Maayong Samarianhon, ni Annie Henrie Nader

Good Samaritan [Maayong Samarianhon], ni Annie Henrie Nader

Abril 23

Unsaon Ko nga Makapakita og Mas Dakong Gugma ngadto Niadtong naglibot Kanako?

Mateo 18; Lucas 10

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nagdala kanato nga mas maduol ngadto sa Langitnong Amahan ug ni Jesukristo?

• Mag-atiman alang niadtong nanginahanglan. Aduna bay tawo nga bag-o lamang mibalhin sa atong ward o mipasakop sa Simbahan? Sa unsang paagi kita makatabang kanila aron mobati nga giabi-abi?

• Magdapit sa tanan sa pagdawat sa ebanghelyo. Unsa nga mga kalihokan sa umaabot diin kita mahimong makadapit sa atong mga higala sa pagtambong?

• Maghiusa sa mga pamilya alang sa kahangtoran. Unsa nga mga paningkamot kita makahimo sa pagrekord sa atong personal nga mga kasaysayan?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Human gitudloan ni Jesus ang usa ka “piho nga manlalaban” sa importansya sa duha ka dagkong mga sugo––ang paghigugma sa Dios ug ang paghigugma sa atong silingan––ang manlalaban nangutana, “Kinsa man ang akong silingan?” (tan-awa sa Lucas 10:25–29; Mateo 22:35–40). Agi og tubag, ang Manluluwas mipakigbahin og usa ka sambingay mahitungod sa usa ka Samarianhon kinsa mirisgo sa iyang kinabuhi sa pag-atiman sa usa ka samaran nga Judeo nga tawo, midala sa tawo ngadto sa usa ka balay-abotanan aron maatiman, ug mibayad sa kantidad sa iyang pagkaayo. Ang Samarianhon wala maghatag og gibug-aton sa mga kalainan sa iyang kaugalingon ug sa tawo, kinsa gihunahuna nga kaaway sa iyang katawhan, o mihukom kaniya o nangita og mga rason sa dili pagtabang. Miserbisyo siya sa tawo nga nanginahanglan, bisan pa sa personal nga kapig-ot ug sa sakripisyo, pinaagi niana nagpakita og gugma alang sa tawo ug alang sa Dios. Samtang ikaw mamalandong sa mga pagtulon-an sa Manluluwas diha sa Lucas 10:25–37, paghunahuna mahitungod kon unsa ang tinuod nga kahulogan sa “higugmaa … ang imong silingan sama sa imong kaugalingon” (bersikulo 27).

Unsaon nimo pagtabang niadtong imong gitudloan sa pagsabot nga kon sila moserbisyo niadtong naglibot kanila, nagpakita sila sa ilang gugma alang sa Dios? Unsa kaha ang magdasig kanila sa paghigugma ug pagserbisyo sa uban? Samtang ikaw nag-andam, mahimo kang magrebyo sa mensahe ni Presidente Russell M. Nelson “Ang Dako ug Ikaduhang Sugo” (Liahona, Nob. 2019, 96–100).

Pagkat-on og Dungan

Sa pagsugod og panaghisgotan mahitungod sa pagpakita og mas dakong gugma alang niadtong naglibot kanato, makahangyo ka sa mga sakop sa klase o sa korum sa pagpakigbahin kon unsa ang ilang nakat-onan mahitungod sa paghigugma sa uban gikan sa sambingay sa maayong Samarianhon, nga makaplagan diha sa Lucas 10:25–37. Unsa ang atong makat-onan mahitungod sa kalabotan tali sa una ug sa ikaduha nga dagko nga mga sugo gikan sa Lucas 10:27 ug sa pahayag ni Presidente Dallin H. Oaks diha sa “Suporta nga mga Kapanguhaan”? Ang mosunod nga mga ideya makatabang kaninyo sa pagpadayon og panaghisgotan mahitungod sa pagpakita og mas dakong gugma ngadto niadtong naglibot kanato.

• Si Jesukristo mao ang atong gamhanang ehemplo sa pagpakita og gugma alang sa Dios pinaagi sa pagserbisyo sa uban, ug ang mga sakop sa klase o sa korum madasig pinaagi sa pagtuon sa Iyang ehemplo. Dapita ang matag tawo sa paghanduraw sa mortal nga kinabuhi ni Jesukristo ug pagpili og kasinatian gikan sa Iyang kinabuhi nga nagpakita sa Iyang dakong gugma alang sa ubang mga tawo. Hangyoa ang matag tawo sa pagpakigbahin sa kasinatian nga ilang gipili, uban sa nganong kini makahuluganon nganha kanila. Dapita kadtong imong gitudloan sa paghunahuna og usa ka paagi nga sila gustong mosunod sa ehemplo sa Manluluwas mahitungod sa gugma. Makahimo usab sila nga makigbahin sa ilang mga hunahuna mahitungod sa usa ka tawo nga ilang nailhan kinsa nagsunod niini nga ehemplo.

• Pakigbahin ug paghisgot uban sa mga sakop sa klase o sa korum sa pahayag ni Presidente Russell M. Nelson nga makaplagan diha sa “Suporta nga mga Kapanguhaan.” Makadapit ka sa mga sakop sa klase o sa korum sa pagrebyo sa usa o dugang pa nga mga mensahe sa kinatibuk-ang komperensiya nga ginganlan dinhi niini nga latid, mangita alang sa mga pagtulon-an nga makagiya kanato sa atong mga paningkamot sa paghigugma sa uban. Mahimo silang mopunting sa mosunod nga mga ehemplo kon unsaon nato nga makaserbisyo gikan sa “Ang Dako ug Ikaduhang Sugo” ni Presidente Nelson; mga seksiyon I, II, ug VI sa mensahe ni Presidente Oaks “Paghigugma sa Uban ug Pagpakabuhi nga may mga Panaglahi”; ug ang istorya mahitungod sa mga koneho ug ang tambag ngadto sa kabatan-onan gikan sa “Mga Kasingkasing nga Nabugkos” ni Elder Gary E. Stevenson. Mahimo usab ninyong basahon og dungan ang Mosiah 2:17 ug ang Moroni 7:45–48. Kini mahimong makatabang ang pagsulat sa mga pagtulon-an nga gihisgotan sa kabatan-onan diha sa pisara. Dayon ang klase o ang korum makatambag og dungan mahitungod sa piho nga mga paagi nga sila mas maayo nga makagamit niini nga mga pagtulon-an ngadto sa ilang mga relasyon sa mga sakop sa pamilya, ngadto sa mga higala, ug sulod sa ilang mga komunidad, ug gani bisan kon ang mga tawo ingon og malisod nga higugmaon.

• Ang mga paningkamot sa mga sakop sa klase o sa korum diha sa buhat sa kaluwasan ug kahimayaan mahimong mas makahuluganon ug hingpit nga malipayon kon madasig sila sa gugma. Sa pagtabang kanila sa pagkakita kon giunsa sa matag bahin sa buhat sa kaluwasan ug kahimayaan (tan-awa sa Kinatibuk-ang Tamdanan nga Basahon, 1.2) nga nadasig pinaagi sa gugma, isulat ang upat ka bahin diha sa pisara. Dayon hangyoa ang kabatan-onan sa paghisgot kon unsaon sa kasingkasing nga puno sa gugma alang sa uban makahimo sa pag-usab kon unsaon nila pag-apil sa matag bahin. Mahimong sila adunay mga kasinatian gikan sa ilang kaugalingong kinabuhi o sa kinabuhi sa uban nga ilang ikapakigbahin.

Batan-ong mga lalaki ug babaye nag-adorno og usa ka cake

Si Presidente Russell M. Nelson mitudlo, “Kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban.”

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Dallin H. Oaks, “Paghigugma sa Uban ug Pagpakabuhi nga may Panaglahi,” Liahona, Nob. 2014, 25–28

• Gary E. Stevenson, “Mga Kasingkasing nga Nabugkos,” Liahona, Mayo 2021, 19–23

• Si Presidente Dallin H. Oaks mitudlo: “Ang atong kadasig sa pagsunod [sa] ikaduhang sugo kinahanglan gayod nga dili makahimo kanato sa pagkalimot sa una, ang paghigugma sa Dios sa tibuok natong kasingkasing, kalag, ug salabutan. … Kinahanglan gayod kitang motuman sa duha ka dagkong mga sugo. Sa pagbuhat niini, naglatay kita sa pino nga linya tali sa balaod ug sa gugma––nagtuman sa mga sugo ug naglakaw sa dalan sa pakigsaad, samtang naghigugma sa atong mga silingan. Kini nga paglakaw nanginahanglan kanato nga magtinguha sa balaanong inspirasyon kon unsa ang suportahan ug unsa ang supakon ug unsaon sa paghigugma ug sa pagpaminaw sa matinahurong paagi ug niana nga proseso makatudlo. Ang atong paglakaw nanginahanglan nga dili nato makompromiso ang mga sugo apan magpakita sa hingpit nga gidak-on sa pagsabot ug gugma” (“Duha ka Dagkong mga Sugo,” Liahona, Nob. 2019, 73–75).

• Si Presidente Russell M. Nelson mitudlo: “Ang mga Santos sa Ulahing mga Adlaw … tinuoray silang nagtinguhang mosunod sa una ug ikaduhang dako nga mga sugo. Kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban diha sa matahom, mahiyason nga paagi. Ang pagtabang sa uban—ang paghimo og makahuluganong paningkamot sa daghan o labaw pa kay sa pag-atiman sa atong kaugalingon—maoy atong kalipay. Modugang ko, ilabi na, kon dili sayon ug kon gikinahanglan nga mobuhat kita og dili kasagarang butang. Ang pagsunod nianang ikaduhang dako nga sugo mao ang yawe sa pagkahimong tinuod nga disipulo ni Jesukristo” (“Ang Dako ug Ikaduhang Sugo,” Liahona, Nob. 2019, 97, 100).

Pagtudlo sumala sa Pamaagi sa Manluluwas

Ang personal nga kasinatian sa pagsunod sa ebanghelyo magtugot kanimo sa paghatag og gamhanang pagsaksi sa mga baroganan nga imong gitudlo. Tungod kay nagpuyo ka niini, ang Espiritu Santo makapamatuod nga ang imong gitudlo tinuod.