Mayo 14

Unsaon Pagtabang sa Ginoo sa Paningkamot sa mga Lalaki ug mga Babaye nga Magkahiusa sa Kaminyoon?

Mateo 19–20; Marcos 10; Lucas 18

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi ang pagduol ngadto sa Ginoo makatabang kanato sa pag-atubang sa mga hagit ug mga pagsulay?

• Mag-atiman alang niadtong nanginahanglan. Kinsay atong nailhan nga nagkinahanglan sa atong mga pag-ampo ug sa atong pagpakighigala?

• Magdapit sa tanan sa pagdawat sa ebanghelyo. Unsa nga mga plano sa pagpakigbahin sa ebanghelyo ang nahisgotan na diha sa mga miting sa konseho sa kabatan-onan sa ward? Sa unsang paagi makaapil ang atong klase o korum?

• Maghiusa sa mga pamilya alang sa kahangtoran. Sa unsang paagi ang paghimo sa buhat sa family history makalig-on sa atong mga relasyon ngadto sa Langitnong Amahan ug ni Jesukristo?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sugod ni Adan ug ni Eva, ang Langitnong Amahan ug si Jesukristo naningkamot sa paglig-on ug paghiusa sa mga asawa ug sa mga bana diha sa kaminyoon. Ang Manluluwas mitudlo, “Tungod niining maong hinungdan kinahanglan pagabiyaan sa lalaki ang iyang amahan ug ang iyang inahan ug makig-ipon siya sa iyang asawa ug silang duha mahimong usa” (Mateo 19:5). Sa samang higayon, si Satanas naghimo sa tanan nga siya makahimo sa pagbulag sa mga kaminyoon ug sa pagguba sa mga pamilya. Ang mga sakop sa imong klase o sa korum may kalagmitan nga nakamatikod sa daghang mga hagit nga nag-atubang sa mga kaminyoon karon. Tingali sila usab nakakita sa mga asawa ug mga bana nga nagtinabangay sa pagpaningkamot ug nangayo sa panabang sa langit nga maangkon ang panaghiusa. Palandonga kon unsaon niini nga mga kasinatian mahimong magtudlo kanila mahitungod kon unsa ang kinahanglanon sa pag-angkon og panaghiusa sa kaminyoon. Unsa ang imong mahimo nga makatudlo kanila sa importansya sa pagpangandam karon alang sa umaabot nga relasyon sa kaminyoon?

Sa milabay nga semana, ang mga sakop sa klase o sa korum dihay oportunidad sa pagbasa sa mga pagtulon-an sa Manluluwas kabahin sa kaminyoon diha sa Mateo 19:4–6. Sa pag-andam sa pagtudlo, tun-i kini nga mga bersikulo, uban sa mensahe ni Presidente Diether F. Uchtdorf nga “Ang Pagdayeg Niadtong Miluwas” (Liahona, Mayo 2016, 77–80) o ubang mga mensahe nga gisugyot niini nga latid.

Pagkat-on og Dungan

Ang kaminyoon mahimong wala sa mga hunahuna sa daghang kabatan-onan. Bisan pa niana, ang usa ka butang nga importante kaayo nagkinahanglan og mabinantayong pagpangandam. Tingali ikaw makadapit sa kabatan-onan sa paghanduraw nga sila nagluhod sa usa ka altar sa templo nga pagabugkuson ug ang tigbugkos nagtambag kanila sa pagtuon sa Mateo 19:4–6. Unsa nga mga kamatuoran ang atong makita dinhi niini nga mga bersikulo nga motabang sa usa ka bag-ong naminyo nga magtiayon? Unsaon sa bana ug asawa mahimong “usa”? Unsaon sa Manluluwas pagtabang? Mga kalihokan nga sama niini makatabang sa imong klase o sa korum nga makasabot kon unsaon sa pag-angkon og panaghiusa sa kaminyoon.

• Si Adan ug si Eva naghatag og importante kaayo nga ehemplo sa usa ka bana ug asawa nga nag-ubang naningkamot diha sa panaghiusa. Makapasundayag ka og usa ka hulagway nila (tan-awa sa Libro sa mga Hulagway sa Ebanghelyo [2009], nu. 5) ug hangyoa ang imong klase o korum sa pagbasa sa Moises 5:1–12, mangita og mga paagi diin si Adan ug si Eva nag-ubang naningkamot diha sa panaghiusa. Unsa ang ilang gibuhat aron ang Dios makapanalangin sa ilang relasyon? Sa pagtabang sa kabatan-onan sa pagkat-on pa og dugang mahitungod sa panaghiusa diha sa kaminyoon, sila makatuon sa mga kasulatan diha sa “Suporta nga mga Kapanguhaan.”

• Si Presidente Diether F. Uchtdorf mitudlo nga diha sa daghang katilingban karon, “tanang butang maingon og gamiton ug pagkahuman ilabay.” Apan kini nga kinaiya kinahanglan gayod nga dili gamiton sa atong mga kaminyoon ug mga pamilya; hinoon, kinahanglan ang atong “pagpahinungod sa atong pinakamaayong mga paningkamot sa pagluwas ug pagpalambo [niini]” (“Pagdayeg Niadtong Miluwas,” 77). Sa pagtabang og paghulagway niini nga punto, makadapit ka sa kabatan-onan sa paghunahuna og usa ka giilisan nga butang nga nabuak, daan, o karaan. Nganong lahi ang mga kaminyoon gikan sa mga butang nga mailisan sama niini? Ang klase o korum makabasa dayon sa seksiyon sa mensahe ni Presidente Uchtdorf nga giulohan og “Pagluwas sa Atong mga Kaminyoon” ug makigbahin og mga paagi nga ang mga bana ug mga asawa magkaubang maningkamot ug uban sa Manluluwas maglig-on sa ilang kaminyoon. Unsay atong mahimo karon sa pag-andam og lig-on, naghiusa nga mga kaminyoon?

• Hunahunaa ang pagsulat sa Panaghiusa diha sa Kaminyoon sa pisara ug sa pagdapit sa kabatan-onan sa paglista og mga butang nga ang mga asawa ug mga bana makabuhat nga mahimong magkahiusa. Dayon hangyoa ang kabatan-onan sa pagsiksik sa “Ang Pamilya: Usa ka Pamahayag ngadto sa Kalibutan” (ChurchofJesusChrist.org) alang sa mga ideya nga ilang ikadugang ngadto sa ilang lista. Unsa ang mga kalidad nga nakita sa mga sakop sa imong klase ug sa korum diha sa usag usa o sa mga magtiayon nga minyo nga ilang nailhan nga mga importante alang sa panaghiusa sa kaminyoon? Nganong importante ang pagpalambo ug paggamit niini nga mga baroganan sa atong mga relasyon karon? Ang mga video diha sa “Suporta nga mga Kapanguhaan” naghatag og pipila ka mga ehemplo niini nga mga kalidad nga gigamit.

• Kon ang mga sakop sa imong klase o sa korum adunay mga pangutana o kabalaka mahitungod sa diborsyo, hunahunaa ang pagrebyo og dungan sa mga bahin sa mensahe ni Presidente Dallin H. Oaks “Diborsyo” (Liahona, Mayo 2007, 70–73).

Sugod ni Adan ug ni Eva, ang Langitnong Amahan ug si Jesukristo naningkamot sa paglig-on ug paghiusa sa mga asawa ug sa mga bana diha sa kaminyoon.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• 1 Mga Taga-Corinto 11:11; Doktrina ug mga Pakigsaad 42:22; 49:15–17; Moises 3:18, 21–24 (Ang importansya sa panaghiusa diha sa kaminyoon)

Pagtudlo sumala sa Pamaagi sa Manluluwas

Ang sinsero nga mga pagpahayag sa Kristohanong gugma adunay dakong gahom sa pagpahumok sa mga kasingkasing sa mga sakop sa klase kinsa nanlimbasog. Sa pagtabang sa klase nga mobati nga gikinahanglan ug gihigugma, ikaw makahangyo kanila sa pag-apil sa umaabot nga leksiyon pinaagi sa pagpakigbahin og kasinatian o ilang mga pagbati mahitungod sa kasulatan.