Hugna 18

Buhat sa Templo: Mahimong mga Manluluwas sa Bukid sa Zion

Naghupot kita sa mga yawe sa kaluwasan sa atong mga kaliwatan kinsa namatay nga walay ebanghelyo.

Gikan sa Kinabuhi ni Wilford Woodruff

Niadtong Oktubre 1841, human dayon sa pagbalik sa Nauvoogikan sa misyon sa England, si Elder Wilford Woodruff mitambong og miting diin si Propeta Joseph Smith mitudlo sa doktrina sa katubsanan sa mga patay. Kini mao ang unang higayon nga si Elder Woodruff nakadungog nga ang buhing mga miyembro sa Simbahan makadawat sa makaluwas nga mga ordinansa alang sa ilang mga kaliwatan kinsa namatay na. Miingon siya: “Daw kadto sama sa haligi sa kahayag gikan sa trono sa Dios ngadto sa atong mga kasingkasing. Nag-abli kini og lapad nga hawan nga daw mahangturon sa among mga hunahuna.”¹ Mikomentaryo usab siya:“Kini nagpakita kanako nga ang Dios kinsa mipadayag niana nga baruganan ngadto sa tawo maalamon, makiangayon ug tinuod, adunay pinakamaayo nga mga hiyas ug maayong panabut ug kahibalo. Gibati nako nga makanunayon siya sa gugma, kalooy, hustisya ug paghukom, ug gibati nako nga nahigugma ko sa Ginoo og labaw pa kaysa sukad sa wala pa ang akong kinabuhi. … Gibati nako sa pag-ingon og hallelujah sa dihang ang pagpadayag miabut nagpahayag ngari kanato sa bunyag alang sa mga patay. Gibati nako nga aduna kitay katungod sa paglipay sa mga panalangin sa Langit.”²

Sa pagkadungog niini nga doktrina, si Elder Woodruff naghunahuna sa iyang inahan. “Ang unang butang nga miabut sa akong hunahuna,” miingon siya, “mao nga aduna koy inahan sa kalibutan sa espiritu. Namatay siya mga 14 pa ko ka bulan. Wala gyud ko kaila sa [akong] mama. Naghunahuna ko sa akong kaugalingon, Duna ba koy gahum sa pag-seal sa akong mama ngadto sa akong papa? Ang pulong mao nga, oo.”³ Wala madugay misulti siya sa panahon nga sa katapusan aduna na siyay opurtunidad sa pagpaseal sa iyang mama ngadto sa iyang papa: “Aduna na siyay bahin sa unang pagkabanhaw; ug kini lang gani mobayad na nako sa tanang paghago sa akong kinabuhi.”⁴ Mipamatuod usab siya sa kalipay nga iyang gibati samtang siya nagpahigayon sa mga ordinansa sa templo alang sa ubang miyembro sa pamilya nga namatay na: “Naangkon nako ang panalangin ug pribilihiyo sa pagtubos diha sa Templo sa atong Dios mga upat ka libo nga mga kaliwatan sa akong papa ug mama. Nagsulti ko niini tungod kay kini maoy usa sa atong mga panalangin, ang kahingpitan ug himaya diin dili gyud kita mahibalo hangtud maabli ang bilo.”⁵

Samtang nag-alagad isip Presidente sa Simbahan, si Wilford Woodruff mipahinungod sa Templo sa Salt Lake. Nianang okasyona nangamuyo siya sa Ginoo sa pagtabang sa mga Santos sa ilang mga paningkamot sa pagtubos sa mga patay: “Kamo ba … motugot sa balaang mga mensahero nga mobisita kanato sulod niining sagradong mga bungbong ug mopaila kanato kalabut sa buhat nga ato gyud nga ipahigayon alang sa atong mga patay. Ug, kay ikaw gusto man sa mga kasingkasing sa daghan kinsa wala pa makasulod og pakigsaad uban kanimo nga mosiksik sa ilang mga kagikanan, ug sa pagbuhat sa ingon sila nagsiksik sa ilang daghang mga kaliwatan sa imong nga Santos, nag-ampo kami kanimo nga unta dugangan pa nimo ang ilang tinguha sa ilang kasingkasing, nga sila unta niining paagiha motabang sa pagtuman niini nga buhat. Panalangini sila, nag-ampo kami kanimo, sa ilang mga paghago, nga sila unta dili masayop sa pag-andam sa ilang mga kaliwatan; ug dugang pa, nangayo kami kanimo sa pag-abli diha sa ilang atubangan og bag-ong mga paagi sa impormasyon, ug mobutang sa ilang mga kamot sa mga rekord sa nangagi, nga ang ilang buhat dili lamang husto apan kini usab kompleto.”⁶

Mga Pagtulun-an ni Wilford Woodruff

Ang Langitnong Amahan maloloy-on sa tanan Niyang nga anak ug dili mosilot niadtong namatay nga walay kahigayunan sa pagdawat sa ebanghelyo.

Kon ang mga patay wala makadungog sa Ebanghelyo, ang Ginoo dili mopadala nila sa impyerno tungod lang kay wala sila makadawat niini. Ang Ginoo mao ang Amahan sa tanan. Maloloyon siya sa tanan. … Minilyon ka mga tawo ang natawo, nagpakabuhi ug namatay, kinsa wala gyud makakita sa nawong sa propeta sa tibuok nilang mga kinabuhi; wala gyud makakita og tawo nga gitawag sa Dios ug adunay gahum sa pagpangalagad sa usa sa mga ordinansa sa Balay sa Dios. Mosilot ba ang Dios kanila tungod lang kay wala sila makadawat sa Ebanghelyo? Dili gyud.⁷

Wala gyuy pagtamud sa tawo ang Dios; dili siya mohatag og mga pribilihiyo sa usa ka henerasyon ug itago kini sa uban; ug ang tibuok tawhanong pamilya, gikan ni amahang Adan hangtud sa atong panahon, adunay pribilihiyo, bisan diin, sa pagpaminaw sa ebanghelyo ni Kristo; ug ang mga henerasyon nga milabay na ug miagi nga wala makadungog sa ebanghelyo sa kahingpitan niini, sa gahum ug himaya, dili gyud responsable sa Dios sa wala pagtuman niini. Ni sila dad-on ubos sa pagsilot sa pagsalikway sa balaod nga wala gyud nila makita o masabut; ug kon sila magpakabuhi sa kahayag nga anaa kanila sila makatarunganon, ug sila pagatudloan diha sa kalibutan sa espiritu.⁸

Mahimo kitang mga manluluwas sa Bukid sa Zion samtang kita magtukod sa mga templo ug modawat sa makaluwas nga mga ordinansa alang sa mga patay.

Daghan sa atong mga kaliwatan, karon anaa sa kalibutan sa espritu, nga wala gyud makakita sa nawong sa apostol, propeta o dinasig nga tawo, ug sila dili prisohon. Si Joseph Smith, Heber Kimball, George A. Smith ug liboan ka mga elders sa Israel mahimong motudlo didto sa mga espiritu, ug sila mahimong modawat sa mga pagpamatuod diin ang mga elder mihatag; apan ang mga elder dili mobunyag sa mga mituo didto; wala nay bunyag didto sa kalibutan sa espiritu kaysa adunay pagminyo o paghatag og kasal.⁹

Pipila ka tawo o mga tawo nga buhi pa mohimo gyud niini nga bahin sa buhat alang kanila; kay kini sama ka importante sa pagluwas sa patay kinsa wala gyud makadawat sa Ebanghelyo ingon sa buhi. Ug kadtong tanan kinsa namatay na nga walay Ebanghelyo adunay katungod sa pagpaabut og usa ka tawo nga buhi nga mohimo niini nga buhat alang kanila.¹⁰

Katungdanan kini nato ang pagdawat sa responsibilidad ug pagtukod niini nga mga Templo. Gihunahuna ko kini nga bahin sa atong pangalagad ingon nga misyon nga ingon ka importante sa pagtudlo sa mga buhi; ang mga patay makadungog sa tingog sa mga sulogoon sa Dios sa kalibutan sa espiritu, ug dili sila makaapil sa buntag sa [unang] pagkabanhaw, gawas lang kon usa ka piho nga ordinansa gihimo, alang sa ilang kaayohan ug puli alang kanila, sa mga Templo nga gitukod sa pangalan sa Dios. … Aduna gyuy motubos kanila, pinaagi sa paghimo sa maong mga ordinansa alang kanila nga buhi kay dili man sila makahimo sa ilang kaugalingon isip espiritu, ug aron kini nga buhat mahimo gyud, aduna gyud kitay mga templo diin himoon kini; ug unsa ang akong buot isulti ninyo, akong mga kaigsoonan, mao nga ang Dios sa langit nagsugo kanato sa pagdawat sa responsibilidad ug pagtukod niini, nga ang buhat sa katubsanan mahimong mapadali. Ang atong ganti mosugat kanato kon kita moadto na sa pikas bilo. …

… Dili ko matingala sa gisulti ni Presidente [Brigham] Young nga natandog siya sa pag-awhag sa mga Santos sa Ulahing mga Adlaw sa pagpadali sa pagtukod sa mga Templo. Gibati niya ang importansya sa buhat; apan karon wala na siya, gisangon kini kanato sa pagpadayon niini, ug ang Dios manalangin sa atong mga kahago ug malipay gyud kita. Pag-andam kini nga gikinahanglan sa ikaduhang pag-anhi sa Manluluwas; ug kon kita nakatukod sa mga Templo nga karon gipamalandong, unya magsugod kita sa pagkakita sa panginahanglan sa pagtukod sa uban, tugbang sa atong kakugi sa atong mga paghago niini nga direksyon, masabtan nato ang gidak-on sa buhat nga dapat buhaton, ug karon mao lang ang sinugdanan. Kon ang Manluluwas moabut, liboan ka mga tuig ang itagana niini nga buhat sa katubsanan; ug ang mga Templo makita sa tibuok yuta ni Joseph,—sa Habagatan ug sa Kasadpang America—ug usab sa Europe ug bisan asa; ug ang tanang kaliwatan ni Shem, Ham ug Japheth kinsa wala makadawat sa buhi pa kinahanglan ipahigayon sa mga templo sa Dios sa dili pa ang Manluluwas mopresentar sa gingharian sa Amahan, moingon, “Nahuman na.”¹¹

Adunay gipahimutang sa inyong atubangan … pipila ka mga butang nga may kalabutan sa pagtubo sa sa atong mga patay, ug pipila ka mga butang kalabut sa pagtukod og mga templo. Kini, mga kaigsoonan, mahinungdanong mga buhat. Kini mga buhat diin atong gibuhat alang sa uban nga dili sila makabuhat alang sa ilang kaugalingon. Kini mao ang gibuhat ni Jesukristo sa dihang mitugyan Siya sa Iyang kinabuhi alang sa atong katubsanan, tungod kay kita dili makatubos sa atong kaugalingon. Duna kitay mga amahan ug mga inahan ug mga kaliwatan sa kalibutan sa espiritu, ug duna kitay himoon alang kanila. Isip indibidwal duna koy dakong interes niini nga buhat sa pagtubos sa mga patay, ug mao usab kamo mga kaigsoonan. Kini ang trabaho nga atong ipadayon hangtud nga duna kitay oprtunidad. … Kini ang buhat nga gisangon sa mga Santos sa Ulahing mga Adlaw. Buhata ang taman nga imong mahimo niini nga bahin, aron kon moadto na kita sa laing bahin sa bilo ang inyong mga amahan, mga inahan, mga paryente ug mga higala manalangin kaninyo tungod sa inyong nabuhat, ug tungod kay kamo nahimong mga instrumento sa mga kamot sa Dios sa pag-angkon sa ilang katubsanan, pagailhon kamo isip mga Manluluwas sa Bukid sa Zion agi og katumanan sa panagna [tan-awa sa Abadias 1:21].¹²

Gipanalanginan kita uban sa gahum ug awtoridad, naghupot sa Holy Priesthood pinaagi sa sugo sa Dios, mobarug sa yuta ug motubos sa mga buhi ug mga patay. Kon wala kini nato buhata, kita tunglohon ug isalikway sa yuta, ug ang Dios sa Israel mopatubo og mga tawo kinsa mobuhat niini.¹³

Mga kaigsoonan, tugoti ang inyong kaugalingon nga maimpluwensya niining mga butanga. Magpadayon kita sa atong mga record sa family history, pagsulat niini og husto sa atubangan sa Ginoo, ug ipatuman kini nga baruganan, ug ang mga panalangin sa Dios moatiman kanato, ug kadto kinsa gitubos mopanalangin kanato sa mga adlaw nga moabut. O Dios mag-ampo ako nga isip mga tawo ang among mga mata unta mabuka aron makakita, ang among mga dunggan makadungog, ug ang among mga kasingkasing unta makasabut sa mahinungdanon ug gamhanang buhat nga gisangon kanato, ug nga ang Dios sa langit nagsugo kanato sa atong mga kamot. Mahinungdanon ug mahimayaon kini nga mga baruganan diin ang Dios mipadayag kanato kalabut sa katubsanan sa atong mga patay.¹⁴

Ang mga patay nahingawa alang kanato nga modawat sa mga ordinansa alang kanila, ug ang Dios mismo nagbantay sa buhat sa templo uban sa dakong interes.

Duna kitay dakong buhat sa atong atubangan sa pagtubos sa atong mga patay. Ang dalan nga atong gisubay gibantayan pagayo sa tanang langit.¹⁵

Ang atong mga kaliwatan nagpaabut kanato nga moatiman niini nga buhat. Nagbantay sila kanato uban sa dakong kahingawa, ug matinguhaon nga kita makahuman gyud niini nga mga templo ug moatiman sa mga ordinansa alang kanila, aron sa buntag sa pagkabanhaw makaapil sila ug matagamtam ang samang mga panalangin nga atong nadawat.¹⁶

“Tanan kinsa namatay nga wala kahibalo niini nga Ebanghelyo, kinsa makadawat unta niini kon sila gitugotan pa sa pagpabilin, mahimo nga manununod sa celestial nga gingharian sa Dios; ug usab ang tanan nga mamatay sukad karon nga walay kahibalo niinit, kinsa makadawat unta niini sa ilang tibuok nga kasingkasing, mahimong mga manununod niana nga gingharian, kay Ako, ang Ginoo, mohukom sa tanang mga tawo sumala sa ilang mga buhat, sumala sa tinguha sa ilang mga kasingkasing.” [D&P 137:7–9.] Mao usab kini uban sa inyong mga amahan. Gamay ra gyud kaayo, kon duna man, nga dili modawat sa Ebanghelyo. … Ang mga amahan niini nga mga tawo modawat gyud sa Ebanghelyo.¹⁷

Si Presidente Young miingon ngari kanato, ug tinuod gyud, kon ang mga patay mahimo pang makasulti ingon ka lanog sa pulo ka libo nga mga dugdog, magtawag sa mga sulugoon sa Dios sa pagbarug ug sa pagtukod sa mga Templo, sa pagbuhat sa ilang mga tawag ug motubos sa ilang mga patay.¹⁸

Kon [kita] nasayud ug nakasabut pa sa mga pagbati ni Propeta Joseph Smith, ug niadtong mga kaigsoonan nga nagtrabaho uban niya, ug ang mga pagbati sa minilyon sa tawhanong pamilya kinsa anaa sa prisohan sa mga espritu, dili gyud ta kapoyon. … Motrabaho gyud kita alang sa katubsanan sa atong mga patay.¹⁹

Ang mga mata sa langit anaa nagtan-aw kanato; ang mata sa Dios mismo, ang mga mata sa kada Propeta ug sa Apostol sa kalibutan sa espiritu, nagbantay kaninyo, nagbantay niining Priesthood, aron pagsuta unsa ang ilang gihimo ug unsa ang ilang buhaton. Kini labaw pa ang importansya kay sa atong maamgohan ug masabtan. Maamgohan unta nato ang importansya sa mga ordinansa sa Balay sa Dios ug mobuhat unta sa atong katungdanan, nga aron kita mahimong makatarunganon.²⁰

Kon magkita unya kita sa atong mga kaliwatan sa kalibutan sa espiritu, mamahimo kining panahon sa kalipay o pagbasol, magdepende sa buhat nga atong nahimo alang kanila dinhi.

Aduna kamoy gahum sa … pagtubos sa inyong mga patay. Daghan kaayo kanato nga nagbuhat na niini, ug naglaum ko nga kamo magpadayon kon kamo adunay bisan kinsang patay nga itubos. Ayaw gyud kamo paghunong nianang trabahoa samtang kamo aduna pay gahum sa pagsulod sa Templo. … Duna koy mga liboan nga natubos dinhi. Duna koy mga pagbunyag, mga pag-orden, mga pagpanghugas ug pagdihog, mga pagtuga ug mga pag-seal alang kanila, sama ra nga sila mismo nagbarug sa buhi pa. Moadto ko ug makigkita kanila sa pikas bahin sa bilo. Moadto kamo ug makigkita sa inyong mga paryente.²¹

Kon ihaya na ang akong lawas ug ang akong espiritu moadto sa kalibutan sa espiritu, malipay gayud ako ug maghimaya uban kanila sa buntag sa pagkabanhaw, tungod kay sila nakadawat man niini nga mga baruganan. “Nan,” tingali kamo moingon, “unya kon kining mga tawhana nga inyong gipabunyagan dili modawat sa Ebanghelyo?” Ila na kanang sayop, dili ako. Kini ang katungdanan nga gisangon sa tanan sa Israel, nga sila moatiman niining trabahoa, hangtud nga anaa kanila ang opurtunidad dinhi sa yuta.²²

Unsa kahay akong bation, human sa akong dugay nga pagpakabuhi, uban sa mga pribilihiyo nga anaa nako sa pag-adto niini nga mga templo, nga moadto sa kalibutan sa espiritu nga wala himoa kining trabahoa? Magkita kami sa kaliwatan sa akong amahan, magkita kami sa kaliwatan sa akong inahan, magkita kami sa akong kagikanan, ug sila anaa sa prisohan sa mga espiritu; naghupot ako sa mga yawe sa ilang kaluwasan, ug unya walay nahimo alang kanila; unsa kaha ang akong bation, o unsa gyud [kaha] ang ilang bation ngari kanako?²³

Dili ako buot nga moadto sa kalibutan sa espiritu ug makigkita sa akong mga kagikanan kinsa wala gayud makadungog sa Ebanghelyo sa ilang panahon ug henerasyon, ug moingon sila kanako, “Gihuptan nimo ang gahum sa pag-adto ug pagtubos kanako, ug wala kana nimo buhata.” Dili ko buot nga mahitabo kana. Dili ako buot nga mahitabo kana sa mga Santos sa Ulahing mga Adlaw. Nagtuo ako nga maayo kaayo ang atong nabuhat. Duna kitay upat ka templo nga anaa nining mga bukira [niadtong 1897], ug kini nagamit gayud pag-ayo sa mga Santos sa Ulahing mga Adlaw. Apan buot kami nga mopadayon niini hangtud nga atong matubos ang tanan ubos sa atong gahum sa pagtubos. Kon atong ipatuman kini nga baruganan, kita mapanalanginan gyud niini. Maanaa kini kanato sa buntag sa pagkabanhaw, kon ang atong mga amahan ug mga inahan ug atong mga kagikanan makig-uban nato tungod kay ato silang gitubos.²⁴

Kon dili nato buhaton ang gisugo kanato niining butanga, anaa kita sa panghimaraut. Kon kita nakahimo niini, nan kon magkita na kita sa atong mga higala sa celestial nga gingharian, moingon sila, “Nahimo namo kamong mga manluluwas, tungod kay duna kamoy gahum sa pagbuhat niini. Gibuhat ninyo kini nga mga ordinansa nga gisugo sa Dios.”²⁵

Gitawag kita isip mga Manluluwas sa Bukid sa Zion, samtang ang gingharian iya sa Ginoo. Kini mao ang mahimayaong mga baruganan. Nga maluwas ang atong kaugalingon, ug sa pagluwas sa atong isigkatawo, pagkamahimayaon! Unsa ang bulawan ug plata; unsa ang bahandi niini nga kalibutan? Kining tanan mawala ra. Mamatay kita ug biyaan kini. Apan kon kita adunay kinabuhing dayon, kon magpabilin kitang matinud-anon ug mobuntog sa kalibutan, malipayon kita nga moadto sa kalibutan sa espiritu. Malipay gayud ako niining tanang mga butang. Wala pa gyuy bisan unsang baruganan nga gipadayag sa Ginoo nga akong gikalipay og dako kaysa pagtubos sa atong mga patay, nga makauban nato ang atong mga amahan, atong mga inahan, atong mga asawa ug atong mga anak sa organisasyon sa pamilya, sa buntag sa unang pagkabanhaw ug sa Celestial nga Gingharian. Kini mao ang labing taas nga baruganan. Takus gyud kini sa tanang sakripisyo.²⁶

Mga Sugyot sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang ikaw mangandam sa pagtudlo. Alang sa dugang nga tabang, tan-awa ang mga pahina v–x.

Unsa man ang gibati ni Wilford Woodruff sa dihang iyang unang nadungog ang doktrina sa katubsanan sa mga patay? Unsa man ang iyang unang nahunahunaan? (Tan-awa sa pahina 205–6.) Unsay atong makat-unan gikan niining mga tubag?
Miingon si Presidente Woodruff nga ang buhat sa templo alang sa mga patay sama ka importante sa buhat sa misyonaryo alang sa mga buhi (pahina 208). Hinuktuki ug hisguti ang kamahinungdanon niini nga pamahayag. Unsa man ang mga kasinatian nga imong nakita nga may koneksyon tali sa buhat sa templo ug buhat sa misyonaryo?
Miingon si Presidente Woodruff nga kon kita modawat sa mga ordinansa alang sa mga patay, makahimo kita og trabaho nga ang uban “dili gyud makahimo alang sa ilang kaugalingon” (pahina 208–9). Sa unsa man nga paagi nga ang pagsabut niini makaimpluwensya sa imong gibati kalabut sa buhat sa templo?
Ribyuha ang seksyon nga nagsugod sa pahina 211. Sumala pa ni Presidente Woodruff, unsa man ang gibati sa atong mga kaliwatan kalabut sa buhat sa templo? Giunsa man sa Dios nga Amahan paghunahuna sa trabaho? Unsay imong gibati samtang nagbasa kamo niini nga mga pamahayag?
Ribyuha ang katapusang seksyon sa hugna, nagsugod sa pahina 212. Hunahunaa kuno unsa kahay imong bation kon magkita mo sa inyong mga kaliwatan sa kalibutan sa espiru.
Unsaon man nato paggahin og panahon alang sa buhat sa templo ug sa family history? Unsa ang mga kapanguhaan nga gihatag sa Simbahan aron paggiya ug pagtabang kanato?
Sa unsa man nga paagi nga ang pag-apil sa buhat sa templo ug sa family history makapalig-on sa atong mga pamilya? Unsay atong buhaton aron pagtabang sa mga kabatan-onan sa Simbahan nga malipay sa ilang responsibilidad sa pagtubos sa mga patay?

May Kalabutan nga mga Kasulatan: 1 Mga Taga-Corinto 15:29; D&P 128; 138

Salt Lake Temple — Ang Templo sa Salt Lake, gipahinungod ni Presidente Wilford Woodruff niadtong Abril 6, 1893.

Winter Quarters Nebraska Temple — Ang Templo sa Winter Quarters Nebraska, natukod diin daghang mga Santos sa Ulahing mga Adlaw nagkampo niadtong tingtugnaw sa 1846–47 sa wala pa sila magsugod sa pagbiyahe paingon sa Walog sa Salt Lake.

St. George Utah Temple — Ang Templo sa St. George Utah, diin si Presidente Wilford Woodruff nag-alagad isip presidente sa templo.