He Comes Again to Rule and Reign [Siya Moanhi Pag-usab sa Pagmando ug Paghari], ni Mary R. Sauer

Mayo 28

Unsa ang Akong Mahimo Karon nga Makaandam alang sa Ikaduhang Pag-anhi sa Manluluwas?

Joseph Smith—Mateo 1; Mateo 24–25; Marcos 12–13; Lucas 21

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa ang atong gihisgotan sa miaging panahon, ug unsa nga mga pagdapit o mga buluhaton ang gihimo? Unsa ang atong nahimo aron malihok kadto nga mga pagdapit o mga buluhaton?

• Mag-atiman alang niadtong nanginahanglan. Unsa ang atong mabuhat o masulti nga makatabang niadtong kinsa tingali mibati nga nag-inusara o nahilayo gikan sa Langitnong Amahan?

• Magdapit sa tanan sa pagdawat sa ebanghelyo. Unsa ang pipila ka paagi nga kita makatabang sa uban aron mobati sa gugma ni Jesukristo?

• Maghiusa sa mga pamilya alang sa kahangtoran. Unsa nga mga ideya ang atong ikapaambit sa usag usa sa pagtabang nga malig-on ang atong mga pamilya?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Giunsa sa kabatan-onan nga imong gitudloan sa pagbati mahitungod sa pagpuyo sa kataposang mga adlaw sa wala pa ang Ikaduhang Pag-anhi ni Jesukristo? Kini tinuod nga kini makuyaw nga mga panahon, gimarkahan og kalisdanan, kadaotan, ug kalaglagan. Apan sa dihang gihulagway sa Manluluwas ang atong panahon ngadto sa Iyang mga disipulo duol sa kataposan sa Iyang mortal nga kinabuhi, mihatag Siya kanato og paglaom. Samtang nag-ila sa nagsingabot nga kangitngit, misaad Siya nga ang iyang kahayag “mo [tabon] sa tibuok yuta” sa Iyang pagbalik (tan-awa sa Joseph Smith–Mateo 1:22–26; tan-awa usab sa Doktrina ug mga Pakigsaad 45:34–38).

Unsaon nimo pagtabang ang kabatan-onan nga mas makasabot og maayo sa mga panalangin ug mga oportunidad sa pagpuyo sa ulahing mga adlaw? Unsa ang imong mabuhat sa pagdasig kanila sa pagpangandam sa ilang mga kaugalingon ug sa kalibotan alang sa Ikaduhang Pag-anhi sa Manluluwas?

Pagkat-on og Dungan

Sa pagtabang sa kabatan-onan sa pagrebyo unsay ilang nabasa diha sa mga kasulatan niini nga semana, makasulat ka niini nga mga ulohan diha sa pisara: Masulub-ong mga Panagna ug Mahimayaong mga Pahayag (tan-awa sa Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 73–76). Dayon ang matag tawo makarebyo sa Joseph Smith––Mateo 1:22–37 ug ilista ang “masulub-on” ug “mahimayaon” nga mga butang nga mahitabo sa dili pa mobalik ang Manluluwas. Nganong importante alang kanato nga mahimong makaamgo niini nga mga panghitabo? Sa pagtabang sa kabatan-onan sa pagkat-on og dugang pa mahitungod kon unsaon sa pagpangandam alang sa pag-anhi sa Manluluwas, hunahunaa ang mosunod nga mga kalihokan o usa nga imong kaugalingon.

• Ang mga kasulatan diha sa “Suporta nga mga Kapanguhaan” makatabang sa kabatan-onan nga makasabot kon giunsa sa Langitnong Amahan pag-andam ang agianan alang sa Ikaduhang Pag-anhi sa Iyang Anak. Hunahunaa ang pagsulat sa mga panghitabo sa mga kasulatan diha sa pisara ug sa paghangyo sa matag usa ka tawo sa pagbasa sa usa sa mga tudling sa kasulatan. Ang matag tawo makapares sa ilang tudling ngadto sa usa ka panghitabo diha sa pisara ug sa paghisgot sa tudling diha sa klase. Unsa ang gisugyot niini nga mga panghitabo mahitungod sa atong tahas sa pag-andam alang sa Ikaduhang Pag-anhi sa Manluluwas? Unsay nakapadasig nato nga buhatob isip usa ka klase o korum?

• Mitambag si Presidente Russell M. Nelson: “Unsaon nato pag-atubang ang masulub-ong mga panagna ug ang mahimayaong mga pahayag mahitungod sa atong panahon? Ang Ginoo misulti kanato kon unsaon uban sa yano, apan matahom, gibalik nga pasalig: ‘Kon kamo andam dili kamo mahadlok’ [Doktrina ug mga Pakigsaad 38:30]” (“Hangopa ang Umaabot uban sa Hugot nga Pagtuo,” 74). Sa pagtabang sa kabatan-onan nga mas maandam alang sa pag-balik sa Manluluwas, ikonsiderar ang paghangyo sa matag usa kanila sa pagbasa sa usa sa tulo ka baroganan sa pagpangandam nga gipakigbahin ni Presidente Nelson diha sa iyang mensahe. Dapita sila sa pagpakigbahin kon unsa ang ilang nakat-onan. Unsay nakapadasig nato nga buhaton sa paglihok sa tambag ni Presidente Nelson?

• Diha sa sinugdanan sa iyang mensahe nga giulohan og “Pagpangandam alang sa Pagbalik sa Ginoo,” gihulagwayni Elder D. Todd Christofferson kon sama sa unsa ang kalibotan human sa Ikaduhang Pag-anhi ni Jesukristo (Liahona, Mayo 2019, 81–84). Dapita ang kabatan-onan sa pagrebyo sa iyang paghulagway ug ipakita ang kalainan niini kon sama sa unsa ang kalibotan karon. Makahisgot sila kon unsa ang atong mabuhat nga maandam sa pagpuyo diha sa matang sa kalibotan nga gihulagway ni Elder Christofferson. (Ang upat ka parapo sa iyang mensahe nagsugod sa “Una, ug mahinungdanon alang sa pagbalik sa Ginoo” mahimong makatabang.) Giunsa sa Simbahan sa Manluluwas sa pagtabang og andam kanato alang sa Iyang Ikaduhang Pag-anhi? Si Elder Christofferson milista og tulo ka paagi diin ang Simbahan “talagsaong gihatagan og gahom ug gitudlo sa pagtuman sa gikinahanglang mga pagpangandam alang sa Ikaduhang Pag-anhi sa Ginoo.” Ang mga sakop sa klase makaila ug makahisgot niining mga butanga.

Kon kita andam, kita dili kinahanglang mahadlok sa mga panghitabo nga naggiya ngadto sa Ikaduhang Pag-anhi sa Manluluwas.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Doktrina ug mga Pakigsaad 65:1–2 (Pagpahiuli sa ebanghelyo)

• Doktrina ug mga Pakigsaad 20:8–12 (Pagtungha sa Basahon ni Mormon)

• Malaquias 4:5–6; Doktrina ug mga Pakigsaad 110:13–16 (Pagpahiuli sa mga yawe sa pagkapari)

• 3 Nephi 21:1, 8 (Pagpundok sa Israel)

• Joseph Smith—Mateo 1:28–30 (Gubat, kagubot, ug pagkadaotan)

• Joseph Smith—Mateo 1:31 (Ebanghelyo gisangyaw ngadto sa kalibotan)

• Gary E. Stevenson, “Usa ka Maayong Patukuranan alang sa Umaabot,” Liahona, Mayo 2020, 48–52

Pagtudlo sumala sa Pamaagi sa Manluluwas

Tudloi ang mga tigkat-on nga usahay ang Espiritu motudlo kanila og mga butang atol sa panaghisgotan sa klase nga dili gayod ipamulong og kusog.