“Abril 9. Unsaon Ko nga Makapalig-on sa Akong Pagpamatuod sa Pagkabanhaw ni Jesukristo? Pasko sa Pagkabanhaw,” Dali, Sunod Kanako—Alang sa mga Korum sa Aaronic nga Pagkapari ug mga Klase sa Young Women: Mga Hilisgotan nga Doktrina 2023 (2022)
“Abril 9. Unsaon Ko nga Makapalig-on sa Akong Pagpamatuod sa Pagkabanhaw ni Jesukristo?,” Dali, Sunod Kanako—Alang sa mga Korum sa Aaronic nga Pagkapari ug mga Klase sa Young Women: Mga Hilisgotan nga Doktrina 2023
Abril 9
Unsaon Ko nga Makapalig-on sa Akong Pagpamatuod sa Pagkabanhaw ni Jesukristo?
Pasko sa Pagkabanhaw
Pagtinambagay
Gipangulohan sa usa ka sakop sa kapangulohan sa klase o sa korum; mga 10–20 minutos
Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon, agi og dugang ngadto sa pagtinambagay mahitungod sa piho nga mga buluhaton sa klase o sa korum, mahimo nimong hisgotan ang mga panghunahuna ug mga tema gikan sa kinatibuk-ang komperensiya. Ang mosunod nga mga pangutana tingali makatabang.
-
Unsa nga mga tema o mga mensahe ang mahinungdanon ngari kanato? Unsa ang nakapalig-on sa atong hugot nga pagtuo diha ni Jesukristo?
-
Unsa ang nakapalig-on sa atong mga pagpamatuod bahin sa buhing mga propeta? Unsa nga pag-aghat ang atong gibati nga buhaton tungod sa unsay atong nakat-onan o gibati?
-
Unsay kinahanglan natong buhaton isip usa ka klase o korum aron mahinumdoman ug malihok ang tambag nga atong nadungog sa kinatibuk-ang komperensiya?
Sa kataposan sa leksiyon, kon angay, buhata ang mosunod:
-
Pagpamatuod sa mga baroganan nga gitudlo.
-
Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.
Itudlo ang Doktrina
Gipangulohan sa usa ka hamtong nga lider o batan-on; mga 25–35 ka minutos
Andama ang Imong Kaugalingon sa Espirituhanong Paagi
Ang apostoles sa karaan ug sa karon nagpamatuod nga si Jesukristo buhi! Siya nag-antos ug namatay diha sa krus, gilubong Siya sa usa ka lubnganan, ug sa ikatulong adlaw nabuhi Siya pag-usab. Tungod sa Iyang kadaogan sa kamatayon, kitang tanan mabanhaw. Ang Pagkabanhaw sa Manluluwas midala sa saad sa imortalidad ug sa paglaom sa kinabuhing dayon. Kini nga saad anaa sa kinauyokan sa Pasko sa Pagkabanhaw.
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay talagsaong rason sa pagtuo nga si Jesukristo nabanhaw. Agi og dugang ngadto sa mga pagsaksi sa mga tawo gikan sa mga panahon sa Bag-ong Tugon, kita adunay mga pagpamatuod sa mga tawo kinsa buhi sa mga panahon sa Basahon ni Mormon, si Propeta Joseph Smith, ug ang atong buhi nga mga propeta ug apostoles. Makadawat usab kita og personal nga pagsaksi sa Pagkabanhaw pinaagi sa Espiritu Santo. Unsaon nga ikaw makatabang sa paglig-on sa mga kabatan-onan sa ilang mga pagpamatuod nga si Jesukristo nabanhaw? Samtang ikaw nag-andam, hunahunaa ang pagtuon sa mensahe ni Sister Reyna I. Aburto nga “Ang Lubnganan Walay Kadaogan” (Liahona, Mayo 2021, 85–86) ug sa mensahe ni Elder S. Mark Palmer nga “Mahimong Kalipay ang Atong Kaguol” (Liahona, Mayo 2021, 88–89).
Pagkat-on og Dungan
Mahimo nimong sugdan ang panaghisgotan mahitungod sa Pagkabanhaw ni Jesukristo pinaagi sa pagdapit sa kabatan-onan sa pagpakigbahin kon usa ang ilang nahimo niini nga semana sa pagsaulog sa Pasko sa Pagkabanhaw. Makapangutana ka kanila kon unsa ang ilang natun-an o nabuhat sa tinagsa o uban sa ilang mga pamilya sa paglig-on sa ilang mga pagpamatuod bahin sa Pagkabanhaw sa Manluluwas. Sa ubos mao ang mga kalihokan sa pagtabang sa mga sakop sa imong klase o sa korum paglig-on sa ilang mga pagpamatuod.
-
Paghisgot og dungan kon nganong ang mga saksi importante sa inadlaw nga kinabuhi. Dayon paghimo og lista kutob sa gidaghanon sa mga saksi sa Pagkabanhaw ni Jesus nga mahunahuna sa imong klase o sa korum. Ang matag tawo makapili og usa ka kasulatan gikan niadtong gilista diha sa “Suporta nga mga Kapanguhaan” sa pagkat-on mahitungod niining pipila ka mga saksi. Dapita ang mga sakop sa klase o sa korum sa pagpakigbahin kon unsa ang ilang nakat-onan. Awhaga usab sila sa pagpakigbahin kon giunsa niini nga mga saksi sa paglig-on sa ilang mga pagpamatuod sa Pagkabanhaw ni Jesukristo.
-
Unsa ang pipila ka mga sitwasyon nga kita makahimo sa pagpakigbahin sa atong mga pagpamatuod sa Pagkabanhaw sa Manluluwas? Kon adunay usa diha sa klase o sa korum nga may kasinatian sa pakigsultihanay ngadto sa usa ka tawo mahitungod sa Pagkabanhaw sa Manluluwas, hunahunaa ang pagdapit kaniya sa pagpakigbahin niana nga kasinatian. Awhaga ang mga sakop sa klase o sa korum sa paghunahuna mahitungod kon unsaon nila pagtabang ang usa ka tawo sa pagsabot sa Pagkabanhaw ni Jesukristo ug pag-angkon og usa ka pagpamatuod nga tungod Kaniya kita mahimo nga mabanhaw. Unsa ang importanting mga kamatuoran mahitungod sa Pagkabanhaw sa tanang mga tawo nga importanting itudlo sa uban? Ang mga sakop sa klase o sa korum makakaplag og mga tubag sa mga kasulatan diha sa “Suporta nga mga Kapanguhaan.”
-
Sa dihang gisultihan sa Apostoles si Tomas nga ilang nakita ang nabanhaw nga Manluluwas, miingon si Tomas nga dili siya motuo gawas kon makakita siya sa iyang kaugalingon. Wala madugay gisultihan ni Jesus si Tomas, “Dalaygon kadtong wala managpakakita, ngani nanagpanoo.” Pagrebyo og dungan sa kasinatian ni Tomas nga makaplagan diha sa Juan 20:24–29. Giunsa kita pagpanalangin tungod sa pagtuo diha sa Manluluwas nga wala makakita Kaniya? Sa unsang paagi kita makapalig-on sa atong hugot nga pagtuo diha ni Jesukristo? Dapita ang mga sakop sa klase o sa korum sa pagsiksik og usa o dugang pa sa mga mensahe gikan sa mga lider sa Simbahan diha sa “Suporta nga mga Kapanguhaan” ug ipakigbahin kon nganong sila mapasalamaton alang sa Pagkabanhaw sa Manluluwas. Giunsa sa atong kahibalo nga kita mabanhaw pag-epekto sa paagi kita naghunahuna mahitungod sa atong mga lawas ug mga desisyon nga kita naghimo?
That Ye May Know [Nga Kamo Mahibalo], ni Gary L. Kapp
Lihok diha sa Hugot nga Pagtuo
Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.
Suporta nga mga Kapanguhaan
-
Mateo 28:1–10; Lucas 24:13–35; Lucas 24:36–48; Juan 20:11–29; 1 Mga Taga-Corinto 15:3–8; 3 Nephi 11:1–15; Ether 12:38–39; Doktrina ug mga Pakigsaad 76:19–24 (Mga Saksi sa Pagkabanhaw)
-
2 Nephi 9:10–15; Mosiah 16:8–11; Alma 11:42–45; Alma 40:23–25; Doktrina ug mga Pakigsaad 93:33–34 (Mga kasulatan nga nagtudlo mahitungod sa Pagkabanhaw sa tanang mga tawo)
-
D. Todd Christofferson, “Ang Pagkabanhaw ni Jesukristo,” Liahona,, Mayo 2014, 111–14
-
Gerrit W. Gong, “Hosanna ug Aleyuya—Ang Buhi Nga si Jesukristo: Ang Pinakaimportanting Bahin sa Pagpahiuli ug sa Pasko sa Pagkabanhaw,” Liahona, Mayo 2020, 52–55
-
Reyna I. Aburto, “Ang Lubnganan Walay Kadaogan,” Liahona, Mayo 2021, 85–86
-
S. Mark Palmer, “Mahimong Kalipay ang Atong Kaguol,” Liahona, Mayo 2021, 88–89
-
Mga video sa Pasko sa Pagkabanhaw makaplagan diha sa ChurchofJesusChrist.org/study/video/easter-videos.
Pagtudlo sumala sa Pamaagi sa Manluluwas
Ang usa ka tawo kinsa makahibalo mokuha og kahulogan gikan sa mga kasulatan ug modangop ngadto niini matag adlaw makahimo sa pagkuha og balaanong paggiya sa pagbuntog sa bisan unsa nga hagit. Samtang ikaw magtudlo, pangutana nga magkinahanglan sa mga tigkat-on sa pagpangita og mga tubag diha sa mga kasulatan.