Dili Matugkad nga Adlaw sa Kasubo sa Golgota, ni J. Kirk Richards

Gray Day at Golgota [Dili Matugkad nga Adlaw sa Kasubo sa Golgota], ni J. Kirk Richards

Hunyo 25

Unsa ang Kahulogan sa Pag-ula ni Jesukristo ngari Kanako?

Mateo 27; Marcos 15; Lucas 23; Juan 19

icon sa pagtinambagay

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Sa unsang paagi kita mas napaduol ngadto sa Manluluwas? Sa unsang paagi kita naningkamot nga mahimong mas mahisama Kaniya?

• Mag-atiman alang niadtong nanginahanglan. Kinsa ang anaa sa atong hunahuna sa bag-ohay lamang? Sa unsang paagi kita makatabang niini nga mga indibidwal?

• Magdapit sa tanan sa pagdawat sa ebanghelyo. Sa unsang paagi kita makatubag sa mga pangutana sa atong mga higala mahitungod sa Simbahan sa paagi nga maglig-on sa ilang hugot nga pagtuo diha sa Manluluwas?

• Maghiusa sa mga pamilya alang sa kahangtoran. Unsa ang pipila ka mga paagi nga kita mas makakonektar sa mga sakop sa kaliwat sa pamilya sama sa mga apohan ug mga ig-agaw?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Si Elder David A. Bednar nakaobserbar nga ang pipila ka mga Santos sa Ulahing mga Adlaw “ingon og aduna silay hugot nga pagtuo sa Manluluwas, apan dili sila motuo nga ang gisaad Niya nga panalangin maanaa para nila” (“Kon Nakaila Pa Kamo Kanako,” Liahona, Nov. 2016, 104). Sa laing pagkasulti, bisan tuod kon kita motuo nga si Jesukristo miantos ug namatay alang sa mga sala sa kalibotan, kita mahimong matingala kon Siya miantos ug namatay sa piho alang sa atong mga sala. Mibati ka ba og sama niini nga paagi sukad? Unsaon sa mga tawo sa imong klase o sa korum sa pagpahimulos gikan sa pagsabot nga ang Pag-ula sa Manluluwas magamit nganha kanila sa personal nga paagi? Unsaon nimo nga makatabang ka kanila?

Palandonga kini nga mga pangutana samtang ikaw magbasa niini nga semana mahitungod sa Paglansang sa Manluluwas diha sa Krus. Samtang ikaw mangandam sa pagtudlo mahitungod sa personal nga kinaiyahan sa Pag-ula ni Kristo, mahimo nimong tun-an ang mensahe ni Presidente Dallin H. Oaks nga “Unsa ang Nabuhat sa Manluluwas alang Kanato?” (Liahona,, Mayo 2021, 75–77).

Pagkat-on og Dungan

Dapita ang mga sakop sa klase o sa korum sa pagpakigbahin og usa ka butang nga ilang nakat-onan diha sa Bag-ong Tugon sa milabay nga semana mahitungod sa Paglansang sa Manluluwas diha Krus ug sa ilang mga pagbati mahitungod sa Manluluwas. Sa pagtabang og aghat kanila, makapangutana ka “Unsa ang atong nakat-onan mahitungod ni Jesukristo gikan sa mga butang nga Iyang gisulti ug gibuhat sa panahon sa Iyang kataposang mga takna?” Sama pananglit, ikaw makasuhid og mga higayon sa dihang ang Manluluwas, samtang nag-antos alang sa tanan, sa gihapon mitan-aw uban sa kapuangod niadtong mipalibot Kaniya (tan-awa, sama pananglit, sa Lucas 23:34, 39–43; Juan 19:25–27). Kini makagiya ngadto sa usa ka panaghisgotan mahitungod kon sa unsang paagi ang Pag-ula ni Jesukristo alang sa tibuok kalibotan ug sa personal. Ang mga kalihokan sama sa mosunod makatabang kanimo og dugang pa sa paghisgot sa Pag-ula sa Manluluwas.

• Diha sa unang parapo sa iyang mensahe nga “Unsa ang Nabuhat sa Manluluwas alang Kanato?,” gihulagway ni Presiente Dallin H. Oaks ang usa ka panagsultihanay sa usa ka babaye kinsa wala makumbinsir nga si Jesukristo may nabuhat og bisan unsa alang kaniya. Tingali ang mga sakop sa klase o sa korum makabasa niana nga parapo, nagbutang sa ilang mga kaugalingon sa dapit ni Presidente Oaks. Unsa ang atong isulti niini nga babaye? Makahatag ka sa sakop sa matag klase o sa korum og usa sa ginumerohan nga mga seksiyon sa mensahe ni Presidente Oaks. Naggamit sa unsay ilang nakat-onan, uban sa ilang kaugalingong mga kasinatian, sila niana makapakigbahin sa ilang kaugalingong mga tubag ngadto sa pangutana “Unsa ang nabuhat ni Jesukristo alang kanako?”

• Sa pagdasig og usa ka panaghisgotan mahitungod kon giunsa sa Pag-ula sa Manluluwas pag-apekto kanato sa personal nga paagi, ikaw makasulat diha sa pisara og hugpong sa mga pulong sama sa Tungod kay si Jesukristo miantos ug namatay alang sa tanang katawhan … . Ang mga sakop sa klase o sa korum makasugyot og mga paagi sa pagkompleto sa kapahayag. Dayon ikaw makausab sa hugpong sa mga pulong nga mabasa Tungod kay si Jesukristo miantos ug namatay alang kanako … ug makadapit og bisan unsa nga dugang nga mga sugyot. Samtang ang mga sakop sa klase o sa korum maghisgot niini nga mga pahayag, awhaga sila sa pagbasa sa mga kasulatan, awhaga sila sa pagbasa sa mga kasulatan diha sa “Suporta nga mga Kapanguhaan.” Unsa ang gitudlo niini nga mga kasulatan kanato mahitungod sa impluwensya sa Pag-ula sa Manluluwas diha sa atong indibidwal nga mga kinabuhi?

• Laing paagi sa pagtuon sa mga kasulatan diha sa “Suporta nga mga Kapanguhaan” mao ang pagdapit sa kabatan-onan sa pag-ilis sa mga pulong diha sa mga bersikulo aron ang mga bersikulo masulti og diretso ngadto kanila. Unsaon nga ang pagbuhat niini nag-apekto sa atong mga pagbati mahitungod sa mga kamatuoran diha sa mga bersikulo? Unsaon nga kita makapakita sa atong pasalamat alang sa sakripisyo sa Manluluwas alang kanato?

• Ang sagradong mga musika gamhanang makapamatuod ni Jesukristo. Hunahunaa ang pagdapit sa mga sakop sa klase o sa korum sa pag-anha nga andam sa pagpakigbahin og mga himno nga nagtabang kanila sa pagbati sa gahom sa Pag-ula sa Manluluwas diha sa ilang kaugalingong mga kinabuhi. (Makatan-aw sila sa mga himno sa sakramento o sa tala “Jesukristo––Manluluwas” diha sa indeks sa mga ulohan sa Mga Himno.) Hangyoa ang mga sakop sa klase o sa korum sa pag-ila sa mga hugpong sa mga pulong diha sa mga himno nga nagtabang kanila sa pagbati og personal sa gugma sa Manluluwas alang kanila. Ikaw mahimo usab nga mangutana mahitungod kon giunsa sa sakripisyo sa Manluluwas pag-apekto sa atong inadlaw nga mga kinabuhi. Sama pananglit, giunsa niini pag-apekto ang pagpili nga atong gihimo?

Kristo sa Getsemani

Christ in Gethsemane [Kristo sa Getsemani], ni Dan Burr

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• 1 Mga Taga-Corinto 15:20–22; 2 Mga Taga-Corinto 12:7–9; Alma 7:11–12; 3 Nephi 11:10–11

• Tad R. Callister, “Ang Pag-ula ni Jesukristo,” Liahona, Mayo 2019, 85–87

Pagtudlo sumala sa Pamaagi sa Manluluwas

Ang sinsero nga pagpahayag sa Kristohanong gugma adunay dakong gahom sa pagpahumok sa mga kasingkasing sa mga sakop sa klase nga nanlimbasog sa ebanghelyo. Kasagaran kini nga mga indibidwal nagkinahanglan lamang nga masayod nga sila gikinahanglan ug gihigugma.