto 2:9–14; 1 Nephi 10:17–19; 2 Nephi 32:1–5; Moroni 10:5; D&P 8:2–3; 14:7

gift of the Holy Ghost — Ang gasa sa Espiritu Santo ikahatag “ngadto sa tanang matinud-anon nga lalaki ug babaye, ug ngadto sa tanang bata nga may igo nang pangidaron sa pagdawat sa ebanghelyo ni Kristo.”

two men conversing — Takus nga mga Santos sa Ulahing mga Adlaw makadawat sa Espiritu Santo “sa pagtabang kanila sa ilang mga paningkamot, sa pagtudlo sa ilang mga anak, sa pagtambag sa ilang mga anak ug niadtong gitawag nga maoy magdumala.”