Pasiuna

Ang Unang Kapangulohan ug ang Korum sa Napulog Duha ka mga Apostoles miestablisar sa han-ay sa Mga Pagtulun-an sa mga Presidente sa Simbahan aron sa pagtabang kanato nga madugangan ang atong nasabtan sa gipahiuli nga ebanghelyo ug makapaduol ngadto sa Ginoo pinaagi sa mga pagtulun-an sa mga propeta sa ulahing mga adlaw. Samtang ang Simbahan magdugang og mga libro sa niini nga han-ay, makakolekta ikaw og mga libro sa pakisayran [reference] sa ebanghelyo diha sa imong balay.

Kining libroha naghisgot sa mga pagtulun-an ni Presidente Wilford Woodruff, kinsa nagserbisyo isip Presidente sa Ang Simbahan ni Jesukristo sa mga Santos sa Ulahing mga Adlaw gikan sa Abril 1889 hangtud sa Septyembre 1898.

Personal nga Pagtuon

Samtang ikaw magtuon sa mga pagtulun-an ni Presidente Wilford Woodruff, tinguhaa ang inspirasyon sa Espiritu. Hinumdumi ang makapadasig nga saad ni Nephi: “Kay siya nga sa makugihon nga paagi mangita makakaplag; ug ang mga misteryo sa Dios ipadayag ngadto kanila, pinaagi sa gahum sa Espiritu Santo” (1 Nephi 10:19).

Sa katapusan sa kada hugna [chapter], imong makita ang “Mga Sugyot alang sa Pagtuon ug Pagtudlo.” Kining mga pangutana, mga ideya, ug mga pakisayran [reference] sa kasulatan makatabang kanimo nga makasabut ug makagamit sa mga pulong ni Presidente Woodruff ’. Hunahunaa ang pagribyu niini sa dili pa ikaw mobasa sa hugna. Palandunga usab ang mosunod nga mga pangutana samtang ikaw magtuon:

Unsa nga baruganan ang gitudlo ni Presidente Woodruff? Unsay akong makat-unan gikan niini?
Sa unsang paagi nga ang mga pagtulun-an ni Presidente Woodruff makatabang kanako sa akong personal nga kinabuhi? Sa unsang paagi nga kini makatabang kanako sa akong mga responsibilidad sa panimalay ug sa Simbahan?
Unsay angay nakong buhaton isip resulta sa mga butang nga akong nakat-unan?

Pagtulun-an gikan Niining Libroha

Kon ikaw nagserbisyo isip titser sa Relief Society, elders quorum, o sa grupo sa high priests, duna kay oportunidad nga motudlo gikan niining libroha. Ang mosunod nga mga sumbanan makatabang kanimo.

Pokus sa mga pulong ni Presidente Woodruf ug sa mga Kasulatan

Misugo ang Ginoo nga dili kita motudlo og “lain nga mga butang gawas niana nga gisulat sa mga propeta ug mga apostoles, ug kana nga gitudlo [kanato] pinaagi sa Maghuhupay pinaagi sa pagampo sa hugot nga pagtuo” (D&P 52:9).

Tingali usahay matintal ikaw sa dili paggamit niining libroha ug mag-andam og mga leksyon gikan sa laing mga materyal. Pero ang imong buluhaton mao ang pagtabang sa uban nga makat-on sa ebanghelyo pinaagi sa mga pulong ni Presidente Woodruff ug sa mga kasulatan. Itumong ang kada leksyon sa mga kinutlo niining libroha ug sa mga kasulatan nga may kalabutan nga anaa sa katapusan sa kada hugna. Paggahin og taas-taas nga panahon sa leksyon sa pagbasa ug paghisgot sa mga pulong ni Presidente Woodruff.

Awhaga ang mga partisipante sa pagtuon sa mga hugna sa dili pa ang mga miting sa Dominggo ug sa pagdala sa ilang libro sa simbahan. Kon mobasa sila pag-una, mas andam silang moapil ug moghatag og kaayohan sa usag usa.

Tinguhaa ang Giya sa Espiritu Santo

Samtang ikaw mag-ampo alang sa panabang ug magkugi sa pagandam, ang Espiritu Santo mogiya sa imong mga paningkamot (tan-awa sa Alma 17:2–3; D&P 11:21; 42:14; 88:77–78). Pinaagi sa hinay, hinagawhaw nga tingog sa inyong hunahuna ug kasingkasing, motabang Siya kanimo sa pagpili og mga kinutlo gikan sa libro nga makapaawhag sa uban nga makat-on ug magsunod sa ebanghelyo.

Kon ikaw magtudlo, pag-ampo nga ang gahum sa Espiritu maguban sa imong mga pulong ug sa pagpanaghisgot sa klase. Si Nephi miingon, “Kon ang tawo mamulong pinaagi sa gahum sa Espiritu Santo ang gahum sa Espiritu Santo modala niini ngadto sa mga kasingkasing sa mga katawhan” (2 Nephi 33:1; tan-awa usab sa D&P 50:13–22).

Pag-andam og Outline sa Leksyon

Kon ang Espiritu modasig kanimo og mga ideya alang sa pagtudlo isulat kadtong mga ideya aron ikaw makahinumdom niini. Sa pa dili ikaw motudlo, pag-andam og sinulat nga outline aron maorganisar ang mga ideya ngadto sa usa ka plano sa leksyon. Sulayi paggamit kining simpol nga upat ka paagi:

Tun-i ang hugna. Basaha ang hugna aron makapamilyar sa mga pagtulun-an ni Presidente Woodruff. Sunda ang tambag ubos sa “Personal nga Pagtuon,” sa pahina v.
Pilia sa mainampoong paagi ang mga pamahayag nga labing makatabang niadtong imong gitudloan … Tun-i pa og makausa ang hugna. Ribyuha ang mga bold subheading, nga naghisgot sa mga baruganan nga imong itudlo. Hangyoa ang Ginoo sa paggiya kanimo sa pagpili sa mga pamahayag nga mas makatabang sa mga miyembro nga makat-on ug makagamit niadtong mga baruganan. Tungod kay ang kada hugna adunay daghang mga impormasyon kay sa imong matudlo sa usa ka klasehan, kinahanglang dili ikaw mobati nga obligado nga motudlo sa tanang mga baruganan o mogamit sa tanang mga pamahayag.
Hukmi kon unsaon sa pagtudlo sa mga pamahayag. Kon ikaw nakapili na sa mga pamahayag, ikaw andam na nga moplano og mga paagi sa pagtudlo niini. Tinguhaa sa mainampoong paagi ang giya sa Espiritu samtang imo kining gihimo. Pangita og mga ideya diha sa “Mga Sugyot alang sa Pagtuon ug Pagtudlo” sa katapusan sa hugna. Hinumdumi nga ang inyong pagtudlo makatabang sa mga miyembro nga makasabut, makahisgot, ug makagamit sa mga pulong ni Presidente Woodruff.
Pagsulat og outline aron maorganisar ang imong mga ideya. Usa ka mubo nga sinulat nga outline makatabang nimo sa pagorganisar sa imong mga ideya ug sa pagpahigayon sa leksyon. Ang imong outline kinahanglang dunay tulo ka importanting mga bahin:
- Pasiuna. Pag-andam og mubo nga pasiuna aron sa pagtabang sa mga miyembro nga makapokus sa ilang atensyon sa mga pulong ni Presidente Woodruff.
- Paghisgot sa mga pagtulun-an ni Presidente Woodruff. Isulat ang imong mga plano sa pagtudlo sa mga pamahayag nga imong napilian. Mahimo nimong bahinon kini nga bahin sa imong outline sumala sa mga baruganan nga anaa sa bold subheadings sa hugna.
- Panapos. Pangandam sa pagsumarayis sa mga baruganan nga imong gihisgutan ug pagpamatuod niadtong mga baruganan. Mahimo usab nga ikaw magplano og mga paagi sa pag-imbitar sa uban sa pagpakigbahin sa ilang mga pagpamatuod.

Pahigayon [conduct] og mga Panaghisgutan nga Makahatag og Kaayohan

Gipadayag sa Ginoo ang mga baruganan sa epektibo nga pagtudlo sa dihang Siya miingon, “Pagtudlo diha sa inyong mga kaugalingon og usa ka magtutudlo, ug dili ang tanan magdungan sa pagpamulong; apan himoa nga ang usa mamulong sa tagsa-tagsa ka higayon ug himoa nga ang tanan maminaw ngadto sa iyang gipamulong, nga sa diha nga ang tanan mahuman sa pagpamulong nga unta ang tanan mahatagan og kaayohan sa tanan, ug nga ang matag tawo makabaton og managsama nga kahigayunan” (D&P 88:122). Ang mosunod nga mga sumbanan makatabang nimo sa pag-awhag ug pagpahigayon og mga panaghisgutan nga makahatag og kaayohan:

Tinguhaa ang giya sa Espiritu Santo. Moaghat siya kanimo sa pagpangutana o sa pagpaapil sa mga tawo diha sa panaghisgutan.
Tabangi ang mga partisipante nga mopokus sa mga pagtulun-an ni Presidente Woodruff. Ipabasa nila ang iyang mga pulong aron makasugod og panaghisgutan ug sa pagtubag og mga pangutana. Ibalik pag-usab ang mga panaghisgutan nga nagsugod na sa pagsimang sa hilisgutan.
Ipamatuod kanunay ang mga kamatuoran nga gihisgutan. Dapita ang mga partisipante sa pagpakigbahin usab sa ilang mga pagpamatuod.
Kon angay, ipakigbahin ang mga kasinatian nga may kalabutan sa mga baruganan sa hugna. Awhaga ang uban sa pagpakigbahin og mga kasinatian kon giaghat sila sa Espiritu Santo sa pagbuhat sa ingon.
Ayaw palabig sulti. Awhaga ang uban sa pagpakigbahin sa ilang mga hunahuna, sa pagpangutana, ug sa pagtudlo sa usag usa.
Ayaw kahadlok kon dunay kahilom human ikaw makapangutana. Ang mga partisipante sa kasagaran nagkinahanglan og panahon sa paghunahuna o sa pagtan-aw sa ilang mga libro sa dili pa sila mopakigbahin og mga ideya, mga pagpamatuod, ug mga kasinatian.
Dawata ang tanang mga gisalmot sa diskasyon. Paminaw pagayo, ug paningkamuti ang pagsabut sa mga komentaryo sa mga sumasalmot. Pasalamati ang ilang mga paningkamot.
Kon ang mga partisipante mopakigbahin og daghang mga ideya, ipalista kini nga mga ideya sa usa ka tawo diha sa pisara.
Ayaw putla ang maayong diskasyon aron lang mahuman ang tanang materyal nga imong giandam. Unsay mas importante mao nga ang mga partisipante mobati sa impluwensya sa Espiritu ug molambo ang ilang pasalig sa pagsunod sa ebanghelyo.

Ang maayong mga pangutana mosangpot ngadto sa mapalandungon nga pagkat-on, panaghisgutan, ug sa paggamit. Sa katapusan sa kada hugna niining libroha, makakita ikaw og mga pangutana nga makatabang sa “Mga Sugyot alang sa Pagtuon ug Pagtudlo.” Gamita kining mga pangutanaha pirme. Kon gikinahanglan, mahimong mohimo usab ikaw og imong kaugalingong mga pangutana. Pag-andam og mga pangutana nga mogiya sa mga miyembro sa pagsiksik, pag-analisar, ug paggamit sa mga pagtulunan ni Presidente Woodruff’, sama sa gipakita sa ubos.

Mga pangutana sa pagsiksik [search question] makaawhag sa mga partisipante sa pagbasa ug paghisgot sa mga pamahayag ni Presidente Woodruff. Pananglit, mahimo kang mangutana, “Unsay atong makat-unan gikan sa tambag ni Presidente Woodruff mahitungod sa pagpakigbahin sa ebanghelyo?
Mga pangutana sa pag-analisar mogiya sa mga partisipante sa pagpamalandong sa mga pagtulun-an ni Presidente Woodruff ug aron madugangan ang sa ilang kahibalo sa mga baruganan sa ebanghelyo. Pananglit, human makatubag ang mga partisipante sa pangutana sa pag-analisar sa ibabaw, ikaw mahimong mangutana, “Ngano nga ang misyonaryo nga buhat usa gayud ka malipayon nga kasinatian?”
Mga pangutana sa paggamit [application questions] makatabang sa mga partisipante nga makahibalo kon unsaon nga sila makasunod sumala sa mga pagtulun-an ni Presidente Woodruff. Sama pananglit, ikaw mahimong mangutana, “Unsa gayud ang mga butang nga atong mahimo aron makahimo sa pagpakigbahin sa ebanghelyo?”

Impormasyon mahitungod sa mga Tinubdan [sources] nga Gikutloan Niining Libroha

Ang mga pagtulun-an ni Presidente Woodruff niining libroha gikuha direkta gikan sa iyang mga sermon, gimantala nga mga sinulat, ug mga journal. Sa mga kinutlo gikan sa iyang mga journal, ang punctuation, spelling, capitalization, ug paragraphing gimoderno na. Nagpabilin sa ubang mga kinutlo ang punctuation, spelling, capitalization, ug paragraphing sa orihinal nga mga tinubdan gawas kon ang editorial o tipograpik nga mga kausaban ang gikinahanglan aron mas mabasa pa kini. Tungod niini nga katarungan, makamatikod tingali ikaw og gagmay nga kalahian sa teksto. Sama pananglit, ang pulong ebanghelyo sa gamay nga mga letra sa ubang mga kinutlo ug gikapital sa uban.

Si Presidente Woodruff usab, sa kasagaran mogamit og mga termino nga mga lalaki, lalaki, o mga katawhan nga nagpasabut sa tanang mga tawo, lalaki ug babaye. Kanunay siyang mogamit sa pronoun nga he nagpasabut sa lalaki ug babaye. Komon kini nga pinulongan sa iyang panahon. Bisan pa sa kalahian tali niining maong pinulongan ug sa bag-o nga paggamit, ang mga pagtulunan ni Presidente Woodruff magamit sa mga babaye ug lalaki.