Hugna 15

Pagpakabuhi pinaagi sa Hugot nga Pagtuo

Magpakabuhi kita pinaagi sa pagtuo ug dili pinaagi sa makita, uban sa kasiguroan nga ang Ginoo molig-on kanato sa atong mga pagpaninguha sa pagpalambo sa Iyang gingharian sa yuta.

Gikan sa Kinabuhi ni Wilford Woodruff

Niadtong Nobyembre 1834, si Wilford Woodruff giorden nga priest sa Aaronic Priesthood ug gihatagan sa iyang unang assignment isip full-time missionary. Nagpuyo siya kaniadto sa Clay County, Missouri, nagpuyo didto human nag-alagad sa Zion’s Camp. Sa wala pa siya magsugod sa iyang misyon, nakigsulti siya sa iyang bishop, kinsa mihatag niya og assignment. Nangutana siya sa dalan nga iyang agian paingon sa iyang adtoan. Nangutana usab siya kon siya ug ang iyang kauban mobiyahe ba nga walay puntil ni puyo, sama sa gisugo sa Ginoo sa mga misyonaryo niadtong panahona (tan-awa sa D&P 24:18; 84:78, 86). Ang pagbiyahe nga walay puntil o puyo nagpasabut nga moadto nga walay kwarta, mag-agad lang sa kaayo sa mga miyembro sa Simbahan ug sa uban nga mohatag og pagkaon ug kapuy-an. Sa kaulahian si Presidente Woodruff nahinumdum sa iyang pagpakigsulti sa iyang bishop:

“Niadto kuyaw ni bisan kinsa sa atong mga kaigsoonan nga moagi sa Jackson County [Missouri]. Buot siya nga moadto ko sa Arkansas, ug ang dalan moagi sa Jackson County. Nangutana ko kon moagi ba gayud mi didto (Naa akoy kauban—usa ka elder).

“Miingon siya, ‘Kon duna kay hugot nga pagtuo sa paghimo sa ingon, mahimo mo kana; ako wala gayud.’

“Nagtuo akong lain kadto nga pagkasulti gikan sa usa ka bishop.

“‘Nan,’ miingon ko, ‘ang Ginoo miingon nga mobiyahe gayud kita bisag walay kwarta; ato ba kanang buhaton?’

“Miingon siya, ‘Balaod kana sa Dios, kon kamo adunay hugot nga pagtuo sa pagbuhat sa ingon, mahimo ninyo kana.’”¹

Wala madugay human niana nga diskusyon, si Wilford Woodruff ug ang iyang kauban mipaingon na sa ilang misyon, mibiyahe paingon sa Jackson County nga walay kwarta. Unya si Presidente Woodruff miingon: “Mibutang kami og pipila ka mga Basahon ni Mormon ug mga sinina sa among bag, mihigot niini sa among mga likod ug nagsugod paglakaw. Misakay mi sa ferry boat paingon sa Jackson County, ug niabut didto. Sa pipila ka mga higayon ang Ginoo miluwas kanamo pinaagi sa milagro, gikan sa mga manggugubot.”²

Dugang sa pagpanalipod sa duha ka mga misyonaryo gikan sa mga manggugubot sa Jackson County, ang Ginoo nanalipod kanila gikan sa ubang mga peligro sa ilang pagbiyahe. Si Presidente Woodruff miasoy og usa sa maong kasinatian. Samtang siya ug ang iyang kauban nagsingabot sa kakahoyan, usa ka dako og itom nga oso nagpaingon kanila. “Wala mi mahadlok niya,” miingon siya, “tungod kay anaa kami sa trabaho sa Ginoo, ug wala magbugalbugal sa propeta sa Dios ingon niadtong gibuhat sa kwarenta y dos ka dautang mga bata kinsa miingon ni Eliseo ‘Tumungas ka upawon,’ unya gikuniskunis sila sa mga oso [tan-awa sa 2 Mga Hari 2:23–24]. … Sa dihang ang oso duol na namo [nagdistansya og mga 44 ka yarda o 40 ka metros] miyaka siya ug mitan-aw kanamo og makadiyot, ug dayon midagan palayo; ug nalipay ming mipadayon.”³

Si Presidente Woodruff kanunay nga mosulti niining unang misyon, nahinumdum sa mga panalangin nga iyang nadawat samtang siya nag-alagad sa Ginoo uban sa hugot nga pagtuo: “Wala pa sukad sa akong kinabuhi, isip apostol, isip seventy, o isip elder, nga ako napanalipdan og maayo sa Ginoo samtang naghupot sa katungdanan [sa] usa ka priest. Mipadayag kanako ang Ginoo pinaagi sa panan-awon, sa mga pagpadayag, ug pinaagi sa Balaang Espiritu, sa daghang mga butang nga naghulat kanako.”⁴

Mga Pagtulun-an ni Wilford Woodruff

Sa panahon sa atong kinabuhi sa yuta, magpakabuhi kita pinaagi sa pagtuo ug dili pinaagi sa makita.

Ang hugot nga pagtuo maoy unang baruganan sa Ebanghelyo. Unsa ang hugot nga pagtuo? Si Pablo, sa pagsulat sa mga Hebreohanon, misulay sa pagpasabut niini. Miingon siya nga “ang hugot nga pagtuo mao ang pagsalig sa mga butang nga ginapaabut, ang panghimatuod sa pagkaanaa sa mga butang nga dili makita,” ug aron sa pagpamatuod niini mipadayon siya sa pagsulti unsa ang nakab-ot sa nagkalainlaing tawo pinaagi sa pagtuo [tan-awa sa Mga Hebreohanon 11]. Ang akong pagsabot sa hugot nga pagtuo ingon sa usa sa pinakaimportanteng mga baruganan nga sukad gipadayag sa Dios ngadto sa tawo.⁵

Kon duna kitay husto nga panabut makita gyud kini nato sama sa nakita sa Ginoo, ug makasabut gayud unsaon pagtuman sa iyang mga katuyoan; apan kita magpakabuhi uban sa pagtuo ug dili pinaagi sa makita.⁶

Kon atua na kita sa kalibutan sa espiritu, aduna na kitay mahibaw- an. Molihok na kita pinaagi sa pagtuo. Aduna kitay mga ebidensya sa mga butang nga dili makita. Ang pagkabanhaw, ang mahangturong paghukom, ang celestial nga gingharian, ug ang mahinungdanong panalangin nga gihatag sa Dios sa balaang mga pagdihog ug pagtuga sa mga templo, ang tanan alang sa umaabut, ug kini adunay katuman, kay kini mahangturong mga kamatuoran. Dili gyud kita hingpit nga makasabut unsa ang nagpaabut kanato sa kalibutan samtang buhi pa kita, uban niini nga tabil nga anaa kanato. Maayo alang ni bisan kinsang tawo nga moalagad sa Dios ug mohupot sa Iyang mga sugo sa mga adlaw sa inyong pagpuyo dinhi sa yuta.⁷

Mga kaigsoonan, magpakabuhi gayud kamo pinaagi sa pagtuo, nga makasabut sa kada adlaw nga ang tanang gahum anaa sa Dios, ug nga pinaagi kaniya mahimong mabuhi sa kalinaw ug makatagamtam og kabuhong.⁸

Ang Ebanghelyo ni Kristo nagkinahanglan og pagtuo sa tanang adlaw.⁹

Mapakita nato ang atong pagtuo pinaagi sa atong mga buhat.

Maayo gayud nga … maminaw sa pulong sa Ginoo, ug sa tinuod maayo nga motuo niini, apan mas maayo pa gayud ang paghimo niini.¹⁰

Ang unang baruganan [sa] Ebanghelyo mao ang hugot nga pagtuo. Nan, ang mga tawo sa kalibutan mahimong moingon, kitang tanan nagtuo ni Jesukristo. Oo, apan adunay usa ka butang nga buhaton gawas sa pagtuo ni Kristo. Maghinulsol gayud kita sa atong mga sala, magpabunyag alang sa kapasayloan niini, ug modawat sa Espiritu Santo. Mao kini ang doktrina nga gitudlo ni Kristo ug sa Iyang mga Apostoles.¹¹

Ang pagtuo gikinahanglan sa mga Santos aron magpakabuhi sa ilang relihiyon, mobuhat sa ilang katungdanan, molakaw nga matarung sa atubangan sa Ginoo ug mopalambo sa iyang Zion sa yuta. Unya kini nagkinahanglan og mga buhat aron mahiuyon sa atong hugot nga pagtuo. … Katungdanan nato isip mga tawo nga magkahiusa ug dili magtinapulan sa pagbuhat og maayo.¹²

Ato gayud nga ipakita ang hugot nga pagtuo samtang kita motabang sa pagpalambo sa gingharian sa Dios.

Kining gasa ug baruganan sa pagtuo gikinahanglan sa mga Santos sa kada panahon sa kalibutan aron makahimo sila sa pagpalambo sa gingharian sa Dios ug mopahigayon sa buhat nga gisugo kanila.¹³

Basaha ang ika-onse nga kapitulo sa Mga Hebreohanon ug inyo kanang makit-an nga, sa pagsugod sa paglalang sa kalibutan, ang tanan natuman pinaagi sa hugot nga pagtuo. Ang kinatibukan sa buhat sa tanang karaang mga patriyarka ug mga propeta natuman pinaagi sa paggamit niini nga baruganan; ug kini mao usab sa katapusang dispensasyon sa kahingpitan sa mga panahon.¹⁴

Bisan gani ang mga paningkamot ni Jesus, gikan sa pagkatawo hangtud sa kamatayon, hangtud sa Iyang tibuok kinabuhi sa kasakit, kagul-anan, kakulian, pag-antus, panggukod ug pagbiaybiay, ang tanan tungod sa hugot nga pagtuo. Kadto pinaagi sa gahum sa Amahan, kansang buhat Siya mianhi aron ipahigayon, nga Siya gipaluyohan. Hingpit gayud Siyang nagtuo nga Iyang mahimo ang tanang katuyoan nga Siya gipadala dinhi sa pagbuhat. Kini mao ang baruganan nga Iyang gituman ang tanang gikinahanglan ug misunod sa tanang balaod, bisan gani ang bunyag. … Ang mga apostoles, sa ilang mga paningkamot, motrabaho gyud sa samang baruganan nga ang mga Santos sa nag-una ug sa ulahing mga adlaw ilang nagahimo,—ginganlan og baruganan sa hugot nga pagtuo.

Si Joseph Smith mibuhat pinaagi sa pagtuo. Tinuod nga aduna siyay kahibalo sa daghang mahinungdanong butang, ingon nga aduna ang mga Santos sa unang mga adlaw, apan sa daghang buluhaton mogamit gayud siya sa hugot nga pagtuo. Nagtuo siya nga siya ang katumanan sa mga panagna sa karaang mga propeta. Nasayud Siya nga ang Dios nagtawag kaniya, apan sa pagtukod sa Iyang gingharian mopadayon gayud siya sa pagbuhat pinaagi sa pagtuo. Ang simbahan giorganisar niadtong ika-6 sa Abril, 1830, nga may unom ka mga miyembro, apan si Joseph adunay hugot nga pagtuo nga ang gingharian nagsugod na, nga sama sa liso sa mustasa, mamahimong bantugang simbahan ug gingharian dinhi sa yuta; ug gikan nianang adlawa hangtud sa adlaw diin mitimaan siya sa iyang pagpamatuod pinaagi sa iyang dugo, ang iyang tibuok kinabuhi sama sa niubog sa lawum nga tubig sa pagpanggukod ug pangdaugdaug, nga nadawat gikan sa mga kamot sa iyang isigkatawo. Kining tanan nalahutay niya pinaagi sa pagtuo, ug matinuoron siya, matinud-anon ug maisug sa pagpamatuod kang Jesus hangtud sa iyang kamatayon.…

…Sa atong paningkamot sa pagpalambo sa Simbahan ug sa Gingharian sa Dios sa yuta, atong buhaton uban sa hugot nga pagtuo. Kini gikinahanglan gihapon.¹⁵

Gatusan ka mga tawo naghago sa [mga templo]. Alang kang kinsa? Alang sa mga buhi ug sa mga patay. Nganong maghago man sila alang sa mga patay? Nakakita na ba sila sa pagkabanhaw sa mga patay? Wala, gawas lamang sa panan-awon o pagpadayag. Apan duna silay pagtuo niini, ug isip ebidensya niana nga pagtuo sila mipahigayon niini nga buhat. Nagpaabut sila sa pagkabanhaw ug sa mahangturong paghukom, sa celestial nga gingharian ug sa mahinungdanong mga panalangin nga gipadayag sa Dios alang sa kaluwasan ug kahimayaan sa mga anak sa katawhan. Gibuhat nila kini uban sa pagtuo, ug pinaagi niini nga gahum nga sila nakatuman sa ilang gihimo. … Pinaagi sa hugot nga pagtuo ang tabernakulo [sa Salt Lake] natukod, … ang mga templo napadaghan, ug … ang mga tawo napundok gikan sa mga kanasuran sa kalibutan.

Liboan ka mga Elders gitawag, dili gikan sa mga kolehiyo, apan gikan sa nagkalainlaing okupasyon sa kinabuhi, ug gipadala sa kalibutan aron pagsangyaw sa Ebanghelyo nga walay kwarta ug walay ganti. … Ang mga tawo naminaw kanila, ug ang ubang espiritu ug gahum mikombinse kanila nga ang pagpamatuod nga gihatag niini nga mga Elder tinuod. … Unsa man ang resulta niini? Liboan ang mituo niana nga pagpamatuod ug nagmatuod nga kini tinuod. Kini nga mga Elder naghago pinaagi sa pagtuo; mibiyahe sila pinaagi sa pagtuo; mitrabaho sila pinaagi sa pagtuo. Ang pagtuo lamang ang nakapalahutay kanila sa pagsugod hangtud sa pagkahuman sa misyon. Mibyahe sila nga walay puntil og puyo, ug pinaagi sa pagtuo ang Dios sa langit mipakaon ug mipasinina kanila, ug mibukas sa agianan sa ilang unahan. … Ug daghang mga tawo ang mituo sa pagpamatuod niining simpling mga tawo. Naghinulsol ang daghang mga tawo sa ilang mga sala, daghan ang nabunyagan alang sa kapasayloan niini, sa pangalan sa Amahan, ug sa Anak, ug sa Espiritu Santo; nakadawat sila sa Espritu Santo, ug kini nagpamatuod kanila sa katinuod sa Ebanghelyo.¹⁶

Bisan kanus-a ug sa matag panahon sa kalibutan ang Dios mitawag o misugo og tawo o mga tawo sa pagpahigayon og usa ka buhat, pinaagi sa determinasyon ug paglahutay, ug sa pagtuo diha kaniya, sila nakahimo sa pagtuman niini.¹⁷

Samtang kita magtuman sa atong mga pakigsaad ug mohupot sa mga sugo, ang Ginoo modugang sa gahum sa pagtuo diha kanato.

Ang tanang kahago nga atong gihimo … tungod sa hugot nga pagtuo, ug kita, isip mga Santos sa Ulahing mga Adlaw, kinahanglang maningkamot sa pag-amuma ug magtubo niini nga baruganan.¹⁸

Ato kining katungdanan sa pagpadayon nga magtubo ang pagtuo, aron kita makahimo sa paghangyo sa Ginoo ug tubagon Niya.¹⁹

Nagtuo ako nga ang Ginoo nagkinahanglan niini gikan sa matag lalaki ug babaye sa Israel, sa matag Santos sa Ulahing mga Adlaw, nga unahon nato pag-angkon ang Balaang Espiritu [ug] dayon maghatag og mga bunga niini ngadto sa kaluwasan. Dayon inyong makita nga kining mga tawhana motuman sa ilang mga pakigsaad ug mohupot sa mga sugo sa Dios; kini ang katungdanan natong tanan, ug magpakabuhi gyud kita sa atong relihiyon ug mosunod sa sumbanan niini. Kon mahimo na kini inyong makita nga kining mga tawhana aktibo na ug magdala og mga buhat sa pagkamatarung, dayon makabaton na sila og pagtuo ug makaangkon na sila og gahum, ug mailhan ug ang gahum ug himaya sa Dios mahimong makita pinaagi sa maong mga tawo ingon nga ang Ginoo mipili kanila niini nga dispensasyon dinhi sa yuta, ngadto kang kinsang mga kamot siya mitugyan sa Holy Priesthood.²⁰

Gibati gayud nako nga ang Ginoo maloloy-on ngari kanato, ug atong hatagan og bili labaw sa tanang mga butang sa yuta ang mga pulong sa mahangturong kinabuhi nga gihatag ngari kanato. Samtang kita gidumala pinaagi sa Balaang Espiritu ang atong mga hunahuna malig-on, ug ang atong hugot nga pagtuo magdugang. Ug kinahanglan kitang maghago alang sa pagpalambo sa gingharian sa Dios.²¹

Makagagahum nga Amahan, idugang kanamo ang mga gahum nianang hugot nga pagtuo nga gihatag ug giangkon sa mga Santos. Lig-ona kami sa mga handumanan sa mahimayaong mga pagluwas nga nangagi, sa mga paghinumdum sa sagradong mga pakigsaad nga imong gihimo uban kanamo, aron nga, kon ang dautan mohulga kanamo, kon ang mga kasamok mohasi kanamo, kon kami makasinatig kahiubos, unta kami dili magpanuko, unta dili magduhaduha, apan uban sa kalig-on sa imong balaang pangalan unta matuman namo ang tanan nimong matarung nga mga katuyoan kalabut namo, nga makatuman sa katuyoan sa among pagkalalang, ug mahimayaong magmadaugon, pinaagi sa imong grasya, ibabaw sa tanang mga sala nga naghasol, unta matubos gikan sa tanang dautan, ug mahimong maihap sa gingharian sa langit uban niadtong kinsa mopuyo sa imong presensya sa kahangturan.²²

Mga Sugyot sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa man ang pagtuo? (Tan-awa sa mga pahina 168–69; tanawa usab sa Mga Hebreohanon 11:1, footnote b; Alma 32:21.) Sa unsa man nga paagi nga kita makadawat “sa ebidensya sa mga butang nga dili makita”? Alang kanimo unsa ang gipasabut sa “paglakaw pinaagi sa pagtuo ug dili pinaagi sa makita”?
Sa unsa nga paagi nga ang pagtuo ni Jesukristo makaimpluwensya sa atong inadlawng kinabuhi? Sa unsa man nga paagi nga ang hugot nga pagtuo kang Jesukristo makaimpluwensya sa atong paglaum alang sa kinabuhing dayon? (Tan-awa sa Moroni 7:41–42.)
Samtang kamo magtuon sa mga pagtulun-an ni Presidente Woodruff niini nga hugna, unsa man ang inyong makita nga kalabutan tali sa atong pagtuo ug sa atong mga binuhatan? (Tan-awa usab sa Santiago 2:17–26.)
Sa unsa man nga paagi nga napakita ni Wilford Woodruff ang iyang hugot nga pagtuo sa dihang gitawag siya aron pag-alagad sa iyang unang full-time mission? (Tan-awa sa mga pahina 167, 168–69.) Unsa man ang inyong mga kasinatian diin nagkinahanglan nga mogamit sa inyong pagtuo?
Unsa man ang atong makat-onan kalabut sa hugot nga pagtuo gikan sa ehemplo ni Jesukristo? gikan sa ehemplo ni Propeta Joseph Smith? gikan sa mga ehemplo sa mga misyonaryo ug bag-ong mga convert karon? (Tan-awa sa mga pahina 170–171.)
Sa unsa man nga paagi nga gipanalangin kamo sa Ginoo samtang kamo naggamit sa pagtuo diha Kaniya?
Timan-i ang pulong gasa sa unang paragrap sa pahina 170–171. Hinuktoki kini ug hisguti ang importansya sa paghinumdum nga ang hugot nga pagtuo usa ka gasa gikan sa Dios. Unsa man ang atong buhaton aron madawat kini nga gasa? (Tan-awa sa mga pahina 173–74.)

May Kalabutan nga mga Kasulatan: Mga Taga-Roma 10:17; 2 Mga Taga-Corinto 5:7; Helaman 15:7–8; Ether 12:2–27; Moroni 7:20–33

Christ healing a man — “Bisan gani ang mga gibuhat ni Jesus, … ang tanan tungod sa pagtuo. Kadto pinaagi sa gahum sa Amahan, kinsang buhat Siya mianhi aron ipahigayon, nga Siya nakalahutay.”

missionaries sharing the gospel — Si Presidente Woodruff miingon nga ang mga misyonaryo “nakasugakod pinaagi sa mga pagtuo; mibiyahe pinaagi sa pagtuo; mitrabaho sila pinaagi sa pagtuo. Ang pagtuo maoy nakapalahutay kanila.”