Hugna 22

“Kinahanglan nga Manag-uban,” ang Temporal ug Espirituhanon nga Pagkugi

Sa atong mga pagpaninguha aron malig-on ang atong mga pamilya ug mapalambo ang gingharian sa Dios dinhi sa yuta, kinahanglan gayud nga magkugi kita sa temporal ug espirituhanon nga paagi.

Gikan sa Kinabuhi ni Wilford Woodruff

Sa unang mga adlaw sa Simbahan, ang mga propeta ug mga apostoles kanunay nga nag-awhag sa mga tawo sa pagbuhat sa ilang bahin sa pagtukod sa gingharian sa Dios. Kini nga paninguha nagkinahanglan sa espirituhanon ug temporal nga pagkugi. Dugang pa sa ingon nga mga kalihokan sama sa pag-ampo, pagtuon sa mga kasulatan, ug sa pagpakig-ambit sa ebanghelyo, ang mga Santos mitukod og mga pinuy-anan ug mga siyudad, miestablisar og pang publiko nga mga eskwelahan, miugmad ug mihimo’g irigasyon sa bantok nga yuta, ug mihakot og mga bato gikan sa kabukiran aron tukuron ang Templo sa Salt Lake. Niadtong 1857, napulo ka tuig human ang mga pioneer nga Santos sa Ulahing mga adlaw unang misulod sa Walog sa Salt Lake, miingon si Elder Wilford Woodruff: “Kon motrabaho kita ug palamboon ang gingharian sa Dios nga imbis ang atong mga kaugalingon, walay sapayan kon unsaon nato paghimo niini, bisag’ magbuhat og kanal, o magtukod og templo, magsangyaw sa ebanghelyo, mag-ugmad sa yuta, o bisan unsa pang butanga. … Atong makita nga tabangan kita sa Ginoo ug mopaluyo kanato, ug hatagan kita niya og kalig-on uban sa iyang gahum, ug motabang kanato sa tanang butang nga atong himoon.”¹

Kadtong nasuhito ni Presidente Woodruff nasayud nga wala lamang siya magsulti mahitungod sa bili sa pagkugi sa trabaho—gigamit niya ang baruganan sa iyang kinabuhi. Agi og dugang sa pagpalambo sa iyang mga katungdanan sa priesthood, makugihon siya sa temporal nga mga buhat, bisan diha sa iyang katigulangon. Ang Santos sa Ulahing mga adlaw nga tigsulat sa kasaysayan nga si Andrew Jenson mirekord: “Ang iyang kakugi makita kaayo nga kabahin na sa iyang pagkatawo nga, sa edad nga nubyenta anyos, usa sa iyang apo nga lalaki nakabintaha lang og dyutay kaayo sa pagpangguna og sagbot sa tanaman sa utanon, matud niya uban sa klaro nga pagpaubos: ‘Nan, una pa kining higayon sa akong kinabuhi nga usa sa akong mga anak ang nakalupig nako sa pagpangguna.’ ”²

Usa ka kadungan-dungan ni Presidente Woodruff nag-ingon: “Ganahan siya og trabaho, dili lang tungod niini, apan giubanan kini sa balaanon nga pagmando. Ni alang kaniya dili lamang aron mainila sa kalibutan, sa pagdugang og kaharuhay ug kahayahay sa kaugalingong kinabuhi ug ingon man usab sa nagsalig kaniya, alang kaniya usa kini ka panalangin, usa ka prebilihiyo, usa ka kahigayonan nga iyang pahimuslan sa matag higayon nga itugot sa iyang katungdanan. … Ang pagpatulo sa singot, usa kini ka balaang mando sama sa pag-ampo, ug sa iyang kinabuhi gipanigingnan niya diha sa pinakataas nga matang nianang yano nga Kristohanong kinabuhi nga naghimo sa pisikal, mental, ug matarung nga kinaiya sa tawo. Dako ang iyang pagtuo sa dignidad sa pisikal nga trabaho. Ganahan ug nalingaw siya niini.”³

Mga Pagtulun-an ni Wilford Woodruff

Samtang nagpalambo kita sa gingharian sa Dios, kita adunay temporal nga mga katungdanan nga buhaton.

Ang atong Presidente [Brigham Young] kanunay nga nagsulti kanato nga dili nato mahimulag ang temporal gikan sa espirituhanon, apan kinahanglan gayud nga maghiusa sa buhat, ug mao kini ug busa kinahanglan nga molihok kita aron palamboon ang simbahan ug ang gingharian sa Dios.⁴

Ang ubang mga tawo nagtuo nga ang Kapangulohan niini nga Simbahan ug ang Napulog Duha ka mga Apostoles walay labut sa temporal nga mga buluhaton. Nan, mahimutang kami sa kadaut kon dili kami magtagad sa temporal nga mga butang.⁵

Nagpalambo kita og tinuod nga gingharian sa Dios dinhi sa yuta, ug kita may temporal nga katungdanan nga pagabuhaton. Nagpuyo kita sa temporal nga mga lawas, nagkaon kita sa temporal nga pagkaon, nagtukod kita og temporal nga mga balay, nagbuhi kita og temporal nga mga baka ug temporal nga trigo, nangibot kita sa temporal nga mga sagbot, ug uban sa temporal nga mga kaaway sa atong yuta, ug kining mga butanga natural lang nga kinahanglang atimanon ug sa pagpahigayon og daghang mga katungdanan sa usa ka temporal ug malisud nga kinaiyahan, ug kini, dayag, lang nga gidawat sa atong relihiyon.⁶

Dili kita makapalambo sa Zion nga maglingkud lamang sa bangko magkanta sa atong mga kaugalingon palayo sa walay katapusan nga kasadya, kinahanglan nga maugmad nato ang yuta, aron makuha ang mga bato ug mga elemento gikan sa kabukiran ug mopabarug og mga templo ngadto sa Labing Makagagahum nga Dios, ug kini nga temporal nga buhat gipangayo sa Dios sa langit gikan kanato, sama sa iyang pagsugo ni Kristo nga mamatay aron pagtubos sa kalibutan, o sama sa gisugo sa Manluluwas ngadto nila ni Pedro, Santiago ug Juan sa paglakaw ug magsangyaw sa ebanghelyo ngadto sa mga kanasuran sa yuta. Mao kini ang mahinungdanon nga dispensasyon diin kinahanglan gayud nga tukuron ang Zion sa Dios, ug kita isip mga Santos sa Ulahing mga adlaw ang motukod niini.⁷

Sa temporal nga mga butang, dawaton gayud nato ang tambag sa Ginoo ug sa Iyang mga sulugoon.

Gikan sa pagsugod niini nga buhat hangtud karon ang trabaho nagkalisud alang sa mga sulugoon sa Dios sa pag-andam sa mga kasingkasing sa mga tawo aron ang Ginoo modumala ug momando kanila sa ilang temporal nga trabaho ug mga paagi kay sa mga butang nga may kalabutan sa ilang mahangturon nga kaluwasan. …

Kahibulongan kining butanga, apan nagtuo ako, nga tingali, resulta kini sa atong katungdanan. Adunay tabil tali sa tawo ug sa mahangturon nga mga butang, kon kuhaon kana nga tabil ug atong makita ang mahangturon nga mga butang sama nga diha sa atubangan sa Ginoo walay tawo nga matintal kabahin sa bulawan, plata o mga butang niini nga kalibutan, ug walay tawo, tungod niini, ang dili mosugot nga ang Ginoo magmando kanila. Apan dinhi aduna kitay kabubut-on, ug kita ubos sa pagsulay, ug adunay tabil tali kanato ug sa mahangturon nga mga butang, tali kanato ug sa atong Langitnong Amahan ug sa kalibutan sa mga espiritu; ug kini sa usa ka maalamon ug tukma nga katuyoan diha sa Ginoo nga atong Dios, aron sulayan kon ang mga anak sa mga tawo mosunod ba sa iyang balaod o dili sa sitwasyon nga gibutangan nila dinhi. Ang mga Santos sa Ulahing mga adlaw, naghunahuna niining mga butanga. Mauyunon kita, uban sa tibuok nato nga kasingkasing, nga sila si Joseph Smith, Presidente Young ug ang mga lider sa katawhan mogiya ug modumala gayud kanato kabahin sa atong mahangturon nga mga tinguha; ug ang mga panalangin nga gihatag ngari kanato pinaagi sa ilang awtoridad mosangko ngadto sa kalibutan sa mga espiritu ug may epekto gihapon human sa kamatayon, ug makaapekto kini sa atong kapalaran ngadto sa walay katapusan nga katuigan sa kahangturan.

Ang mga tawo, sa panahon nila ni Abraham, Isaac ug Jacob, ug ni Jesus ug sa mga Apostoles, may mga panalangin nga gihatag diha kanila, mga gingharian, mga trono, mga kayutaan ug mga gahum uban sa tanang mga panalangin sa Bag-o ug Walay katapusan nga Pakigsaad. Mahimo nga ikapangutana kini, kini ba nga mahangturong mga panalangin makaayo kanato? Makaayo gyud, o kinahanglan gyud. Kini ba nga mga panalangin sama ka bililhon sa atong kalibutanon nga bahandi, bisan kon dyutay ra o daghan? Ang kaluwasan ba, ang kinabuhing dayon sama ba kabililhon sa usa ka parisan nga baka, balay, 40 ka mga ektarya nga yuta, o bisan unsang butang nga ania kanato dinhi sa kalibutan? Kon mao kinahanglan gyud nga andam kita sa pagtugot sa Ginoo nga modumala ug momando kanato sa tanang temporal nga mga buhat ingon man sa atong espirituhanon nga mga buhat.

Usab, kon ang tawo mamatay dili niya madala ang iyang mga baka, mga kabayo, mga balay o mga yuta; adto siya paingon sa lubnganan—ang kapahulayan sa tanang mga unod. Walay tawo nga makalingkawas niini, ang balaod sa kamatayon anaa sa tanan. Diha kang Adan ang tanan mangamatay, maingon man usab diha kang Kristo ang tanan mangabuhi [tan-awa sa 1 Mga Taga-Corinto 15:22]. Nasabtan natong tanan nga ang kamatayon moagi sa tanang mga tawo, apan … walay usa kanato nga nasayud kon kanus-a moabut ang atong turno, bisan nasayud kita nga dili magdugay tawagon kita aron mosunod sa mga kaliwatan nga naguna kanato. Kon palandungon nato kining mga butanga nagtuo ako nga kinahanglan nga mouyon kitang tanan nga ang Ginoo maoy mogiya kanato sa temporal nga mga butang.⁸

Ang pagsunod sa ebanghelyo naglakip sa espirituhanon ug temporal nga edukasyon inubanan sa matinud-anon nga pagtrabaho.

Adunay proberbio o panultihon nga akong nadungog sa makadaghan na kaayong higayon sa akong kinabuhi, ug sa akong hunahuna naghatag og dako kaayong gibug-aton, ug kana mao, “ang kamatuoran gamhanan ug modaug.” Sa akong hunahuna nakita kini sa matag kahimtang diin ang kamatuoran nagamit bisan kon gigamit kini sa temporal o espirituhanon nga paagi, o gigamit diha sa kahimtang sa mga nasud o mga pamilya o mga indibidwal, gigamit ngadto sa kalibutan o ngadto sa Gingharian sa Dios.⁹

Ang pagpalambo sa Zion sa Dios ning ulahing mga adlaw naglakip sa, maingon nga mosulti ako sa tinuoray, kada sanga sa patigayon, sa temporal ug espirituhanon, nga ato karong gibuhat. Dili kita makasulti sa bisa’g unsa nga hilisgutan nga nagsunod sa balaod ug legal diha sa panan-aw sa Dios ug sa tawo nga wala dawata sa atong relihiyon. Ang ebanghelyo ni Jesukristo nga atong gidawat, ug atong gisangyaw, naglakip sa tanang kamatuoran, ug tanang legal nga katungdanan ug pangita sa tawo.¹⁰

Dili gayud nato pasagdan ang atong mga anak; kinahanglan nga makadawat sila sa tukma nga edukasyon sa mga butang nga espiritual ug temporal. Kana ang pinakamaayo nga kabilin sa bisa’g kinsang mga ginikanan nga ikabilin ngadto sa ilang mga anak.¹¹

Samtang nagkadugang ang tinguha sa giingon nga kahibalo pinaagi sa mga libro ug edukasyon, kinahanglan nga dili kalimtan ang kaimportante sa pisikal nga trabaho. Kinahanglan nga manag-uban ang edukasyon sa hunahuna ug edukasyon sa lawas. Ang hanas nga salabutan kinahanglan nga ubanan sa hanas nga kamot. Ang pisikal nga trabaho kinahanglan atong hatagan og bili ug kanunay hatagan og dignidad. Ang padulngan niini nga komon kaayo karong mga panahona sa batan-on nga mga lalaki mao ang pagkuha og taphaw nga edukasyon ug dayon maghunahuna sa ilang mga kaugalingon nga dili angay sa mikanikal o ubang bug-at nga trabaho maoy dili angay nga magdaghan diha kanato. … Angay nga ikapasigarbo sa matag usa nga mahimong tiggama ug dili lamang usa ka pumapalit. Ang atong mga anak kinahanglan nga tudloan nga tabangan ang ilang mga kaugalingon pinaagi sa ila mismong kakugi ug kahanas, ug dili lamang mobuhat niini, apan tabangan usab ang uban, ug ang pagbuhat niini pinaagi sa matinuuron nga pagbudlay mao ang dungganon nga mga paagi nga gisangkap sa Dios ngadto sa Iyang mga anak dinhi sa yuta. Ang hilisgutan sa tukma nga edukasyon sa mga batan-on sa Zion mao ang usa sa pinakaimportante.¹²

Sa atong pinansiyal nga mga paningkamot, kinahanglan mosangkap kita sa atong mga pamilya, magsunod sa balaod sa ikapulo, magmanggihatagon sa unsay anaa kanato, ug maglikay sa utang.

Mahitungod sa atong temporal nga pagkabutang, kinahanglan nga magtrabaho kita ug sangkapan ang atong mga kaugalingon.¹³

Kabahin sa mga bahandi ug katigayunan, wala ako magkinahanglan niini kon magdala kini og tunglo kanako. Buot lamang nako nga makasangkap og sapot, sapatos ug makapakaon sa akong [pamilya], ug himoon sila nga komportable, kon makuha nako kini sa minatarung nga paagi sa atubangan sa Ginoo; apan palabihon ko pa nga magpuyo sa kakabus uban kanila kaysa makaangkon og katigayunan ug malaglag. Peligro ang bahandi gawas kon gamiton kini nga dili kita malaglag, kon dili nato magamit kini alang sa kahimayaan sa Dios ug sa pagpalambo sa iyang gingharian, maayo pa nga wala kini.¹⁴

Ang ubang mga tawo nagtan-aw sa balaod sa ikapulo nga isip usa ka matang sa buhis ug ang kabudlay ilang gipas-an, apan alang kang kinsa kini? Ang atong ikapulo, ang atong trabaho, ug sa tanan natong gibuhat diha sa gingharian sa Dios, alang kang kinsa kining tanan? … Ang atong ikapulo, ang atong kabudlay, ang atong mga trabaho dili alang sa pagbayaw sa Labing Makagagahum, apan kini alang kanato. … Atong sabton nga ingon kini niana ug mamaayo ra kita. Sa pagbayad sa atong ikapulo, sa pagsunod sa kada balaod nga gihatag aron sa pagbayaw kanato ug makaayo kanato, kining tanan alang sa atong indibidwal nga kaayohan ug sa kaayohan sa atong mga anak, ug dili kini alang sa bisan unsang partikular nga kaayohan sa Ginoo, kondili sa iyang kahimuot diha sa pagkamatinud-anon sa iyang mga anak ug nagtinguha nga magtan-aw kanila nga naglakaw diha sa dalan nga nagpaingon sa kaluwasan ug sa kinabuhing dayon.¹⁵

Tan-awon lamang nato ang atong palibut aron mapamatuod-an sa ato mismong mga kaugalingon … nga kinsa kadtong musalmot sa buhat sa Dios mao ang pinalabi sa Ginoo. Mao kini ang kasinatian sa karaang Israel, ug kini atong kasinatian. Bisan pa niana sa kabahin sa boluntaryo nga mga donasyon adunay hilabihang pagpasagad, bisan pa man sa bililhon nga mga saad nga nagdugtong niini. Kinahanglan nga pahinumdoman ang mga Santos sa obligasyon nga gisalig diha kanila. Usab, ang atong mga anak, kinahanglan nga tudloan niini nga katungdanan, aron mahimo na nilang kinaiya ang paghatag niini. Kadtong hugot nga nagsunod niini nga kasugoan makapamatuod niining dakong kalipay ug daghang mga ganti nga ilang madawat sa pagsunod niini.

Kini nga balaod sa pagkamanggihatagon makita nga usa sa mga panalipod nga gisagup sa Ginoo aron malikayan niining mga tawhana ang dautan nga mga linugdangan nga nagsunod sa pag-angkon og katigayunan. Nagsulti Siya kanato nga ang bahandi sa yuta Iyaha aron ipanghatag, Apan mipahimangno Siya kanato nga magbantay sa garbo, tingali unya og mahisama kita sa mga Nephite sa karaan [tan-awa sa D&P 38:39]. Nasayud kita sa kalaglagan nga midangat kanila, ug kinahanglan nga magbantay kita aron malikayan nato ang makadaot nga epekto sa bahandi. Daghan ang makalahutay sa kakabus ug magmapaubsanon, ug nagpaduol sa Ginoo, [apan] dili makaagwanta sa bahandi. Nagmapagarbuhon sila ug nahimong maibugon, ug nakalimot sa ilang Dios. Hinoon, kinsa kadtong, nahinumdom kanunay sa mga pagtulun-an sa Ginoo kalabut sa yuta ug sa mga lumulupyo niini, ug miamot sa mga katigayunan nga gihatag sa Ginoo kanila aron pagtabang sa mga kabus ug motabang sa pagpalambo sa buhat sa Dios, magpugong sa ilang mga kaugalingon ug dili nila hatagan og higayon si Satanas sa pagtintal kanila.¹⁶

Nadasig kami sa pagpasidaan sa mga Santos sa Ulahing mga adlaw batok sa dili pag-anad sa dautang bisyo sa pagpangutang ug sa pagsulod og daghang mga utang nga bug-at na kaayo sa pagbayad, nga mopaingon sa pagkawala sa ilang mga pinuy-anan ug ubang mga kabtangan. Nasayud kami nga nauso na karon sa paggamit sa kredit kard nga ingon og walay kinutuban. … Hilabihan kini ka dautan ug usa ka butang nga kita, isip katawhan, ug isip mga indibidwal, angay nga maglikay. Ang atong transaksyon kinahanglan nga himoon, kutob sa mahimo, diha sa naandan nga paagi sa pagbayad dayon sa atong gipalit, ug ang atong mga gikinahanglan magagad gyud sa atong maabot. Ang atong pagpamasin sa pagsulod sa walay klarong negosyo aron lang makaganansiya og dako kinahanglan nga limitahan. …Pagkontento sa igong mga ganansiya, ug ayaw padala sa malamaton nga mga paglaum nga makaangkon og bahandi. Hinumdomi ang panultihon sa maalamon nga tawo: “Apan kadtong nagadali sa pagkaadunahan dili makalikay sa silot.” [Tan-awa sa Mga Proberbio 28:20]. Tugoti nga matudloan usab ang atong mga anak nga maanad sa pagdaginot, ug dili magpatuyang sa mga tinguha nga dili nila matuman kon dili mosulod sa utang.¹⁷

Sa atong mga pagpaninguha, kinahanglan gayud nga pangitaon nato og una ang gingharian sa Dios.

Adunay dako kaayong tinguha nga gipakita niining mga tawhana nga madato, ug motrabaho alang sa kaugalingon kay sa gingharian sa Dios. Apan unsay maani nimo ug kanako nga mobiya sa pag-ampo ug motrabaho aron madato? Kay unsa may kapuslanan alang sa usa ka tawo ang pag-angkon sa tibuok kalibutan nga pagapildihan sa iyang kinabuhi? Dili daghan. Unsa may ikahatag sa tawo nga arang ikabawi niya sa iyang kinabuhi kon makaabut siya [didto] nga pikas bahin sa tabil? [Tan-awa sa Marcos 8:36–37.]

Nahibulong kaayo ako sa dyutay’ng interes nga gipakita sa mga lumulupyo sa yuta diha sa ilang umaabot nga kahimtang. Ang matag tawo dinhi mopuyo sa pikas nga bahin sa tabil nga sama ka dugay sa iyang tiglalang—sa walay katapusan nga tuig sa kahangturan, ug ang mahangturon nga kapalaran sa kada indibidwal nagagad sa pamaagi nga gigahin diha sa mubong panahon sa pagkamortal. Mangutana ako diha sa pangalan sa Ginoo, unsa may bili sa pupolaridad diha nimo o kanako? Unsay bili sa bulawan o pilak, o sa mga butang niining kalibutan sa bisan kinsa kanato, kay sa paghimo kanato nga makakuha sa atong gikinahanglang kan-on, imnon ug isul-ob, ug sa pagtukod sa gingharian sa Dios. Ug alang kanato ang pagbiya sa pag-ampo ug pagtinguha sa bahandi sa kalibutan mao ang hilabihan nga pagpakabuang.

Kon tan-awon ang paagi sa gibuhat sa mga tawo, imong mahunahuna nga mopuyo sila dinhi sa hangtud, nga ang ilang kapalaran nag-agad diha sa gidaghanon sa ilang dolyar. Mangutana usahay ako sa mga Santos sa Ulahing mga adlaw, kon pila’y atong kwarta sa pag-anhi nato dinhi? Pila ang atong gidala, ug diin kini gikan? … Wala ako magtuo nga ang kada usa kanato natawo diha sa ibabaw sa kabayo o sa karuwahe, o nagdala kita og puhonan alang sa train o mga baka ug mga balay, apan natawo kita nga hubo sama ni Job, ug sa akong hunahuna mobiya kita dinhi ingon kaniya ka hubo [tan-awa sa Job 1:20–21]. Unya kabahin sa mga bahandi niini nga kalibutan unsa ang bili niini nganhi nato, nga makaawhag kanato nga wad-on ang atong kaluwasan tungod lang niini? Ako moingon nga mas maayo pang pobre ako sa tibuok kong kinabuhi, kon ang bahandi motunglo kanako ug kuhaon gikan kanako ang himaya nga akong gilauman nga maangkon pinaagi sa pagsunod sa mga kasugoan sa Dios, mag-ampo ako sa Dios nga dili ako makaangkon niini.

Gikuptan sa Dios diha sa iyang mga kamot ang mga bahandi niini nga kalibutan: ang bulawan ug ang plata, ang mga baka ug ang yuta iyaha, ug hatagan niya kon kinsay buot niyang hatagan. Sa dihang didto sa bukid si Kristo, si Lucifer, ang yawa, mipakita kaniya sa kahimayaan sa kalibutan ug mitanyag nga ihatag kini kaniya kon mohapa ug simbahon siya [tan-awa sa Mateo 4:8–9]. Apan nasayud ba kamo nga kanang alaut nga yawa wala makapanag-iya og bisa’g usa na lang ka pye nga yuta sa tibuok kalibutan, ug nga wala gani siyay lawas o tabernakulo? Ang kalibutan mao ang tungtonganan sa tiil sa Ginoo, ug kon gusto kitang moangkon og luna niini alang sa kaugalingon ang Ginoo mohatag niini kanato, ug kinahanglan nga magmatinud-anon lamang kita sa atong relihiyon, kon aduna kitay diyes mil ka bilyon nga dolyar sama nga wala gihapon nato kini. Unta ang kinabuhing dayon maoy atong tinguhaon, ug kana, bisag’ unsa pay kahimtang ug pagkabutang nato sa kinabuhi, mao kana ang una natong tinguhaon. …

… Naghisgot ako kabahin sa bahandi. Wala ako’y nakitang dautan sa bahandi. Iyaha sa Dios ang bulawan ug plata. Buot kita nga [mutukod ] og mga balay ug kinahanglan gayud nga ugmaron ang yuta. Maayo ra kini. Wala ako’y nakitang sayop sa pagpakadato sa tawo. Nakita nako ang sayop sa wala nato paghatag og bili sa gingharian sa Dios, sa wala pagpakabana sa ebanghelyo ug nga mahikawan ang atong mga kaugalingon sa kinabuhing dayon tungod lamang sa pagtagbaw sa kaibog sa unod, garbo sa kinabuhi, ug ang mga uso sa kalibutan, ug pagpahimutang sa atong mga kasingkasing niining mga butanga.¹⁸

Hisgutan nako ang mga pulong ni Jesukristo sa dihang misulti siya ngadto sa iyang mga tinun-an: “Unaha ninyo pagpangita ang gingharian ug ang pagkamatarung gikan sa Dios, ug unya kining tanang mga butanga igadugang ra kaninyo.” [Tan-awa sa Mateo 6:33.] Sultihan ko kamo, mga kaigsoonan, mahimong sulayan nato kini sa tibuok natong kinabuhi, mahimong sulayan nato ang matag agianan ug baruganan niini nga kalibutan ug kita isip mga Santos dili mouswag diha sa lain nga paagi sa pagpadayon kay sa pag-una og pangita sa gingharian sa langit ug pagkamatarung; kon ato kining buhaton matag panalangin, matag maayo nga butang, pagkabayaw, gasa, tinguha, o bisa’g unsang butang nga pangandoyon sa buotan nga tawong mapuslanon, igahatag ngari kanato karon ug sa kahangturan.

Daghan kaayong mga tawo nga misulay sa pagpangita og kalipay nga wala unaha sa pagpangita ang gingharian sa langit, … apan kanunay nga malisud kini alang kanila, ug pareho ra usab nato kon ato kining sulayan.¹⁹

Ang atong tinguha halangdon. Nagtinguha kita og usa ka dapit sa celestial nga gingharian sa Dios, aron mabaton og kinabuhing dayon, ang labing mahinungdanon sa tanan nga mga gasa sa Dios ngadto sa tawo. Ang tanang pasidungog, himaya ug katigayunan niini nga kalibutan mahimong walay kahulugan sa atong mga hunahuna kon itandi sa maangkon nga kabilin unya sa atubangan sa Dios ug sa Kordero, uban sa tanang mga propeta, mga apostoles ug mga santos lakip ang balay sa atong amahan. Samtang ang usa lumalabay lamang ug sa dili madugay mawala, ang usa molahutay sa hangtud.²⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna ug samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsay gibuhat ni Presidente Wilford Woodruff aron sundon ang mga baruganan nga gipresentar niini nga hugna? (Tan-awa sa mga pahina 249–51.)
Ngano man nga kita “dili makapahimulag sa temporal gikan espirituhanon”? (Tan-awa sa mga pahina 251–52 tan-awa usab sa D&P 29:34–35.) Unsaon nato sa paggamit niini nga kamatuoran diha sa adlaw-adlaw natong pagpuyo? sa atong serbisyo sa Simbahan?
Nakamatikod si Presidente Woodruff nga daghang mga tawo ang wala magsunod sa tambag sa Ginoo kabahin sa temporal nga mga butang. Ngano sa inyong hunahuna nga ingon man niini? (Tan-awa sa mga pahina 252–53. Unsa ang tambag nga gihatag sa bag-ong Presidente sa Simbahan mahitungod sa temporal nga mga butang?
Ribyuha ang ikaduhang paragrap diha sa pahina 254–55. Unsay mga kaayohan sa pisikal nga trabaho? Unsa sa inyong hunahuna ang ipasabut sa “maoy tighimo, ug dili lamang ang tiggamit”?
Unsa nga mga pasidaan ang gihatag ni Presidente Woodruff mahitungod sa kwarta? (Tan-awa sa mga pahina 255–60.) Unsa nga tambag ang iyang gihatag mahitungod sa utang? Unsay atong mabuhat aron mabatonan ang tukma nga panan-aw?
Sa unsang paagi ang mga ikapulo ug mga halad “makahatag og kaayohan sa matag usa ug sa kaayohan sa atong mga anak”? (Tan-awa sa pahina 255–56.)
Unsa ang gipasabut nganha kaninyo sa pagtulun-an sa Manluluwas diha sa Mateo 6:33? (Tan-awa usab sa mga pahina 258–60.)
Suhira ang hugna, pangita sa mga baruganan nga angay’ng itudlo sa mga ginikanan ngadto sa ilang mga anak. Unsa ang tino nga mga butang nga mabuhat sa mga ginikanan ngadto sa ilang mga anak aron itudlo kining mga baruganan? Unsay inyong naeksperensya sa pagkat-on ug sa pagtudlo niini nga mga baruganan?

May Kalabutan nga mga Kasulatan: Malaquias 3:8–11; Mateo 6:19–21; Santiago 2:14–26; Jacob 2:12–19; D&P 42:42; 58:26–28

family gardening — “Ang kada usa kinahanglan nga maghimo niini nga ikapasigarbo nga butang nga mahimong tiggama ug dili lamang usa ka pumapalit.”

class discussion — “Ang hilisgutan sa tukma nga edukasyon sa mga batan-on sa Zion mao ang usa sa pinakaimportante.”

couple managing finances — Ang ikapulo maoy usa ka “balaod nga gihatag aron sa pagbayaw kanato ug makahatag nato og kaayohan.”