Hugna 10

Mapainubsanong Pagsalig sa Dios

Ang tinuod nga gahum nagagikan sa mapainubsanong pagsalig sa Dios.

Gikan sa Kinabuhi ni Wilford Woodruff

“Ang bugtong nakapatingala sa akong tibuok kinabuhi,” miingon si Presidente Wilford Woodruff, “mao nga ang Ginoo mipili kanako, ilabi na nga mahimong usa ka Apostol ug usa ka Presidente. Pero kana Iyang kaugalingong katungod; dili akoa.”¹

Bisan og si Presidente Woodruff natingala sa iyang katungdanan niini nga Simbahan, nasayud siya ngano nga ang Ginoo mitawag kaniya. Nakaobserbar siya: “Ngano nga ang Ginoo mipili og usa ka huyang nga tawo sama kanako nga modumala sa Iyang Simbahan? Nganong Iyang gipili si Joseph Smith––nga walay kinaadman nga batan-on, nga maoy tawag kaniya? Nganong Iyang gipili kanang grupoha sa mga tawo? Tungod kay makasalig Siya kanila. Mipili siyag mga tawo nga moila sa gahum sa Dios.”²

Si Presidente Woodruff miila kanunay sa gahum sa Dios, sa personal nga mga kalampusan ug sa pag-uswag sa Simbahan. Sa usa ka pakigpulong nga iyang gihimo didto sa Salt Lake Tabernacle, miingon siya: “Nagpasalamat ako sa Ginoo sa akong kinabuhi. Nagpasalamat ako Kaniya sa Iyang mga panalangin ug mga kalooy ngari kanako. Duna akoy katarungan nga malipay niini, ug ako obligado sa paghatag sa Dios sa himaya sa tanan nakong nadawat. Kon nakahimo man ako og kaayohan; kon ako nakasangyaw sa Ebanghelyo ug sa pagpadayon diin ako nakatabang sa akong isig ka tawo, dinhi o sa layong dapit, kini tungod sa gahum sa Dios. … Kini nga gahum nag-uban kanato. Mao nga ania kita karong adlawa. Mao nga kining tabernakulo [Tabernacle] nagbarug karon, katumanan kini sa mga panagna sa mga propeta sa Dios sa karaang panahon. Mao nga ang Zion sa Dios gitukod dinhi niini nga mga “walog sa kabukiran. Nahimo kining tanan tungod sa gahum sa Dios, ug dili sa tawo.”³

Mga Pagtulun-an ni Wilford Woodruff

Nagsalig kita sa Dios alang sa tanang espirituhanon ug temporal nga mga panalangin.

Nagsalig gyud ako. Kanunay akong ingon niini sa tibuok nakong kinabuhi, ug sa akong mga biyahe ug mga panaw, sa pagsangyaw sa ebanghelyo ni Kristo ngadto sa akong isig ka tawo.⁴

Kinahanglang atong masabtan nga ang mga pamaagi sa Dios mas maayo pa kay sa atong mga pamaagi, ug nga ang Iyang mga tambag, bisan og ingon nga nagkinahanglan og sakripisyo, mao ang labing maayo kanunay ug labing luwas nga atong sundon ug gamiton. Liboan kanato makapamatuod sa kamatuoran niini gikan sa indibidwal nga kasinatian. … Kinahanglang makat-on usab kita niining importanting kamatuoran, nga ang Dios makaangkon sa tanang himaya ug dungog alang sa pagkatukod sa Iyang Simbahan ug gingharian dinhi sa yuta. Ang tawo dili makaangkon niini o sa bisan unsang panahon sa kalibutan. Walay lain gawas sa gahum sa Dios ang makahatag sa kahingpitan sa Ebanghelyo, sa pag-organisar sa Simbahan, sa pagpundok sa Iyang katawhan ngadto sa Zion sa katumanan sa pagpadayag ug pagpahigayon sa natuman nga buluhaton.⁵

Ibutang nato sa hunahuna nga ang atong kusog, ang atong paglaum ug ang atong gahum anaa sa mga kamot sa Dios, ug dili sa tawo. Ang Ginoo mismo milugway sa Iyang kamot aron pag-establisar niini nga Simbahan, Iyang gingharian, Iyang buluhaton. … Wala kitay gahum sa atong kaugalingon. Sukad masukad wala gayud kitay gahum sa paggiya ug pagdumala niini nga gingharian, gawas lamang kon magpataliwala ang Makagagahum nga Dios.⁶

Ang tinuod nga kita dunay mga katawhan, nga duna kitay Zion, nga duna kitay gingharian, nga duna kitay simbahan ug priesthood nga konektado sa kalangitan, ug adunay gahum sa pagtandog sa kalangitan, ug nasayud kita nga ang kalangitan mopahayag kanato, naggiya sa pagpahigayon niining importanting buluhaton niining ulahing mga adlaw diin maoy giatiman sa mga Santos sa Ulahing mga Adlaw, kini nga kamatuoran mao lamang ang motagbaw sa atong mga kasingkasing sa pagkamapainubsanon atubangan sa Ginoo nga atong Dios, ug kinahanglan nga kanunay magpahinumdom kanato sa atong mga pagpamalandong ug mga pagbati sa atong responsibilidad ngadto Kaniya ug ngadto sa usag usa, ug usab sa atong pagsalig kaniya sa tanang mga panalangin nga atong natagamtaman sa espirituhanon ingon man usab sa temporal nga matang.⁷

Ang akong mga pagbati ug mga panglantaw mao nga ang Ginoo wala gyuy mga katawhan gikan pa ni Amahang Adan hangtud karon nga gitawag sa pagtukod sa Iyang gingharian ug pag-establisar sa Iyang Zion sa kalibutan, o sa pagsangyaw sa ebanghelyo sa paghinulsol ngadto sa mga anak sa tawo, nga wala silay laing gisaligan kon dili ang panabang sa Dios [sa] langit alang sa ilang suporta.⁸

Nasayud ug nakasabut gayud kita sa atong padulngan, sa atong pagkabutang, ug sa atong mga panalangin nga anaa sa iyang mga kamot.⁹

Moingon ako sa katawhan—Judeo ug Hentil, dagko ug gagmay, datu ug pobre––nga ang Ginoong Makagagahum adunay gahum sa iyang kaugalingon, ug wala magsalig ni bisan kinsang tawo, sa pagpadayon sa iyang buluhaton; pero kon motawag siya og mga tawo sa paghimo sa iyang buluhaton kinahanglang mosalig sila kaniya.¹⁰

Ang Dios mipili sa mapainubsanon sa pagbuhat sa Iyang buluhaton.

Ang Ginoo mipili sa huyang nga mga tawo sa kalibutan sa paghimo sa Iyang buluhaton. Pero Siya makahimo sa pagtudlo kanako, o ni bisan kinsa sa akong mga kaigsoonan, sama sa Iyang gibuhat sa bisan unsang panahon sa kalibutan. Kanunay niyang gipili ang huyang nga mga tawo. Pananglit si Moises sa pagpangulo sa mga anak sa Israel. Si Moises miingon nga dili siya madanihon nga mosulti, ug nagtuo siya nga wala siyay mahimo. Pero ang Ginoo miingon nga mohatag siya og usa ka tigpama-ba alang kaniya. Sa dihang ang Ginoo gusto og hari alang sa Israel, iyang gipili si David, ang anak ni Jesse, nga magbalantay sa karnero. Ang tanang mga anak ni Jesse, gawas ni David, gidala ngadto sa Propeta; pero si Samuel dili modihog ni [bisan kinsa] kanila. Iyang gipangutana si Jesse kon duna pa ba siyay anak nga lalaki. Si Jesse miingon, Oo; naay gamayng batan-on nga nag-atiman sa karnero. Ang Propeta gustong makakita kaniya. Sa dihang miabut siya, si Samuel midihog kaniya nga hari sa Israel. Mao usab sa adlaw sa mga Apostoles. Kinsa sila? [Walay kaalam] nga mga mananagat. Mao usab karon. Sugod ni Joseph Smith ug hunahunaa kitang tanan. Kinsa kita? Pobre kita, huyang nga mga wati sa yuta. Pero ang Ginoo mipili kanato tungod kay nagtuo Siya nga duna Siyay mahimo kanato. Nanghinaut ako nga makahimo Siya.

Sa akong pagtuo ako ang kinadugayan nga naghupot sa pagka-Apostol kay ni bisan kinsa nga tawo sa ibabaw sa yuta niining katapusang mga adlaw. Manghambog ba ako niini o magmapasigarbuhon ug magpakahimaya tungod kay nahuptan nako ang Priesthood sa dugay nga higayon? Kon buhaton nako, usa ako ka buang nga tawo. Obligado kita nga mopasidungog sa Dios; obligado kita nga moila sa gahum sa Dios. Ang yawa naningkamot sa paglaglag kanako gikan sa akong pagkahimugso hangtud karong adlawa. Pero ang Ginoo anaa kanunay sa akong tuong kamot ug miluwas kanako. Dihay duha ka mga gahum nga nag-inilugay––ang usa molaglag kanako, ang lain moluwas kanako. Ug ania ako karon, usa ka huyang nga instrumento sa kamot sa Dios. Pero, samtang buhi ang Dios, kon Siya mosulti kanako unsa ang akong katungdanan, buhaton gyud kini nako!

… Mag-ampo ako sa Dios nga hatagan kita og kaalam, ug sa pagtabang kanato nga magpaubos, magmatinud-anon, magmaaghup ug may mapainubsanon nga kasingkasing.¹¹

Daghang higayon sa akong pagbiyahe nga ako makadungog sa mga tawo nga moingon––Nganong gipili man sa Dios si Joseph Smith, nganong iyang gipili kadtong bataa sa pagsugod niini nga dispensasyon ug mopahimutang sa pundasyon niini nga Simbahan? Nganong wala man siya mopili og bantugang tawo … ? Duna lang akoy usa ka tubag nga ikahatag sa maong pangutana, mao kini, nga ang Ginoong Makagagahum walay mahimo kanila, dili niya mahimong pugson sila sa pagpaubos magpaubos nila. Dili sila ang klase sa tawo nga gipili alang niining matanga sa buluhaton sa bisan unsang panahon sa kalibutan. Ang Ginoong Makagagahum mipili sa huyang nga mga tawo sa kalibutan. Makaagak siya kanila. Busa iyang gipili si Joseph Smith tungod kay siya huyang, ug siya adunay igo nga panabut nga makahibalo niini.¹²

Kon ang mga tawo magmapagarbuhon, sila mapukan.

Walay adlaw nga milabay, walay adlaw nga moabut, karon o sa kahangturan, nga kamo dili na magkinahanglan sa panalipod ug pag-amuma sa Dios. Gikinahanglan ninyo kini sa inyong tibuok kinabuhi. Kon ang atong mga batan-ong lalaki, o ang atong katigulangan, o ang atong mga dalaga, mobati nga sila miabut na sa punto nga wala na nila kinahanglana ang Ginoo, maamguhan unya nila nga dako kaayo silang sayop.¹³

Kon ang Presidente sa Simbahan o ang iyang mga magtatambag o ang mga apostoles o bisan kinsa nga tawo nagtuo diha sa iyang kasingkasing nga ang Dios walay mahimo kon wala siya, ug nga siya importante gayud kaayo aron mapadayon ang buluhaton sa Ginoo, peligro siya nga mapukan. Nakadungog ako ni Joseph Smith nga miingon nga si Oliver Cowdery, kinsa mao ang ikaduha nga apostol niini nga Simbahan, miingon ngadto kaniya, “Kon mobiya ako niini nga Simbahan kini mapukan.”

Si Joseph miingon, “Oliver, sulayi kana.” Gisulayan ni Oliver. Napukan siya; pero ang gingharian sa Dios wala maunsa. Nakaila ako sa ubang mga apostoles sa akong higayon ug panahon kinsa mibati nga walay mahimo ang Ginoo kon wala sila; pero ang Ginoo nagpadayon sa iyang buluhaton bisan og wala sila.¹⁴

Akong nakit-an si Oliver Cowdery ingon nga anaa kaniya ang gahum sa Dios. Wala pa gyud ko makadungog og tawo nga mas ligong mipamatuod kay kaniya kon ubos sa impluwensya sa Espiritu. Pero sa dihang mibiya siya sa gingharian sa Dios, niadtong gutloa nawala ang iyang gahum. … Gikuhaan siya sa iyang kusog, sama ni Samson nga diha sa sabakan ni Delilah. Nawala kaniya ang gahum ug pagpamatuod nga iyang naangkon, ug wala na gayud kini mabalik kaniya sa hingpit samtang buhi pa siya, bisan og namatay siya nga [usa ka miyembro sa] Simbahan.¹⁵

Ang ikatulong bahin sa mga espiritu sa langit gisalikway tungod sa ilang pagrebelde. … Anaa sila sa kada siyudad ug balangay nga gipuy-an sa mga lumulupyo sa yuta, ug ilabi na kon dunay mga Santos sa Ulahing mga Adlaw. … Nagtuo ba kamo nga kining mga yawa ania sa atong palibut nga walay himoon? Natulog ba sila? Wala ba silay angayng buhaton? Sultihan ko kamo mga kaigsoonan kinsa naghupot sa Priesthood, aduna kitay dakong gubat uban niini nga mga espiritu. Dili kita makalikay niini. Unsay ilang buhaton kaninyo? Maningkamot sila nga makahimo kita og bisan unsang butang nga dili husto. Kini nga mga yawa malipay kaayo nga ako ug ang akong mga kaigsoonan maghunahuna nga kami bantugang mga tawo, maantigo kay ni bisan kinsa; aron nga magkasumpaki kami sa usag usa, nga magtudlo kanato nga maninguha sa pagsugid sa mga sala sa atong igsoon imbis ang atong kaugalingong sala. Kinahanglang matngunan nato ang atong mga kaugalingon pagayo. Kinhanglang buhaton ko kini; kinahanglang buhaton kini sa akong mga Magtatambag ug sa mga Apostoles; kinahanglang buhaton natong tanan. … Ug kon bukas ang atong mga mata aron masabtan ang mga butang sa Dios, masabtan nato ang atong mga responsibilidad; atong masabtan ang mga gahum sa Balaan nga Priesthood ug sa relasyon nga atong gipasalig ngadto sa Dios. Kinahanglang magpaubos gayud kita sa atong mga kaugalingon sa atubangan sa Ginoo.¹⁶

Pagmapainubsanon, pagmabinantayon, pagmainampoon. Paglikay sa garbo, tingali og mapukan kamo sama sa uban.¹⁷

Kon mapainubsanon kitang mosalig sa Ginoo, Siya manalipod ug molig-on kanato.

Duha ka importanting mga hiyas … nga makahatag sa tawo og gahum sa kalangitan––kaligdong ug kaputli sa kinaiya. Ipaangkon kini sa tawo, himoa nga ang iyang kasingkasing magmatinuoron ug makanunayon, himoa nga iyang kinabuhi putli, ug, kon atong idugang ang pagkamapainubsanon, siya [mapanalipdan] batok sa daghang mga kahuyang ug makasalikway sa daghang mga tintasyon. Kitang tanan dunay mga kahuyang; ang Dios mitugot niini aron matudloan kita sa pagpaubos sa atong mga kaugalingon ug may gugma nga putli ngadto sa uban.

Walay usa nato nga hingpit samtang ania pa kita sa yuta; pero ang tawo kinsa mapainubsanong nagsalig sa Dios dili gayud mapakyas sa pagpakig-away alang sa katarung, dili gayud magduhaduha sa iyang pagdapig sa kamatuoran, ug magpadayon sa pagtuman sa iyang mga pakigsaad, maoy usa ka tawo nga angay natong daygon, ug maningkamot, nga sundon, pinaagi sa tabang sa langit.¹⁸

Gusto nakong isulti ngadto sa mga Santos sa Ulahing mga Adlaw, nga ang tanang angay buhaton mao ang pagmatinud-anon, sa pagsunod sa Iyang mga sugo, magpainubsanon, sa pagpangita Kaniya pinaagi sa pag-ampo, ug maayo ra kanato ang tanan.¹⁹

Ang Dios maga-uban niini nga katawhan. Gisugo kita sa pagpaminaw sa Iyang tingog, pagsunod sa Iyang mga kasugoan, ug pagpaubos sa atong kaugalingon sa Iyang atubangan. … Ang kakalma maoy nagpatigbabaw sa mga Mormon—nga maoy tawag kanato––katingalahan ug kahibulongan kana sa kalibutan. … Ang rason sa atong pagkakalma mao—nga ang Dios atong higala, atong magbabalaod, atong tigluwas. Kon ang Ginoo dili makahimo sa Iyang buluhaton, kita usab dili. Pero makahimo siya. Gihimo niya kini kanunay, ug buhaton kini hangtud sa katapusan. Busa ako moingon ngadto sa mga Santos, ayaw kahadlok. Salig sa Dios. Ayaw itugot nga ang inyong kasingkasing maluya. Itugot nga ang inyong mga pag-ampo mahidangat sa mga dalunggan sa Ginoo sa mga Kasundalohan [Lord of Sabaoth] sa adlaw ug gabii. Pangayoa unsay inyong gusto. Kon buhaton ninyo kana, ang Ginoo motubag sa inyong mga pag-ampo, kon ang inyong gipangayo husto. Dinha mag-agad ang atong kusog. Anaa kini sa Dios.²⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Nganong importante nga atong ilhon ang atong pagsalig [dependence] sa Dios? (Tan-awa sa mga pahina 112–13.) Sa unsang paagi nga kini nga pag-ila makaimpluwensya sa atong pag-atubang sa kinabuhi?
Kinsa ang gipasabut ni Presidente Woodruff nga “huyang nga mga tawo sa kalibutan”? (Tan-awa sa mga pahina 111, 113–14 tan-awa usab sa 1 Mga Taga-Corinto 1:25–28.) Ngano nga ang Ginoo mipili man sa maong mga tawo sa pagtuman sa buluhaton? Kanus-a kamo nakakita nga ang Ginoo migamit sa “huyang nga mga tawo sa kalibutan”?
Basaha ang tibuok nga ikatulo nga paragraph sa pahina 114, ug palandunga o hisguti kon unsay mahitabo sa inyong kinabuhi kon wala ang panalipod ug pag-amuma sa Dios. Unsa ang natudlo niini kaninyo mahitungod sa garbo? Unsa pa ang ubang mga resulta sa garbo?
Unsa ang atong makat-unan gikan sa istorya mahitungod ni Oliver Cowdery sa mga pahina 114–15?
Basaha ang tanan nga tibuok ikaduhang paragrap sa pahina 115. Ngano nga si Satanas ug ang iyang mga ginasakupan gusto nga “kita maghunahuna nga bantugan kita [ug] maalamon kay sa uban”? Ngano nga gusto nila nga atong “ipanabi ang mga sala sa uban kay sa ang atong kaugalingong mga sala”? Unsaon nato pagbuntog kini nga mga tintasyon?
Ribyuha ang katapusang upat ka mga paragrap sa hugna, ilista ang pulong o mga pulong nga may kahulugan nganha kaninyo (tan-awa sa mga pahina 115–16). Unsa nga mga panalangin ang atong madawat kon mosalig kita sa Ginoo?

May Kalabutan nga mga Kasulatan: Proverbio 3:5–7; Lucas 18:9–14; Jacob 2:13–21; Alma 36:3; Helaman 3:35; D&P 112:10; 121:34–40

President Wilford Woodruff — Si Presidente Wilford Woodruff miingon: “Obligado ako nga ihatag ang himaya ngadto sa Dios sa tanan nakong nadawat. Kon nakahimo man ako og kaayohan … kini tungod sa gahum sa Dios.”