Hugna 1

Ang Pagpahiuli sa Ebanghelyo

Pinaagi kang Propeta Joseph Smith, ang Ginoo mipahiuli sa Iyang ebanghelyo sa tinuod niini nga himaya, gahum, han-ay, ug kahayag.

Gikan sa Kinabuhi ni Wilford Woodruff

Sa bata pa si Wilford Woodruff, siya ug ang iyang pamilya nakighigala ni Robert Mason, usa ka tawo nga nailhan na pagkatalagsaon sa iyang relihiyosong pagtuo. Nahinumdom si Presidente Woodruff:

“Nagtuo siya nga kinahanglan gayud nga dunay mga propeta, mga apostoles, mga damgo, mga panan-awon ug mga pagpadayag sa simbahan ni Kristo, sama sa karaang mga panahon; ug nagtuo siya nga ang Ginoo mopasanay og katawhan ug simbahan, sa katapusang mga adlaw, nga dunay mga propeta, mga apostoles ug ang tanang mga gasa, mga gahum, ug mga panalangin, nga anaa sa bisan unsang panahon sa kalibutan. … Kanunay siyang moadto sa balay sa akong amahan sa bata pa ako, ug mitudlo kanako ug sa akong mga igsoon niadtong mga baruganan, ug ako mituo kaniya.

“Nag-ampo [Siya] sa tinud-anay, ug aduna siyay mga damgo ug mga panan-awon, ug ang Ginoo mipakita kaniya og daghang mga butang, pinaagi sa panan-awon, nga mahitabo sa katapusang mga adlaw.

“Isaysay ako ang usa ka panan-awon, nga iyang giistorya kanako. Ang katapusang higayon nga ako siyang nakita, miingon siya: ‘Nagtrabaho ako didto sa uma sa udtong tutok sa dihang nakita nako ang panan-awon. Gibutang ako taliwala sa mabagang kakahoyan sa mga prutas: gigutom kaayo ako, naglakaw og layo sa prutasan, nangita og prutas nga makaon, pero wala akoy makita sa tibuok prutasan, mihilak ako kay wala akoy makitang prutas. Samtang ako nagbarug nga nagtan-aw sa prutasan, ug naghunahuna nganong walay prutas, ang mga kahoy nagsugod sa pagpangatumba sa akong palibot, hangtud nga wala nay bisan usa ka kahoy nga nag-barug sa tibuok prutasan; ug samtang ako nahibulong niini nga talan-awon, akong nakita ang gagmay nga mga udlot nga migitib gikan sa mga gamut sa kahoy nga nangatumba, ug akong nakita nga kusog kining mitubo. Nanalingsing kini, namulak, ug namunga hangtud ang mga kahoy napuno sa pinakanindot nga prutas nga akong nakita sukad, nalipay ako nga nakakita og daghan kaayong nindot nga prutas. Mikatkat ako sa usa ka kahoy ug nanguha og daghang mga prutas, ug natingala sa kanindot niini, ug sa dihang tilawan na unta nako nahuman ang panan-awon, ug akong nakita ang akong kaugalingon sa samang dapit sa uma sa pagsugod sa panan-awon.

“‘Miluhod dayon ako, ug nag-ampo ngadto sa Ginoo, ug mihangyo kaniya, pinaagi sa pangalan ni Jesukristo, sa pagpakita kanako sa kahulugan sa panan-awon. Ang Ginoo miingon ngari kanako: “Mao kini ang interpretasyon sa panan-awon; ang daghang mga kahoy sa kalasangan nagrepresentar sa henerasyon sa mga tawo sa imong panahon. Walay simbahan ni Kristo, o gingharian sa Dios sa yuta sa imong henerasyon. Walay bunga ang Simbahan ni Kristo sa yuta. Walay tawo nga naordinahan sa Dios sa pagpangalagad sa bisan unsang mga ordinansa sa ebanghelyo sa kaluwasan dinhi sa yuta niining panahona ug henerasyon. Pero, sa sunod nga henerasyon, Ako ang Ginoo mopahimutang sa akong gingharian ug sa akong Simbahan dinhi sa yuta, ug ang mga bunga sa gingharian ug ang simbahan ni Kristo, sama sa pagsunod sa mga propeta, mga apostoles ug mga santos sa kada dispensasyon, sa makausa pa makita sa ilang tanang kahingpitan dinhi sa yuta. Mabuhi ikaw aron makakita sa maong panahon, ug makagunit sa prutas; pero dili gayud makatilaw niini dinhi sa yuta.”’”

Si Presidente Woodruff mipadayon: “Sa dihang nahuman na [siya] sa pag-istorya sa panan-awon ug sa interpretasyon niini, miingon siya ngari kanako, … ‘Dili gayud ako makakaon niini nga prutas dinhi sa yuta, pero ikaw makakaon, ug ikaw mahimong inila nga aktor niana nga gingharian.’ Mitalikod siya nako ug mibiya. Mao kini ang katapusang mga pulong nga iyang gipamulong ngari kanako dinhi sa yuta. …

“Iyang nakita kini nga panan-awon sa tuig 1800, ug iya kining giistorya nako niadtong 1830—sa samang tingpamulak nga giorganisar kini nga Simbahan.

“Kini nga panan-awon, uban sa iyang laing mga pagtulun-an ngari kanako, mituhop pag-ayo sa akong hunahuna, ug ako nagampo pag-ayo ngadto sa Ginoo nga giyahan ako pinaagi sa iyang Espiritu, ug sa pag-andam kanako kon matukod na ang iyang Simbahan.”

Sa dihang si Wilford Woodruff mipasakop sa Simbahan, misulat siya ngadto sa iyang higala nga si Robert Mason. “Giingnan … nako siya nga ako nang nakaplagan ang Simbahan ni Kristo nga iyang gisulti kanako,” nahinumdom siya. “Gisultihan nako siya sa organisasyon niini ug sa pag-abut sa Basahon ni Mormon; nga ang Simbahan adunay mga propeta, mga apostoles, ug ang tanang mga gasa ug mga panalangin niini, ug nga ang tinuod nga bunga sa gingharian ug sa Simbahan ni Kristo gipakita diha sa mga Santos sama sa gipakita sa Ginoo kaniya sa panan-awon. Iyang nadawat ang akong sulat, ug gibasa kini sa daghang mga higayon, ug miamping niini sama sa iyang pagamping sa prutas sa panan-awon; pero tigulang na kaayo siya, ug namatay sa wala madugay. Wala na siya makakita ni bisan kinsang Elder nga mangalagad sa mga ordinansa sa Ebanghelyo ngadto kaniya.

“Ang una kong higayon, human mapadayag ang doktrina sa bunyag alang sa mga patay, miadto ako ug nagpabunyag alang kaniya.”¹

Mga Pagtulun-an ni Wilford Woodruff

Ang ebanghelyo ni Jesukristo walay katapusan ug walay pagkausab.

Ang Ginoo sa daghang panahon sa nagkalain-laing dispensasyon mitukod sa Iyang gingharian dinhi sa yuta; mipasanay Siya og mga tawo—halangdong mga espiritu—kinsa natawo ug nakadawat og lawas sa lain-laing hugna ug mga panahon. Iyang gidasig kadtong mga tawo; mihatag kanila og mga pagpadayag; mipuno sa inspirasyon, uban sa kahayag, uban sa kamatuoran, uban sa mga butang sa gingharian sa Dios.²

Kon inyong ikahimamat si amahang Adan, uban ni Seth, Moises, Aaron, Kristo, o ang mga apostoles, silang tanan motudlo sa samang mga baruganan nga atong gitudlo; dili mausab bisan unsa ka gamayng butang. Walay katapusan ang matang niini nga ebanghelyo ug dili mausab ang hiyas niini.³

Usa ra gayud ang ebanghelyo, ug kini ra ang ebanghelyo nga ibutyag ngadto sa mga anak sa mga katawhan, ug kana dili gayud mausab sa karon nga panahon ug sa kahangturan. Mao ra gihapon kini sa tanang panahon sa kalibutan; ang mga ordinansa niini mao ra. Ang mga tumutuo sa ebanghelyo adunay pagtuo ni Jesus sa wala pa siya magpakatawo sa yuta, ug ang paghinulsol sa sala gisangyaw sa iyang panahon ingon man usab sa una pa; naghimo usab sila og bunyag alang sa kapasayloan sa mga sala ug sa pagpandong sa mga kamot alang sa gasa sa Espiritu Santo; ug aduna silay organisasyon sa simbahan uban sa dinasig nga mga tawo. … Kining mga butanga gikinahanglan sa tanang panahon sa kalibutan.⁴

Sa panahon nga ang Ginoo adunay Simbahan dinhi sa yuta, ug kana nga Simbahan midawat sa Ebanghelyo ni Jesukristo, ug nakatagamtam sila sa Espiritu Santo, ang tanang gasa ug grasya nga anaa sa Simbahan sa Dios kabahin niana nga Simbahan. ⁵

Si Jesukristo miistablisar sa Iyang Simbahan atol sa Iyang mortal nga pangalagad, pero ang mga katawhan mi-apostasiya human sa Iyang kamatayon ug Pagkabanhaw.

Si Jesukristo … mitudlo sa Ebanghelyo ngadto sa mga Judeo ug miestablisar sa Iyang gingharian diha kanila, ug uban niini ang tanang mga gasa, mga grasya ug mga gahum: ang masakiton gipang-ayo; mga yawa gipalayas, ang mga gasa gipakita diha kanila. Pero ang mga Judeo misalikway Kaniya, ug sa katapusan gipatay nila Siya. … Wala Siya dawata, ug dayon, sumala sa sugo, kini nga Ebanghelyo gitudlo sa mga Hentil.⁶

Sa dihang gipresentar ang gingharian ngadto sa mga Hentil, gipresentar kini uban sa mga apostoles ug mga propeta, uban sa makaayo nga mga gahum, uban sa mga pagpadayag nga direkta gikan sa Dios, ug sa kada gasa ug grasya mituo ang mga Judeo, ug nakatagamtam kon sila magpabilin nga matinud-anon: sa dihang nahiadto kini ngadto sa mga Hentil hingpit ang organisasyon niini, pero sa paglabay sa panahon ilang gipang-usab ang mga ordinansa sa gingharian sa Dios, ug midangat sa pareho nga ehemplo sa pagkawalay pagtuo, ug nagpabilin sa mga siglo nga walay tinuod nga lagda sa langit diha kanila. … Sa paglabay sa panahon ang mga gasa, ug mga grasya, ug mga gahum sa gingharian sa Dios gikuha, ug ang mga tawo nga nagpahigayon sa karaang simbahan sa Dios gipamatay hapit ang tanan; gipatay sila tungod kay naninguha sila sa pagpadayon sa kaputli niini, ug naningkamot kutob sa ilang mahimo sa pag-establisar sa mga baruganan nga gipadayag sa Dios.⁷

Daghang mga siglo na ang nanglabay. Minilyon ka mga tawo ang nangatawo, nagpuyo sa yuta, namatay, ug miadto sa kalibutan sa espiritu, ug walay bisan usa kanila, nga atong nahibaloan, nga adunay gahum sa pag-adto sa mga katawhan ug mangalagad sa mga ordinansa sa Ebanghelyo sa kinabuhi ug kaluwasan. Dili kaduhaduhaan, nga dunay minilyon ka mga tawo, nga naglihok sigon sa kahibalo nga ilang naangkon …, kinsa nabuhi sa ilang panahon ug nagsangyaw sa Ebanghelyo sumala sa kahayag nga ilang naangkon. Pero wala silay gahum sa pagpangalagad sa usa ka ordinansa nga may katungod human sa kamatayon. Wala sila maghupot sa balaang Priesthood.⁸

Ang kalibutan hapit kawad-i sa kahibalo sa kamatuoran, ug sa Espiritu Santo nga gibu-bu sa paggiya sa mga tawo pinaagi sa kamatuoran. … Ang tinuod nga kadto nga henerasyon human sa laing henerasyon miabut ug miestablisar og mga sistema ug mga organisasyon, ang tanan nagsulti nga nagsubay sa plano sa kaluwasan, ug pero wala sila magkasinabut, hangtud nga sila nakaorganisar og daghang mga simbahan ang tanan may nagkadaiyang mga punto sa doktrina, kini nagpasabut lang nga dunay butang nga sayop.⁹

Human sa gatusan ka mga tuig nga apostasiya, ang Ginoo mipahiuli sa kahingpitan sa ebanghelyo pinaagi ni Propeta Joseph Smith.

Ang ebanghelyo miabut karong panahona sa iyang tinuod nga himaya, gahum, han-ay, ug kahayag, nga sagad nga ang Dios adunay mga tawo taliwala sa mga katawhan nga miila kaniya. Kana nga samang organisasyon ug ebanghelyo nga gipakamatyan ni Kristo, ug gipaagasan sa dugo sa mga apostoles aron sa pagpanghimatuod, sa makausa giestablisar niini nga henerasyon. Sa unsa nga paagi kini nahimo? Pinaagi sa pagpangalagad sa balaan nga anghel gikan sa Dios, gikan sa langit, kinsa [nakigsulti] sa tawo, ug gipadayag ngadto kaniya sa kangitngit nga mitabon sa kalibutan, ug mipakita ngadto kaniya sa mabaga nga kangitngit nga miputos sa mga kanasuran, kadtong mga talan-awon nga mahitabo niini nga henerasyon, ug magsunod-sunod nga mahitabo bisan hangtud sa pag-abut sa Mesiyas [tan-awa sa Joseph Smith—Kasaysayan 1:30–49]. Ang anghel mitudlo ni Joseph Smith niadtong mga baruganan nga gikinahanglan alang sa kaluwasan sa kalibutan; ug ang Ginoo mihatag kaniya og sugo, ug gi-seal diha kaniya ang priesthood, ug mihatag kaniya og gahum sa pagpangalagad sa mga ordinansa sa balay sa Ginoo. Siya misulti kaniya nga ang ebanghelyo wala diha sa mga tawo, ug walay usa ka tinuod nga organisasyon sa iyang gingharian sa kalibutan, nga ang mga tawo mibiya gikan sa iyang tinuod nga kapunongan, miusab sa mga ordinansa ug misupak sa walay katapusang pakigsaad, ug nakapanunod og bakak ug mga butang nga walay hinungdan. Siya misulti kaniya nga ang panahon miabut na sa pagpahimutang sa pundasyon alang sa pagtukod sa Gingharian sa Dios diha sa mga tawo sa katapusang higayon agig pagpangandam sa katapusan sa kalibutan.¹⁰

Unsay gihimo ni Joseph Smith human madawat [ang] priesthood ug ang mga ordinansa niini? Sultihan ko kamo unsay iyang gibuhat. Iyang gihimo ang butang nga wala mahimo sa tanang kaparian ug relihiyosong Kristiyano, ug sa tibuok kalibutan sulod sa 17 ka siglo ug 50 ka mga henerasyon—siya, bisan og batan-on nga [walay kaalam], mitudlo sa ebanghelyo ni Jesukristo sa iyang kahingpitan, kayano ug kasayon, ingon sa gitudlo sa iyang Tigpasiugda ug sa iyang mga apostoles; iyang gipahayag ang simbahan ni Jesukristo ug ang gingharian sa Dios nga hingpit sa ilang organisasyon, sama sa pagpasabut ni Pablo niini—nga dunay ulo ug tiil, mga bukton ug mga kamot, ang matag miyembro sa lawas hingpit sa atubangan sa langit ug sa yuta [tan-awa sa Mga Taga Corinto 12:12–28]. Giunsa man niya, nga usa ka [walay kaalam] nga batan-on, nakahimo nianang wala mahimo sa tanang maalamon sa kalibutang Kristiyano sulod sa napulog pito ka siglo? Tungod kay siya gidasig sa gahum sa Dios, gitudloan siya sa mga tawo kinsa, sa dinhi pa sa yuta, misangyaw sa mao gihapon nga ebanghelyo mismo, ug sa pagbuhat niini iyang natuman ang tanang gipanagna sa Amahan nga si Adan, Enoch, Moises, Elias, Isaias, Jeremias ug ni Jesus ug sa iyang mga apostoles.

Sama sa gisulti ni Pablo “kay wala ko igakaulaw ang Maayong Balita ni Kristo, kay kini mao ang gahum sa Dios alang sa kaluwasan sa matag usa nga nagatoo.” [Tan-awa sa Mga Taga Roma 1:16.] Hinaut nga ang mga Santos sa Ulahing mga Adlaw moingon—“Wala kami maulaw sa ebanghelyo ni Jesukristo.” Dili ako maulaw nga moingon nga si Joseph Smith usa ka propeta sa Dios; dili ako maulaw sa pagpamatuod nga siya gitawag sa Dios, ug mipahimutang sa pundasyon niini nga simbahan ug gingharian dinhi sa yuta, kay kini tinuod, ug si bisan kinsang lalaki o babaye nga gidasig sa Espiritu Santo makakita ug makasabut niining mga butanga.

… Buhi pa siya hangtud iyang nadawat ang tanang yawe, ordinansa ug balaod nga sukad gihatag ngadto ni bisan kinsang tawo dinhi sa yuta, gikan pa ni Amahang Adan, kalabut niini nga dispensasyon. Iyang nadawat ang mga gahum ug mga yawe gikan sa mga kamot ni Moises alang sa pagpundok sa balay ni Israel sa katapusang mga adlaw; iyang nadawat ubos sa mga kamot ni [Elijah] ang mga yawe sa pagbugkos sa mga kasingkasing sa mga amahan ngadto sa mga anak ug sa mga kasingkasing sa mga anak ngadto sa mga amahan; iyang nadawat ang pagkaapostol ubos sa mga kamot nila ni Pedro, Santiago, ug Juan, ug ang tanang nahiapil niini; iyang nadawat ubos sa mga kamot ni Moroni ang tanang mga yawe ug mga gahum nga gikinahanglan diha sa sungkod ni Joseph sa mga kamot ni Ephraim; iyang nadawat ubos sa kamot ni Juan Bautista ang Aaronic priesthood, uban sa tanang mga yawe ug gahum niini; ug sa tanang laing yawe ug gahum nga nalakip niini nga dispensasyon, ug ako dili maulaw nga moingon nga siya usa ka propeta sa Dios.¹¹

Si Joseph Smith, imbis mabuhi og dul-an og usa ka libo ka tuig ang edad sama ni Adan, nabuhi sulod lang sa trayntay otso anyos. Iyang gipadayag ang rekord sa sungkod ni Joseph sa mga kamot ni Ephraim—ang kasaysayan sa karaang mga lumulupyo niini nga yuta. Pinaagi sa gahum sa Dios iya kining gihubad, ug gimantala kini sa daghang mga pinulongan. Gawas niini, iyang giorganisar ang Simbahan ni Jesukristo sa mga Santos sa Ulahing mga Adlaw pinaagi sa pundasyon sa mga apostoles ug mga propeta, si Jesukristo ang ulohang bato sa pamag-ang [tan-awa sa Mga Taga-Efeso 2:20]. Ang mga lalaki giorden ngadto sa Priesthood ug gipadala, sila gikan sa lain-laing mga trabaho sa kinabuhi, sa pagdala niini nga Ebanghelyo ngadto sa kalibutan. Ang Dios mipahibalo ni Joseph Smith nga siya gitawag sa pagpul-ong sa ubasan sa makausa pa alang sa katapusang higayon sa dili pa ang pag-anhi sa Anak sa Tawo [tan-awa sa D&P 24:19]. Sukad niadto, liboan ka mga Elder sa Israel gipadala ngadto sa kalibutan aron sa pagsangyaw sa Ebanghelyo. … Ipabasa ni bisan kinsang tawo ang mga pagpadayag sa Libro sa Doktrina ug mga Pakigsaad, nga gihatag pinaagi kaniya sa mubong panahon sa iyang pagpuyo dinhi sa yuta. Mao kini ang usa sa pinakaimportante nga rekord nga gikahatag sukad ni bisan kinsang tawo ngadto sa tawhanong pamilya. Dili lamang kini, pero iyang giorganisar ang mga endowment ug mihimo og daghang laing buhat? Kinsay motuo kaniya nga sa kamubo sa iyang kinabuhi sa kalibutan, nakahimo siya og daghan. Akong nadawat ang akong endowments gikan sa iyang mga kamot. Iyang gidala kining tanang mga ordinansa nga gihatag ngadto sa mga Santos sa Ulahing mga Adlaw. Gani, katingalahan ug kahibulongan nga nahimo niya ang daghan kaayong mga butang.¹²

Ania na kanato karon ang kahigayunan sa paglakaw diha sa kahayag sa gipahiuli nga ebanghelyo.

Giisip nako nga bulahan kadtong si bisan kinsa nga gipadayagan sa Ginoo sa ebanghelyo ni Jesukristo, diin iyang gihatagan sa balaan nga priesthood ug awtoridad sa pagpangalagad sa mga ordinansa sa iyang balay. … Giisip nako kini nga atong pagkabutang karon; gihatagan kitag katungod sa paglakaw diha sa kahayag, duna kitay kahigayunan sa pagsabut ug pagkahibalo sa kamatuoran, sa pagkahibalo sa paagi aron maluwas ug mahimaya didto sa atubangan sa atong Amahan ug Dios. Ania kita sa dapit nga makahibalo sa iyang hunahuna ug kabubut-on, pinaagi sa iyang mga sulugoon ang mga propeta. Ang Ginoo mihatag kanato og mga titser ug dinasig nga mga tawo, mga tawo kinsa gidasig sa Espiritu ug sa gahum sa Dios; nga gihatagan sa Dios sa kamatuoran ug gitugahan niini uban sa kaalam sa pagtudlo kanato sa tanang panahon sa dalan nga angay natong pagalaktan. Usa kini ka dako nga panalangin.¹³

Samtang ako namalandong … sa kahimtang sa tawhanong pamilya, ug gihunahuna kon unsa kalahi ang atong sitwasyon gikan sa kadaghanan sa katawhan, akong gibati nga kinahanglang magpasalamat kita sa atong Dios. Adunay minilyon ka tawhanong pamilya nga nagpundok sa lainlaing mga balay, sa mga katedral, mga simbahan ug mga kapilya, sa tuyo nga mosimba sa Dios, pero aduna bay usa niadtong daghan kaayong mga katiguman kinsa nagkahiusa sa pagsabut sa kamatuoran, gawas lang kon dunay mga Santos sa Ulahing mga Adlaw nga mga Elder kinsa gitawag sa pagsangyaw ngadto sa mga lumulupyo sa yuta? Nagkahiusa ba sila sa pagsabut sa mga baruganan sa samang ebanghelyo sa samang plano sa kaluwasan, sa ebanghelyo ni Jesukristo, sa usa ka paagi nga makapahiusa kanila?

Karon, dili makahiusa sa Dios ang mga tawo nga dunay nagkalainlain nga matang sa pagtuo, ug daghang mga doktrina, nga hingpit nga supak sa usag usa, nga ania sa kalibutan, pero bulahan kita nga mga katawhan; aduna kitay mga baruganan sa panaguyon ug panaghiusa, ug ang pagsunod niini makapahiusa kanato.

Tungod niini nga baruganan ang mga Santos sa Ulahing mga Adlaw nabulahan, ug nahimong gawasnon. Naluwas kita nga layo kaayo gikan sa mga kasamok ug mga kaguliyang, bakak nga mga doktrina, sa kangitngit, sa sayop ug sa pagtuo-tuo nga gikalibgan sa atong mga hunahuna hangtud nga ang kahayag gipakita ngadto sa mga anak sa mga tawo nga sila anaa diay sa kangitngit, kay mao kini ang sitwasyon natong tanan; hangtud miabut ang kahayag kita nagsukarap sa kangitngit, sa hilabihan. Bisan og kita matinuoron, ug kita tingali naaghat pinaagi sa pinakamaayo ug pinakabalaang mga pagbati, pero hangtud nga gipadayag ang kahingpitan sa ebanghelyo, ang kalibutan sama sa buta nga nagpangapkap sa bongbong [tan-awa sa Isaias 59:9–11]. Wala kitay mga Apostoles, walay mga Propeta, wala kitay dinasig nga mga tawo nga mobarug ug mosulti kanato unsay buhaton aron maluwas, ug kita miagi niadtong tanang mga kasamok, kasakit ug kangitngit diin ang mga anak sa mga tawo ulipon samtang anaa niining bakak nga mga doktrina, sayop nga mga tradisyon, ug mini nga mga magtutudlo. …

Giluwas kita gikan niining mga butanga, ang panganud sa kangitngit gikuha gikan kanato, ug ang kahayag sa mahangturong kamatuoran nagsugod sa pagdan-ag sa atong mga hunahuna. …

Kini akong giisip nga usa sa labing dako nga mga panalangin nga gihatag sa Dios ngadto sa mga anak sa mga tawo, nga ang yanong kamatuoran matudlo kanila. …

Hain ba ang lalaki o babaye nga nakasabut sa tanan mahitungod sa Dios o mahitungod sa kahangturan [eternity] hangtud nga gipadayag ni Joseph Smith ang kahingpitan sa ebanghelyo? Mabasa nako kadtong mga butanga sa Biblia nga karon atong gituohan ug gidawat, pero gilibutan ako sa mga tradisyon sa kalibutan ug dili makasabut niini.

Gitudloan na kita karon, matag karon ug unya, sa tinuoray nga mga baruganan sa ebanghelyo ni Jesukristo, sa plano sa kaluwasan—sa paagi sa pagpuyo aron adunay pagtugot sa atong Amahan sa Langit. Dili ba kini panalangin labaw sa tanang mga panalangin? Kon kini nga mga tawhana dili makasabut sa ilang mga panalangin dili sila angay nga magsubo. Kon kini nga mga tawhana nakasabut sa ilang gibarugan ug sa ilang tinuod nga relasyon sa Dios ilang bation ang hingpit nga katagbawan, ug ilang maamgohan nga maloloy-on ang atong langitnong Amahan kanato ug nga iyang gitugyan ang dili maihap ug mahimayaong mga panalangin ngari kanato.¹⁴

Nagpasalamat ako sa Dios nga ako buhi niining adlaw ug niining panahona sa kalibutan, sa dihang ang akong mga dunggan nakadungog sa tingog sa kahingpitan sa ebanghelyo ni Jesukristo.¹⁵

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Ribyuha ang istorya sa mga pahina 1–3. Unsay kulang sa kinabuhi ni Robert Mason? Unsa ang gitudlo niini nga asoy mahitungod sa Dakong Apostasiya ug sa Pagpahiuli sa ebanghelyo?
Tun-i ang mga pahina 3–6, mangita sa mga hiyas sa tinuod nga Simbahan sa Ginoo. Nganong importante nga ang Simbahan iestablisar kanunay sumala sa samang sumbanan?
Sumala ni Presidente Woodruff, unsay hinungdan sa Dakong Apostasiya? Unsa ang ubang resulta sa Dakong Apostasiya? (Tan-awa sa mga pahina 4–6.) Sa unsa nga paagi nga atong makita karon ang mga resulta?
Ribyuha ang mga pahina 6–9, mangita sa mga kalampusan ni Propeta Joseph Smith diha sa Pagpahiuli sa ebanghelyo. Sa unsa nga paagi nga kini nga mga kalampusan nakaimpluwensya sa inyong kinabuhi?
Basaha ang pamahayag nga nagsugod sa ubos sa pahina 7. Sa unsa nga paagi nato mapakita nga kita wala maulaw sa gipahiuli nga ebanghelyo ni Jesukristo?
Timan-i ang mga pulong nga kangitngit ug kahayag sa pahina 9–11. Unsay inyong nakat-unan sa pagamit ni Presidente Woodruff niining mga pulonga? Unsay kulang sa inyong kinabuhi kon wala pa kamo modawat sa gipahiuli nga ebanghelyo?

May Kalabutan nga Kasulatan:Isaias 29:10–14; Amos 8:11–12; Mormon 1:13–14; D&P 128:19–21