Hugna 24

Pagpangandam alang sa Ikaduhang Pag-anhi ni Jesukristo

Samtang nagpaabut kita sa pagbalik sa Manluluwas aron magmando dinhi sa yuta, kinahanglan gayud nga mangandam kita sa atong kaugalingon sa indibidwal, isip mga pamilya, ug isip mga katawhan.

Gikan sa Kinabuhi ni Wilford Woodruff

Sa usa ka pakigpulong sa kinatibuk-ang komperensya niadtong Abril 1950, si Elder Richard L. Evans sa Korum sa Napulog Duha ka mga Apostoles miingon: “Nakahinumdom ako og usa ka pamahayag, nga gipahinungod, sumala sa akong nahinumdoman niini, ngadto kang Presidente Wilford Woodruff. Pipila sa mga kaigsoonan sa iyang panahon giingon nga miduol kaniya … ug nangutana kaniya kon kanus-a sa iyang paminaw ang katapusan—kanus-a moabut ang Magtutudlo? Kini, sa akong hunahuna, dili mao ang tukma niya nga mga pulong, apan naghatud kini sa espiritu sa gikataho niya nga tubag: ‘Magpakabuhi ako nga sama sa ugma— apan mananom lang gihapon ako ug serales [cherry] nga mga kahoy!’ ”¹

Bisan tuod og dili kini mao ang tukma nga mga pulong ni Presidente Woodruff, kini tinuod nga nagpahayag sa iyang mga pagbati kabahin sa Ikaduhang Pang-anhi ni Jesukristo. Miangkon siya nga: “Wala ako magtuo nga adunay usa nga makatagna sa oras sa pag-anhi sa Anak sa Tawo. … Dili kita kinahanglang maglibug kon kanus-a kana nga panghitabo ibutyag.”² Hinoon, nagpaabut siya sa pagbalik sa Manluluwas aron magmando dinhi sa yuta. Uban sa pagpamatuod nga ang Simbahan naestablisar na niining ulahing mga adlaw, gitudloan dayon niya ang mga Santos sa walay paglangaylangay, nag-awhag kanila sa pagpangandam alang sa Ikaduhang Pag-anhi sa Manluluwas. “Ang tilimad-on sa langit ug yuta nagpasabut sa pag-anhi ni Ginoong Jesukristo,” siya miingon.”Kon ang akong hunahuna, ubos sa impluwensya sa Espiritu Sa Dios, ablihan aron makatugkad niini nga mga butanga sa daghang mga higayon ako natingala ug nahibulong, dili lamang sa kalibutan apan sa ato usab mismong kaugalingon, nga dili kita mas maikagon ug makugihon sa pag-andam sa atong mga kaugalingon ug sa atong mga pamilya alang sa mga panghitabo nga hapit na moabut, kay bisan ang langit ug ang yuta mahanaw, walay bisa’g usa lang ka tuldok o kudlit sa pulong sa Ginoo nga dili matuman.”³

Mga Pagtulun-an ni Wilford Woodruff

Ania na kita sa katapusang mga adlaw, ug kinahanglan nga magbantay kita sa mga tilimad-on sa Ikaduhang Pag-anhi sa Manluluwas.

Moingon ako ngadto sa mga Santos sa Ulahing mga adlaw, isip usa ka elder sa Israel ug usa ka apostol ni Ginoong Jesukristo, nagkaduol kita sa pipila sa pinakadakong mga paghukom sa Dios nga sukad gibubo sa kalibutan. Bantayi ninyo ang mga tilimad-on sa panahon, ang timaan sa pag-abut sa Anak sa Tawo. Nagsugod na kini nga ipakita sa langit ug dinhi sa yuta. … Nagkaduol na kita niini nga mga butanga. Ang tanan nga maayong buhaton sa mga Santos sa Ulahing mga adlaw mao ang magmalinawon, magmabinantayon ug magmaalamon atubangan sa Ginoo, bantayi ang mga tilimad-on sa mga panahon, ug magmatinuuron ug magmatinudanon; ug kon makalabang na kamo inyo rang masabtan ang daghang mga butang nga wala ninyo masabti karon. … Ania na kita sa katapusang dispensasyon ug kahingpitan sa panahon. Mahinungdanon kini nga adlaw, ug ang tanan didto sa langit nagbantay kanato, ug ang mga mata sa Dios mismo ug sa tanang mga patriarch ug mga propeta. Nagbantay sila kaninyo uban sa pagbati sa hilabihang kaikag, alang sa inyong kaayohan; ug sa atong mga propeta nga gipatay, ug mitimaan sa ilang pagpamatuod uban sa ilang dugo, nakig-uban sa mga Dios, nangamuyo alang sa ilang mga kaigsoonan. Busa, magmatinud-anon kita, ug isalig ang mga panghitabo sa mga kamot sa Dios, ug siya na ang mag-atiman kanato kon mobuhat kita sa atong katungdanan.⁴

Ang Ginoong Jesukristo moanhi aron magmando sa yuta. Ang kalibutan mahimong moingon nga naglangay siya sa iyang paganhi hangtud sa katapusan sa yuta. Apan wala sila masayud sa mga hunahuna ni mga paagi sa Ginoo. Ang Ginoo dili maglangay sa iyang pag-anhi tungod sa ilang pagkawalay pagtuo, ug ang mga tilimad- on sa langit ug sa yuta nagpasabut nga duol na kini. Ang kahoy nga higira nagpakita na sa iyang mga dahon sa tanang nasud sa yuta [tan-awa sa Joseph Smith—Mateo 1:38–40], ug kon anaa kanila ang Espiritu sa Dios ila kining makita ug makasabut niini.⁵

Makakat-on kita mahitungod sa mga tilimad-on sa Ikaduhang Pag-anhi pinaagi sa pagtuon sa mga kasulatan.

Kon ang kalibutan buot mahibalo unsay umaabot nga mahitabo, pabasaha sila sa Biblia, sa Basahon ni Mormon, ug sa Doktrina ug mga Pakigsaad; pabasaha sila [sa] pagpadayag ni San Juan. Ingon nga ang Dios buhi kini mahitabo gayud. Walay usa niini nga mapakyas. Ug ang kamot sa Dios nagsugod na sa pagpakita dinhi sa yuta. Ang paghukom hapit na moabut; ang kalamidad naghulat sa mga nasud sa yuta; apan kita sa atong kaugalingon kinahanglan nga andam nga magbarug sa balaan nga mga dapit samtang ang mga paghukom sa Dios gipakita dinhi sa yuta.⁶

Gisultihan na kita sa ika-24 nga kapitulo sa Mateo, nga si Jesus, usa niana ka higayon, nagtudlo sa iyang mga tinun-an og daghang mga butang kabahin sa iyang ebanghelyo, ang templo, sa mga Judeo, sa iyang ikaduhang pag-anhi ug sa katapusan sa kalibutan; ug sila nangutana kaniya—Magtutudlo, unsa man ang ilhanan niining mga butanga? Ang Manluluwas mitubag kanila, pero sa dinalian nga paagi. Samtang naghunahuna ako niining mga butanga akong gibati nga kinahanglan mobasa kabahin sa pulong sa Ginoo nganhi kanato, diin hingpit nga nagpasabut niini nga mga butanga kaysa gipasabut sa Manluluwas ngadto sa iyang mga tinun-an. Kana nga bahin sa pulong sa Ginoo nga akong basahon, mao ang pagpadayag nga gihatag ngadto sa mga Santos sa Ulahing mga adlaw, niadtong Marso 7, 1831. [Human mohimo niini nga pamahayag, si Elder Woodruff mibasa sa pagpadayag nga mao na karon ang seksyon 45 diha sa Doktrina ug mga Pakigsaad] …

Nagpuyo na kita karon sa katapusan nga panahon, bisan tuod og tinuod kini nga daghang mahinungdanon nga dagko ug importante nga mga panghitabo ang mahinabo niining panahona. Apan usa ka butang ang siguro, bisan tuod ang Ginoo wala mobutyag sa adlaw ni sa oras nga moabut ang Anak sa Tawo, iya na nga gitudlo ang kaliwatan, ug ang mga tilimad-on nga gipanagna ingon nga may mag-una nianang mahinungdanon nga panghitabo nagsugod na sa pagpakita sa kalangitan ug dinhi sa yuta, ug magpadayon hangtud nga matuman kini. Kon kita, isip mga Santos sa Ulahing mga adlaw, buot sa bisan unsa nga butang nga modasig kanato, atong basahon ang Biblia, ang Basahon ni Mormon ug ang Libro sa Doktrina ug mga Pakigsaad, paigo na kini aron sa paglig-on ug pagtudlo kanato sa mga butang sa Dios. Hatagi og bili kining mga pagpadayag sa Dios ug ang ebanghelyo ni Kristo nga nahisulat niini.⁷

Makita nimo ang daghang mga panagna kabahin sa iyang pagabut, sama sa—”Ako moabut sa labing madali,” “Ako moabut sa takna nga wala ninyo dahuma,” “Ang akong pag-abut anaa na gayud sa pultahan,” “Moabut ako sama sa usa ka kawatan sa kagabhion,” “Ako moabut ra sa takna nga wala ikaw magpaabut kanako,” ug “Bulahan siya kinsa nagpaabut sa pag-anhi sa atong Ginoo ug Manluluwas nga si Jesukristo.” Moingon ako nga sa kinatibuk-an sa mga Kasulatan—ang Daan ug Bag-ong Tugon, ang Basahon ni Mormon ug ang Libro sa Doktrina ug mga Pakigsaad, ang ikaduhang pag-anhi sa Ginoo kanunay nga gihisgutan; ug nagsaad ba ang Ginoo niini nga mga butang nga dili tumanon? wala, wala gayud siya, matuman gayud kini.⁸

Isip katawhan sa pakigsaad sa Ginoo, atong katungdanan ang pag-andam sa agianan alang sa Iyang Ikaduhang Pag-anhi.

Buot ako nga mangutana kon kinsa ang nagpaabut alang sa katumanan niini nga mga panghitabo, ug kinsa dinhi sa yuta ang nangandam sa ilang mga kaugalingon alang sa katumanan sa pulong sa Ginoo pinaagi sa mga baba sa mga propeta, mga patriyarka ug mga apostoles sa milabay nga mga unom ka libo ka tuig? Walay bisa’g kinsa nga akong nahibaloan, [gawas] sa mga Santos sa Ulahing mga Adlaw, ug ako mismo mibati nga wala kaayo kita magbantay sa ingon nga ato unta nga buhaton, ug dili gani kaayo kita andam alang sa dako kaayo nga mga panghitabo nga sagunson na nga moabut dinhi sa yuta niining ulahing mga adlaw. Kinsa pa man diay ang saligan sa Ginoo sa pag-andam sa iyang ikaduhang pag-anhi kon dili ang Iyang mga Santos? Walay lain.⁹

Ang Ginoo adunay mahinungdanong trabaho nga naghulat ug nag-andam siya og mga tawo nga mobuhat niini sa dili pa siya moabut. Karon ang pangutana mao kini, mga kaigsoonan, andam na ba ang atong mga kasingkasing? Ato ba nga naamgohan kining mga butanga? Isip mga tawo ato ba nga naamgohan ang atong mga responsibilidad atubangan sa Ginoo? Ang Ginoo mipabarug og gingharian sa mga kaparian niining katapusang mga adlaw aron pagtukod sa iyang simbahan ug gingharian, ug sa pag-andam og agianan alang sa ikaduhang pag-anhi sa Anak sa Tawo, ug ang Dios sa langit mibutang diha sa mga kamot sa iyang mga sulugoon sa mga yawe sa gingharian, ug siya miingon—“Bisan unsay akong mando niining akong mga sulugoon kinahanglan pagatumanon, kay ngadto kanila ang gahum gihatag aron sa pagbugkos ug sa pagpamatuod dinhi sa yuta ug didto sa langit, diha sa adlaw sa kasuko sa labing Makagagahum nga Dios, nga ibu-bu sa kalibutan.” [Tan-awa sa D&P 1:7–9.]

Naghunahuna ako, sa daghang mga higayon, nga kita, isip mga elder sa Israel ug isip mga Santos sa Ulahing mga Adlaw, napakyas pag-ayo sa pagsabut sa atong katungdanan sa atubangan sa Ginoo. Ang buhat nga gisangon kanato mahinungdanon ug gamhanan; buhat kini sa labing Makagagahum nga Dios. May tulubagon kita sa pagsangyaw sa ebanghelyo ni Kristo sa tanang nasud sa yuta. … May tulubagon kita alang niining tanan ug sa pagtukod og mga templo ngadto sa Labing Halangdon, diin makasulod kita ug makabuhat sa mga ordinansa alang sa kaluwasan sa atong mga patay. …

… Kapila na manawag ang Ginoo sa mga nasud sa yuta aron tagaan sila sa celestial nga himaya, dungog, pagka-imortal ug kinabuhing dayon? Nagtawag siya kanila sulod sa unom ka libo ka tuig, ug nagpadala og iyang mga sulugoon sa kada panahon ug mitawag sa mga lumulupyo sa kalibutan sa pag-andam sa ilang mga kaugalingon alang sa mahinungdanon nga adlaw sa iyang ikaduhang higayon ug pag-abot, nga hapit na. Kusganon Siya nga nagatawag kanila karon; ug sa ako nang giingon sa pipila sa atong kaigsoonan dili pa lang dugay, ang Ginoo karon buot nga masayud kon ang mga Santos sa Ulahing mga Adlaw andam ba nga motrabaho uban kaniya o dili. Panahon na kini sa pagdesisyon.¹⁰

Sa dili pa moabut si Kristo kinahanglan nga andam ang mga tawo aron mabalaan sa atubangan sa Ginoo. Kinahanglan nga tukuron ang mga templo; ang Zion kinahanglan nga matukod, kinahanglang adunay dapit nga luwas alang sa mga katawhan sa Dios samtang ang iyang paghukom anaa pa sa yuta, kay ang mga paghukom sa Dios mohampak sa yuta, walay pagkasayop niana; ang pagpadayag puno sa mga saad kabahin niini, ug ingon nga gipahayag kini sa Ginoo, dili niya pakyason ang pagtuman sa iyang pulong.¹¹

Sa akong hunahuna wala kaayo kita makasabut sa gidak-on niini nga trabaho. Malisud kini nga butang alang kanato sa pagtugkad sa atong responsibilidad sa Dios, sa langit, sa mga patay, ingon man usab sa mga buhi nga atong isigkatawo.

Karon, kon akong tan-awon kining mga butanga, ako usab nga gitan-aw og unsay atong giatubang. Ang mga kapunongan, nga giorganisar niini nga Simbahan sukad pa sa sinugdanan, ang tanan mga tabang ug mga pagdumala, ug naghiusa aron sa pagpadayon niining mahinungdanong nga buluhaton. Ang langit nagtan-aw kanato. Ang Anak sa Dios ug ang tanang mga Propeta ug mga Patriyarka nga nakapuyo sa yuta nagbantay niining mahinungdanon nga buluhaton—kining mahinungdanon nga organisasyon nga nag-andam alang sa pag-anhi sa Anak sa Tawo.¹²

Kinahanglan gayud nga tagsa-tagsa kita nga mangandam sa kaugalingon alang sa Ikaduhang Pag-anhi ni Jesukristo.

Nagpuyo kita sa usa kaimportante nga panahon. Ang mga panagna kabahin sa atong panahon nagsingabot na kanato; andam ba kita sa pagsugat niini?¹³

Ang Manluluwas … mitandi sa gingharian sa Dios ngadto sa napulo ka mga birhen, nga nagdala sa ilang mga lampara ug nanglakaw aron sugaton ang ilang mga pamanhonon [tan-awa sa Mateo 25:1]. “Ang lima kanila mga but-an, ug ang lima mga boangboang. Kay ang mga boangboang, sa pagdala nila sa ilang mga lamparahan, wala magdalag lana; apan ang mga but-an nanagdalag mga prasko nga sinudlan ug lana uban sa ilang mga lamparahan. Ug kay ang pamanhonon nadugay man sa pag-abut, silang tanan nanagpiratpirat ug nahikatulog. Apan sa pagkatungang gabii dihay singgit nga nagingon, Tan-awa ang pamanhonon miabot; Panggula kamo ug sugata ninyo siya. Ug namangon silang tanang mga dalaga ug gihikay nila ang ilang mga lamparahan. Ug ang mga boangboang miingon sa mga but-an, Hatagi kamig lana kay nagakapalong kining among mga lamparahan. Apan kanila mitubag ang mga but-an nga nanagingon, Tingalig dili kini paigo alang kanamo ug kaninyo; pangadto hinoon kamo sa mga magbabaligya ug pamalit kamog alang kaninyo. Ug samtang nangadto sila sa pagpamalit, miabut ang pamanhonon ug silang mga andam misulod uban kaniya ngadto sa kombira sa kasal; ug unya ang pultahan gitakpan. Tapus niini nangabut usab ang ubang mga dalaga, nga nanag-ingon Ginoo, Ginoo, ablihi kami. Apan siya mitubag nga nag-ingon, Sa pagkatinuod, magaingon ako kaninyo, nga wala ako makaila kaninyo.” [Mateo 25:2–12.] Karon kadtong adunay lana sa ilang mga lamparahan, mao ang mga tawo kinsa nagsunod sa ilang relihiyon, nagbayad sa ilang ikapulo, nagbayad sa ilang mga utang, nagsunod sa mga sugo sa Dios, ug dili mopasipala sa iyang ngalan; mga lalaki ug mga babaye nga naglakaw diha sa kahayag sa Ginoo; mga lalaki ug mga babaye nga dili mobaligya sa ilang katungod alang lamang sa usa ka plato nga nilugaw o gamay nga bulawan o plata, kini mao sila nga mga maisugon sa pagpamatuod kang Jesukristo.

Mao kini ang akong gibati karon. Akong gibati nga mopasidaan sa akong mga igsoong lalaki ug babaye, ang mga Santos sa Ulahing mga Adlaw, sa pagsunod sa ilang relihiyon, pag-andam sa ilang mga kaugalingon, tungod kay maingon nga ang Ginoo buhi ang iyang pulong matuman. Ang pag-abot ni Jesus anaa na sa ganghaan… Ang matarung nga tawo dili makaluwas sa dautan. Kinahanglan nga magpuyo kita nga matarung, nga mao ang pagsunod sa mga sugo sa Dios.¹⁴

Ang sambingay sa napulo ka mga birhen gituyo aron sa pagrepresentar sa ikaduhang pag-anhi sa Anak sa Tawo, ang pag-abot sa Pamanhonon aron pagsugat sa pangasaw-onon, ang simbahan, ang asawa sa Kordero, sa katapusan nga mga adlaw; ug ako magpaabot nga ang Manluluwas husto sa dihang miingon siya, kabahin sa mga miyembro sa simbahan, nga lima kanila maalamon ug ang lima buang; kay kon ang Ginoo sa langit moabot diha sa gahum ug sa dakong pagkahimaya aron sa paghatag og ganti sa kada tawo sumala sa iyang binuhatan nga gihimo diha sa mortal nga kinbuhi, kon iyang makit-an nga katunga niadtong nangangkon nga mga miyembro sa iyang simbahan andam alang sa kaluwasan, mahimo nga daghan kini ingon sa gipaabut nga makita pinaagi sa dalan nga ilang gitinguha.¹⁵

Ang pulong sa Ginoo ngari kanako mao nga panahon na sa Zion nga motindog ug ipakita ang iyang kahayag aron mosanag; ug ang pagpamatuod sa Espiritu sa Dios kanako mao nga kining tibuok gingharian, kining mahinungdanon nga gingharian sa mga pari … nga nagdala sa priesthood, hingpit nga nakatuman sa usa ka bahin sa sambingay sa napulo ka mga birhen. Unsa man kana? Ngano, samtang ang Pamanhonon naglangay kitang tanan nagduka ug nakatulog isip usa ka simbahan ug gingharian kita natagpilaw ug nakatulog, ug ang pulong sa Ginoo kanako mao nga nakatulog na kita og dugay, ug may kahigayonan na kita karon sa pagbangon ug pagandam sa atong mga lampara ug pagbutang og lana sa atong mga sudlanan. Mao kini ang pulong sa Ginoo ngari kanako.¹⁶

Ang pangutana karon mao, sa unsang paagi kita makapundo og lana sa atong mga lampara? Pinaagi sa pagsunod sa mga sugo sa Dios, dili makalimot sa atong mga pag-ampo, [mag]buhat sa gisulti kanato pinaagi sa mga gipadayag ni Jesukristo, ug gawas pa niini motabang sa pagtukod sa Zion. Kon maghago kita alang sa gingharian sa Dios, makapundo kita og lana sa atong mga lampara, ang atong kahayag mosanag ug mobati kita sa pagpamatuod sa Espiritu sa Dios. Sa laing bahin, kon atong ipahimutang ang atong mga kasingkasing sa mga butang sa kalibutan ug naninguha sa mga pasidungog sa mga tawo, maglakaw kita sa kangitngit ug dili sa kahayag. Kon dili kita mohatag og bili ang atong priesthood, ug sa buhat niini nga priesthood, ang pagpalambo sa gingharian sa Dios, ang pag-atiman sa mga templo, ang pagtubos sa atong mga patay, ug ang pagpadayon sa mahinungdanon nga buhat nga giorden kanato sa Dios sa Israel—kon wala kita mobati nga mas bililhon alang kanato kini nga mga butang kaysa mga butang sa kalibutan, wala kitay lana sa atong mga lampara, walay kahayag, ug mapakyas kita sa pagtambong sa bangkite sa kasal sa Kordero.¹⁷

Kinsa ang naandam sa pag-abot sa Mesiyas? [Kadtong] kinsa mobati sa Espiritu Santo ug nagpuyo uban sa pagdasig sa labing Makagagahum, nga nagsunod ni Jesukristo ug nagdala og bunga aron sa pagpasidungog ug paghimaya sa Dios. Walay laing mga katawhan ang makahimo.¹⁸

Mag-ampo ako nga hinaut unta nga magpuyo kita sa sama nga kinaiya nga dili maipon sa buang nga mga birhen, apan makasabut sa tilimad-on sa mga panahon, mobuhat sa atong katungdanan, padayonon ang atong kaligdong, buntugon ang kalibutan, ug mangandam sa pagdawat sa atong Manunubos kon moabut siya, uban sa hingpit nga kalipay, ug dili sa kasub-anan ug kaulaw.¹⁹

Salig sa Dios. Buhata ang inyong katungdanan. Ayaw kamo kalimot sa pag-ampo. Pagbaton og hugot nga pagtuo sa Ginoo, padayon ug palamboon ang Zion. Mamaayo ra ang tanan. Ang Ginoo mobisita sa iyang mga katawhan, ug dalion niya paghuman ang iyang buhat diha sa pagkamatarung, kay kon dili walay tawo nga maluwas [tan-awa sa D&P 84:97; Mateo 24:22]. Moingon ako diha kaninyo, bantayi ang mga tilimad-on sa panahon, ug andama ang inyong mga kaugalingon sa butang nga moabut.²⁰

Mga Sugyot sa Pagtuon ug Pagtudlo

Hunahunaa kini nga mga ideya samtang ikaw magtuon sa hugna o samtang mangandam ikaw sa pagtudlo. Alang sa dugang nga tabang, tan-awa ang mga pahina v–x.

Ribyuha ang unang parapo diha sa pahina 277. Unsa nga mga leksyon ang imong makat-unan gikan sa pamahayag ni Elder Evans bahin ni President Woodruff?
Unsaon nato sa pag-ila kabahin sa mga tilimad-on sa Ikaduhang Pag-anhi sa Manluluwas? (Tan-awa sa mga pahina 279–80.)
Unsa ang mga katuyoan sa mga tilimad-on sa Ikaduhang Paganhi? (Tan-awa sa mga pahina 278–80; tan-awa usab sa D&P 45:34–39.) Unsa nga mga ebidensya ang inyong nakita nga pipila niining mga tilimad-on ang natuman? Sa unsa nga paagi kita magpabilin nga “malinawon, mabinantayon ug maalamon sa atubangan sa Ginoo,” bisan kon pipila niining mga tilimad-on naglakip sa trahedya?
Ribyuha ang mga pagtulun-an ni Presidente Woodruff mahitungod sa tahas sa Simbahan sa pag-andam og agianan alang sa Ikaduhang Pag-anhi (mga pahina 281–83). Sa unsa nga paagi kita makaapil niini nga buhat?
Ngano nga kinahanglang mabalaka kita sa atong kaugalingong pagpangandam kaysa tukma nga panahon sa Ikaduhang Paganhi? Sa unsa nga mga paagi makatabang kita sa atong mga pamilya nga makaandam? Sa unsa nga paagi kita “makabarug sa balaan nga mga dapit samtang ang mga paghukom sa Dios gipakita dinhi sa yuta”? (pahina 279–80).
Diha sa sambingay sa napulo ka mga birhen, kinsa ang girepresentahan sa but-an ug buangboang nga mga birhen? sa pamanhonon? Sa pangasaw-onon? Unsa ang girepresentahan sa kombira sa kasal? sa lana diha sa mga lampara? Sa atong pagandam sa Ikaduhang Pag-anhi, unsay atong buhaton aron “makapundo og lana sa atong mga lampara”? (Tan-awa sa mga pahina 383–85, 286; tan-awa usab sa D&P 45:56–57.)

May Kalabutan nga mga Kasulatan: D&P 45:15–75; Joseph Smith—Mateo 1:21–55

Second Coming of Christ — “Ang Ginoong Jesukristo moanhi aron magmando sa yuta. … Ang Ginoo dili maglangay sa iyang pag-anhi.”

virgin with oil lamp — “Kon maghago kita alang sa gingharian sa Dios, makapundo kita og lana sa atong lampara, ang atong kahayag mosanag ug mobati kita sa pagpamatuod sa Espiritu sa Dios.”