Human sa Iyang Pagkabanhaw, ang Manluluwas nangulo sa Iyang Simbahan pinaagi sa Iyang Apostoles, lakip ni Pedro.

Hulyo 9

Giunsa Pagpangulo ni Jesukristo ang Iyang Simbahan?

Mga Buhat 1–5

Pagtinambagay

Gipangulohan sa usa ka sakop sa kapangulohan sa klase o sa korum; mga 10–20 minutos

Sa sinugdanan sa miting, balika pagsulti og dungan ang Tema sa Young Women o ang Tema sa Korum sa Aaronic nga Pagkapari. Dayon pangulohi ang usa ka panaghisgotan mahitungod sa buhat sa kaluwasan ug kahimayaan gamit ang usa o dugang pa nga mga pangutana nga anaa sa ubos o imong kaugalingong mga pangutana (tan-awa sa Kinatibuk-ang Tamdanan nga Basahon, 10.2, 11.2). Planoha ang mga paagi sa paglihok sa unsay inyong hisgotan.

• Magpuyo diha sa ebanghelyo. Unsa nga mga hilisgotan ang nahisgotan sa bishopric diha sa atong mga miting sa konseho sa kabatan-onan sa ward? Unsay atong mahimo isip usa ka klase o korum base niadto nga mga panaghisgotan?

• Mag-atiman alang niadtong nanginahanglan. Sa unsang paagi kita makatabang ngadto sa mga tawo sa Kristohanong mga paagi kon makakita kita og panginahanglan ug wala makahibalo kon unsa ang isulti?

• Magdapit sa tanan sa pagdawat sa ebanghelyo. Unsa ang atong nakaplagan diha sa ebanghelyo ni Jesukristo nga nagdala kanato og hingpit nga kalipay? Sa unsang paagi kita makahimo sa pagpakigbahin niana nga kalipay ngadto sa uban?

• Maghiusa sa mga pamilya alang sa kahangtoran. Unsa ang atong gihimo sa pagpangita og mga ngalan sa atong mga katigulangan kinsa nagkinahanglan og mga ordinansa sa templo? Unsa ang atong mahimo sa pagtabang sa uban sa pagpangita sa mga ngalan sa ilang mga katigulangan?

Sa kataposan sa leksiyon, kon angay, buhata ang mosunod:

• Pagpamatuod sa mga baroganan nga gitudlo.

• Pahinumdomi ang mga sakop sa klase o sa korum mahitungod sa mga plano ug mga pagdapit nga gihimo atol sa miting.

Itudlo ang Doktrina

Gipangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Kini usa ka butang nga mahibaloan nga ang Simbahan maayo, nga ang Simbahan nagtudlo og tinuod nga mga baroganan, o nga ang simbahan makatabang kanimo nga mahimong mas maayong tawo. Kini lain nga butang nga mahibalo nga ang Simbahan karon sa tinuod nga pagkasulti Simbahan ni Jesukristo, gitukod Niya ug gipangulohan sa personal ug gipadayon Niya pinaagi sa usa ka buhing propeta. Ang basahon sa Mga Buhat naghatag og daghang ebidensiya nga ang Manluluwas personal nga apil sa pagpangulo sa Iyang Simbahan. Samtang ikaw magtuon sa mga kapitulo 1–5, pangitaa kana nga ebidensiya, ug palandonga giunsa nimo pagkahibalo nga Siya nagpadayon sa pagpangulo sa Iyang Simbahan karon. Giunsa niini nga kahibalo sa pagpanalangin kanimo?

Ang kabatan-onan ba nga imong gitudloan adunay pagpamatuod nga ang Simbahan nga sila sakop gipangulohan pinaagi sa Manluluwas Mismo? Unsaon niana nga pagpamatuod sa pagpanalangin kanila? Unsaon nga ikaw makatabang kanila sa pag-angkon o paglig-on niini nga pagpamatuod? Agi og dugang sa pagtuon sa Mga Buhat 1–5, mahimo usab nga imong basahon ang mensahe ni Elder Quentin L. Cook nga “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi” (Liahona, Mayo 2020, 96–100).

Pagkat-on og Dungan

Sa pagsugod sa inyong panaghisgotan, makasulat ka diha sa pisara og Si Jesus migiya sa Iyang Simbahan pinaagi sa pagpadayag ngadto sa Iyang Apostoles. Ang mga sakop sa klase o sa korum makapakigbahin og usa ka butang nga ilang nakaplagan sa ilang pagtuon sa Mga Buhat 1–5 nga nagsuporta niini nga pahayag. (Kon gikinahanglan, ikaw makatudlo kanila ngadto sa Mga Buhat 1:1–8; 2:36–39; 4:1–13, 31–33.) Unsa nga ebidensiya ang atong makita nga si Jesukristo nangulo sa Iyang Simbahan sa samang paagi karon? Ang mga kalihokan sama sa mosunod makatabang niadtong imong gitudloan sa paglig-on sa ilang hugot nga pagtuo niining importanting kamatuoran.

• Makaandam ka og daghang pangutana sama niini: Giunsa pagpangulo ni Jesukristo ang Iyang Simbahan? Unsaon nato sa pagpalambo sa atong hugot nga pagtuo nga si Jesukristo naggiya sa Iyang Simbahan? Nganong ikaw mosalig sa mga propeta ug apostoles sa Ginoo? Hatagi ang matag sakop sa klase o sa korum og usa sa mga pangutana, ug dapita sila sa pagpalandong sa pangutana ug sa paghunahuna og mga kasulatan nga makatabang kanila sa pagtubag niini (kon gikinahanglan, tan-awa sa “Suporta nga mga Kapanguhaan” alang sa pipila ka mga ideya). Dayon paghatag og panahon alang sa tanan sa pagpakigbahin ug paghisgot kon unsa ang ilang nakat-onan.

• Sa pagtabang sa klase o sa korum nga makakita kon giunsa sa Ginoo paggiya ang Iyang Simbahan, mahimo kang modapit kanila sa pagrebyo sa unang seksiyon sa mensahe ni Elder Quentin Cook nga “Ang Panalangin sa Nagpadayon nga Pagpadayag ngadto sa mga Propeta ug sa Personal nga Pagpadayag aron sa Paggiya sa Atong Kinabuhi.” Tingali ang matag sakop sa klase o sa korum makapakigbahin og usa ka butang gikan sa mensahe nga nagtabang kanila nga mahibalo nga si Jesukristo aktibo ug personal nga naggiya sa Iyang Simbahan. Unsa ang ubang mga panabot ang atong makita diha sa mga kasulatan ubos sa “Suporta nga mga Kapanguhaan”?

• Kini makatabang usab alang sa mga kabatan-onan sa pagkat-on pa og dugang mahitungod kon giunsa sa Ginoo paggiya ang inyong ward. Mahimo nimong hangyoon ang mga kabatan-onan sa pagpakigbahin og mga ehemplo kon giunsa sa Ginoo paggiya sa indibidwal nga mga lider sa ward, lakip ang presidente sa klase o sa korum. Sulod sa semana sa wala pay klase, mahimo kang mangutana og pipila ka mga lider sa ward sa pagpakigbahin––sa tawo o sa electronic nga paagi––mga kasinatian nga nagpakita kon giunsa sa Ginoo paggiya kanila. Ang mga sakop sa klase o sa korum makakaplag og dugang nga mga ehemplo diha sa mensahe ni Presidente Henry B. Eyring nga “Ang Ginoo Mangulo sa Iyang Simbahan” (Liahona, Nob. 2017, 81–84). Nganong kini importante ang pagbaton og hugot nga pagtuo nga ang Ginoo nagdasig sa atong mga lider sa ward?

• Ang ubang mga tawo mobati nga kon kita maayo nga mga tawo ug magbuhat og maayong mga butang, wala kita magkinahanglan og usa ka simbahan. Mahimong imong pangutan-on ang kabatan-onan kon unsaon nila sa pagtubag ngadto niini. Diha sa iyang mensahe sa “Ang Panginahanglan sa usa ka Simbahan” (Liahona, Nob. 2021, 24–26), si Presidente Dallin H. Oaks mihatag og daghang rason kon ngano nga ang mga simbahan, lakip ang gipahiuli nga Simbahan sa Ginoo, mga importante. Ang kabatan-onan makasiksik niini nga mensahe nga magpares, sa ginagmay nga mga grupo, o isip usa ka klase o korum ug makigbahin kon unsa ang ilang nakaplagan.

Ang Ginoo naggiya sa Iyang Simbahan pinaagi sa pagpadayag, lakip ngadto sa mga kapangulohan sa klase ug sa korum.

Lihok diha sa Hugot nga Pagtuo

Awhaga ang mga sakop sa klase o sa korum sa pagpamalandong ug pagrekord sa unsay ilang buhaton sa paglihok sa mga panghunahuna nga ilang nadawat karong adlawa. Kon gusto sila, makahimo sila sa pagpakigbahin sa ilang mga ideya. Dapita sila sa paghunahuna mahitungod kon sa unsang paagi ang paglihok sa ilang mga panghunahuna makalig-on sa ilang mga relasyon ngadto sa Langitnong Amahan ug ni Jesukristo.

Suporta nga mga Kapanguhaan

• Mga Taga-Efeso 2:19–20; 4:11–15; Doktrina ug mga Pakigsaad 1:38; 21:1–6; Mga Artikulo sa Hugot nga Pagtuo 1:5–6

Pagtudlo sumala sa Pamaagi sa Manluluwas

Sa pagdapit sa Espiritu diha sa imong pagtudlo, awhaga ang uban sa pagpakigbahin sa ilang personal nga pagsaksi sa kamatuoran nga imong gihisgotan.