Hugna 17

Buhat sa Templo: Pagpabalik sa Atong mga Kasingkasing ngadto sa Atong mga Pamilya ug sa Ginoo

Kon kita takus mosulod sa balay sa Ginoo, madawat nato ang mga ordinansa nga makatabang kanato nga maandam, sa atong mga katigulangan ug sa atong mga kaliwatan nga mopuyo sa presensya sa Dios sa kahangturan.

Gikan sa Kinabuhi ni Wilford Woodruff

Sa dihang gipahinungod ang Templo sa Kirtland niadtong Marso 27, 1836, si Wilford Woodruff nag-alagad og full-time misyon sa habagatang Estados Unidos. Paglabay sa tulo ka semana nadungog niya ang mga panghitabo sa dedikasyon ug misulat siya sa iyang journal nga ang balita “wala gyuy makatupong sa kamahimayaon.”¹ Pagkahuman sa iyang misyon, mibalik siya sa Kirtland, miabut “nga naglakaw diha sa kusog nga unos sa snow.” Mirekord siya, “Nakita namo ang templo sa Ginoo sa wala pa kami moabut sa lungsod, ug sa tinuoray nalipay gyud ako og maayo pagkakita kay kini man ang unang higayon nga nakakita ko og balay sa Ginoo nga gitukod pinaagi sa sugo ug pagpadayag.”²

Ang gugma ni Wilford Woodruff ’ sa buhat sa templo wala gayuy paglubad. Mitabang siya sa tanang bahin sa trabaho—gikan sa pagtukod hangtud sa pagpahinungod ug gikan sa buhat sa family history ngadto sa buhat sa ordinansa sa mga patay. Nalipay sab siya pag-ayo sa mga ordinansa sa templo nga nadawat niya ug sa miyembro sa iyang kaugalingong pamilya.

Kanunay magsulti si Presidente Woodruff niadtong higayon sa dihang iyang nadawat ang pagtuga [endowment]. Si Propeta Joseph Smith, nga nakamatikod nga ang iyang yutan-ong pagministro hapit na matapos, mitugyan sa pagtuga ngadto sa Korum sa Napulog Duha ka mga Apostoles sa Nauvoo, bisan wala pa mahuman ang templo. Si Presidente Woodruff mipamatuod: “Si Joseph Smith ang unang mipasabut nako sa mismong mga ordinansa nga gihatag nato sa mga Santos sa Ulahing mga Adlaw sa atong mga pagtuga. Nadawat nako ang akong mga tuga ubos sa direksyon ni Joseph Smith.”³

Isip miyembro sa Korum sa Napulog Duha ka mga Apostoles ug sa wala madugay isip Presidente sa Simbahan, si Wilford Woodruff mitabang sa mapadayonong paningkamot sa pagtukod og mga templo. Mitabang siya sa trabaho sa templo sa Nauvoo, Illinois, ug sa mga templo sa upat ka mga siyudad sa Utah: Logan, St. George, Manti, ug sa Dakbayan sa Salt Lake. Mihatag siya sa mga pahinungod nga pag-ampo sa mga templo sa Manti ug sa Dakbayan sa Salt Lake.

Ang Templo sa Salt Lake, nga nahuman sulod sa 40 ka tuig nga mga maunongong paghago sa mga Santos, adunay talagsaong kahulogan para ni Presidente Woodruff. Nakita niya ang templo sa detalye nga panan-awon sa wala pa moabut ang mga Santos sa Walog sa Salt Lake [Salt Lake Valley].⁴ Upat ka adlaw gikan sa ilang pag-abut sa walog, diha siya sa dihang si Presidente Brigham Young nadasig sa pagpili sa tukuranang dapit sa templo.⁵ Mga tuig una pa mahuman ang templo, nagdamgo siya nga gihatagan siya og yawe sa templo ug gipahimangnoan ni Presidente Young sa “pagpasulod sa templo sa tanan kinsa nangita og kaluwasan.”⁶ Usa siya sa walay kakapoy nga tigpasiugda aron mahuman ang templo, bisan gani sulod sa mga panahon sa pagsulay ug pagpanggukod. Ug sa dihang ang konstraksyon sa katapusan nahuman na niadtong Abril 1893, gituman niya ang tugon ni Presidente Young nga diha sa damgo, nag-organisar og tulo ka semana nga tulumanon sa pagpahinungod aron pagsiguro nga ang tanang mga Santos adunay kahigayunan sa pagtambong.

Human sa pagpahinungod sa Templo sa Salt Lake, si Presidente Woodruff mipasabut pag-ayo sa kamahinungdanon sa pamilya diha sa buhat sa templo. Miingon siya: “Buot kami nga ang mga Santos sa Ulahing mga Adlaw mosubay gikan karon sa ilang mga kagikan taman sa ilang maabot, ug ma-seal sila sa ilang mga amahan ug mga inahan. Ang mga anak ipa-seal ngadto sa ilang mga ginikanan, hiusahon ang mga kaliwatan taman sa inyong maabut.”⁷ (Aron pagbasa sa historikal nga asoy kalabut niini nga pagtulun-an, tan-awa sa mga pahina xxxvii–xxxix sa pasiuna niining libro.)

Niadtong 1894, si Presidente Woodruff midumala sa pagtukod sa Genealogical Society of Utah, diin midala sa tibuok kalibutan nga paningkamot sa Simbahan aron pagtabang sa mga tawo nga mosubay sa ilang mga kaliwatan. Paglabay sa usa ka gatus ka tuig, si Elder Russell M. Nelson sa Korum sa Napulog Duha ka mga Apostoles nakamatikod, “Ang mga hitabo nianang makasaysayong tuig nakapasugod sa family history research ug temple service isip usa ka buhat sa Simbahan.”⁸ Kining hitaboa kabahin sa nagpadayong katumanan sa panagna nga “ang mga kasingkasing sa mga anak mobati sa ilang mga amahan” (D&P 2:2; tan-awa usab sa Malaquais 4:5–6).

Tungod sa daghang makahuloganong mga pagtulun-an ni Presidente Woodruff sa buhat sa templo, kini ang unang duha ka mga hugna sa hilisgutan niini nga libro. Kini nga hugna nagpokus sa mga panalangin sa pagtambong sa templo ug sa walay katapusang kinaiyahan sa pamilya, ug ang hugna 18 nagpokus sa mga buhat alang sa mga patay.

Mga Pagtulun-an ni Wilford Woodruff

Moapil kita sa buhat sa templo uban sa langitnong kalipay, kay nasayud kita nga motabang kini sa pag-andam nato, sa atong mga kaliwatan, ug sa atong mga katigulangan nga mopuyo sa presensya sa Dios.

Wala gyuy buhat nga gitinguha pag-ayo sa mga Santos sa Ulahing mga Adlaw kaysa pagtukod ug paghuman sa mga templo.⁹

Kon maghunahuna ako sa gahum nga diha kanamo sa pagtukod sa mga Templo diha sa ngalan sa Labing Hataas nga Dios … ug ang mga pribilihiyo nga diha kanamo nga nakaadto niadtong mga Templo ug nakahimo sa buhat nga gikinahanglan alang sa among kaugalingong kaluwasan ug ingon man alang sa katubsanan sa atong mga patay, dako kaayo ang akong kalipay, ug gibati nga kita gipanalanginan gyud pag-ayo.¹⁰

Ang kasaysayan niini nga mga Templo anaa sa inyong atubangan. Nasayud kamo nga gipatay ang mga Propeta [Joseph ug Hyrum Smith], ug ang Ginoo nagmando nga magtukod og Templo [sa Nauvoo] gikan sa mga kamot sa mga Santos sa wala pa sila giabog ngadto sa kamingawan. Dihay usa ka pagpadayag nga gihatag nga hilabihang nakapadasig sa mga Elders sa Simbahan sa Dios aron pagpahigayon niana nga buhat [tan-awa sa D&P 124:25–41]. Naghago sila uban sa tibuok kusog diha kanila, ug nahuman gyud nila kadto nga trabaho. Misulod sila niadto nga Templo ug nakadawat sa mga ordinansa ug mga pagtuga sa wala pa sila mobiya paingon sa kamingawan. Kini nga mga Templo nga atong natukod … nagbuntaog isip monumento sa atubangan sa Dios, mga anghel ug mga tawo, sa hugot nga pagtuo ug buhat sa mga Santos sa Ulahing mga Adlaw.¹¹

Klaro kaayo nga ang mga Santos sa Ulahing mga Adlaw mapasalamaton sa mga panalangin nga mahimong maangkon pinaagi niining buhat sa Templo. … Ang among mga kasingkasing puno sa kalipay ug dili kapugngan nga modayeg sa atong Dios ug sa Iyang kamaayo ngadto sa Iyang mga tawo sa paghatag kanila og kahigayunan, bisan pa man sa oposisyon ug sa daghang mga kalisud nga ilang gisagubang, aron pagtukod sa maong bilding ug pagpahinungod niini, sumala sa sumbanan nga Iyang gihatag niining sagrado nga mga katuyoan.

Kada Santos sa Ulahing Adlaw nga dunay hustong pangisip kabahin niining butanga bation gyud og kahinam uban sa langitnong kalipay kon unsa ang nabuhat sa Dios alang kanato sa atong henerasyon, naghatag kanato, sama sa Iyang gihimo, sa tanang pamaagi sa pag-andam kanato, sa atong kaliwatan ug sa atong mga katigulangan alang nianang mahangturong kalibutan nga anaa lapas niining kinabuhia. Ang mga Santos sa Ulahing mga Adlaw, sa pagkatinuod, pinalabi kaayo nga mga tawo, ug ang pagdayeg sa Dios kinahanglan mokayab gikan sa kada kasingkasing ug panimuyo sa atong yuta tungod sa dakong kalooy ug kaayo nga Iyang gipakita kanato. Mihatag Siya kanato og saad nga labing bilihon, ug Iya kanang gituman hangtud karon. Tingali kita na ang pinakawalay utang buot ug dili takus nga mga tawo nga sukad nabuhi kon, human nato madawat ang ingon ka talagsaong mga pagpakita sa Iyang kaayo, nagtinapulan kita o napakyas sa atong pagsunod ug pagmahal Kaniya ug sa Iyang dakong katuyoan.¹²

Buot natong ipadayon kining mga templo. Buot kita nga mapuno kini sa mga Santos sa Ulahing mga Adlaw. Buot kita nga ang atong mga kaigsoonan magpadayon sa pag-adto didto ug motubos sa mga patay ug manalangin sa mga buhi.¹³

Gikan sa pag-ampo sa pagpahinungod sa Templo sa Salt Lake: O Ginoo, among giisip uban sa mainiton ug dili matukib nga mga pagbati ang pagkahuman niining sagradong balay. Itugot ang pagdawat niining ikaupat nga templo diin ang imong sinaaran nga mga anak imong gitabangan sa pagpabarug dinhi niini nga mga bukid. Sa miaging mga panahon imong gidasig uban sa imong Balaang Espritu ang imong mga sulugoon, ang mga Propeta, sa pagsulti bahin sa usa ka panahon sa ulahing mga adlaw sa dihang ang balay sa Ginoo matukod sa ibabaw sa mga bukid, ug ihimaya ibabaw sa mga bungtod [tan-awa sa Isaias 2:2; Micah 4:2]. Mapasalamaton kami niining mahimayaon nga kahigayunan sa pag-abag sa katumanan niini nga mga panan-awon sa imong karaang mga manalagna, ug makiangayon ikaw nga mitugot kanamo nga makaapil sa mahinungdanong buhat.¹⁴

Pinaagi sa buhat sa family history ug sa mga ordinansa sa templo, kita gi-seal ngadto sa atong mga pamilya, naghimo og tiunay nga panagsumpay tali sa mga henerasyon.

Ang mga baruganan sa ebanghelyo ni Jesukristo adunay gahum ug epekto human sa kamatayon; modala kini sa paghiusa sa mga bana ug sa ilang mga asawa ug mga anak sa organisasyon sa pamilya ug manag-uban pag-usab sa mga kalibutan nga walay katapusan. … Ngadto sa mga Santos sa Ulahing mga Adlaw ang mga ordinansa sa pag-seal gipadayag na, ug kini adunay epekto human sa kamatayon, ug ‘sa gikaingon ko na, mag-uban pag-usab ang bana ug asawa sa kahangturan sa pamilya nga organisasyon. Mao gani kon ngano nga kining mga baruganan kabahin sa atong relihiyon, ug pinaagi kanila ang mga bana ug mga asawa, mga ginikanan ug mga anak mag-uban pag-usab hangtud nga ang mga dugtong sa kadena masumpay og balik ngadto sa Amahang Adan. Dili nato maangkon ang kahingpitan sa celestial nga himaya kon wala kining ordinansa sa pag-seal.¹⁵

Mga kaigsoonan, ang himaya niining tanan mao, nga kon kita makahuman na maangkon nato ang atong mga pamilya—ang atong mga amahan ug atong mga inahan, ang atong mga igsoong lalaki ug babaye, ang atong mga asawa ug mga anak—unya sa buntag sa pagkabanhaw, sa pamilya nga organisasyon sa celestial nga kalibutan, aron mopuyo hangtud sa hangtud. Kini mao ang tugbang nga bili sa tanan ninyo o sa akong pagsakripisyo sa pipila ka tuig niining atong pagpuyo sa yuta.¹⁶

Himoa nga ang tanang tawo [ma-seal] ngadto sa iyang amahan; ug dayon mobuhat gyud kamo sa husto unsa ang gisulti sa Dios sa dihang mipahayag Siya nga Iyang ipadala si Elias ang propeta sa katapusang mga adlaw [tan-awa sa Malaquias 4:5–6]. Si Elias ang propetang mipakita ngadto ni Joseph Smith ug misulti kaniya nga ang adlaw moabut nga kini nga baruganan ipahinabo gyud [tan-awa sa D&P 110:13–16]. Si Joseph Smith wala mabuhi og dugay aron makatuon ug makasulti niining mga butanga. Iyang gihalad ang kaugalingon niini nga buhat sa wala pa siya gipatay tungod sa pulong sa Dios ug sa pagpamatuod ni Jesukristo. Miingon siya kanato nga duna gayuy tiunay nga sumpay sa tanang dispensasyon ug sa buhat sa Dios gikan sa usa ka henerasyon ngadto sa lain [tan-awa sa D&P 128:18]. Diha na kini sa iyang hunahuna labaw pa sa ubang butang nga gihisgutan nga nahatag kaniya.

Sa akong mga pag-ampo ang Ginoo mipadayag kanako nga akong katungdanan ang pagsulti ngadto sa tanan sa Israel sa pagtuman niini nga baruganan, ug agi og katumanan niini nga mga pagpadayag ako kining gitudlo sa mga tawo. … buot kami nga ang mga Santos sa Ulahing mga Adlaw gikan karon mosubay sa ilang mga kaliwatan taman sa ilang mahimo, ug ma-seal sa ilang mga amahan ug mga inahan. Ang mga anak ipa-seal sa ilang mga ginikanan, ug ipadayon kini kutob sa inyong maabut.¹⁷

Gikan sa pag-ampo sa pagpahinungod sa Templo sa Salt Lake: Among Amahan sa langit, among ihatag diha kanimo ang mga altar nga among giandam alang sa imong mga sulugoon nga mga lalaki ug babaye sa pagdawat sa ilang mga panalangin nga ma-seal. Amo kining ipahinungod sa pangalan sa Ginoong Jesukristo, ngadto sa sa imong labing balaang pangalan, ug nangayo kami kanimo sa pagbalaan niini nga mga altar, nga kadtong mosulod niini mahimong mobati sa gahum sa Espiritu Santo nga mokunsad kanila, ug makaamgo sa kasagrado sa mga pakigsaad nga ilang gihimo. Ug among iampo nga ang among mga pakigsaad ug mga panumpa nga among gihimo diha kanimo ug sa usag usa mahimong magiyahan sa Balaang Espiritu, nga sagradong gihuptan namo ug gidawat nimo, ug nga ang tanang mga panalangin nga gisaad mahimong matuman sa tanang mga Santos nga moampo niini nga mga altar, sa buntag sa pagkabanhaw sa mga makiangayon.…

O ikaw ang Dios sa among mga katigulangan, nga si Abraham, Isaac, ug Jacob, kinsang Dios mahimuot nga pagatawgon, mapasalamaton kaayo kami kanimo sa naghingaping pasalamat nga imong gipadayag ang mga gahum diin ang mga kasingkasing sa mga anak mobati ngadto sa ilang mga amahan ug ang mga kasingkasing sa mga amahan ngadto sa ilang mga anak, nga ang mga anak sa katawhan, sa tanan nilang mga henerasyon mahimong makaambit sa mga himaya ug sa kalipay sa gingharian sa langit. Ipamatuod kanamo ang espiritu ni Elias, nag-ampo kami kanimo, nga unta matubos namo ang among mga patay ug usab magkadugtong ang among mga kaugalingon uban sa among mga amahan kinsa patay na, ug dugang pa i-seal ang among mga patay nga maapil sa unang pagkabanhaw nga kami kinsa nagpuyo sa yuta unta mahimong mabugkos niadtong kinsa nagpuyo sa langit. Nagpasalamat kami kanimo tungod kanila kinsa nakahuman na sa ilang buhat sa mortalidad, ingon man alang sa among kaugalingon, nga ang mga pultahan sa prisohan maablihan na, nga ang kaluwasan gipahayag ngadto sa binilanggo, ug ang mga bugkos nahubad na niadtong gigapos. Nagdayeg kami kanimo nga ang among mga amahan, gikan sa katapusan ngadto sa sinugdanan, gikan karon, balik ngadto sa sinugdanan, mahimong mahiusa uban kanamo sa dili mabugto nga mga dugtong, hiniusa sa balaan nga Priesthood, ug isip usa ka talagsaong pamilya gihiusa diha kanimo ug gilig-on pinaagi sa imong gahum mag-uban kaming mobarug sa imong atubangan, ug pinaagi sa gahum sa matubsanong dugo sa imong Anak maluwas gikan sa tanang dautan, mahimong maluwas ug mabalaan, mabayaw ug mahimaya.¹⁸

Espirituhanon gayud kitang mangandam aron madawat ang mga panalangin sa temple service.

Sa dili pa kamo moadto sa Templo, … pag-inusara, nga sekretong mag-ampo. Ihalad ang inyong mga pag-ampo sa Ginoo, ug mag-ampo nga ang inyong mga sala dili lang mapasaylo, apan kamong tanan unta makabaton sa Espiritu sa Dios ug pamatuod sa Ginoong Jesukristo; nga ang Espiritu sa Dios maanaa unta niadtong kinsa moadto sa Templo. …

Nagtinguha ako nga ang mga Santos mobuhat niini, tungod kay nangandoy kong makakita niadtong mosulod sa Templo nga mosulod uban sa putling mga kasingkasing, ug nga ang Espiritu sa Dios magauban kanila, nga sila malipay, nga sila untang tanan mobati sa impluwensya niana nga gahum.¹⁹

Walay miyembro sa Simbahan kinsa giisip nga takus mosulod nianang sagrado nga balay nga matawag natong ignorante sa mga baruganan sa Ebanghelyo. Maoy gilauman nga kada usa nasayud unsay iyang katungdanan sa Dios ug sa iyang isigkatawo. Walay malimtanon kaayo nga makalimot sa pahimangno nga kita kinahanglan mapuno sa putling gugma alang sa atong mga kaigsooan. Ug busa walay usa nga bisag sa unsang panahon magduda sa hilabihan ka importante sa kada miyembro sa kongregasyon nga makigdait sa tanan niyang mga kaigsoonan, ug may kadait sa Dios. Unsaon pa man nato paglaum nga makaangkon sa mga panalangin nga Iyang gisaad kon dili sa pagtuman sa mga sugo diin kadtong mga panalangin mao ang ganti!

Ang mga lalaki ug mga babaye nga misupak sa balaod sa Dios, o kadtong napakyas sa pagtuman sa Iyang mga sugo, makapaabut ba nga bisan ang pagsulod lang sa Iyang balaang balay … makapahimo na nilang takus nga modawat, ug makahimo nila nga modawat, sa Iyang panalangin?

Nagtuo ba sila nga ang paghinulsol ug pagbiya sa ilang mga sala dali ra nga mapasaylo?

Mangahas ba sila, bisan sa hunahuna lang, nga mopasangil sa atong Amahan og inhustisya ug nga may pinalabi, ug mopasangil Kaniya sa kawalay pag-amping nga tumanon ang Iyang kaugalingong mga pulong?

Sigurado gayud nga walay usa nga nahisakop sa Iyang katawhan nga moangkon nga nahimong sad-an sa maong butang.

Nan kinsa kadtong dili takus dili makapaabut sa panalangin tungod lang sa ilang pagsulod sa Templo samtang ang wala mahinulsoling mga sala nagpahugaw pa kanila, ug samtang ang kaligutgot o gani walay kadasig sa pagpasaylo sa ilang mga kaigsoonan anaa pa sa ilang mga kasingkasing.

Niining ulahing hilisgutan atong bation nga daghan pang angay isulti. Sa tinguha nga matuman ang klarong kaayo nga labi pang mahinungdanong mga butang sa kasugoan, adunay posibilidad nga ang kabililhon niini nga espiritu sa gugma ug kalooy ug pagkamahatagon mahimong giisip nga dili kaayo importante. …

… Sa dili pa mosulod sa Templo aron paghalad sa atong mga kaugalingon ngadto sa Ginoo …, atong tangtangon gikan sa atong mga kaugalingon ang tanang mapintas ug walay kalooy mga pagbati batok sa usag usa; nga dili lang kay atong mga panagbingkil ang hunongon, apan ang hinungdan niini wagtangon, ug ang tanang sentimyento nga nag-aghat ug nagpabilin niini mawala na; nga kita motug-an sa atong mga sala sa usag usa, ug mangayog pasaylo sa usag usa; nga kita mangamuyo sa Ginoo uban sa espiritu sa paghinulsol, ug, kon maangkon na kini, mosunod sa mga pagaghat niini, aron sa pagpaubos sa atong mga kaugalingon sa Iyang atubangan ug sa pagpangayo og pasaylo sa usag usa, atong mahatag kanang putling gugma ug kaaghup niadtong kinsa uhaw sa atong pagpasaylo nga atong gipangayo ug gipaabut gikan sa Langit.

Busa moadto kita sa balaang dapit nga ang atong mga kasingkasing walay pagpakaron-ingon ug ang atong mga kalag andam sa kaayohan nga gisaad! Sa ingon ang atong mga pangamuyo, dili matugaw sa panagbingkil, ang tanan moabut ni Jehovah ug mabubu ang piniling mga panalangin sa Dios sa Langit! …

… Moawhag kami [sa matag miyembro sa Simbahan] nga maninguha sa pagpakigdait sa ilang mga kaigsoonan, ug sa ilang tibuok nga pagsalig ug gugma; labaw sa tanan maninguha sa pagpakigdait ug paghiusa sa Espiritu Santo. Tuguti kini nga Espiritu tinguhaon ug mahalon ingon kamakugihon sulod sa kinagamyan ug kinaubsan diha sa pamilya sama sa pagkamiyembro sa pinakataas nga organisasyon ug korum. Unta kini motuhop sa mga kasingkasing sa mga kaigsoonan, sa mga ginikanan ug mga anak diha sa panimalay, ingon man sa mga kasingkasing sa Unang Kapangulohan ug sa Napulog Duha. Unta kini mopalumo ug mohumok sa tanang panagsumpaki tali sa mga miyembro sa mga Stake Presidencies ug sa mga High Council, ingon man tali sa mga silingan nga nagpuyo sa amo gihapong ward. Unta maghiusa ang mga batan-on ug mga tigulang, lalaki ug babaye, ang kongregasyon ug mga lider, mga tawo ug ang Priesthood diha sa mga bugkos sa pagpasalamat ug pagpasaylo ug gugma, aron [kita] bation nga gikahimut-an sa Ginoo, ug nga kita unta moatubang kaniya uban sa iyang atubangan uban sa tanlag nga walay sala sa isig katawo. Dayon wala nay kapakyasan bahin sa mga panalangin nga gisaad ngadto sa kinasingkasing nga nagsimba Kaniya. Ang tam-is nga mga pagdasig sa Balaang Espiritu ihatag kanila ug ang mga bahandi sa Langit, ang pagpakigsulti sa mga anghel, idugang matag karon ug unya, kay ang Iyang saad gihatag na ug kini dili makawang!²⁰

Gikan sa pag-ampo sa pagpahinungod sa Templo sa Salt Lake: Among Amahan sa Langit, ikaw kinsa nagbuhat sa mga langit ug sa yuta, ug sa tanang mga butang nga anaa niini; ikaw nga labing mahimayaon, hingpit sa kalooy, gugma, ug kamatuoran, kami, nga imong mga anak, midangup karong adlawa sa imong atubangan ug niini nga balay nga among gitukod sa imong labing balaang pangalan mapaubsanong nangamuyo sa hiyas sa matubsanong dugo sa imong Bugtong Anak, nga unta ang mga sala dili na mahinumduman pa batok kanamo sa kahangturan, apan nga ang among mga pag-ampo unta mopaabut diha kanimo ug gawasnong makaduol sa imong trono, nga kami unta madungog diha sa imong balaang pinuy-anan. Ug unta kini makapahimuot kaayo kanimo aron maminaw sa among pangilyupo, motubag niini sumala sa imong walay kinutubang kaalam ug gugma, ug tugoti nga ang mga panalangin nga among gitinguha unta ibubo ngari kanamo, gani gatusan ka pilo, ug kay kami nagtinguha nga may kaputli sa kasingkasing ug kahingpitan sa katuyoan sa pagbuhat sa imong kabubut-on ug mohimaya sa imong pangalan. …

Ania kami sa imong atubangan uban sa kalipay ug pasalamat, uban sa mga espiritu nga malipayon ug mga kasingkasing nga puno sa pagdayeg, nga kami imong gitugutan nga makita karong adlawa diin, sulod niining kwarenta ka tuig, naglaum kami, ug naghago, ug nag-ampo, nga makapahinungod kami diha kanimo niini nga balay diin among gitukod sa imong labing mahimayaong pangalan. Usa ka tuig ang milabay among gipahimutang ang tabong bato [capstone] uban sa mga singgit nga Hosanna sa Dios ug sa Kordero. Ug karon among ipahinungod ang tibuok diha kanimo, uban sa tanan nga may kalabutan niini, nga unta kini balaanon sa imong panan-aw; nga unta kini mahimong balay sa pag-ampo, balay sa pagdayeg ug pagsimba; nga ang imong himaya maanaa niini; nga unta ang imong balaang presensya magpadayon nga maanaa niini; nga unta kini ang mahimong pinuy-anan sa imong pinalanggang Anak, ang among Manluluwas; nga ang mga anghel kinsa anaa sa imong atubangan mahimong balaang mensahero kinsa mobisita niini, magdala kanamo sa imong tinguha ug imong kabubut-on, nga unta kini mahimong mabalaan ug mapahinungod sa tanang bahin nga balaan nganha kanimo, ang Dios sa Israel, ang Labing Makagagahum nga Magmamando sa katawhan. Ug kami nag-ampo nga ang tanang tawo kinsa mosulod sa tugkaran niini, sa imong balay, unta bation sa imong gahum ug mapugos sa pag-ila nga ikaw mipabalaan niini, nga kini imong balay, usa ka dapit sa imong kabalaan.²¹

Mga Sugyot sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa man ang hunahuna ni Elder Wilford Woodruff sa dihang nakadungog siya sa pagpahinungod sa Templo sa Kirtland ug sa dihang nakakita siya sa templo sa unang higayon? (Tan-awa sa pahina 191–92.) Duna ba kamoy susama nga mga kasinatian nga angay ipakigbahin?
Sa unsa man nga mga paagi nga ang unang mga Santos sa Ulahing mga Adlaw mipakita og interes sa mga templo? (Tanawa sa mga pahina 193–94.) Ngano man nga kita angay “mainteresado kaayo” sa buhat sa templo?
Ribyuha ang katapusang paragrap sa pahina 192–93. Sa unsang paagi nga inyong nakita ang temple service ug family history research nga “hiniusang buhat”? (Tan-awa sa mga pahina 193–97.) Giunsa niini kini nga trabaho pagtabang kaninyo nga mobati ang inyong mga kasingkasing ngadto sa inyong mga katigulangan ug sa inyong mga kaliwatan?
Nganong nagkinahanglan kita sa ordinansa sa pag-seal aron “maangkon ang kahingpitan sa celestial nga himaya”? (Tanawa sa mga pahina 196; tan-awa usab sa D&P 131:1–4.)
Paklia ang tibuok hugna, pangitaa ang mga pamahayag bahin sa pakigrelasyon sa pamilya. Unsa man ang atong makat-unan gikan niini nga mga pagtulun-an? Sa unsa man nga paagi nga ang atong pagsabut sa balay sa Ginoo makaimpluwensya sa atong mga pagbati bahin sa atong kaugalingong mga panimalay?
Sa unsang mga paagi nga ang pagtambong sa templo mipanalangin kaninyo ug sa inyong pamilya? Unsaon man sa mga ginikanan pagtudlo sa ilang mga anak sa pagbalaan sa templo ug pag-andam sa pagdawat sa mga ordinansa sa templo?
Mga pahina 196–98 naglakip sa pipila ka mga tambag ni Presidente Woodruff’ aron pagtabang sa mga Santos sa pag-andam sa pagpahinungod sa Templo sa Salt Lake. Sa unsa man nga paagi nga kini nga mga tambag makatabang kanato sa kada higayon nga kita mosulod sa templo?
Unsa man ang pipila ka mga baruganan nga gitudlo sa pag-ampo sa pagpahinungod sa Templo sa Salt Lake? (Tan-awa sa mga pahina 196–98, 198–9.) Hinuktuki o hisguti kon sa unsang paagi nga ang mga pulong sa pag-ampo makatabang kanato sa atong paningkamot sa paghimo sa buhat sa templo ug sa family history.

May Kalabutan sa mga Kasulatan: Mga Salmo 24:3–5; Mateo 16:18–19; D&P 27:9; 97:10–17; 109; 110; 138:46–48

family heirlooms — “Buot kami nga ang mga Santos sa Ulahing mga Adlaw … mosubay sa ilang mga katigulangan kutob sa ilang mahimo, ug i-seal sila sa ilang mga amahan ug mga inahan.”

Salt Lake Temple dedication ticket — Mga rekomen sama niini gipanghatag sa mga miyembro sa Simbahan nga takus motambong sa tulumanon sa pagpahinungod sa Templo sa Salt Lake.