Hugna 21

Matinud-anon nga Molahutay sa mga Pagsulay ug Oposisyon

Kon matinud-anon ug masulundon kita sa panahon sa mga pagsulay, molig-on kanato ang Ginoo ug gamiton ang kalisdanan aron pagtabang kanato nga maandam sa celestial nga himaya.

Gikan sa Kinabuhi ni Wilford Woodruff

“Luwas kita kon buhaton nato ang atong katungdanan,” si Presidente Wilford Woodruff mitudlo. “Bisa’g unsa pa man nga mga pagsulay o mga kalisdanan ang atong sagubangon, tabangan kita sa Dios ug paluyohan kita.”¹ Sa pagtudlo niini nga baruganan, si Presidente Woodruff misulti gikan sa kasinatian. Milahutay siya sa relihiyoso ug politikanhon nga pagpanggukod, kabangis sa mga manggugubot, pagbatok sa misyonaryo nga buhat, pagkasakit, kamatayon sa mga miyembro sa pamilya ug mga higala, ug sa kada adlaw nga mga pagsulay sa kinabuhi. Apan gitubag niya ang ingon nga kalisdanan uban sa hugot nga pagtuo kaysa pagkawalay paglaum, misalig sa mga panaad sa Ginoo ug nakakita og kalig-on sa iyang pagpamatuod sa ebanghelyo.

Niadtong Nobyembre 1835, sa dihang nagmisyon si Wilford Woodruff didto sa habagatang bahin sa Estados Unidos, siya ug ang iyang mga kauban sa pagbiyahe nakadawat og paggiya sa Ginoo sa panahon sa pagsulay. Siya misulat: “Samtang nagbiyahe sa gabii, … naabtan kami og usa ka kusog kaayo nga unos sa hangin ug ulan. Miabut kami sa usa ka sapa nga gisanapan sa tubig tungod sa kakusog sa ulan, nga dili kami makalabang gawas kon palanguyon namo ang among mga kabayo. … Misulay kami sa paglibot didto sa tinubdan sa sapa, aron labangon kini; apan sa pagsulay, taliwala sa kangingit ug sa naghaguros nga hangin ug ulan, nangawala kami sa mabagang kakahoyan, taliwala sa ulan, hangin, mga sapa ug nangahulog nga putol nga tumoy sa kahoy. Gilabang namo ang mga sapa dul-an sa baynte ka higayon. … Apan maloloy-on ang Ginoo ngari kanamo taliwala sa among mga kalisud, kay samtang nagpangapkap kami sa kangitngit, nag-ungaw sa kakuyaw nga madisgrasya kami og ang [among] mga kabayo, nga samtang nagkabayo diha sa handag kaayo nga bakilid, kalit usa ka makasulaw nga kahayag ang midan-ag kanamo, ug nakita ang among makuyaw nga sitwasyon, kay diha kami sa ngilit sa lawom kaayo nga bung-aw. Nagpadayon ang kahayag uban kanamo hangtud among nakita ang usa ka balay, ug nakatultol kami sa husto nga dalan.”²

Sa pagkumentaryo niini nga kasinatian, si Presidente Woodruff miingon, “Mipadayon kami nga nagmaya, bisag mibalik ang kangitngit ug nagpadayon ang ulan.”³ Kini nga pamahayag naghatag og ehemplo sa iyang pamaagi sa mga kalisud sa kinabuhi. Kanunay siya nga nagpadayon, nagmaya diha sa mga panalangin sa Ginoo bisan kon ang pipila ka mga pagsulay nagpabilin.

Mga Pagtulun-an ni Wilford Woodruff

Mga pagsulay ug oposisyon naghatag kanato og kasinatian ug makatabang kanato nga maandam alang sa celestial nga himaya.

Dili kaduhaduhaan nga ikahibulong sa daghang mga higayon, diha sa hunahuna sa mga lalaki ug babaye, nganong gibutang sa Dios ang mga lalaki ug mga babaye sa ingon niini nga kalibutan, nganong iyang gipasinati ang iyang mga anak sa kasubo ug kasakit dinhi sa pagkamortal. Mipadayag ang Ginoo og usa ka butang ngari kanato kabahin niining butanga, ug nakakat-on kita og daghan kabahin niini aron masayud nga kining mga butanga gikinahanglan.⁴

Yano nga makitang katuyoan kini sa Dios nga mag-antus ang Iyang mga Santos aron masulayan og maayo, aron mapamatudan nila ang ilang kaligdong ug mahibalo sa kinaiya sa pundasyon nga diin matukod kini.⁵

Samtang bation nato usahay ug mibati sa adlaw nga nanglabay, nga moreklamo tungod kay nakasugat kita og pagdaugdaug, pagpanggukod, ug kasakit, hinoon, buot nako nga isulti sa akong mga kaigsoonan nga kining mga butanga kabilin sa mga Santos sa Dios. … Wala pa sukad ako makabasa og bahin sa mga tawo sa Dios sa bisan unsa nga dispensasyon nga nabuhi, sa gisulti sa mga sakop sa laing mga tinuohan, diha sa kabuhong sa kinabuhi, nga walay bisag unsa nga matang sa oposisyon. … Nakasagubang na kita og mga pagsulay sa daghang mga higayon, ug dili nako maghunahuna nga moreklamo pa kita, kay kon kita walay mga pagsulay maulaw kita nga mopuyo didto sa laing kalibutan uban sa mga Propeta ug mga Apostoles kinsa gipanghabas, gipanglansang, ubp. tungod sa pulong sa Dios ug pagpamatuod kang Jesukristo.⁶

Imposible … nga ang mga Santos sa Dios makapanunod sa celestial nga gingharian nga dili pagasulayan kon magmasulundon ba sila o dili sa mga pakigsaad sa Ginoo.⁷

Si Jesus … nagpakaubos sa tanang mga butang aron mopatigbabaw sa tanang mga butang ug makatugkad sa tanang mga butang. Walay tawo nga nagpakaubos pa kay sa Manluluwas sa kalibutan. Natawo diha sa kwadra, giduyan sa pasungan, milakaw gikan didto nga mipaingon ngadto sa krus pinaagi sa pag-antus inubanan sa dugo dayon ngadto sa trono sa kahimayaan, ug sa tibuok niya nga kinabuhi wala magbaton og kalibutanon nga kinaiya nga angay maangkon. Nagpuyo Siya sa kakabus, pag-antus, kasakitan, kalisdanan, kabudlay, pag-ampo, pagbangutan ug kasub-anan hangtud nga namatay siya diha sa krus. Sa gihapon Siya ang bugtong anak sa Dios ug ang Manunubos sa kalibutan. Tingali ikapangutana nganong gitugot sa Ginoo nga moanhi ang iyang Anak ug mopuyo ug magpakamatay nga maoy iyang gibuhat. Kon makaadto na kita sa kalibutan sa espiritu, ug ablihan na ang tabil ato ra nga masabtan ang mga tubag niining tanan nga mga butang.

Sa paghatag ug pagsangkap og mga butang sa Dios ngadto sa tawo mao ra og natawo kita aron mag-antus sa kasakit, kalisdanan, kasub-anan ug mga pagsulay, mao kini ang mando sa Dios nga kinahanglang makasinati sa tawhanong pamilya; ug kon magtinarung kita ning panahon sa pagsulay, ang kasinatian nga madala niini sa katapusan mahimo nga usa ka mahinungdanon nga panalangin alang kanato, ug kon madawat nato ang pagkaimortal ug kinabuhing dayon, pagkabayaw, mga gingharian, mga trono, mga kayutaan ug mga kagamhanan inubanan sa mga panalangin sa kahingpitan sa ebanghelyo ni Kristo, atong masabtan ug matugkad kon ngano nga gitawag kita aron mosinati sa nagpadayon nga pakiggubat sulod sa pipila ka tuig nga gigahin nato diha sa pagkamortal.⁸

Unsa nga butang ang mabuhat nato o antuson, aron ikakomparar sa daghang mga gingharian, mga trono, ug mga kayutaan nga gipadayag sa Dios ngari kanato?⁹

Sa gubat tali sa kangitngit ug kahayag, ang Ginoo ug ang Iyang katawhan magmadaugon.

Ang pagbatok ngadto sa Dios ug sa Iyang Kristo, pagbatok sa kahayag ug kamatuoran diha na sukad pa sa sinugdanan hangtud karon. Kini mao ang gubat nga nagsugod didto sa langit, nga milungtad sa tanang panahon, ug nagpadayon hangtud sa iyang pag-abut, hangtud nga Siya maghari kansang katungod mao ang paghari, kon, moabut Siya diha sa mga panganod sa himaya aron gantihan ang matag tawo sumala sa iyang binuhatan diha sa pagkamortal.¹⁰

Ang espiritu sa pakiggubat nga gipakita niining panahona diha na sa tanang katuigan sa dihang ang priesthood diha pa sa yuta. Kanunay nga may panaggubat tali sa kahayag ug kangitngit, sa Dios ug sa yawa, sa santos ug mga makasasala, sa husto nga mga baruganan ug bakak nga mga doktrina. Kita mismo may pakiggubat batok sa atong kaugalingong kinaiya nato sa pagbuhat og dautan.¹¹

Adunay duha ka gahum sa yuta ug diha sa taliwala sa mga lumulupyo sa yuta—ang gahum sa Dios ug ang gahum sa yawa. Sa atong kasaysayan kita adunay talagsaon kaayo nga mga kasinatian. Kon ang Dios adunay mga tawo dinhi sa yuta, dili kini igsapayan kon unsa nga panahona, si Lucifer, ang anak sa kabuntagon, ug ang minilyon sa gilaglag nga mga espiritu nga gihinginlan sa langit, nakiggubat batok sa Dios, batok ni Kristo, batok sa buhat sa Dios, ug batok sa mga tawo sa Dios. Ug dili sila magduhaduha sa pagbuhat niini sa atong panahon ug kaliwatan. Sa higayon nga ang Ginoo mobuhat sa bisag’ unsa nga trabaho, kadto nga mga gahum molihok aron paglumpag niini.¹²

Dili lamang kita makiggubat sa mga gahum sa kangitngit, ang dili makita nga mga pundok nga naglibot kanato, apan kinahanglan kita makiggubat sa daghan kaayong kalibutanon nga mga kahimtang ug sa pagsagubang og daghan kaayo nga mga kalisud nga kinahanglan atong atubangon, ug kon makasinati pa kita og daghang mga pagsulay kinahanglan nga mas labaw pa kitang magmadasigon sa pagbuhat, ug maghago sa tibuok natong gahum atubangan sa Ginoo aron sa pagmugna sa katarung ug kamatuoran ug sa pagtukod sa buhat sa Dios, ug aron mosiguro nga ang iyang ngalan pagapasidunggan dinhi sa yuta.¹³

Ang yawa nasayud nga sa diha nga ang anghel mitugyan sa [Basahon ni Mormon] ngadto ni Joseph Smith nga mao kini ang pundasyon sa sistema nga molumpag sa iyang gingharian. Ang pagpalayas, [sa mga Santos], ubp, nga nasinati niini nga mga katawhan [nahimo] dili tungod kay malapason sila sa balaod—tungod kay mas dautan sila kay sa uban, apan tungod kay gihan-ay nila ang pundasyon sa gingharian sa Dios nga magtubo, ug molambo, … ug moandam sa agianan alang sa pag-abut ni Ginoong Jesukristo kinsa mao ang hari sa mga hari ug Ginoo sa mga Ginoo, kinsa moabut ug maghari sa tibuok kayutaan ug sa tanang mga gingharian, ug sa tanang mga presidente ug mga gobernador ug sa ilang mga alagad maobligar sa pag-ila nga si Jesus mao ang Kristo. Ang ulahing adlaw nga buluhaton nga atong gibarugan mogapus sa gahum sa yawa nga mipasulabi diha sa mga anak sa tawo. … Mao nga dili kini ikahibulong nga ang yawa masuko og maayo, ug mohulhog sa mga dautan aron makiggubat batok niini. Ang Ginoo modasig sa Iyang mga sulugoon ug hatagan sila og abilidad sa pagpatunhay niini nga gingharian dinhi sa yuta. Siya ang nangulo. Wala ako’y hugot nga pagtuo niini nga buhat kon dili pa Siya ang nagtukod niini—dili kini makalahutay kon wala Siya batok sa dakong gahum nga nakiggubat niini.¹⁴

Anaa ra kanato ang pagtuman sa atong katungdanan, ug mapailubon nga motawag sa Ginoo, ug magpaduol Kaniya, ug makita na sa atong mga mata, sama sa batan-on nga lalaki, nga sulugoon sa karaan nga Propeta Eliseo, ug atong makita nga mas daghan ang dapig kanato kay sa batok kanato [tan-awa sa 2 Mga Hari 6:8–17]; ug kanang mga elemento sa pagbatok mao lamang ang mopadali sa katumanan sa mga katuyoan sa Dios. Ibutang ang inyong pagsalig sa Dios ug mag-agad sa Iyang mga saad, magpuyo sa kahayag ug kahibalo nga imong naangkon, ug mamaayo ra ang tanan alang kaninyo buhi man o kamatyonon.¹⁵

Ang Ginoo nagbantay kanato panahon sa pagsulay, naglig-on kanato sumala sa atong hugot nga pagtuo, pagka mapainubsanon, ug pagka masulundon.

Dayag lang nga wala gayud kita makaagi og labaw pa kay sa naagian sa Manluluwas, ni sama kadaghan. Apan Siya sa tibuok Niya nga kinabuhi nagpabilin nga matinud-anon ug masulundon sa Iyang Amahan ug sa Iyang katungdanan isip Manluluwas sa kalibutan. Nag-ampo siya sa hilabihan, ug nagbangutan Siya sa atubangan sa Ginoo tungod sa mga sala sa kalibutan. Karon ania Siya uban kanato. Siya ang atong Manlalaban sa Amahan. [Tanawa sa D&P 29:5.] Iya kitang gibantayan, ug buhaton Niya kutob sa Iyang mahimo alang sa atong kaluwasan.¹⁶

Gipanggukod kita, gisakit kita, ug nalabyan nato ang grabe nga mga pagsulay sa atong kinabuhi; apan gitabangan kita sa Ginoo bisan pa man niining tanan.¹⁷

Nagkadaghan ang katalagman dinhi sa yuta, ug may kahulugan kining tanan. Hinumdomi kini, ug palandongi kining mga butanga. Kon buhaton ninyo ang inyong katungdanan, ug buhaton nako ang akong katungdnan, mapanalipdan kita, ug malabyan ra ang mga kasakit diha sa kalinaw ug kaluwasan.¹⁸

Nagkinahanglan kini og gawasnon nga panghunahuna, kamatinud- anon sa kasingkasing, hugot nga pagtuo sa Dios ug kaligdong sa kinaiya sa pagpuyo sa kinabuhi sa usa ka Santos sa Ulahing mga adlaw, atubangan sa mabiaybiayon nga kalibutan, ug taliwala sa mga pagsulay ug kasamok ug pagpanggukod.¹⁹

Si Daniel andam nga mosulod sa langob sa mga lion; ang tulo ka mga Hebreohanon nga mga bata [Shadrach, Meshach, ug Abednego] wala mahadlok sa kapalaran nga naghulat kanila, maisugon ang mga Apostoles alang sa kamatuoran ug dili mahadlok nga mamatay alang niini, ug ngano kaha nga kadtong mga tawhana ug uban pa nga ubos sa sama nga kahimtang nagpabilin sa ilang mga pagtuo sa walay pagduhaduha? Tungod kay, una, diha kanila ang kamatuoran ug nasayud sila niini mismo; ug ang ikaduha, ang Espiritu Santo, ang Maghuhupay, mipaluyo kanila kay kana lamang nga gahum ang makatabang sa tanang malisud nga kahimtang diin ang katawhan sa Dios kinahanglan nga mosinati. Ug mao usab kini karon.²⁰

Kanunay ako nga maghunahuna nga wala pa sukad nako makita kining mga tawhana nga labaw pang malipayon kay sa ilang panahon sa hilabihan nga kakabus, mga pagpanglutos ug mga kasakit, tungod sa pulong sa Dios ug sa pagpamatuod ngadto kang Jesus. Ang Espiritu sa Dios nag-uban kanila, ug diha sa ilang pagkamapainubsanon ug mga pag-antus, ang Espiritu Santo, ang Maghuhupay ang makanunayon nilang kauban, ug napuno sila sa hingpit nga kalipay ug kahupayan, ug nanagmaya sa atubangan sa Ginoo tungod niining tanan. Wala unta nila kini batia kon wala pa sila magsunod sa mga sugo sa Ginoo.²¹

May panginahanglan alang kanato sa paghinulsol ug pagpaubos sa atong mga kaugalingon sa atubangan sa Ginoo nga atong Dios, aron atong maangkon ug labaw pa nga makapahimulos sa Balaang Espiritu aron maandam kita alang sa umaabot.²²

Buot ako nga magpamatuod ngadto sa mga Santos sa Ulahing mga adlaw. Nga ang Dios nag-uban niini nga katawhan. Gihan-ay Niya ang atong padulngan, ug magpadayon sa pagbuhat sa ingon kon ato lamang paminawon ang Iyang tingog, ug magpadayon Siyang maghatag kanato og igo nga grasya aron makabarug sa panahon sa pagsulay ug kasamok. Nagmaloloy-on ang Ginoo ngadto sa Iyang katawhan sa tanang panahon sa kalibutan, apan sama sa pag-antus ni Kristo, sama sa pag-antus sa mga Apostoles—gani ang pipila kanila ngadto sa kamatayon sa pipila—tungod sa pagsaksi kang Jesus, ingon man miantus usab ang mga Santos sa Ulahing mga adlaw, ug pipila kanila mitimaan sa ilang pagpamatuod pinaagi sa ilang dugo. Nakasinati sila og hilabihan nga mga kasakit tungod sa Ebanghelyo, apan kita wala gayud hatagi og pagsulay nga dili nato masugakod, ug dili gayud kon mosunod lang kita sa mga tambag sa langit.²³

Gilugwayan sa Dios ang iyang kamot alang sa kaluwasan niini nga katawhan, ug bisan unsa pa ka dautan ang sitwasyon, bisan unsa pa ka grabe ang pagpanggukod, pagpanglupig ug pagbatok niini nga buhat, ang Ginoo sukad pa, sa sinugdanan, hangtud karon nagbantay sa iyang katawhan, ug mipaluyo ug mipatunhay niini, ug magpadayon nga buhaton niya kini hangtud sa katumanan niini, hangtud nga ang Zion mobangon ug mosul-ob sa iyang matahum nga mga sapot, ug ang tanang mahinungdanong mga hitabo sa katapusang mga adlaw matuman.²⁴

Mga Sugyot alang sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Basaha ang istorya sa mga pahina 239–41. Unsay imong nakatonan niini nga istorya?
Daghang mga tawo ang nahibulong ngano nga gitugot sa Dios nga ang Iyang mga anak nga “makasinati sa kasubo ug kasakit” (pahina 241). Giunsa pagtubag ni Presidente Woodruff kini nga pangutana? (Tan-awa sa mga pahina 241–42.)
Nganong kinahanglan nga mag-antus si Jesus? (Tan-awa sa pahina 242; tan-awa usab sa Alma 7:11–12; D&P 88:6.) Giunsa Niya pagtubag ang pagbatok? (Tan-awa sa mga pahina 243–45.) Unsaon nato pagsunod sa Iyang ehemplo?
Si Presidente Woodruff mitudlo nga ang gubat tali sa kahayag ug kangitngit “diha na sa tanang panahon” (pahina 243). Unsay imong panan-aw sa gubat nga nagpadayon karon? Unsay mabuhat nato aron madepensahan ang atong mga kaugalingon ug sa atong mga pamilya niini nga gubat? (Tan-awa sa mga pahina 244–45.)
Sa unsa nga mga paagi nga kamo “nadasig sa paglihok” (pahina 243–44) isip resulta sa mga pagsulay?
Tun-i ang 2 Mga Hari 6:8–17. Unsay nakadani kaninyo niini nga istorya? Unsay gitudlo ni Presidente Woodruff sa dihang naghisgot siya niini nga panghitabo? (Tan-awa sa pahina 245.)
Sa unsang mga paagi makatabang nato ang Ginoo sa pagsagubang niini nga mga pagsulay? (Tan-awa sa mga pahina 246–47; tan-awa usab ang Mosiah 24:13–16.) Unsay atong buhaton aron makadawat sa kahupayan ug kalig-on nga gitanyag sa Ginoo? Sa unsa nga paagi nakatabang ang Ginoo sa paglahutay sa inyong kalisdanan?

May Kalabutan nga mga Kasulatan: 2 Nephi 2:11–24; Alma 36:3; D&P 58:2–5; 101:1–5; 121:7–8, 29; 122:5–9

covered wagons — Sama sa unang mga Santos sa Ulahing mga Adlaw, nag-atubang kitang tanan og mga pagsulay. Si Presidente Woodruff mitudlo nga ang Dios nagtugot sa Iyang mga Santos nga masulayan “aron mapamatud-an nila ang ilang kaligdong ug mahibalo sa kinaiya sa pundasyon nga diin natukod kini”

Mary, Joseph and baby Jesus — “Natawo diha sa kwadra, giduyan sa pasungan, [si Jesukristo] milakaw gikan didto nga paingon ngadto sa krus pinaagi sa pag-antus inubanan og dugo dayon ngadto sa trono sa kahimayaan.”