Hugna 4

Ang Gahum ug Awtoridad sa Balaang Priesthood

Gitugyan sa Dios ang priesthood diha sa Iyang mga katawhan alang sa ilang panalangin ug kahimayaan.

Gikan sa Kinabuhi ni Wilford Woodruff

Sa iyang pagkabatan-on, naghandom si Wilford Woodruff nga makakita sa usa ka simbahan nga dunay tinuod nga awtoridad sa priesthood—nga adunay “gahum nga giila sa langit ug dinhi sa yuta.”¹ Sa iyang pakigpulong niadtong 1889, siya misaysay:

“Mitambong ako og Sunday school, sa akong pagkabata. … Niana nga Sunday school gibasa nako ang Bag-ong Tugon. Nakakaton ako gikan sa mga bersikulo ug mga kapitulo. Unsa ang gitudlo sa Bag-ong Tugon kanako? Nagtudlo kini kanako sa Ebanghelyo sa kinabuhi ug kaluwasan; nagtudlo kini kanako sa gahum sa Ebanghelyo sa langit ug sa yuta. Nagtudlo kini kanako nga ang organisasyon sa Simbahan naglangkob sa mga Propeta, mga Apostoles, mga Pastor, ug mga Magtutudlo, uban sa tabang ug panggobyerno. Alang sa unsa? ‘Alang sa kahingpitan sa mga Santos, alang sa buhat sa pangalagad: alang sa paglig-on sa lawas ni Kristo, hangtud makakat-on kitang tanan sa panaghiusa sa pagtuo sa kahibalo mahitungod sa Anak sa Dios, ug makakab-ot sa kahamtong sa pagkatawo, sa sukod sa gidak-on sa kahupnganan ni Kristo.’ [Tan-awa sa 1 Mga Taga-Corinto 12:28; Mga Taga-Efeso 4:11–13.]

“Mao kining mga butanga nga akong nakat-unan, ug nakahatag kini og impresyon kanako. Mituo ako niini; pero wala pa gayud ako makadungog nga kini gitudlo ni bisan kinsa nga pari o ministro dinhi sa yuta. Sa akong pagkabatan-on mitambong ako og mga miting sa hapit tanang mga denominasyon. Usa ka higayon niana miapil ako og usa sa dakong miting nga gihimo didto sa Connecticut, diin kwarenta o singkwenta ka mga ministro sa lain-laing mga denominasyon ang nagpundok. Nag-ampo sila sa pagkunsad sa Espiritu Santo ug alang sa daghang maayong mga butang. Niining mitinga gitugutan si bisan kinsa nga mohimo og pakigpulong. Batan-on pa ako niadtong panahona. Mibarug ako ug miadto sa may agianan ug miingon ako ngadto sa pundok sa mga ministro: ‘Mga higala, mahimo bang sultihan ako ninyo nganong wala man kamo makigbisog sa paghisgot sa tinoohan nga sa makausa gitugyan ngadto sa mga balaan? Sultihi ako nganong wala man kamo makigbisog alang sa Ebanghelyo nga gitudlo ni Jesukristo, ug gitudlo sa Iyang mga Apostoles? Nganong dili man kamo makigbisog alang niana nga relihiyon nga mohatag kaninyo og gahum sa atubangan sa Dios, gahum sa pag-ayo sa masakiton, sa paghimo sa buta nga makakita, sa kimpang nga makalakaw, ug kanang makahatag kaninyo sa Espiritu Santo ug kadtong mga gasa ug mga grasya nga gipakita gikan sa pagkalalang sa kalibutan? Nganong dili man ninyo tudloan ang mga tawo niadtong mga baruganan nga gitudlo sa karaang mga Patriyarka ug mga Propeta samtang sila nadasig sa mga pagpadayag sa Dios? Nangalagad ang mga anghel kanila; duna silay mga damgo ug mga panan-awon, ug kanunay nga pagpadayag sa paggiya ug pagtudlo kanila sa dalan nga ilang pagalaktan.’

“Ang nagdumalang elder mingon: ‘Mahal kong batan-ong lalaki, maalamon kaayo ikaw nga tawo, ug mapuslan sa kalibutan, kon dili ka motuo niadtong binuang nga mga butang. Kining mga butanga gihatag ngadto sa mga anak sa tawo sa mangitngit nga panahon sa kalibutan, ug gihatag kini sa tuyo nga malamdagan ang mga anak sa mga tawo nianang panahona, aron sila motuo ni Jesukristo. Karon nagpuyo na kita sa kahayag sa mahimayaong kahayag sa ebanghelyo, ug wala kita magkinahanglan niadtong mga butanga.’ Miingon ako: ‘Nan ihatag kanako ang mangitngit nga mga panahon sa kalibutan; ihatag kanako kadtong mga panahona sa dihang ang mga tawo nakadawat niining mga baruganan.’”²

Niadtong Disyembre 29, 1833, si Wilford Woodruff sa katapusan nakadungog sa ebanghelyo gikan sa may gitugutan nga mga sulugoon sa Dios. Iyang nahinumduman: “Sa unang higayon sa akong kinabuhi, nakita nako ang Elder sa Simbahan ni Jesukristo sa mga Santos sa Ulahing mga Adlaw. Siya mao si Zera Pulsipher. Miingon siya kanako nga gidasig siya sa Ginoo. Naggiok siya og mga pasi sa iyang kamalig sa dihang iyang nadungog ang tingog sa Ginoo ug misulti kaniya sa pagbarug ug sa pag-adto sa amihanan, ang Ginoo adunay ipabuhat niya didto. Iyang gitawag si Brother [Elijah] Cheney, ang iyang silingan ug miyembro sa Simbahan. Milakaw sila og saysenta ka mga milya … agi sa baga nga snow, ug ang unang lugar nga ilang gibati nga duolon mao ang akong balay ug sa akong igsoong lalaki. Misulod sila sa balay ug nakigsulti sa asawa sa akong igsoon, ug misulti kaniya kon si kinsa sila ug unsay ilang tuyo. Sila miingon nga sila gisugo sa pag-anhi sa amihanan, ug wala gayud nila batia nga mohunong bisan asa hangtud miabut sila niana nga balay. Sa dihang gisultihan nila siya sa ilang mga baruganan, miingon siya nga ang iyang bana ug bayaw nga lalaki mga tawo nga mituo niana nga mga baruganan, ug nag-ampo sila alang niini sulod sa daghang katuigan. Mitakda sila og miting sa eskwelahan diha sa among uma.

“Mipauli ako sa pagkagabii, ug ang akong bayaw nga babaye misulti nako kabahin niini nga miting. Naghakot ako og mga troso gikan sa baybayon sa Lake Ontario (nagnegosyo ako og lumber), ug akong gitugway ang akong mga kabayo, ug wala na ako mouli aron mokaon, ug midiretso ngadto sa miting. Akong nakita ang balay ug ang nataran nga napuno sa tawo. Naminaw ako sa unang higayon sa akong kinabuhi sa usa ka sermon sa Ebanghelyo nga gitudlo sa mga Elder niini nga Simbahan. Mao kadto ang akong gipangita gikan pa sa akong pagkabata. Akong giimbitar sila sa akong balay. Akong gihulaman ang Basahon ni Mormon, ug wala matulog sa tibuok gabii ug nagbasa. Pagkabuntag akong giingnan si Brother Pulsipher gusto akong magpabunyag. Duna akoy pagpamatuod sa kaugalingon nga kadtong mga baruganan tinuod. Ako ug ang akong igsoong lalaki … nagpabunyag—ang unang duha niana nga lalawigan.”³

Si Elder Pulsipher mibunyag ni Wilford Woodruff sa sapa niadtong Disyembre 31, 1833, ug mikumpirma kaniya nianang adlawa. Paglabay sa tulo ka adlaw, si Wilford Woodruff nakadawat sa Aaronic Priesthood ug giordinahan ngadto sa katungdanan nga usa ka teacher. Mao kini ang sinugdanan sa tibuok kinabuhi nga pangalagad sa pagserbisyo sa Dios. Sa paghinumdom niadtong adlawa, miingon siya, “Ang akong misyon nagsugod gyud dayon.”⁴

Mga Pagtulun-an ni Wilford Woodruff

Ang Dios mohimo sa Iyang tanang mga buluhaton pinaagi sa gahum sa priesthood.

Wala akoy nahibaloan nga bisan unsa nga hilisgutan sa Simbahan nga mas importante alang sa mga lumulupyo sa yuta ug sa atong mga kaugalingon kay sa Balaan nga Priesthood.⁵

Pinaagi sa gahum [sa] Priesthood, ang Dios, nga atong Mahangturong Amahan, miorganisar sa tanang mga kalibutan, ug mitubos sa tanang mga kalibutan nga sukad natubos. Pinaagi nianang maong Priesthood ang mga lalaki mipahigayon sa mga ordinansa dinhi sa yuta sa Ebanghelyo ni Kristo.⁶

Ang Dios makigsulti ug makigsabot sa tawo pinasubay sa Balaang Priesthood dinhi sa yuta; ug ang langitnong mga mensahero nga nakabisita sa yuta aron sa pagpahayag sa mga tawo nga naghupot ug nagtahud sa priesthood samtang ania sa yuta; ug ang tanan nga gustong himoon sa Dios alang sa kaluwasan sa tawo, sukad pa sa pag-anhi sa tawo sa yuta hangtud sa katubsanan sa kalibutan, gihimo ug pagahimoon pinaagi sa hiyas sa walay katapusan nga priesthood,⁷

Wala gayuy Simbahan sa Ginoo sa ibabaw sa yuta, gikan sa unang pagkabuhat niini hangtud karon, gawas kon kana nga simbahan giorganisar pinaagi sa pagpadayag, nga adunay mga propeta ug mga apostoles, mga pastor, mga magtutudlo, mga tabang ug mga panggobyerno nga gitugahan sa Balaang Priesthood—kana nga gahum nga gitugyan gikan sa Dios ngadto sa tawo, nga naghatag kaniyag katungod sa pagbuhat alang sa Dios; ug kon wala kini nga Priesthood walay tawo, sukad sa adlaw sa pagkabuhat sa kalibutan, adunay katungod sa pagpangalagad sa bisan unsang mga ordinansa sa iyang balaan nga balay, ni si bisan kinsang tawo adunay katungod niana nga Priesthood gawas kon siya gitawag sa Dios sama ni Aaron kinsa, nga kita giingnan, gitawag pinaagi sa pagpadayag [tan-awa sa Mga Hebreohanon 5:4]. Alang sa unsa kini nga Priesthood? Kini gamiton sa pagpangalagad sa mga ordinansa sa Ebanghelyo, bisan ang Ebanghelyo sa atong Amahan sa Langit, ang mahangturong Dios, ang Elohim sa mga Judeo ug ang Dios sa mga Hentil.⁸

Walay tawo nga dunay awtoridad gikan sa Dios sa pagpangalagad ngadto sa mga anak sa katawhan sa mga ordinansa sa kinabuhi ug kaluwasan [gawas lamang] sa gahum sa Balaang Priesthood. Ang gahum sa mao nga Priesthood anaa sa mga Santos sa Ulahing mga Adlaw.⁹

Ang mga naghupot sa Priesthood kinahanglang mogamit niana nga priesthood sa pagserbisyo ug pagpalambo sa gingharian sa Dios, dili ang pagpasigarbo sa ilang mga kaugalingon.

Pagkadako niini nga responsibilidad nga maghupot niining langitnon, niining mahangturon, niining walay katapusan nga Priesthood! Ug kita manubag niini. Ang mga Apostoles, mga Seventy, mga High Priest, mga Elder, ug ang tanang mga lalaki kinsa naghupot og bisan unsa nga bahin niini nga Priesthood nga gihatag kanato, may tulubagon niini.¹⁰

Aduna kitay mga buluhaton nga gisangon kanato. Si Joseph Smith aduna, si Brigham Young aduna, ang Napulog Duha aduna, kitang tanan aduna, ug kita panghimarauton kon dili nato kini tumanon. Mahibaloan nato kini kon moabut na kita sa kalibutan sa espiritu. … Daghan nang panahon sa akong pagpamalandong nga gusto unta nako nga masabtan gayud ang akong responsibilidad ngadto sa Dios, ug ang responsibilidad sa tanang tawo kinsa naghupot sa priesthood niini nga henerasyon. Pero sultihan nako kamo, mga kaigsoonan, ako nagtuo nga ang atong mga kasingkasing gipahimutang ra kaayo diha sa mga butang niini nga kalibutan. Wala kita magtamud, isip mga lalaki nga naghupot sa Balaang Priesthood niini nga henerasyon, sa dako kaayo nga responsibilidad ubos sa Dios ug sa kahitas-an, ingon man usab sa yuta. Sa akong pagtuo layo ra kaayo kita sa Ginoo.¹¹

Kon kita …, nga naghupot sa balaan nga priesthood, mogamit niana nga priesthood sa laing katuyoan gawas sa pagpalambo sa Gingharian sa Dios, kon buhaton nato kini ang atong gahum mahanaw. … Daghang maayong mga tawo nga misulay sa pagbuhat niini—mga lalaki nga anaa sa halangdon nga Priesthood, bisan anaa sa pagka-Apostol—sa pagbayaw sa ilang mga kaugalingon pinaagi sa awtoridad sa priesthood. Ug asa na sila? Mahimong moingon kamo og amen sa ilang gahum ug katungod. … Hunahunaon nato kining mga butanga. Mao usab ang akong isulti sa akong kaugalingon. Mao ra gihapon ang akong isulti sa mga Apostoles, mga Seventy ug mga High Priest. Dili ninyo magamit ang priesthood sa laing mga katuyoan gawas sa pagpalambo sa gingharian ug pagbuhat sa kabubut-on sa Dios; ug kon kamo mosulay sa pagbuhat og lain ang inyong gahum pagakuhaon gikan kaninyo.¹²

Gibasa nako pag-ayo kadto nga pagpadayag nga gihatag ngadto ni Joseph Smith agig tubag sa iyang pag-ampo didto sa Bilanggoan sa Liberty [tan-awa sa D&P 121:34–46]. Akong giisip kana nga usa ka pagpadayag sa Dios ngadto niana nga tawo, paglakbit sa pipila ka mga pulong naglakip kini og daghang mga doktrina sa pagpadayag sa Dios nga gihatag ngadto sa tawo. Iyang gipasabut si Joseph nga siya naghupot sa priesthood, nga ang mao nga priesthood pinasubay sa kapunongan sa Dios, han-ay sa kapunongan ni Melchizedek, sa samang priesthood nga gigamit sa Dios mismo sa pagpahigayon sa Iyang tanang mga buhat didto sa langit ug dinhi sa yuta, ug si bisan kinsa nga tawo nga naghupot niana nga priesthood adunay sama nga gahum. Kana nga priesthood adunay komunikasyon sa kalangitan, gahum sa pagbalhin sa mga langit, gahum sa pagpahigayon sa buhat sa kalangitan, ug kon si bisan kinsang tawo ang mopalambo niana nga katungdanan, ihatag sa Dios ang iyang mga anghel sa pagbantay kaniya ug ang iyang pagpangalagad may gahum ug kalig-on dinhi sa kalibutan ug sa kalibutan nga moabut; pero kon gamiton nianang tawhana ang priesthood sa laing katuyoan kay sa pagpalambo sa gingharian sa Dios, diin niana nga katuyoan kini gihatag, ug ang kalangitan mobiya, ang gahum sa priesthood mahanaw, ug siya maglakaw sa kangitngit nga maginusara ug dili sa kahayag, ug mao kini ang hinungdan sa apostasiya sa tanang mga tawo niini nga henerasyon o sa uban.¹³

Gihatag kanato ang priesthood, ug kon mapakyas man kita sa paggamit niini sa matarung nga paagi, kita panghimarauton. Busa, kinahanglang lig-unon nato ang atong mga abaga ug dawaton ang responsibilidad niini nga gingharian. Maningkamot kita nga makabaton sa Balaang Espiritu—ug gahum sa ebanghelyo ni Jesukristo—nga gihatag kanato, ug kon buhaton nato kini, ang panalangin sa Dios ihatag tungod alang sa atong mga paningkamot.¹⁴

Ang Ginoo mopaluyo ni bisan kinsang tawo nga maghupot og bahin niana nga Priesthood, bisan og siya usa ka Priest, usa ka Elder, usa ka Seventy, o usa ka Apostol, kon iyang palamboon ang iyang calling ug mohimo sa iyang katungdanan.¹⁵

Nalipay kaayo ako nga nakakita og pipila ka mga Deacon nga nagpalambo sa ilang calling. … Ilang gilibot ang [ilang] siyudad ug mibugha sa tanang kahoy sa tanang biyuda niana nga lungsod. Si Brother [George] Teasdale, ang Presidente sa Stake, adunay tulo o upat ka mga piraso sa kahoy nga cedar sa iyang yuta, ug mipauli siya usa ka gabii niana ug nakamatikod nga kini nawala. Nahibulong siya kon unsay nahitabo; pero sa dihang iya kining gipangita iyang nakit-an nga ang tanang nabugha na didto sa iyang butanganan. Gipalambo gayud pag-ayo nila ang ilang calling didto.

Kita karon, ania sa dili sagad nga mga kahimtang. Kinahanglang mosalig kita sa Ginoo ug mobuhat unsa ang matarung. Nasayud ako nga ang Priesthood gihatag alang sa kaluwasan sa mga tawo ug alang sa pagpangalagad sa mga ordinansa alang sa mga buhi ug mga patay. Liboan ang natubos didto sa kalibutan sa espiritu pinaagi sa ilang mga kaliwatan nga ania sa yuta ug naghupot sa mga yawe sa kaluwasan sa ilang mga patay. Mga manluluwas sa bukid sa Zion gipakatawo, samtang ang gingharian iya sa Ginoo, sama sa gisulti ni Propeta Obadias nga kini mao [tan-awa sa Obadias 1:21]. Kining mga tawhana naghimo niini nga buhat karon. Ang Ginoo magauban kaninyo, ug ang inyong mga katigulangan didto sa kalibutan sa espiritu nagmalipayon. Busa, magmatinud-anon kita, samtang ania kita dinhi. Ang Dios mipili kanato nga mohupot niini nga Priesthood. Gikan sa … minilyon ka mga tawo sa kalibutan ang Ginoo mipili niining pipila ka mga tawo sa pagdala niini; sa pagorden, sa pag-organisar, sa pagpasidaan sa kalibutan, sa pagsangyaw sa Ebanghelyo ngadto kanila. Manghinaut ako nga ang akong mga kaigsoonan nga naghupot niini nga Priesthood makahinumdom sa ka bililhon niini.…

… Magmatinuoron kita ug magmatinud-anon. Kinahanglang dili nato lugakan ang paghupot sa Priesthood ni ang Gingaharian sa Dios. Mag-ampo kita sa tago sa atubangan sa Ginoo ug motawag sa Iyang balaan nga pangalan. Anaa diha ang atong kusog nag-agad.¹⁶

Kon matinud-anon kita sa atong mga pakigsaad ug mga responsibilidad, madawat nato ang mga panalangin sa priesthood niining kinabuhia ug sa kinabuhi nga moabut.

Kon ang Ginoo mohatag og mga gasa ngadto sa mga tawo mahitungod sa Priesthood, kadtong nakadawat niadtong mga gasa maoy responsable sa ilang paggamit niini.¹⁷

Kon magdumala ang usa ka apostol o presidente, bishop o si bisan kinsang tawo nga naghupot sa priesthood, nangalagad siya pinaagi sa awtoridad sa Ginoo nga si Jesukristo; sa ingon kana nga priesthood adunay epekto, ug ang tanang mga panalangin nga gihatag sa sulugoon sa Dios nganha sa mga anak sa mga tawo, moepekto niining kinabuhia ug sa kinabuhi nga moabut. Kon dunay panalangin gihatag ngari kanako pinaagi sa balaan nga priesthood, o kon ako makadawat og panalangin gikan sa patriyaka, kadto nga mga gasa ug mga panalangin adunay epekto ngadto sa laing kalibutan; ug kon ako magmatinud-anon sa akong mga pakigsaad niining kinabuhia, akong maangkon ang mga panalangin nga gihatag kanako, tungod kay ang awtoridad nga gigamit sa pagtugyan niini giorden sa Dios, ug pinaagi usab niini ang mga anak sa Labing Halangdon mangalagad sa mga ordinansa sa kinabuhi ug kaluwasan ngadto sa mga anak sa tawo, ug kadtong maayong buhat adunay epekto niadtong mga tawo human sa kamatayon ingon man usab niining kinabuhia. Mao kini ang tinuod nga mga katigayunan; mga katigayunan kini nga molungtad sa hangtud sa kahangturan, ug makabaton kita og gahum pinaagi niini nga mga panalangin, nga gitugyan pinaagi sa ebanghelyo, sa pagdawat sa atong mga lawas pag-usab ug sa pagpatunhay sa atong pagkatawo sa kahangturan. Oo, maangkon nato kini pinaagi sa hiyas sa balaan nga priesthood.¹⁸

Kanunay akong magpalandong sa mga saad nga gihimo mahitungod sa priesthood. Ang Ginoo, sa usa ka pagpadayag, miingon, … “Kay kinsa kadto nga matinud-anon sa pagbaton niining duha ka mga pagkapari [priesthood] diin Akong gipamulong, ug sa pagpalambo sa ilang balaan nga tawag, pagabalaanon pinaagi sa Espiritu ngadto sa pagbag-o sa ilang mga lawas. … Ang tanan nga iya sa akong Amahan ihatag ngadto kaniya. Busa, kadtong tanan kinsa modawat sa pagkapari, makadawat niini nga panumpa ug pakigsaad sa akong Amahan, diin siya dili makalapas, ni mahimo kini nga mausab.” [Tan-awa sa D&P 84:33–40.] Karon, usahay akong pangutan-on ang akong kaugalingon, nakasabut ba kita niining mga butanga? Nakasabut ba kita nga kon kita mosunod sa mga balaod sa Priesthood mahimo kitang mga manununod sa Dios ug ka manununod uban ni Jesukristo? Nakaamgo ako nga ang atong mga mata wala makakita, ang atong mga dunggan wala makadungog, ni kini misulod sa atong mga kasingkasing aron masabtan ang himaya nga giandam alang sa matinud-anon [tan-awa sa 1 Mga Taga-Corinto 2:9].¹⁹

Unsang matanga sa mga tawo nga kita angay mahisama, kinsa gitawag sa pag-apil niining dako nga buhat sa Ulahing mga Adlaw? Kinahanglan gayud nga kita mga lalaki ug babaye sa hugot nga pagtuo, maisug sa kamatuoran nga gipadayag ug gihatag ngari kanato. Kinahanglang mahimo kitang mga lalaki ug babaye sa kaligdong ngadto sa Dios ug ngadto sa Iyang balaan nga Priesthood, matinudanon ngadto Kaniya ug matinud-anon ngadto sa usag usa. Kinahanglang dili nato tugutan ang mga balay ug mga yuta, bulawan ug pilak, ni bisan unsa nga mga butang sa kalibutan sa pagbalda kanato sa pagpadayon sa importante nga butang nga gipadala sa Dios nga atong himoonon. Ang atong tumong halangdon, ang atong padulngan mahabog ug kinahanglan nga dili nato pakyason ang atong Amahan, ni ang langitnong mga panon nga nagbantay kanato. Kinahanglang dili nato pakyason ang minilyon nga anaa sa kalibutan sa espiritu, kinsa nagtan-aw usab kanato uban sa tinguha ug kabalaka nga kini wala matugkad sa atong mga kasingkasing aron matuman. Kining importante ug mahinungdanong mga butang nga gikinahanglan sa Dios kanato. Dili kita mahimong takus sa kaluwasan, dili kita mahimong takus sa mahangturong mga kinabuhi sa gingharian sa atong Dios, kon adunay mokabig nato palayo gikan sa kamatuoran o gikan sa gugma niini.²⁰

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa nga mga impresyon ang nakagiya sa batan-on nga si Wilford Woodruff sa pagpangita sa tinuod nga Simbahan? (Tan-awa sa mga pahina 39–41.) Sa unsa nga paagi nga kini nga mga impresyon may kalabutan sa priesthood?
Ribyuha ang mga pahina 43–44 ug pangitaa ang mga butang nga nahimo sa Ginoo pinaagi sa gahum sa priesthood. Sa unsa nga paagi nga ang mga naghupot sa priesthood makaapil sa buhat sa Ginoo?
Ngano nga importante alang sa mga lalaki ug mga babaye nga makat-on mahitungod sa priesthood?
Sa unsa nga paagi napanalanginan ang inyong kinabuhi sa priesthood?
Samtang nagbasa kamo sa mga pagtulun-an ni Presidente Woodruff mahitungod sa mga responsibilidad sa mga naghupot sa priesthood, unsa ang tinuod nga mga baruganan ang inyong nakita? (Tan-awa sa mga pahina 44-46.)
Sumala ni Presidente Woodruff, unsa nga mga kinaiya ug mga binuhatan nga maoy makaingon o hinungdan nga biyaan sa kalangitan gikan sa naghupot sa priesthood? Ngano nga imposible alang sa usa ka tawo sa paggamit sa priesthood alang sa personal nga kaayohan? (Tan-awa sa mga pahina 44–46; tan-awa usab sa D&P 121:34–40].) Sa unsa nga paagi nga magpuyo ang usa ka naghupot sa priesthood aron makabaton og “gahum sa pagpahigayon sa buhat sa kalangitan”? (Tan-awa sa mga pahina 44-46; tan-awa usab ang D&P 121:41–46].)
Unsa ang gipasabut sa pagpalambo sa calling diha sa priesthood? (Tan-awa sa mga pahina 45–46.) Unsa nga mga ehemplo ang inyong nakita sa kaigsoonan nga nagpalambo sa ilang mga calling diha sa priesthood?
Ribyuha ang katapusang seksyon sa hugna (mga pahina 46–49). Sa unsang mga paagi nga ang priesthood makahatag og mga panalangin niining kinabuhia ug sa kinabuhi nga moabut?

May Kalabutan nga mga Kasulatan: Juan 15:16; Mga Hebreohanon 5:4–6; Alma 13:1–20; D&P 84:17–48; 107:18–20; Mga Artikulo sa Hugot nga Pagtuo 1:5

Peter and John — Si Pedro ug si Juan miayo sa bakul nga tawo (tan-awa sa mga Buhat 3). Ang batan-on nga si Wilford Woodruff nangita sa “pagtuo nga gihatag sa makausa ngadto sa mga Santos”—usa ka relihiyon nga adunay sama nga “gahum sa Dios” sa Simbahan sa Manluluwas sa tunga-tunga nga panahon.

laying on of hands — Si Presidente Wilford Woodruff mitudlo nga ang priesthood mao ang “gahum nga gitugyan gikan sa Dios ngadto sa tawo, nga naghatag og awtoridad kaniya sa pagbuhat alang sa Dios.”

blessing the sacrament — “Pagkadako nga responsibilidad ang paghupot niining langitnon, niining mahangturon, niining walay katapusan nga Priesthood!”