Hunyo 11

Unsaon Ko nga Mas Mapaduol pa ngadto sa Langitnong Amahan ug ni Jesukristo?

Juan 14–17

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga bag-ong mga kasinatian ang nakapalig-on sa atong mga pagpamatuod?

• Mag-atiman alang niadtong nanginahanglan. Kinsa ang nagkinahanglan sa atong tabang ug mga pag-ampo? Unsa nga pagdani ang atong gibati nga buhaton aron makatabang?

• Magdapit sa tanan sa pagdawat sa ebanghelyo. Sa unsa nga paagi kita mahimong kahayag ngadto sa mga sakop sa pamilya o mga higala nga dili sama kanato og mga tinuohan?

• Maghiusa sa mga pamilya alang sa kahangtoran. Sa unsang paagi kita makapakita og dugang nga gugma og suporta alang sa atong mga pamilya ug makahimo og positibong kalainan diha sa atong mga panimalay?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang bunga dili motubo diha sa usa ka sanga nga nabulag gikan sa kahoy niini. Sa samang paagi, kita dili motubo sa espirituhanong paagi kon kita nabulag gikan sa Dios (tan-awa sa Juan 15:4–6). Gani adunay daghang pwersa nga naninguha sa pagbulag kanato gikan Kaniya—usahay ang atong kaugalingong garbo o dili maayong mga pagpili apan sa kasagaran ang mga sitwasyon lamang sa mortal nga kinabuhi. Sa dihang nakigkita si Jesus sa Iyang mga disipulo sa kataposang panahon sa mortalidad, nahibalo Siya nga sa dili madugay Siya mabulag gikan kanila. Siya mitudlo kanila mahitungod sa importansya sa pagpabilin og suod nga relasyon ngadto Kaniya ug sa Iyang Amahan––nga mahiusa ngadto kanila sama sa usa ka sanga ngadto sa kahoy. Gitawag Niya kini og “magpabilin” diha Kaniya. Ug gitudloan Niya ang Iyang mga disipulo kon unsaon sa pagbuhat niini. Labing importante sa tanan, pinaagi sa Iyang maulaong sakripisyo, gihimo Niya kana nga relasyon nga posible.

Palandonga ang imong relasyon ngadto sa Langitnong Amahan ug ni Jesukristo samtang ikaw nagtuon sa Juan 14–17. Paghunahuna usab sa mga tawo nga imong gitudloan ug ang ilang mga tinguha nga mahimong mas mapaduol ngadto sa Dios. Unsa ang imong buhaton sa pagtabang kanila? Ikaw mahimong mamalandong sa Doktrina ug mga Pakigsaad 88:62–68 samtang ikaw mag-andam sa pagtudlo.

Pagkat-on og Dungan

Hunahunaa kon unsaon kaha nimo pagdasig ang kabatan-onan sa paghisgot sa mga pagtulon-an sa Manluluwas mahitungod sa mga bagon ug sa mga sanga diha sa Juan 15:1–12. Tingali ikaw makagamit og drowing, hulagway, o tinuod nga sanga sa pagtabang kanila sa paghanduraw kon unsa ang gitudlo ni Jesus. Makahangyo ka kanila sa pagsulti mahitungod sa mga panahon nga sila mibati og kaduol ngadto sa Langitnong Amahan ug ni Jesukristo––o sa mga panahon nga sila mibati og ka layo gikan Kanila. Unsa ang gitudlo niini nga mga bersikulo mahitungod kon unsaon nato sa pagpabiling mapaduol ngadto Kanila? Ang mga kalihokan sama sa mosunod makatabang og dugang niini nga panagsultihanay.

• Mahimo kining mapuslanon sa paggahin og pipila ka panahon sa pagsuhid sa pangutana “Unsa ang nagpalayo kanato gikan sa Langitnong Amahan ug ni Jesukristo?” Makahimo ka sa pagsulat sa pangutana diha sa pisara ug mangayo sa mga tubag. Tingali ikaw dayon makahimo sa pagpakigsulti kanila kon unsa ang atong buhaton sa pagtukod og usa ka relasyon ngadto sa usa ka higala o sa sakop sa pamilya. Unsa kini ka susama ngadto sa––ug kalahi gikan sa––paagi kita magtukod og usa ka relasyon ngadto sa Langitnong Amahan ug ni Jesukristo? Unsaon pagtabang ni Jesukristo kanato sa pagpaduol ngadto Kaniya ug sa Iyang Amahan? Awhaga ang mga sakop sa klase o sa kurom sa pagbasa sa mga kasulatan diha sa “Suporta nga mga Kapanguhaan” sa pagtabang kanila og tubag niini nga pangutana. Ang kabatan-onan mahimong makapahimulos gikan sa pagtuon niini nga mga bersikulo nga magpares ug makigbahin sa unsay ilang nakat-onan.

• Walay usa nga mas suod ngadto sa Dios nga Amahan kay sa Iyang Pinalanggang Anak, si Jesukristo. Unsa ang atong makat-onan gikan sa Manluluwas mahitungod sa paninguha nga mas mapaduol ngadto sa Dios? Ang mga sakop sa klase o sa korum makapamalandong niini nga pangutana samtang sila magbasa sa Lucas 22:41–43; Juan 6:38; 17:3, 20–23; 3 Nephi 11:11; Doktrina ug mga Pakigsaad 50:43. Sa unsa nga paagi kita mahimong usa uban sa Langitnong Amahan ug ni Jesukristo?

• Diha sa iyang mensahe nga “Ang Atong Personal nga Manluluwas,” nahinumdoman ni Elder Michael John U. Teh ang usa ka panahon sa dihang iyang naamgohan nga ang, “Unsay akong nahibaloan mahitungod sa Manluluwas mas milabaw pa kay sa unsa gayod ang akong pagkaila Kaniya” (Liahona, Mayo 2021, 99). Mahimo nimong pangutan-on ang imong klase o korum sa paghisgot sa kalainan tali sa nakahibalo mahitungod ni Jesukristo ug sa tinuod nakaila Kaniya. Makahimo sila sa pag-istorya mahitungod kon unsa ang ilang gibuhat nga makahibalo mahitungod Kaniya ug unsa ang ilang gibuhat nga sa tinuod makaila Kaniya. Sila dayon makasiksik og mga bahin sa mensahe ni Elder Teh sa pagpangita sa tambag nga iyang gihatag mahitungod sa pagdangat sa tinuod nga pagkaila sa Manluluwas. Giunsa pagpanalangin ang atong mga kinabuhi pinaagi sa pagpaninguha nga makaila Kaniya?

• Tingali ang mga sakop sa klase o sa korum makahimo og lista sa mga ideya mahitungod kon unsaon sa pagpalambo sa ilang relasyon ngadto sa Amahan sa Langit. Dapita sila sa pagpakigbahin og usa ka butang gikan sa ilang mga lista. Kon mahimo, tingali sila malingaw sa paghimo sa ilang kaugalingong mubo nga mga video nga naghulagway kon giunsa nila pagpaninguha nga mapaduol ngadto sa Dios.

Samtang modangat kita nga makaila sa Manluluwas ug mosunod sa Iyang mga sugo, kita mopabilin diha sa Iyang gugma (tan-awa sa Juan 15:10).

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Juan 14:6; 1 Timoteo 2:5–6; Jacob 4:11; Mosiah 3:19; Doktrina ug mga Pakigsaad 88:63; Moises 6:52

Pagtudlo sumala sa Pamaagi sa Manluluwas

Ang Manluluwas miandam alang sa Iyang yutan-ong pangalagad pinaagi sa pag-ampo ug sa pagpuasa aron Siya masuod ngadto sa Iyang Amahan (tan-awa sa Mateo 4:1–2; Lucas 4:1–2). Samtang ikaw nag-andam sa pagtudlo, paggahin og panahon sa pagpangayo sa paggiya sa Langitnong Amahan, tungod kay ikaw nagtudlo sa Iyang mga anak!